Mbuọtidem Ekeme Ndikpụhọde Uwem Fo

“KE AKPANIKỌ ẹkeme ndidu eti uwem ke Abasi mîdụhe.” Ntem ke andidọhọ ke owo idiọn̄ọke m̀mê Abasi odu m̀mê idụhe eketịn̄. Enye ọkọdọhọ ke ima ibọk nditọ imọ ẹdu ata eti uwem, ndien mmọ, n̄ko, ẹma ẹbọk nditọ mmọ ẹnyene ukem n̄kokon̄ idaha oro—kpukpru ẹmi ye unana edibuọt idem ke Abasi.

Ndi emi ọwọrọ ke ufọn idụhe ndibuọt idem ke Abasi? Nte an̄wan̄ade, owo emi ekekere ntre. Ndien edi akpanikọ nte ke idịghe kpukpru owo ẹmi mînịmke Abasi ke akpanikọ ẹdi idiọkowo ke ntak oro. Apostle Paul ama etịn̄ aban̄a “mme Gentile” ẹmi mîfiọkke Abasi edi “ẹnamde ke edimehe se ibet etemede.” (Rome 2:14) Kpukpru owo—esịnede mme andidọhọ ke owo idiọn̄ọke m̀mê Abasi odu m̀mê idụhe—ẹkedada ubieresịt ẹmana. Ediwak owo ẹdomo nditiene ubieresịt mmọ idem ọkpọkọm mmọ inịmke edidu Abasi emi ọkọnọde mmọ ndammana ifiọk eti ye idiọk oro.

Nte ededi, eti mbuọtidem ke Abasi—enye oro ọkọn̄ọde ke Bible—enen̄ede edi ọkpọsọn̄ odudu emi onụkde owo ndinam eti n̄kpọ akan ubieresịt emi mînyeneke se inọde ndausụn̄. Mbuọtidem ọkọn̄ọde ke Ikọ Abasi, kpa Bible, ọnọ ubieresịt ndausụn̄, anamde enye ọsọp ndidiọn̄ọ eti ye idiọk. (Mme Hebrew 5:14) Akan oro, mbuọtidem ọsọn̄ọ mme owo idem ndimụm n̄kokon̄ idaha n̄kama ke ẹsobode ọkpọsọn̄ mfịghe. Ke uwụtn̄kpọ, ke ọyọhọ isua ikie 20, ediwak idụt ẹma ẹdidu ke idak odudu mbiara ukara ukaraidem, emi ekenyịkde mbon oro ẹtiede nte ẹdu eti uwem ndinam mme enyene-ndịk ibak. Nte ededi, mbon ẹnyenede ata mbuọtidem ke Abasi ẹma ẹsịn ndibiat edumbet mmọ, okposụkedi emi ekesịnde uwem mmọ ke itiendịk. Adianade do, mbuọtidem ọkọn̄ọde ke Bible ekeme ndikpụhọde mme owo. Enye ekeme ndinyan̄a uwem eketiede nte odu ke itie nditaha onyụn̄ an̄wam mme owo nditre ndinam ikpọ ndudue. Kere ban̄a uwụtn̄kpọ ifan̄.

 Mbuọtidem Ekeme Ndikpụhọde Uwem Ubon

“Ebede ke mbuọtidem mbufo, ẹmenam se owo mîkemeke ndinam.” Ntre ke ebiereikpe owo England kiet ọkọdọhọ ke ini ọkọnọde ubiere esie aban̄ade andinyene unen ndibọk nditọ John ye Tania. Ke ini ukara okokopde aban̄a John ye Tania, mmọ ikọdọhọ ndọ ndien uwem ufọk mmọ ama enyene ndịk. John, emi ekenyenede mfịna uda ọkpọsọn̄ ibọk ye ido ubre mbre mfọniso, ama esibiat ibet man enyene okụk ndise mban̄a ndiọi edinam esie. Enye ama ofụmi nditọ esie ye eka mmọ. Ntre, nso “utịben̄kpọ” ikada itie?

Usen kiet, John ama okop nte ekpri eyen eyeneka esie etịn̄de n̄kpọ aban̄a Paradise. Ke emi edemerede enye udọn̄, enye ama obụp ete ye eka eyeneren oro mbụme. Ete ye eka ẹmi ẹdi Mme Ntiense Jehovah, ndien mmọ ẹma ẹn̄wam John ekpep aban̄a enye ke Bible. Sụn̄sụn̄, John ye Tania ẹma ẹkọri mbuọtidem ọkọn̄ọde ke Bible oro okokpụhọrede uwem mmọ. Mmọ ẹma ẹsịn ndọ mmọ ke n̄wed nte ekemde ye ibet ẹnyụn̄ ẹkpọn̄ ndiọi edinam mmọ. Mbon ukara ẹkekade ẹkese ufọk mmọ ẹma ẹkụt n̄kpọ emi esisịt ini ke mbemiso eketiede nte ikemeke ndidu—ubon okopde inemesịt ke edisana ufọk, kpa eti itie ndibọk nditọ. Ebiereikpe ama enen ke ndidọhọ ke “utịben̄kpọ” emi okoto obufa ido ukpono John ye Tania.

Ke ebiet oyomde usụn̄ ke ediwak tọsịn kilomita ọkpọn̄ England, ekpri n̄wanndọ kiet ke N̄kpet N̄kpet Edem Usiahautịn ama ekpere ndinam se ẹkpebatde enye ẹsịn ke ata idiọk otu. Enye akaduak nditiene ediwak miliọn owo oro ẹsisiode ndọ ke isua kiet kiet. Enye ama enyene eyen kiet, edi ebe esie ama enen̄ede ọsọn̄ enye. Ke ntak emi, iman esie ẹkekpak enye ẹte ọwọrọ ndọ, ndien enye ama akam ọtọtọn̄ọ ndinam mme ndutịm ndinam ntre. Nte ededi, enye ke ekekpep Bible ye kiet ke otu Mme Ntiense Jehovah. Ke ini Ntiense oro okokopde aban̄a idaha emi, enye ama anam an̄wan̄a se Bible etịn̄de aban̄a ndọ—ke uwụtn̄kpọ, nte ke ndọ edi enọ otode Abasi inyụn̄ idịghe se ẹkpedian̄arede mfefere mfefere. (Matthew 19:4-6, 9) N̄wan emi ama ekere ete, ‘Edi esen esen n̄kpọ nte ke n̄wan emi, esenowo, odomo ndinam ubon nnyịn ọsọn̄ọ ada ke adan̄aemi mbon ẹkperede mi idem ẹyomde ndibiat enye.’ Mbuọtidem emi enye ekenyenede obufa obufa mi ama an̄wam enye anam ndọ esie ọsọn̄ọ ada.

Idiọk otu kiet otụkde uwem ubon enyene n̄kpọ ndinam ye usion̄o idịbi. Ntọt Edidiana Mme Idụt ama ọnọ ekikere ete ke kpukpru isua, ẹsikokoi ẹwot ke nsụhọde n̄kaha nseknditọ miliọn 45 ẹmi mîmanake kan̄a ke usion̄o idịbi. Utọ edinam oro kiet kiet edi n̄kpọ mmọn̄eyet. Ifiọk Bible ama an̄wam n̄wan kiet ke Philippines etre ndidụk otu oro.

N̄wan emi ama enyene nneme ye Mme Ntiense Jehovah, ọbọ ediye uduot ekpri n̄wed ukpepn̄kpọ Bible ẹkotde Nso ke Abasi Oyom Oto Nnyịn?, * onyụn̄ ọtọn̄ọ ndikpep Bible. Ọfiọn̄ ifan̄ ke ukperedem, enye ama anam ntak an̄wan̄a. N̄wan oro akasan̄a ye idịbi ke ini Mme Ntiense ẹkewahade ẹtiene enye ke akpa ini, edi enye ye ebe esie ẹma ẹbiere ndiwot nsekeyen oro ebe ke usion̄o idịbi. Nte ededi, ndise nsekeyen oro mîmanake kan̄a emi odude ke page 24 ke ediye uduot ekpri n̄wed oro ama otụk esịt n̄wan oro. Se ikodude do emi ẹkedade Bible ẹnam an̄wan̄a nte ke uwem edi edisana koro ‘obube mmọn̄ uwem odude ye Abasi’ ama anam enye okûsion̄o idịbi. (Psalm 36:9) Idahaemi enye edi eka ediye nsekeyen emi okopde nsọn̄idem.

Mbuọtidem An̄wam Mbon Oro Ẹsede ke Usụhọde

Ke Ethiopia, iren iba ẹsịnede n̄kpọ ntaha ntaha ẹma ẹdụk mbono utuakibuot Mme Ntiense Jehovah ẹkenịmde. Ke mbono esop asuanade, Ntiense kiet ama etin̄ owo emi enye edide ọnọ mmọ ke ufan ufan edu. Iren ẹmi ẹma ẹben̄e enye n̄kpọ. Ntiense oro ikọnọhọ mmọ okụk, edi ọkọnọ n̄kpọ ọfọnde akan. Enye ama esịn udọn̄ ọnọ mmọ ete ẹkọri mbuọtidem, emi ‘ọsọn̄de urua akan gold,’ ke Abasi. (1 Peter 1:7) Owo kiet ke otu mmọ ama anam n̄kpọ aban̄a onyụn̄ ọtọn̄ọ ndikpep Bible. Emi ama okpụhọde uwem esie. Nte enye ọkọkọride ke mbuọtidem, enye ama etre ndin̄wọn̄ sika, ebeubọk edin̄wọn̄ mmịn, oburobụt ido, ye edida khat (n̄kpọ ọnọde mbumehe). Enye ama ekpep ndin̄wam idemesie utu ke ndiben̄e eben̄e ndien idahaemi odu edisana uwem emi enyenede uduak.

Ke Italy ẹma ẹbiere n̄kpọkọbi isua duop ẹnọ eren kiet edide isua 47 ke emana ndien ẹkekọbi enye ke ufọkibọk mbon udọn̄ọ ibuot emi esopikpe enyenede. Kiet ke otu Mme Ntiense Jehovah ẹnyịmede odụk mme ufọk-n̄kpọkọbi ọkọnọ un̄wam eke spirit  ama ekpep enye Bible. Eren emi ama anam usọp usọp n̄kọri. Mbuọtidem ama enen̄ede okpụhọde uwem esie tutu mbon n̄kpọkọbi eken idahaemi ẹsika ẹbịne enye ẹkeyom item ke nte ẹkpesede ẹban̄a mme mfịna mmọ. Mbuọtidem esie ọkọn̄ọde ke Bible anam mme akamautom ufọk-n̄kpọkọbi ẹkpono enye, ẹma enye, ẹnyụn̄ ẹberi edem ke enye.

Ke mme isua ndondo emi mme n̄wedmbụk n̄kpọntịbe ẹbụk ẹban̄a mme ekọn̄ mbio obio ke Africa. Mme mbụk ẹban̄ade n̄kpri nditọ ẹmi ẹnọde ukpep nte mbonekọn̄ ẹnen̄ede ẹmụm owo mbọribọ. Ẹsinọ nditọwọn̄ n̄kpọsọn̄ ibọk, ẹnam ẹnyene edu ibak, ẹnyụn̄ ẹnyịk ẹnam n̄kpọ ye iman mmọ ke usụn̄ emi ata owo mîkpanamke man ẹkụt ẹte ke n̄kukụre mbon mmọ ẹsọn̄ọde ẹda ẹnọ edi mbahade-nda otu mmọ ẹn̄wanade ẹnọ. Nte mbuọtidem ọkọn̄ọde ke Bible ọsọn̄ odudu ekem ndikpụhọde uwem utọ nditọwọn̄ oro? Ke nsụhọde n̄kaha ke idaha iba, enye ama ọsọn̄ odudu ekem ndinam oro.

Ke Liberia, Alex akanam utom nte andin̄wam oku ke ini edinam ido ukpono ke Ufọkabasi Catholic. Edi ke edide isua 13, enye ama odụk mbahade-nda otu mbonekọn̄ onyụn̄ akabade edi ekpri owoekọn̄ ẹketịmde ẹdiọn̄ọ. Man enyene uko ke ekọn̄, enye ama akama ifọt. Alex ama okụt nte ẹwotde ediwak ke otu nsan̄a esie, edi enye ama ọbọhọ. Ke 1997 enye ama osobo ye Mme Ntiense Jehovah onyụn̄ okụt ete ke mmọ ikesehe enye ke usụhọde. Utu ke oro, mmọ ẹma ẹn̄wam enye ọfiọk se Bible etịn̄de aban̄a afai. Alex ama ọkpọn̄ utom ekọn̄. Nte mbuọtidem esie ọkọtọn̄ọde ndikọri, enye ama anam ewụhọ Bible emi: “Yak enye ọwọn̄ọde ọkpọn̄ idiọk, onyụn̄ anam eti; yak enye oyom emem, onyụn̄ ebịne enye.”—1 Peter 3:11.

Kan̄a ke emi, akani ekpri owoekọn̄ ekerede Samson ama asan̄a ebe ke obio Alex odụn̄de idahaemi. Enye ama ededi owo n̄kaikwọ, edi ke 1993 enye ama akabade edi owoekọn̄ onyụn̄ esịn idem ke edida n̄kpọsọn̄ ibọk ke idiọk usụn̄, ubụpekpo, ye oburobụt ido. Ke 1997 ẹma ẹnọ enye ọnyọn̄ ufọk. Samson akanam isan̄ aka Monrovia ndikodụk san̄asan̄a n̄ka unọ ukpeme ke ini ufan kiet ekekpekde enye ete ekpep Bible ye Mme Ntiense Jehovah, ndien nte utịp, enye ama ọkọri mbuọtidem ọkọn̄ọde ke Bible. Emi ama ọnọ enye uko ndikpọn̄ ekọn̄ ekọn̄ usụn̄ uwem esie. Idahaemi Alex ye Samson ẹdu uwem emem ẹnyụn̄ ẹnyene eti ido uwem. Nte odu n̄kpọ ekededi ke ebede mbuọtidem ọkọn̄ọde ke Bible oro okpokpụhọrede uwem mbon ẹketịmde ẹnyene edu ibak ntre?

Nnennen Orụk Mbuọtidem

Mmọ ẹmi ẹdi ifan̄ kpọt ke otu ata ediwak uwụtn̄kpọ ẹkemede ndisiak ndinam an̄wan̄a nte ata mbuọtidem ọkọn̄ọde ke Bible enyenede odudu. Edi akpanikọ, idịghe kpukpru owo ẹtịn̄de ẹte ke imenịm Abasi ke akpanikọ ẹnam n̄kpọ ekekem ye n̄kokon̄ idaha Bible. Ke akpanikọ, ndusụk owo oro mînịmke edidu Abasi ke akpanikọ ẹkeme ndidu uwem ọfọn akan ndusụk mme andidọhọ ke idi Christian. Oro edi koro mbuọtidem ọkọn̄ọde ke Bible abuana se ikande ikpîkpu edidọhọ ke imenịm Abasi ke akpanikọ.

Apostle Paul okokot mbuọtidem “ọyọhọ edibet mme n̄kpọ ẹdoride enyịn ẹban̄a, in̄wan̄în̄wan̄ edinam ata idem n̄kpọ n̄wụt okposụkedi owo mîkwe.” (Mme Hebrew 11:1, NW) Ntem, mbuọtidem esịne ọkpọsọn̄ edinịm se owo mîkwe—ọkọn̄ọde ke uyarade owo mîkemeke ndifan̄a. Enye akpan akpan abuana editre ndinyene eyịghe ekededi ke Abasi odu, ke enye enyene udọn̄ ke idem nnyịn, ye ke enye ọyọdiọn̄ mbon oro ẹnamde uduak esie. Apostle oro ọkọdọhọ n̄ko ete: “Owo eke asan̄ade ekpere Abasi enyene ndinịm ete Enye ododu, onyụn̄ edi Andinọ mmọ ẹmi ẹyomde Enye utịp.”—Mme Hebrew 11:6.

Edi orụk mbuọtidem emi okokpụhọde uwem John, Tania, ye mmọ eken ẹtịn̄de ẹban̄a ke ibuotikọ emi. Enye akanam mmọ ẹda ọyọhọ mbuọtidem ẹka ẹbịne Ikọ Abasi, kpa Bible, ẹkeyom ndausụn̄ ke ndinam mme ubiere. Enye akanam mmọ ẹnam n̄waidem ibio ini man ẹkûdụk usụn̄ eferede mmọ ke idem edi akwan̄ade. Okposụkedi ifiọkutom kiet kiet ekedide isio isio, kpukpru ẹketọn̄ọ ke ukem usụn̄. Kiet ke otu Mme Ntiense Jehovah ekekpep mme owo ẹmi Bible, ndien mmọ ẹma ẹdikụt akpanikọ emi odude ke se Bible ọdọhọde: “Ikọ Abasi enyene uwem, onyụn̄ ananam n̄kpọ.” (Mme Hebrew 4:12) Odudu Ikọ Abasi ama an̄wam owo kiet kiet ndikọri ọkpọsọn̄ mbuọtidem okokpụhọrede uwem esie anam ọfọn.

Mme Ntiense Jehovah ẹnam utom ke se iwakde ibe idụt ye isuo inyan̄ibom 230. Mmọ ẹnọ fi ikot ẹte ekpep Bible. Ntak-a? Koro mmọ ẹnịm ke mbuọtidem ọkọn̄ọde ke Bible ekeme ndida akwa n̄kọri ndi ke uwem fo n̄ko.

[Mme Ikọ idakisọn̄]

[Mme ndise ke page 3]

Mbuọtidem ọkọn̄ọde ke Bible okpụhọde uwem anam ọfọn

 [Ebiet ẹdade ndise ẹto ke page 2]

Kad ibuotikọ Biblia nieświeska eke Szymon Budny, 1572