Ntọt M’ọkwọrọ Obio Ubọn̄

Nti Utom Oro Ẹtorode Jehovah

KE UKWỌRỌIKỌ esie oro ke Obot, Jesus ọkọdọhọ mbet esie ete: “Yak un̄wana mbufo ayama ke iso owo, man mmọ ẹkụt nti utom mbufo, ẹnyụn̄ ẹtoro Ete mbufo emi odude ke heaven.” (Matthew 5:16) Kpasụk ntre, mme ata Christian mfịn ẹsịn idem ke “nti utom” oro ẹtorode Jehovah.

Nso idi nti utom ẹmi? Mmọ ẹsịne edikwọrọ eti mbụk, edi eti eduuwem nnyịn edi akpan ubak esie n̄ko. Ediwak ini esidi eti eduuwem nnyịn esidụri mme owo ke akpa ifet ẹdi esop Christian. Mme ifiọkutom ẹtienede mi ẹwụt nte Mme Ntiense Jehovah ke Martinique ‘ẹyakde un̄wana mmọ ayama ke iso mme owo.’

◻ Ke adan̄aemi anamde utom ukwọrọikọ eke ufọk ke ufọk, kiet ke otu Mme Ntiense Jehovah ama awaha ekese n̄wan Catholic kiet. Ke isua 25 n̄wan emi okodụn̄ ye eren oro enye mîkanamke ndọ. N̄wan emi ama emehe ye ukpepn̄kpọ Mme Ntiense Jehovah, sia enye, ke n̄kpọ nte isua itiaba ko ke edem, ama ọkọbọ n̄wed oro Afo Emekeme Ndidu Uwem ke Nsinsi ke Paradise ke Isọn̄. * N̄wan oro ama asian Ntiense oro ete: “Ido ukpono ẹwak ẹkaha. Ami mfiọkke eke n̄kponịmde ke akpanikọ ke otu kpukpru ndutịme emi.” Ntiense oro ama anam an̄wan̄a ete ke ẹkeme ndikụt akpanikọ ke Bible ikpọn̄ ndien nte ke man okụt enye, n̄wan emi enyene ndikpep N̄wed Abasi ye ntịn̄enyịn nnyụn̄ mbọn̄ akam nnọ Abasi mben̄e spirit ye ndausụn̄ esie.

Ke ndusụk ini, okposụkedi ekenyenede udọn̄ ke ndikpep Bible, n̄wan emi ama esịn ndiyere ediwak ikot ndidụk mme mbonoesop Christian ke Ufọkmbono Obio Ubọn̄ eke Mme Ntiense Jehovah. Ntak-a? Enye ekedi ata owo o-bụt. Nte ededi, ke ama ọkọbọ ikot ndidụk Editi n̄kpa Christ, enye ama akan bụt esie onyụn̄ odụk.

Se ikotịmde inem enye iban̄a mbonoesop oro ekedi edu ediwụt ima ke Ufọkmbono Obio Ubọn̄. Akananam enye ikwe utọ ata itie ufan oro ke ufọkabasi esie! Ke ama ọkọnyọn̄ mbonoesop oro enye ama ọtọn̄ọ ndidụk kpukpru mbonoesop oro Mme Ntiense n̄kann̄kụk ẹkenịmde, ndien ikebịghike enye ama anam ndọ ye eren oro enye okodụn̄de kiet. Enye idahaemi edi andibuana ke esop oro ama akana baptism.

◻ Nti utom eke Ntiense en̄wen ama on̄wụm nti mfri. N̄wan oro ama enyene akamba itie ke ọfis. Ke ẹma ẹkeda eren kiet otode isuo Réunion ke ukpe utom, ndusụk mbonutom ẹma ẹtọn̄ọ ndisak enye koro enye okomụhọde. Enye ama akabade edi n̄kpọ usak imam. Ke edide isio ye oro, Ntiense oro ama esiwụt eren oro mfọnido ye ukpono kpukpru ini. Ikebịghike eren oro ama obụp ntak emi n̄wan oro ekedide isio ntre.

Ntiense oro ama anam an̄wan̄a ete ke edu ukpono owo imọ ekedi ke ntak mme edumbet Bible oro imọ ikekpepde ito Mme Ntiense Jehovah. N̄wan oro n̄ko ama owụt enye se N̄wed Abasi etịn̄de aban̄a mme uduak Abasi ye idotenyịn obufa ererimbot. Eren oro ama onyịme ukpepn̄kpọ Bible, ọtọn̄ọ ndidụk mme mbonoesop Christian, onyụn̄ anam ndọ ye n̄wan oro enye okodụn̄de kiet.

Ke akpatre eren oro ama afiak ọnyọn̄ Réunion. Ke mbemiso, enye ama esinyene mfịna ye mme iman esie, akpan akpan ye ubon n̄wan esie. Edi idahaemi mmọ ẹma ẹnen̄ede ẹkop inemesịt ke ntak nti edu Christian esie. Eren oro ama ana baptism ndien idahaemi edi asan̄autom unamutom. Ediwak owo ke ubon oro, esịnede n̄wan ye nditọiban esie iba, ẹnam utom n̄ko ke esop Christian nte mme asuanetop eti mbụk Obio Ubọn̄ Abasi.

[Ikọ idakisọn̄]