“Ata Ọkpọsọn̄ Udọn̄ ke Esịt ye Ekikere”

“Inua ikemeke nditịn̄ idatesịt ye nduaidem oro akade iso ndikọri nte n̄kotde Is There a Creator Who Cares About You? ye ọkpọsọn̄ udọn̄. Enye akam anam owo enyene udọn̄—baba, oyom—ndifiọk n̄kpọ efen efen. Ẹsọsọn̄ọ ke ndidemede ata ọkpọsọn̄ udọn̄ ke esịt ye ekikere mi.”

ORO edi nte kiet ke otu Mme Ntiense Jehovah otode North Carolina, U.S.A., ekekerede aban̄a n̄wed oro Watch Tower Society okosiode ke Mme Mbono District “Usụn̄ Uwem Abasi” ke 1998/1999. Idem edieke afo mûnyeneke idem n̄wed oro kiet, tịm fiọk nte mbon en̄wen ẹtịn̄de ẹban̄a.

Ke ndusụk usen ẹma ẹkebe nte enye ọkọbọ idem kiet ke mbono kiet ke San Diego, California, U.S.A., eren kiet ekewet ete: “Mmokụt ke n̄wed emi ọsọn̄ọ mbuọtidem etieti. Enye anam esịt mi ọyọhọ ye esịtekọm kaban̄a mme utom edibotn̄kpọ Jehovah. Mmokot nsịm page 98, ndien mmaha ndikere nte ke usen kiet nyokot enye nsịm utịt! Enye enen̄ede akama idatesịt oro ọnọde uyụhọ.”

N̄wan Edem Usiahautịn kiet ekewet ete: “Etịn̄ikọ ke mbono oro akada ikọ emi ‘san̄asan̄a n̄wed,’ ndien ikọ oro enen̄ede ekem ye se isịnede. N̄wọrọnda ikpehe edi nte ke n̄wed oro inyịkke andikot enịm edidu Abasi, edi etịn̄ mme akpan n̄kpọ.”

Mme akpan n̄kpọ ẹsịne ndyọ ndyọ n̄kpọ oro ntaifiọk ẹkụtde ẹban̄a ekondo nnyịn, uwem, ye nnyịn. Emi otụk ediwak owo. “Nnen̄ekede n̄keme nditịn̄ nte ekpri n̄wed emi otụkde mi,” ntem ke n̄wan kiet otode California ekewet. “N̄kekemeke ndiyak n̄wed emi nnịm nte page kiet kiet okobụkde mme n̄kpọ efen efen oro ẹkụtde ẹban̄a ekondo nnyịn ye uwem ke idemesie. Mma nnen̄ede n̄kpep ekese n̄kpọ! Nyenen̄ede nda ekpri n̄wed emi ke n̄kpọuto nnyụn̄ mbuana enye ye adan̄a ediwak owo nte n̄kekeme.”

Ikpehe oro adatde ediwak owo esịt edi nte n̄wed emi owụtde ibio ibio mbụk Bible, osiode edu Andibot owụt. “Ofụri ofụri ekikere Bible, ẹnemede ke utịt utịt n̄wed oro, edi kiet ke otu mfọnn̄kan oro akanam n̄kotde,” edi uwụtn̄kpọ kiet ke se ẹtịn̄de. Ke ndondo oro akpa mbono ke New York, U.S.A., okokụrede, owo en̄wen ekewet ete: “Obufa n̄wed oro ẹsiode edi n̄wed oro odụride udọn̄ owo akan oro akanam mbufo ẹmịn̄de. Idem ama akpa mi aban̄a mme uyarade ifiọk ntaifiọk nte ke Andibot odu. Ibio ibio mbụk Bible ke idemesie akam ekem ndinam mme akpan n̄kpọ oro ẹnemede an̄wan̄a nnyụn̄ ndemede udọn̄ ndika iso n̄kot.”

Ifiọk Ntaifiọk Oro An̄wan̄ade

Ntọt ifiọk ntaifiọk ke mme akpa ibuot ẹkeme nditie nte ọsọn̄ akaha ndifiọk, edi se nte ẹkenamde n̄kpọ ẹban̄a mi.

Eren Canada kiet ekewet ete: “Nso ukpụhọde ke edi ntem ye mme n̄wed akpan ifiọk ẹmi mme andiwet mmọ ẹsidomode ndida ikpọ ikọ ndụri ntịn̄enyịn nnyịn. Ifiọk mbufo edi n̄wọrọnda  ke ndinam ibuotikọ ukpepn̄kpọ obot, ukpepn̄kpọ aban̄ade mmọn̄ibọk, DNA, chromosome, ye ntre ntre, ẹnen̄erede ẹn̄wan̄a nnyịn. Ubaha ekpedide mbufo ẹkewet mme n̄wed ukpepn̄kpọ ufọkn̄wed ntaifiọk oro n̄kekpepde ke ediwak isua ẹmi ẹkebede!”

Prọfesọ ekpepde ukpepn̄kpọ obot ke ufọkn̄wed ntaifiọk ekewet ete: “[Enye] eneme mme n̄kpọ oro ẹbuanade in̄wan̄în̄wan̄ ye unana edida awak-n̄kukọhọ ntọt mfek owo. N̄wed emi ọkọk ibuot ye andikot onyụn̄ okot oto ediwak ọwọrọetop ntaifiọk. Emi edi ‘akpan n̄wed’ ọnọ owo ekededi emi enyenede udọn̄ ke ndifiọk ntọn̄ọ ekondo ye uwem, edide nte ataifiọk m̀mê nte ikpîkpu owo.”

N̄kaiferi emi ọbọde ukpep ndidi nurse ọkọdọhọ ete: “Ama akpa mi idem ndikụbọde ibuot 4 nnyụn̄ n̄kot se ẹkotde ẹto n̄wed oro nnyịn ikamade ke ubet ukpepn̄kpọ! Mma nnọ prọfesọ nnyịn n̄wed emi nnyụn̄ nsian enye nte ke mma mfiọk ke enye ayama ntọt oro odude do. Mma n̄wụt enye page 54 aban̄ade mfre. Enye ama okot ke idemesie onyụn̄ ọdọhọ ete, ‘Emi edi n̄kpọ udọn̄! Nyodụn̄ọde nse.’”

Owo ufọkmbet kiet ke Belgium ekewet ete: “Se ikotụkde mi inyụn̄ imụm mi udọn̄ ekedi nneme ifiọk ntaifiọk oro owụtde nte ke ifiọk ntaifiọk eyomfịn ituahake ye ekikere Bible ẹban̄ade Abasi kiet edi, utu ke oro, enyenyịme mme ekikere oro. Emi edi ata eti ekikere.”

Ndifiọk Andibot Etịm Ọfọn

N̄wed oro ama an̄wam mme owo ke ediwak idụt ẹfiọk Abasi etịm ọfọn ẹnyụn̄ ẹtịm ẹsan̄a ẹkpere enye. Andikot kiet ke Fukuoka City, Japan, ọkọdọhọ ete: “Etie nte n̄kpọ eke ẹwụkde akrasi use n̄kpọ ata nnennen ke Jehovah ke akpa ini. N̄wed emi anam owo enịm ke akpanikọ ke utịbe utịbe usụn̄. Mma n̄keme ndidi ndifiọk Jehovah ke idaha ekikere oro akananam mmen̄kereke mban̄a tutu esịm idahaemi.” Eren kiet otode El Salvador ekewet ete: “Mbufo ẹmenam etịm an̄wan̄a nte Abasi owụtde mbọm, mfọn, anyan ime, onyụn̄ awakde ima. Ke akpanikọ, emi edi nnennen se nnyịn iyomde man isịk ikpere enye ye Eyen esie. Enye edi akpa n̄wed emi anamde ẹdiọn̄ọ mme ntụk Jehovah ye mme ntụk owo eke Eyen esie, Jesus.” Ndien andikot ke Zambia ọkọdọhọ ete: “Jehovah enyene se ọwọrọde ọnọ mi ke ata obufa usụn̄.”

Nte an̄wan̄ade, Mme Ntiense Jehovah ẹkop nduaidem ẹban̄a ndibuana Is There a Creator Who Cares About You? ye mbon en̄wen. Kiet ọkọdọhọ ete: “Nte n̄kokotde ibuot 10 [“If the Creator Cares, Why So Much Suffering?”] mma, n̄kekemeke ndinyan̄a edi mma mfiori nte, ‘Emi enen̄ede edi n̄wed emi nnyịn iyomde ke Japan!’ Nyama nditịm nti se idude ke ibuot emi nnyụn̄ nda nnam n̄kpọ ke an̄wautom etieti.” N̄wan en̄wen ke ekpep Bible ye n̄kaiferi emi ẹkebọkde ke temple emi ete esie edide oku. “Ama ọsọn̄ enye ndinyịme ekikere aban̄ade Andibot. Edinam an̄wan̄a ke n̄wed emi inyịkke-nyịk owo, edi mme akpan n̄kpọ ẹdu, ntre n̄kere ke idem mbon Buddha ẹkeme ndikot n̄wed emi ye unana mmen̄e. Enye anam nnyịn n̄ko itịm ikụt ima Jehovah.”

Ndụn̄ọde emi okoto England: “Ndisụk n̄kot n̄wed Creator n̄kụre edi oro ndien ami mmọn̄ mfiak ntọn̄ọ. Nso utịbe utịbe n̄wed! Owo enyene ndima Jehovah ke ini okotde enye. Mmọnọ mbọhọidụn̄ mi kiet, emi ke ama okokot ibuot iba kpọt ọkọdọhọde ete, ‘N̄kemeke ndiyak enye nnịm, enye akama nduaidem etieti.’ Mmetịm nnịm nte ke emi ayan̄wam mme owo ẹdi ẹdifiọk ẹnyụn̄ ẹma Akwa Andibot nnyịn.”

Eren kiet ke Maryland, U.S.A., ọkọdọhọ ete: “Enye enen̄ede osụhọde odụk ọkpọ ye ndia mi eke spirit! Mmodiomi ndinọ kpukpru owo oro ndade nnam mbubehe idem kiet. Esidi ọkpọsọn̄ n̄kpọ ọnọ mi ndusụk ini ndinọ mme utọ ọfiọkn̄wed-owo oro mînyeneke ifet ikọ ntiense. Ye n̄wed emi, idahaemi ami mmokụt inem inem, uforo uforo usụn̄ ndinam ntre.”

Nte an̄wan̄ade, n̄wed oro Is There a Creator Who Cares About You? eyenyene eti odudu ke idem mme owo ke ofụri isọn̄.

[Ebiet Ẹdade Ndise Ẹto ke page 25]

Foto ikpaedem ke enyọn̄, Eagle Nebula: J. Hester ye P. Scowen (AZ State Univ.), NASA