Nịm Editi Nte Odotde

EKEDI ke mbubịteyo Nisan 14, 33 E.N., ke Jesus ọkọtọn̄ọ Editi. * Enye ndisụk n̄kụre edinịm usọrọ Passover ye mme apostle 12 esie edi oro, ntre nnyịn imekeme ndifiọk usenọfiọn̄ oro. Ke ama akanam andida nnọ oro, Judas, ọwọrọ, Jesus “emen uyo, ndien ke ama ọkọdiọn̄, obụn̄, onyụn̄ ọnọ mmọ, ete, Ẹbọ: emi edi ikpọkidem Mi. Enye onyụn̄ emen cup, ndien ke Enye ama ọkọnọ ekọm, ayak ọnọ mmọ; kpukpru mmọ ẹnyụn̄ ẹn̄wọn̄. Ndien Enye ọdọhọ mmọ ete, Emi edi iyịp Mi, eke ediomi, emi ẹduọkde kaban̄a ediwak owo.”—Mark 14:22-24.

Jesus ọkọnọ mme mbet esie ewụhọ ete ẹti n̄kpa imọ ke ntak emi enye edide akpan n̄kpọ. (Luke 22:19; 1 Corinth 11:23-26) Eke esie ekedi n̄kukụre uwa oro ekemede ndifak ubonowo nsio ke isụn̄i ndammana idiọkn̄kpọ ye n̄kpa. (Rome 5:12; 6:23) Bred ye wine oro enye akakamade ẹkeda ẹban̄a mfọnmma ikpọkidem esie ye iyịp esie. Ke ifiọkde akpasarade usenọfiọn̄ oro, nnyịn imekeme ndinịm usọrọ oro ke usen emi asan̄ade ekekem kpukpru isua, kpa nte ẹkesinamde ye Passover mme Jew. Edi ana nnyịn inam oro nte odotde. Ntak-a?

Apostle Paul ọkọdọhọ ke mbon oro ẹdiade ẹnyụn̄ ẹn̄wọn̄de mme n̄kpọ idiọn̄ọ oro ẹdide bred ye wine ẹnyene ‘ndikwọrọ n̄kpa Ọbọn̄, tutu enye edi.’ (1 Corinth 11:26) Usọrọ emi ke ntre ediwụk ntịn̄enyịn ke n̄kpa Jesus ye se enye ọwọrọde ọnọ ubonowo. Edinam oro ekpedi akpan n̄kpọ, ini nditie n̄kere eti ido Abasi ye esịtekọm oro nnyịn ikpowụtde inọ Jehovah ye Eyen esie. (Rome 5:8; Titus 2:14; 1 John 4:9, 10) Ke ntre, Paul ama ọnọ item ete: “Mmọdo owo ekededi eke edidiade uyo Ọbọn̄ edinyụn̄ ọn̄wọn̄de cup Ọbọn̄ ke usụn̄ eke mîdotke, eyenyene isop aban̄a ikpọkidem ye iyịp Ọbọn̄.”—1 Corinth 11:27.

Nte Odotde—Didie?

Nte an̄wan̄ade, Abasi idinemke esịt edieke nnyịn isabarede edinam oro ebe ke ndisịn idem ke mme edinam oro ẹdemerede eyịghe m̀mê ebe ke ndida mme ido ukpono ndem ndisịn. (James 1:27; 4:3, 4) Emi idisịneke mme ọwọrọetop edinam ini Easter. Ke nditiene item Jesus ‘ndikaiso nnam emi ke nditi enye,’ eyeyom nnyịn inịm Editi kpa nte enye ọkọtọn̄ọde. (Luke 22:19; 1 Corinth 11:24, 25) Emi idisịneke mme enyọn̄ enyọn̄ n̄kpọmbana oro mme ufọkabasi Christendom ẹdade ẹdisịn ke usọrọ oro. New Catholic Encyclopedia onyịme ete ke “Mass eke mfịn okpụhọde akamba akamba ye ata mmemmem edinam oro Christ ye mme Apostle Esie ẹkenamde.” Ndien ebede ke ndinịm Mass ndien ndien, idem kpukpru usen, Christendom ọmọwọn̄ọde ọkpọn̄ se Jesus akaduakde ete ẹnam onyụn̄ anam enye edi ikpîkpu edinam.

Paul ama ewet mme Christian mbon Corinth aban̄a edidia nte mîdotke ke ntak oro mfịna ekedemerede ke esop kaban̄a Udia Mbubịteyo Ọbọn̄. Ndusụk owo ikowụtke ukpono inọ edisana idaha esie. Mmọ ẹma ẹsida udia mbubịteyo mmọ ẹdi ẹnyụn̄ ẹdidia mbemiso mîdịghe ke ini mbono oro. Mmọ ẹma ẹsiwak ndidia nnyụn̄ n̄n̄wọn̄ n̄kpọ mbe ubọk. Emi ama esinam mmọ ẹyet idap ẹnyụn̄ ẹtie ndebe ndebe ke ekikere mmọ. Ke nditre  ndidu ke edidemede ke ekikere ye ke spirit, mmọ ikekemeke ‘ndidụn̄ọde idem mfiọk’ ndien ke ntre ẹma ‘ẹnyene isop ẹban̄a ikpọkidem ye iyịp Ọbọn̄.’ Kan̄a kemi, biọn̄ ama ọdọn̄ mbon oro mîkakamake udia mbubịteyo ndien ntịn̄enyịn mmọ ama ọwọn̄ọde n̄ko. Ekpere ndidi ndomo owo mmọ kiet ikodụhe ke idaha ndidia mme n̄kpọ idiọn̄ọ oro ye esịtekọm ye ọyọhọ ifiọk ke nte edinam oro edide akpan n̄kpọ—nte ke usọrọ oro ekedi ke nditi n̄kpa Ọbọn̄. Emi ama osụn̄ọ ke mmọ ndinyene ubiomikpe, koro mmọ ẹkewụtde unana ukpono, idem emiom, ẹnọ enye.—1 Corinth 11:27-34.

Oyom Mbufiọk

Ndusụk owo ẹma ẹdia mme n̄kpọ idiọn̄ọ Editi oro okposụkedi, ke ukperedem, mmọ ẹkedifiọkde ẹte ke ikpakanaha mmimọ inam ntre. Mbon oro ẹdiade mme n̄kpọ idiọn̄ọ Editi oro nte enende ẹdi se Abasi ekemekde ẹkenyụn̄ ẹnyenede uyarade spirit Abasi ẹban̄a oro. (Rome 8:15-17; 2 Corinth 1:21, 22) Idịghe ubiere m̀mê uduak idemmọ anam mmọ ẹdot. Abasi osụhọde ibat mbon oro ẹdikarade ye Christ ke heaven okonịm ke 144,000, kpa esisịt ibat owo ke ẹmende ẹdomo ye kpukpru mbon oro ẹbọde ufọn ẹto ufak Christ. (Ediyarade 14:1, 3) Edimek oro ọkọtọn̄ọ ke eyo Jesus, mmọdo mfịn esisịt ibat mme andidia kpọt ẹdu. Ndien nte ndusụk mmọ ẹkpan̄ade, ibat oro ekpenyene ndisụhọde.

Ntak emi owo ekemede ndidia mme n̄kpọ idiọn̄ọ oro ke ukwan̄ usụn̄? Emi ekeme ndito mme ekikere akani ido ukpono—nte ke kpukpru mme anam-akpanikọ ẹka heaven. Mîdịghe ekeme ndidi ke ntak udọn̄ ikpọ n̄kpọ m̀mê edu ibụk—ekikere oro owo enyenede nte ke imodot ikan mbon en̄wen—ye udọn̄ kaban̄a uwọrọiso. Ndusụk emi oto n̄kpọsọn̄ ntụk ẹmi ẹdemerede ẹto n̄kpọsọn̄ mfịna m̀mê n̄kpọ mmọn̄eyet ẹnamde owo anana  udọn̄ ndidu uwem ke isọn̄. Enye ekeme n̄ko ndidi ke ntak n̄kpet n̄kpet itie ufan ye owo emi enyenede ikot uka heaven. Oyom kpukpru nnyịn iti ite ke enyene Abasi ikpọn̄, inyeneke nnyịn, idịghe eke nnyịn. (Rome 9:16) Ntre edieke owo, ‘ke ama okodomo idem ese,’ okụtde ete ke imọ ke akpanikọ ikpakadiaha mme n̄kpọ idiọn̄ọ oro, enye ekpenyene nditre idahaemi.—1 Corinth 11:28.

Idotenyịn oro Abasi ọnọde n̄wakn̄kan ke otu ubonowo edi nsinsi uwem ke paradise isọn̄. Oro edi akwa edidiọn̄ ndikere mban̄a, ye enyeoro nnyịn ikemede ndinam n̄kpọ mban̄a mmemmem mmemmem. (Genesis 1:28; Psalm 37:9, 11) Edi ke isọn̄ ke mme anam-akpanikọ ẹdifiak ẹdiana ye mbonima mmọ oro ẹdinamde ẹset ẹnyụn̄ ẹsobo ye ndinen owo eke usen edem, utọ nte Abraham, Sarah, Moses, Rahab, David, ye John Andinịm Owo Baptism—emi kpukpru ẹma ẹkekpan̄a mbemiso Jesus ekeberede usụn̄ ọnọ uwem eke heaven.—Matthew 11:11; men 1 Corinth 15:20-23 domo.

Mbon oro ẹnyenede idotenyịn eke isọn̄ ẹsinịm usọrọ Udia Mbubịteyo Ọbọn̄ nte odotde ebe ke mmọ ndidụk nnyụn̄ nnọ n̄kpan̄utọn̄ ukpono ukpono, idem okposụkedi mmọ mîtaha bred mînyụn̄ in̄wọn̄ke wine. Mmọ n̄ko ẹbọ ufọn ẹto uwa Christ, emi an̄wamde mmọ ndinyene eti idaha ke iso Abasi. (Ediyarade 7:14, 15) Nte mmọ ẹnọde n̄kpan̄utọn̄ ke utịn̄ikọ oro ẹnọde, emi esisọn̄ọ esịtekọm oro mmọ ẹnyenede ẹnọ ndisana n̄kpọ, ndien udọn̄ mmọ ndidu ke edidianakiet ye ikọt Abasi ke kpukpru ebiet esikọri.

Isua emi, ke utịn ama okosụhọde ke Tuesday, April 2, ẹyenịm Editi ke kpukpru esop Mme Ntiense Jehovah emi ebede 78,000 ke ofụri isọn̄. Nte afo eyedụk?

[Ikọ idakisọn̄]

[Ndise ke page 8]

Mme Ntiense Jehovah ẹsinịm Editi ini kiet kpukpru isua