Mbufa Mbon Otu Ukara

KE Saturday, October 2, 1999, Mbono Ofụri Isua eke Watch Tower Bible and Tract Society of Pennsylvania eketre ye akama-n̄kpaidem ntọt. Owo 10,594 oro ẹkedụkde m̀mê ẹkekpan̄de utọn̄ ke urụk ukopikọ ẹma ẹkop nduaidem ndikop nte ke ẹda mbufa owo inan̄ ẹsịn ke Otu Ukara eke Mme Ntiense Jehovah. Mbufa mme andibuana oro, kpukpru ẹdide mme Christian oro ẹyetde aran, ẹdi Samuel F. Herd; M. Stephen Lett; Guy H. Pierce; ye David H. Splane.

• Samuel Herd ọkọtọn̄ọ usiakusụn̄ ke 1958, ndien ọtọn̄ọde ke 1965 esịm 1997, enye okodu ke utom circuit ye district. Ke oro ebede, enye ye n̄wan esie, Gloria, ẹdi mme andibuana ke ubon Bethel ke United States, emi Brọda Herd anamde utom ke Itieutom Utịmutom. Enye akanam utom n̄ko nte andinọ Kọmiti Utom un̄wam.

• Stephen Lett ọkọtọn̄ọ usiakusụn̄ ke December 1966, ndien ọtọn̄ọde ke 1967 esịm 1971, enye ama anam utom ke Bethel ke United States. Ke October 1971, enye ama ọdọ n̄wan, Susan, onyụn̄ odụk utom akpan asiakusụn̄. Ọtọn̄ọde ke 1979 esịm 1998, enye akanam utom nte esenyịn circuit. Ọtọn̄ọde ke April 1998, enye ye Susan ẹdi mme andibuana ke ubon Bethel ke United States. Do enye akanam utom ke Itieutom Utịmutom, okonyụn̄ edi andinọ Kọmiti Unọ Ukpep un̄wam.

• Guy Pierce ama ọtọn̄ọ ubon ndien ekem enye ye n̄wan esie ẹtọn̄ọ usiakusụn̄ ke April 1982. Enye ama anam utom nte esenyịn circuit ọtọn̄ọde ke 1986 tutu esịm 1997, emi enye ye n̄wan esie Penny, ẹkekabarede ẹdi mme andibuana ke ubon Bethel ke United States. Brọda Pierce akanam utom nte andinọ Kọmiti Mbonutom un̄wam.

• David Splane ọkọtọn̄ọ usiakusụn̄ ke September 1963. Nte andikụre ukpep ke ọyọhọ otu 42 eke Gilead, enye akanam utom nte isụn̄utom ke Senegal, Africa, ekem anam utom circuit ke isua 19 ke Canada. Enye ye n̄wan esie, Linda, ẹdu ke Bethel ke United States toto ke 1990, emi Brọda Splane anamde utom ke Itieutom Utịmutom ye eke Uwetn̄wed. Ọtọn̄ọde ke 1998, enye edi andinọ Kọmiti Uwetn̄wed un̄wam.

Ke adianade ye mbufa mme andibuana inan̄ oro, Otu Ukara idahaemi esịne C. W. Barber, J. E. Barr, M. G. Henschel, G. Lösch, T. Jaracz, K. F. Klein, A. D. Schroeder, L. A. Swingle, ye D. Sydlik. Edi akam kpukpru owo nte Jehovah aka iso ọdiọn̄ onyụn̄ ọsọn̄ọ Otu Ukara emi ẹtatde idahaemi idem, nte enye akade iso ndise enyịn ke utom ikọt Abasi ke ofụri ererimbot nnyụn̄ nse mban̄a mme udọn̄ n̄kpọ eke spirit mmọ.