Ntak Emi Afo Okpodụkde

AFO eyebọ item eke spirit usen inan̄ oro enyenede ufọn ke Mme Mbono District “Ukpepn̄kpọ Abasi,” oro editọn̄ọde ndaeyo emi ke ikpọ obio ke ofụri ererimbot. Ke Nigeria ikpọn̄, ẹyenịm se ibede mbono ẹmi 82 ke November, December, ye January. Ke ofụri ofụri, edinam editọn̄ọ ke Thursday ke n̄kanika 1:20 uwemeyo onyụn̄ eberi ke Sunday ke n̄kanika 4:15 mbubịteyo. Mme isụn̄utom, oro ẹken̄wamde ẹka obio emana mmọ ke edinam inemesịt emi ẹyetọt mme akpan n̄kpọ ke ndusụk mbono.

Edide afo edi akamba owo m̀mê ekpri owo—ebe, n̄wanndọ, ete, eka, akparawa owo, m̀mê eyenọwọn̄—afo eyebọ ukpepn̄kpọ ke usụn̄ oro an̄wan̄ade, odụride-dụri owo udọn̄ oro edinọde fi ufọn. Ke uwụtn̄kpọ, ediwak owo mfịn ẹbụp ẹte, Nso idi uduak uwem? Ke usenubọk Friday, afo eyedara ndikop ẹnemede mbụme emi onyụn̄ adat esịt ke se afo edibọde ndin̄wam mbon efen ẹfiọk ibuotikọ emi.

Edinam uwemeyo Friday ediban̄a mme ikpehe “Ndinam Ndọ Edi Mbọbọ Oro Ebịghide,” “Nam Utom Ọkpọsọn̄ Kaban̄a Edinyan̄a Ubon Fo,” ye “Mme Ete ye Eka—Nditọ Mbufo Ẹyom San̄asan̄a Ntịn̄enyịn.” Usọp usọp etienede ẹmi, ẹyenọ akpan ntịn̄enyịn ke mme mfịna oro n̄kparawa owo ẹsobode mfịn ye nte mmọ ẹkemede ndise mban̄a mmọ. Mmọ ẹkpenyene ndibọ nsịnudọn̄ nto drama eyomfịn oro ẹkotde Mme Uyen Oro Ẹtide Andibot Mmọ Idahaemi.

Ke Saturday edinam edikọn̄ọ ke prọfesi Jesus aban̄ade ukperedem ini ye akpan akpan mme ikọ esie oro: “Ukụt mme usen oro ama ekebe, idahaoro utịn eyekabade okịm.” (Matthew 24:29) Afo eyeyom ndikop nneme aban̄ade ini emi ukụt adade itie. Edinam Saturday eyedụn̄ọde n̄ko n̄wetnnịm n̄kpọ eke Mme Ntiense Jehovah ke eyomfịn onyụn̄ owụt se mmọ ẹnamde.

Ke Sunday drama efen, ẹkotde Ẹkûyak Ẹbian̄a Mbufo m̀mê Ndida Abasi Nnam Mbubru, eyetịn̄ aban̄a n̄kpọ-ata eke edinam akpanikọ Christian ke ntak mme ọwọrọetop ọkpọ umụm ndise ye ikwọ eyomfịn. Utịn̄ikọ an̄wa ke uwemeyo edikọn̄ọ ke ibuotikọ emi “Ukpepn̄kpọ Oro Enyenede Ufọn ke Ndiọkeyo Nnyịn.” Ẹyeberi edinam oro ye item emi “Ẹkaiso Ndisọn̄ọ Mmụm Ukpepn̄kpọ Abasi N̄kama.”

Ke akpanikọ, afo eyebọ ufọn ke ndidu do ke ofụri usen inan̄ oro! Ẹnọ fi ima ima ikot ndidụk. Man okụt ebiet oro ekperede ufọk fo akan, ka Ufọkmbono Obio Ubọn̄ Mme Ntiense Jehovah eke n̄kann̄kụk mîdịghe wet mme andimịn̄ magazine emi mîdịghe se nsiondi Enyọn̄-Ukpeme eke June 1, oro esịnede adres kpukpru obio mbono ke Nigeria.