“Ẹkpeme”

“Ẹkpeme ndien: koro mbufo mîfiọkke usen eke Ọbọn̄ mbufo edide.”—MATTHEW 24:42.

1. Etie mme asan̄autom Jehovah ẹmi ẹma ẹkenam utom ke anyanini didie ke idem kaban̄a ediwak isua utom uyakidem mmọ nnọ? Nọ uwụtn̄kpọ.

 EDIWAK asan̄autom Jehovah ẹmi ẹma ẹkenam utom ke anyan ini ẹkekpep akpanikọ ke ini mmọ ẹkedide n̄kparawa iren ye iban. Ukem nte owo-urua emi ọkọfiọhọde pearl emi okponde ekọmurua onyụn̄ anyamde kpukpru se enye enyenede ndidep enye, nditọ ukpepn̄kpọ Bible oro ẹnyenede ọkpọsọn̄ udọn̄ mi ẹma ẹtụk idemmọ ẹnyụn̄ ẹyak uwem mmọ ẹnọ Jehovah. (Matthew 13:45, 46; Mark 8:34) Etie mmọ ke idem didie ndikenyene ndibet ebịghi akan nte mmọ ẹkedoride enyịn man ẹkụt mme uduak Abasi ẹsude kaban̄a isọn̄? Mmọ ituaha n̄kpọfiọk! Mmọ ẹnyịme ye Brọda A. H. Macmillan, emi ke ama akanam utom Abasi ifịk ifịk ke se ikperede ndisịm isua 60, ọkọdọhọde ete: “Ami mmetịm mbiere ndika iso ke utom mbuọtidem mi akan nte akanam edide. Enye amanam mi n̄kop inem uwem. Enye ke osụk an̄wan̄wam mi ndisak iso nse ini iso ye unana ndịk.”

2. (a) Ekemini item ewe ke Jesus ọkọnọ mme anditiene enye? (b) Mme mbụme ewe ke nnyịn idikere iban̄a ke ibuotikọ emi?

² Nso kaban̄a fi? Inamke n̄kpọ m̀mê afo edi isua ifan̄, kere ban̄a mme ikọ Jesus emi: “Ẹkpeme ndien: koro mbufo mîfiọkke usen eke Ọbọn̄ mbufo edide.” (Matthew 24:42) Mmemmem ikọ oro esịne ntotụn̄ọ akpanikọ. Nnyịn ifiọkke usen emi Ọbọn̄ edidide edibiere ikpe ọnọ idiọk editịm n̄kpọ emi, inyụn̄ iyomke nnyịn ifiọk. Edi oyom nnyịn idu uwem ke usụn̄ eke nnyịn mîdituaha n̄kpọfiọk ke ini enye edide. Ke afan̄ emi, mme uwụtn̄kpọ ewe ke nnyịn ikụt ke Bible oro ẹdin̄wamde nnyịn idu ke ukpeme? Didie ke Jesus akanam se ẹyomde emi an̄wan̄a? Ndien nso uyarade ke nnyịn inyene mfịn oro ọsọn̄ọde nte ke nnyịn idu uwem ke ukperedem ini eke ererimbot unana uten̄e Abasi emi?

Ntọt Uwụtn̄kpọ

3. Didie ke ediwak owo mfịn ẹbiet mbon eyo Noah?

³ Ke ediwak idaha, mme owo mfịn ẹbiet iren ye iban ẹmi ẹkedude uwem ke eyo Noah. Ini oro afai ama ọyọhọ ererimbot, ndien ekikere esịt owo ẹkedi “idiọk kpukpru ini.” (Genesis 6:5) Ata ediwak ẹkesịn idem ofụri ofụri ke mbubehe uwem eke usen ke usen. Nte ededi, mbemiso akadade akwa Ukwọ edi, Jehovah ama ọnọ mme owo ifet ndikabade esịt. Enye ama ọnọ Noah utom ndikwọrọ ikọ, ndien Noah ama anam ntre—anamde utom nte “ọkwọrọ edinen ido” ndusụk ke isua 40 m̀mê 50 m̀mê awakde akan oro. (2 Peter 2:5)  Nte ededi, mme owo oro ẹma ẹfụmi etop emi Noah ọkọnọde nte ntọt. Mmọ ikodụhe ke ukpeme. Ntre, ke akpatre, Noah ye ubon esie kpọt ẹkebọhọ ubiereikpe Jehovah.—Matthew 24:37-39.

4. Ke nso usụn̄ifiọk ke ẹkeme ndidọhọ ke utom ukwọrọikọ Noah ama okụt unen, ndien didie ke ẹkeme nditịn̄ ukem oro mban̄a utom ukwọrọikọ fo?

⁴ Nte utom ukwọrọikọ Noah ama okụt unen? Kûda esisịt ibatowo ẹmi ẹkenamde n̄kpọ ẹban̄a etop esie ubiere. Ke akpanikọ, ukwọrọikọ Noah ama ọyọhọ uduak esie inamke n̄kpọ m̀mê mme owo ẹkenam n̄kpọ didie ẹban̄a enye. Ntak-a? Koro enye ama ọnọ mme owo ifet oro ekemde ndimek m̀mê mmọ ẹyenam n̄kpọ Jehovah m̀mê idinamke. Nso kaban̄a efakutom ukwọrọikọ fo? Idem ọkpọkọm esisịt owo ẹnam n̄kpọ ẹban̄a nte ọfọnde, afo emenyene akwa uforo. Ntak-a? Koro ke ndikwọrọ ikọ, afo atan̄a ntọt Abasi, ndien ke ntre afo anam utom oro Jesus ọkọnọde mme anditiene enye.—Matthew 24:14; 28:19, 20.

Ndifụmi Mme Prọfet Abasi

5. (a) Mme idaha ewe ikodu ke Judah ke eyo Habakkuk, ndien didie ke mme owo ẹkenam n̄kpọ ẹban̄a ntịn̄nnịm etop esie? (b) Didie ke mbon Judah ẹkesua mme prọfet Jehovah?

⁵ Ediwak isua ikie ke Ukwọ ama ekebe, obio ubọn̄ Judah ama osobo ata ọkpọsọn̄ idaha. Ukpono ndem, ukwan̄ikpe, ufịk, ye idem uwotowo ẹkedi ọsọ n̄kpọ. Jehovah ama ọdọn̄ prọfet Habakkuk ọkọtọt mme owo ete ke edieke mmọ mîkabakede esịt, nsobo otode ubọk mme Chaldean, m̀mê Babylon, eyesịm mmọ. (Habakkuk 1:5-7) Edi mme owo ẹma ẹsịn ndikpan̄ utọn̄. Ndusụk ekeme ndidi mmọ ẹma ẹkere, ‘Kamse, ke se iwakde ikan isua ikie ẹmi ẹkebede, prọfet Isaiah ama atan̄a ukem ntọt oro, edi n̄kpọ ndomokiet itịbeke kan̄a!’ (Isaiah 39:6, 7) Ediwak ikpọ owo Judah ikananake udọn̄ kpọt ke etop oro edi ẹma ẹsua mme isụn̄utom oro n̄ko. Ke idaha kiet, mmọ ẹma ẹdomo ndiwot prọfet Jeremiah, ndien mmọ ẹkpekekụt unen edieke Ahikam mîkpọkọbiọn̄ọke. Ke okopde iyatesịt aban̄a ntịn̄nnịm etop efen efen, Edidem Jehoiakim ama anam ẹwot prọfet Urijah.—Jeremiah 26:21-24.

6. Didie ke Jehovah ọkọsọn̄ọ Habakkuk idem?

⁶ Etop Habakkuk okosụk edi uko uko, ndien ekedi se mme owo mîkamaha ukem nte eke Jeremiah, emi ẹkenọde odudu spirit Abasi ndibem iso ntịn̄ mban̄a Judah ndina ndon ke isua 70. (Jeremiah 25:8-11) Ke ntre, nnanenyịn Habakkuk ekeme ndin̄wan̄a nnyịn nte enye okofioride ete: “O Jehovah, adan̄a didie ke ndiseme, ndien afo ukopke! nditua afai nnọ fi, ndien unyan̄ake!” (Habakkuk 1:2) Jehovah ke mbọm ama ada mme ikọ oro ẹsọn̄ọde mbuọtidem mi ọbọrọ Habakkuk: “N̄kukụt [ana] kan̄a ọnọ ini emi ẹnịmde; ndien enye oyosioro uyo ke utịt, idinyụn̄ isụho nsu: enye ama ebịghi, bet enye; koro enye mîditreke ndidi, mîdinyụn̄ ibehe ini.” (Habakkuk 2:3) Ntre Jehovah ama enyene “ini emi ẹnịmde” ndida utịt nsọk ukwan̄ikpe ye ufịk. Edieke eketiede nte ke ebebịghi, Habakkuk ikenyeneke ndikop mmemidem, ikonyụn̄ inyeneke ndikpọt. Utu ke oro, enye ekenyene ‘ndibet,’ enyenede nte ini edide usọp usọp ke ekikere nte enye  odude uwem ke usen kiet kiet. Usen Jehovah idibehe ini!

7. Ntak emi ẹkeduakde ndifiak nsobo Jerusalem ke akpa isua ikie E.N.?

⁷ Ke n̄kpọ nte isua 20 ke Jehovah ama eketịn̄ ikọ ye Habakkuk, ẹma ẹsobo Jerusalem, ibuot obio Judah. Ke ukperedem ẹma ẹfiak ẹbọp enye, ẹnyụn̄ ẹnen̄ede ediwak ukwan̄ edinam ẹmi ẹkenamde Habakkuk okop mfụhọ. Nte ededi, ke akpa isua ikie E.N., ẹma ẹdọhọ ke ẹmọn̄ ẹfiak ẹsobo obio oro ke ntak unana edinam akpanikọ mbon ẹmi ẹkedụn̄de. Ke mbọm, Jehovah ama anam ndutịm man mbon esịt akpanikọ ẹkpebọhọ. Isan̄ enye emi, enye ikadaha prọfet efen ikan Jesus Christ ndinọ etop oro. Ke 33 E.N., Jesus ama asian mme anditiene enye ete: “Ke adan̄aemi mbufo ẹdikụtde nte mbon-ekọn̄ ẹkande Jerusalem ẹkụk, ẹfiọk ndien ẹte, n̄wụre esie ke ekpere. Ke ini oro yak mmọ eke ẹdude ke Judea ẹfen̄e ẹka ikpọ obot.”—Luke 21:20, 21.

8. (a) Ekeme ndidi nso iketịbe inọ ndusụk Christian ke Jesus ama akakpa? (b) Didie ke mme ntịn̄nnịm ikọ Jesus ẹban̄ade Jerusalem ẹkesu?

⁸ Nte ediwak isua ẹkebede, ekeme ndidi ndusụk Christian ke Jerusalem ẹma ẹkere m̀mê ata ini ewe ke ntịn̄nnịm ikọ Jesus edisu. Idem n̄kpọ, kere ban̄a mme n̄kpọ oro ndusụk mmọ nte eyịghe mîdụhe ẹkeyakde atak. Ekeme ndidi mmọ ẹma ẹsịn ifet ndinam nti mbubehe ke ntak ubiere mmọ ndidu ke ukpeme. Nte mmọ ẹma ẹkpa mba nte ini akakade? Ndi mmọ ẹma ẹbiere ke ikabiat ini mmimọ, ẹkerede ẹte ke ikọ Jesus enyene ebuana ye emana ini iso, idịghe eke mmimọ? Ke 66 E.N., ntịn̄nnịm ikọ Jesus ama ọtọn̄ọ ndisu ke ini udịmekọn̄ Rome ẹkekande Jerusalem ẹkụk. Mbon ẹmi ẹkedude ke ukpeme ẹma ẹfiọk idiọn̄ọ oro, ẹfen̄e ẹwọn̄ọ ke obio, ndien ẹma ẹnyan̄a mmọ ẹsio ke nsobo Jerusalem.

Ndinam Ufọn Edidu ke Ukpeme An̄wan̄a

9, 10. (a) Didie ke afo ekeme nditịn̄ ibio ibio mban̄a uwụtn̄kpọ Jesus aban̄ade ifịn ẹmi ẹketiede ẹbet eteufọk mmọ ndinyọn̄ ndọ ndi? (b) Nso ikeme ndidi ntak emi editie mbet eteufọk mmọ ekedide ọkpọsọn̄ n̄kpọ ọnọ ifịn oro? (c) Ntak emi ifịn oro ndinyene ime ọkọfọnde?

⁹ Ke ndidori nsọn̄uyo ke ufọn ndidu ke ukpeme, Jesus ama emen mme mbet esie odomo ye ifịn ẹmi ẹtiede ẹbet eteufọk mmọ ọnyọn̄ ndọ esie edi. Mmọ ẹma ẹfiọk ẹte ke enye ọyọnyọn̄ edi okoneyo kiet—edi ke ewe hour? Ke mbubịteyo? Ke ufọt okoneyo? Ke n̄kpọusen? Mmọ ikọfiọkke. Jesus ọkọdọhọ ete: “Edieke [eteufọk] edinyụn̄ edide ufọt okoneyo, m̀mê n̄kpọusen, ke enye edidi okụt mmọ [ẹtiede ẹkpeme], ọfọfọn ọnọ mme asan̄autom oro.” (Luke 12:35-38) Kere nte ifịn ẹmi ẹketiede ẹbet ye udọn̄. Kpukpru uyom, kpukpru mbukpọn̄ ẹnam mmọ ẹtetịm ẹdori enyịn: ‘Ndi eteufọk nnyịn ekpedi oro?’

¹⁰ Nso edieke eteufọk edide ke ufọt okoneyo, emi ekesitọn̄ọde ke n̄kanika 9 okoneyo esịm ufọt okoneyo? Nte kpukpru ifịn oro, esịnede mbon ẹmi ẹma ẹkenam utom ọkpọsọn̄ ọtọn̄ọde ke tụhi-tụhi usenubọk, ẹyedu ke mben̄eidem ndidara enye, m̀mê eyedi ndusụk owo ẹma ẹde? Nso edieke eteufọk ọnyọn̄de edi ke n̄kpọusen—emi ọkọtọn̄ọde ke ufọt okoneyo esịm n̄kpọ nte n̄kanika ita n̄kpọusen? Ndi ndusụk ifịn ẹkpekop mmemidem, idem ẹkopde idiọkesịt ke se iketiede nte eteufọk ebịghi ndidi? * Sụk mbon ẹmi ẹkedude ke ukpeme ke ini eteufọk ekedide edisịm ke ẹdidọhọ ọfọfọn ọnọ. Ikọ Mme N̄ke 13:12 ẹyenen̄ede ẹsu mmọ ke idem: “Idotenyịn eke anamde ubịghi esịn esịt ọdọn̄ọ; edi ndibọ se ẹyomde edi eto uwem.”

11. Didie ke akam ekeme ndin̄wam nnyịn idu ke ukpeme?

¹¹ Ke ufan̄ ini emi etiede nte ebebịghi, nso idin̄wam mme anditiene Jesus ndidu ke ukpeme? Ke adan̄aemi okodude ke in̄wan̄ Gethsemane esisịt ini mbemiso ẹmụmde enye, Jesus ọkọdọhọ ita ke otu mbet esie ete: “Ẹkpeme, ẹnyụn̄ ẹbọn̄ akam, mbak mbufo ẹdidụk ke idomo.” (Matthew 26:41) Ediwak isua ke ukperedem, Peter, emi okodude ini oro, ama ọnọ mme ekemmọ Christian ukem item emi. Enye ekewet ete: “Utịt kpukpru n̄kpọ ke ekpere.  Mmọdo mbufo ẹnyene eti ibuot, ẹnyụn̄ ẹfara ke idem, man ẹkeme ndibọn̄ akam.” (1 Peter 4:7) Nte an̄wan̄ade, akam ofụri esịt ekpenyene ndidi ubak edinam ofụri ini Christian nnyịn. Ke akpanikọ, oyom nnyịn ika iso ndiben̄e Jehovah an̄wam nnyịn idu ke ukpeme.—Rome 12:12; 1 Thessalonica 5:17.

12. Nso ukpụhọde idu ke ufọt n̄kpọ emi ẹkerede-kere ye edidu ke ukpeme?

¹² Tịm fiọk ete ke Peter ama ọdọhọ n̄ko ete: “Utịt kpukpru n̄kpọ ke ekpere.” Ekpere adan̄a didie? Usụn̄ ndomokiet idụhe owo ndidiọn̄ọ nnennen usen m̀mê hour. (Matthew 24:36) Edi, ukpụhọde odu ke ndisịn idem ke n̄kpọ emi ẹkerede-kere, emi Bible mîsịnke udọn̄ inọ, ye edinyene utịt ke ekikere, emi enye esịnde udọn̄ ọnọ. (Men 2 Timothy 4:3, 4; Titus 3:9 domo.) Nso idi usụn̄ kiet emi nnyịn ikemede nditie mbet utịt? Ebe ke nditịm nnọ ntịn̄enyịn ke uyarade oro nte ke utịt ke ekpere. Ẹyak nnyịn ke ntre idụn̄ọde uyarade itiokiet ẹmi ẹsọn̄ọde nte ke nnyịn idu uwem ke mme ukperedem ini ererimbot unana uten̄e Abasi emi.

Uyarade Itiokiet Oro Ẹnamde Inịm

13. Didie ke ntịn̄nnịm ikọ Paul emi ẹwetde ke 2 Timothy ibuot 3 anam fi enịm ke akpanikọ nte ke nnyịn idu uwem ke “ukperedem ini”?

¹³ Akpa, nnyịn imokụt in̄wan̄în̄wan̄ nte ntịn̄nnịm ikọ apostle Paul aban̄ade “ukperedem ini” osude. Paul ekewet ete: “Ndiọk eyo ẹyedu ke ukperedem ini. koro mme owo ẹyedi mme ama idem, ye mme ama inyene; ẹnyụn̄ ẹbụre idiọk mbụre, ẹseri iseri, ẹsụn̄i isụn̄i, ẹsọn̄ ibuot ye ete ye eka, ẹnana esịt ekọm, ẹnana uten̄e Abasi, ẹnana ima uduot owo; ẹnyụn̄ ẹbiat un̄wọn̄ọ; ẹma ebiari, ẹyak idiọk itọn̄ akan mmọ ubọk, ẹtie obom-obom, ẹnyụn̄ ẹsua se ifọnde; mmọ ẹdi mme ada owo nnọ mme asua, ye mbon idiọk iwụk, ye mbon n̄kohode-idem; mmọ ẹma mbre ẹkan Abasi; ẹnyene enyọn̄ enyọn̄ ido uten̄e Abasi, edi isan̄ake n̄kpọ ye odudu eke odude ke uten̄e Abasi. Wọn̄ọde kpọn̄ mmọ eke ẹtiede ntem. Edi ndiọi owo ye mbon abian̄a ẹyedọdiọn̄ ẹdiọk ẹka iso, ẹbian̄a owo, owo ẹyenyụn̄ ẹbian̄a mmọ.” (2 Timothy 3:1-5, 13) Nte nnyịn ikwe nte ntịn̄nnịm ikọ emi osude ke eyo nnyịn? Sụk mbon oro mîmaha ndinyịme akpanikọ ẹkeme ndifan̄a! *

14. Didie ke mme ikọ Ediyarade 12:9 ẹban̄ade Devil ẹsu mfịn, ndien ke mîbịghike nso iditịbe inọ enye?

¹⁴ Ọyọhọ iba, nnyịn imokụt utịp edision̄o Satan ye mme demon esie ke heaven nduọn̄ọ, ke ndisu Ediyarade 12:9. Do, nnyịn ikot ite: “Ndien ẹsio akwa dragon ẹduọk ke isọn̄, kpa akani urụkikọt oro ẹkotde enye ẹte, andidori ikọt Abasi ikọ ye Satan, andibian̄a ofụri ererimbot; ẹsio enye ẹduọk ke isọn̄, ẹnyụn̄ ẹsion̄o mme angel esie ẹduọn̄ọ ye enye.” Emi omosụn̄ọ ke ekese nnanenyịn ọnọ isọn̄. Ke akpanikọ, ekese nnanenyịn emesịm ubonowo, akpan akpan ọtọn̄ọde ke 1914. Edi ntịn̄nnịm ikọ oro ke Ediyarade adian ete ke ini ẹsiode Devil ẹduọk ke isọn̄, enye ọdiọn̄ọ ete “ini imọ edi ibio.” (Ediyarade 12:12) Ke ini emi, Satan an̄wana ye mme anditiene Christ oro ẹyetde aran. (Ediyarade 12:17) Nnyịn ke akpanikọ imokụt utịp en̄wan esie ke ini nnyịn. * Nte ededi, ibịghike ẹyekụk Satan ẹsịn ke editụn̄ọ ukpe man “okûbian̄a aba mme idụt.”—Ediyarade 20:1-3.

15. Didie ke Ediyarade 17:9-11 ọnọ uyarade nte ke nnyịn idu uwem ke utịt ini?

¹⁵ Ọyọhọ ita, nnyịn idu uwem ke ini ọyọhọ “edidem” itiaita onyụn̄ edide akpatre oro ẹtịn̄de ẹban̄a ke ntịn̄nnịm ikọ oro ẹwetde ke Ediyarade 17:9-11. Mi apostle John asiak ndidem itiaba, ẹdade ẹban̄a ukara ererimbot itiaba—Egypt, Assyria, Babylon, Medo-Persia, Greece, Rome, ye adiana-iba ukara ererimbot eke Britain ye America. Enye okụt n̄ko “ọyọhọ [edidem] itiaita” emi ọwọrọde ke “kiet ke otu itiaba oro.” Ọyọhọ  edidem itiaita emi—akpatre oro John okụtde ke n̄kukụt—idahaemi ada aban̄a Edidiana Mme Idụt. John ọdọhọ ete ke ọyọhọ edidem itiaita emi “aka nsobo,” ke oro ebede owo isiakke aba ndidem efen eke isọn̄. *

16. Didie ke akpanikọ ẹdude ke edisu mbiet eke ndap Nebuchadnezzar ẹwụt nte ke nnyịn idu uwem ke ukperedem ini?

¹⁶ Ọyọhọ inan̄, nnyịn idu uwem ke ini oro ikpat mbiet eke ndap Nebuchadnezzar adade aban̄a. Prọfet Daniel ama asiak utịbe utịbe ndap akwa mbiet ebietde owo mi. (Daniel 2:36-43) Mbakidem inan̄ ẹmi ẹdide ukwak ke mbiet emi ẹda ẹban̄a nsio nsio ukara ererimbot, ọtọn̄ọde ye ibuot (Obio Ukara Babylon) onyụn̄ ebe esịm ikpat ye nnuenukot (mme ukara ẹmi ẹkarade mfịn). Kpukpru ukara ererimbot ẹmi ẹwụtde ke mbiet oro ẹma ẹwọrọ ẹwụt idem. Nnyịn idu uwem ke ini oro ikpat mbiet oro adade aban̄a. Owo itịn̄ke iban̄a mme ukara efen ndidaha nda. *

17. Didie ke utom ukwọrọikọ Obio Ubọn̄ nnyịn ọnọ uyarade efen efen nte ke nnyịn idu uwem ke utịt ini?

¹⁷ Ọyọhọ ition, nnyịn imokụt nte ẹnamde utom ukwọrọikọ ke ofụri ererimbot, emi Jesus ọkọdọhọde ke ayada itie mbemiso utịt editịm n̄kpọ emi. Jesus ọkọdọhọ ete: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” (Matthew 24:14) Mfịn, ntịn̄nnịm ikọ oro ke aka iso ndisu ke udomo emi ananade mbiet. Edi akpanikọ, mme efakutom ẹmi owo mîtụkke-tụk ẹsụk ẹdodu, ndien ekeme ndidi ke edikem ini Jehovah, akamba usụn̄ adade esịm n̄kponn̄kan utom eyeberede. (1 Corinth 16:9) Nte ededi, Bible idọhọke ite ke Jehovah eyebet tutu kpukpru owo ke isọn̄ ẹbọ ikọ ntiense ọkpọkpọ. Utu ke oro, ana ẹkwọrọ eti mbụk tutu Jehovah okụt ke ekem. Adan̄aoro utịt eyedi.—Men Matthew 10:23 domo.

18. Nte an̄wan̄ade, nso iditịbe inọ ndusụk mbon oro ẹyetde aran ke ini akwa ukụt ọtọn̄ọde, ndien didie ke ẹkeme ndidiọn̄ọ emi?

¹⁸ Ọyọhọ itiokiet, ibat ata mbet Christ oro ẹyetde aran ke osụhọde, kpa ye edide nte an̄wan̄ade ndusụk ẹyesụk ẹdu ke isọn̄ ke ini akwa ukụt ọtọn̄ọde. N̄wakn̄kan ke otu nsụhọ ẹnen̄ede ẹsọn̄, ndien ibat mmọ ẹmi ẹdide ata mbon oro ẹyetde aran ke ekpekpri nte mme isua ẹbede. Edi, ke etịn̄de aban̄a akwa ukụt, Jesus ọkọdọhọ ete: “Ke mîkpesịbeke mme usen oro ẹmụhọ, baba owo kiet ikpọbọhọke; edi kaban̄a ndimek ikọt Abasi ẹyesịbe mme usen oro ẹmụhọ.” (Matthew 24:21, 22) Ntre, nte an̄wan̄ade, ndusụk ke otu “ndimek ikọt” Christ ẹyesụk ẹdu ke isọn̄ ke ini emi akwa ukụt ọtọn̄ọde. *

Nso Ina ke Iso?

19, 20. Ntak etịmde edi usọp usọp n̄kpọ nnyịn ndidu ke edidemede ndinyụn̄ ndu ke ukpeme idahaemi akan nte akanam edide?

¹⁹ Nso ke ini iso akama ọnọ nnyịn? Mme ini nduaidem idịghe kan̄a. Paul ọkọnọ item ete ke “usen Ọbọn̄ mọn̄ edi nte inọ ke okoneyo.” Ke etịn̄de aban̄a mme owo oro ẹtiede nte ke ẹdi mme ọfiọkn̄kpọ owo ererimbot, enye ọdọhọ  ete: “Ini mme owo ẹdọhọde ẹte, idu ke emem ye ifụre, kpa adan̄aoro ke nsobo abuat mmọ.” Ntem, Paul esịn udọn̄ ọnọ mme andikot n̄wed esie ete: “Ẹyak nnyịn ikûde idap, nte mmọ eken, edi ẹyak nnyịn itaba idap ikpeme, imụm idem ikama.” (1 Thessalonica 5:2, 3, 6) Ke akpanikọ, mbon ẹmi ẹsede mme n̄ka eke owo ndida emem ye ifụre ndi ẹfụmi ata idem n̄kpọ. Mme utọ owo oro ẹnen̄ede ẹde ata idap!

²⁰ Nsobo editịm n̄kpọ emi edidi ke ata mbuari. Ke ntre, ẹbet usen Jehovah. Abasi ke idemesie ọkọdọhọ Habakkuk ete: ‘Idinyụn̄ ibehe ini’! Ke akpanikọ, akananam idịghe usọp usọp n̄kpọ ntem inọ nnyịn ndidu ke ukpeme.

[Mme Ikọ idakisọn̄]

Nte Afo Emeti?

• Ewe mme uwụtn̄kpọ N̄wed Abasi ẹkeme ndin̄wam nnyịn idu ke ukpeme?

• Didie ke Jesus akanam ufọn ndidu ke ukpeme an̄wan̄a?

• Ewe uyarade itiokiet ẹsọn̄ọ nte ke nnyịn idu uwem ke ukperedem ini?

[Mme Mbụme Ukpepn̄kpọ]

[Mme ndise ke page 9]

A. H. Macmillan ama anam n̄kpọ Jehovah ke edinam akpanikọ ke se ikperede iduọk isua itiokiet

[Ndise ke page 10]

Jesus ekemen mme mbet esie odomo ye ifịn ẹmi ẹkedude ke ukpeme