Ntọt M’ọkwọrọ Obio Ubọn̄

Ukpono Ẹnyenede Ẹnọ Edisana Idaha eke Uwem

BIBLE owụt ete ke iyịp edi ọsọn̄urua n̄kpọ ke enyịn Abasi ye nte ke enye obiom edida enye nnam n̄kpọ ke idiọk usụn̄ ikpe. (Leviticus 17:14; Utom 15:19, 20, 28, 29) Ke ntak mme ndausụn̄ Bible ẹmi, Mme Ntiense Jehovah ibọhọ edikịm iyịp nsịn ke idem.

Man an̄wam mme dọkta ye mme anamutom ufọkibọk ẹfiọk idaha Mme Ntiense Jehovah ke n̄kpọ emi ẹnyụn̄ ẹkụt ẹte ke Mme Ntiense ẹyebọ usọbọ efen, Watch Tower Society omotịm ediwak Kọmiti Unyene Nneme ye Mbonutom Ufọkibọk (KUNMU) ke nsio nsio idụt. Mme andibuana ke mme kọmiti ẹmi ẹsika mme ufọkibọk man ẹkenyene nneme ye mbonutom ufọkibọk. Ndondo emi, ke ikpọ obio 12 ke Poland, ẹma ẹnyene se ibede mbono 200, abuanade se ibede dọkta ibọkusọbọ 500, akpan akpan mme adaibuot ufọkibọk m̀mê eke mme ubet mbonudọn̄ọ ke ufọkibọk. Se itienede mi okotịbe ke ini utọ edika n̄kese oro:

“Mbono ke Cardio-Surgical Clinic ke Zabrze ekedi edinam oro okụtde unen akan. Ọtọn̄ọde ke 1986 otu mbon ibọkusọbọ ke ufọkibọk emi ke esisiak nditọete nnyịn idem ye unana edisịn iyịp. Idahaemi kan̄a, ibat utọ usiakidem oro ẹnamde osịm 40. Ufọkibọk emi odu ke mben̄eidem ndise mban̄a mbonudọn̄ọ ẹtode ofụri Poland ọkọrọ ye mbon oro ẹtode esenidụt. Ke nneme minit 50 ama ekebe, udiana esenyịn ke ubet mbonudọn̄ọ ke ufọkibọk ama emen mme andibuana ke KUNMU owụt otu mbonudọn̄ọ onyụn̄ ọdọhọ ete: ‘Mme owo ẹmi ẹdi Mme Ntiense Jehovah. Mmọ ẹdiana kiet ye ufọkibọk nnyịn, mmọ ẹnyụn̄ ẹn̄wam nnyịn. Idịghe ekemmọ mme andinịm ke akpanikọ ikpọn̄, edi kpukpru mbonudọn̄ọ eken n̄ko ẹbọ ufọn ẹto un̄wam mmọ. Ke ntak Mme Ntiense Jehovah, nnyịn imedi idinịm ke akpanikọ nte ke ẹkeme ndinam akpan usiakidem ke esịt ye unana edisịn iyịp.

“‘Ke uwụtn̄kpọ, nnyịn ima isiak eyenan̄wan emi [anyan ubọk owụt owo udọn̄ọ kiet] ye unana iyịp, ndien enye eyenyọn̄ ufọk ke Monday. Ami n̄kpama nditịn̄ nte ke nnyịn idaha iyịp inam n̄kpọ ndien ndien aba nte ikesinamde ke akpa koro enye edide n̄kpọndịk. Enye enyene ebuana ye HIV, udọn̄ọ esịt, ye mfịna anyanini mbemiso ẹkopde nsọn̄idem.

“‘Ami ndi owo Catholic, edi ke ufọk nnyịn nnyịn imesiwak ndinyịme mme ekikere mbon efen. Usen kiet n̄kasan̄a n̄kanade An̄wambre Slaski ye nditọ mi. Ke akpa, ẹma ẹfre enyịn ẹban̄a an̄wambre emi, edi nnyịn ima ikụt nte ke enye idahaemi ama okpụhọde ke usụn̄ oro ọsọn̄de ndidiọn̄ọ. Mma mbụp kiet ke otu mme anamutom nte ukpụhọde emi akasan̄ade. Enye ama ọdọhọ ete ke mme andise mban̄a ẹma ẹkpere ndiduọk idotenyịn edidiọn̄ an̄wambre emi, edi ẹma ẹyak enye ẹnọ Mme Ntiense Jehovah ke ukpeokụk, ndien mmọ ẹdiọn̄ enye.

“‘Ntre mmọemi ẹdi mme owo oro kpukpru nnyịn ikemede ndikpep ekese nto. Ami n̄kere nte ke ikpehe ubet mbonudọn̄ọ emi nnyịn ikpenyene ndinyịme mme ekikere mbon efen.’ Ekem, ke anyande ubọk owụt Ntiense kiet oro akanade ẹsiak idem ke usen ifan̄, enye ama ọdọhọ ete: ‘Eyenan̄wan emi edi kiet ke otu Mme Ntiense Jehovah, ndien ẹyesiak enye idem ye unana edisịn iyịp.’”

Ke adan̄aemi Mme Ntiense Jehovah mîdomoke ndinyịk mme edinịm ke akpanikọ mmọ ndori mbon en̄wen ke idem, mmọ ẹtiene uwụtn̄kpọ mme apostle ẹnyụn̄ ‘ẹkop uyo Abasi ẹkan uyo owo.’ (Utom 5:29) Emi esịne edinyene ukpono nnọ iyịp. Mmọ ẹsiwụt esịtekọm ke ini mbon en̄wen ẹkponode ubieresịt mmọ kaban̄a edinịm ke akpanikọ eke ido ukpono mmọ ke n̄kpọ emi.