Kọri N̄kpet N̄kpet Itie Ebuana ye Jehovah

MBET oro James ekewet ete: “Ẹsan̄a ẹkpere Abasi, ndien enye ayasan̄a ekpere mbufo.” (James 4:8) Ndien David andiwet psalm ọkọkwọ ete: “Jehovah etie ufan ye mmọ eke ẹbakde enye.” (Psalm 25:14) Nte an̄wan̄ade, Jehovah Abasi oyom nnyịn inyene ntotụn̄ọ itie ebuana ye imọ. Edi, idịghe kpukpru owo ẹmi ẹtuakde ibuot ẹnọ Abasi ẹnyụn̄ ẹnịmde ibet esie ẹsinen̄ede ẹkpere enye.

Nso kaban̄a fi? Nte afo emenyene ọkpọkpọ n̄kpet n̄kpet itie ebuana ye Abasi? Nte eyịghe mîdụhe, afo omoyom ndisan̄a n̄kpere enye. Didie ke nnyịn ikeme ndikọri n̄kpet n̄kpet itie ebuana ye Abasi? Nso ke emi ediwọrọ ọnọ nnyịn? Ọyọhọ ibuot ita ke n̄wed Mme N̄ke 3 eke Bible ọnọ ibọrọ.

Wụt Ima-Mfọnido ye Akpanikọ

Edidem Solomon eke Israel eset ada mme ikọ ẹmi ọtọn̄ọ ọyọhọ ibuot ita ke Mme N̄ke: “Eyen mi, kûfre mbet mi; edi yak esịt fo ekpeme mme ewụhọ mi: Koro ẹyekọrọ anyan usen, ye isua uwem, ye ifụre ẹnọ fi.” (Mme N̄ke 3:1, 2) Sia Solomon ekewetde n̄kpọ ke ndausụn̄ odudu spirit Abasi, item emi ebietde eke ete mi enen̄ede oto Jehovah Abasi ndien ẹwet enye ẹnọ nnyịn. Ẹnọ nnyịn item mi ẹte nnyịn idu uwem ikekem ye mme n̄kpọ editi Abasi—ibet, m̀mê ukpepn̄kpọ esie, ye mme ewụhọ esie—oro ẹwetde ke Bible. Edieke nnyịn inamde emi, “ẹyekọrọ anyan usen, ye isua uwem ye ifụre” ẹnọ nnyịn. Ih, idem idahaemi nnyịn imekeme ndidu emem emem uwem imonyụn̄ ikeme ndifep mme mbubịne ẹmi ẹsiode nnyịn ẹnyan ẹnọ n̄kpọndịk edibak n̄kpa emi mme anamidiọk ẹsiwakde ndisobo. Akan oro, nnyịn imekeme ndinyene idotenyịn nsinsi uwem ke emem emem obufa ererimbot.—Mme N̄ke 1:24-31; 2:21, 22.

Ke akade iso, Solomon ọdọhọ ete: “Kûyak mfọnido [ima-mfọnido, NW] ye akpanikọ ẹkpọn̄ fi: kọn̄ọ mmọ ke itọn̄ fo; wet mmọ ke ọwọn̄esịt fo: Ndien afo oyokụt ima ye mfọniso ke iso Abasi ye ke iso owo.”—Mme N̄ke 3:3, 4.

Ẹkabade akpasarade ikọ oro adade ọnọ “ima-mfọnido” ke usụn̄ efen nte “ima akpanikọ,” ndien enye abuana edinam akpanikọ, edidianakiet, ye nsọn̄ọnda. Nte nnyịn imebiere ndisọn̄ọ nyịre ye Jehovah inamke n̄kpọ m̀mê nso itịbe? Nte nnyịn imowụt ima-mfọnido ke itie ebuana nnyịn ye mme ekemmọ andinịm ke akpanikọ? Nte nnyịn imanam n̄kpọ ndisịk n̄kpere mmọ? Ke mme edinam nnyịn eke usen ke usen ye mmọ, nte nnyịn imenịm ‘ewụhọ ima ke edeme nnyịn’ idem ke mme idaha ẹtiede idomo idomo?—Mme N̄ke 31:26.

Jehovah “ama ndidahado” sia awakde ima. (Psalm 86:5) Edieke nnyịn ituade n̄kpọfiọk iban̄a mme idiọkn̄kpọ ini edem inyụn̄ inen̄ede mme usụn̄ nnyịn idahaemi, ẹn̄wọn̄ọ ẹnọ nnyịn nte ke “ini edidemede” oyoto Jehovah edi. (Utom 3:19) Nte nnyịn ikpenyeneke ndikpebe Abasi nnyịn ebe ke ndifen mmọ en̄wen ndudue mmọ?—Matthew 6:14, 15.

Jehovah edi “Abasi akpanikọ,” ndien enye oyom “akpanikọ” oto mbon oro ẹyomde n̄kpet n̄kpet itie ebuana ye enye. (Psalm 31:5) Nte nnyịn imekeme ndinen̄ede ndori enyịn  Jehovah ndidi Ufan nnyịn edieke nnyịn idude uwem esịt iba—inamde n̄kpọ ke usụn̄ kiet ke ini idude ye mme nsan̄a Christian ndien ke usụn̄ efen ke ini mîdụhe ye mmọ—nte “mbon nsu” oro ẹdịpde orụk owo oro mmọ ẹdide? (Psalm 26:4) Emi ekpedi ndisịme didie ntem, sia ‘kpukpru n̄kpọ ẹnade iferi ye ata in̄wan̄în̄wan̄ ke enyịn’ Jehovah!—Mme Hebrew 4:13.

Ẹkpenyene ndida ima-mfọnido ye akpanikọ ke akpan n̄kpọ nte ọsọn̄urua n̄kpọitọn̄ oro ‘ikọn̄ọde ke itọn̄ nnyịn,’ koro mmọ ẹn̄wam nnyịn ‘ndikụt mfọniso ke iso Abasi ye ke iso owo.’ Iyomke nnyịn iwụt mme edu ẹmi enyọn̄ enyọn̄ kpọt edi oyom inyụn̄ iwet mmọ ke ‘ọwọn̄ esịt nnyịn,’ inamde mmọ ẹdi akpan ikpehe edu nnyịn.

Kọri Ọyọhọ Mbuọtidem ke Jehovah

Enyene-ọniọn̄ edidem oro aka iso ete: “Buọt idem fo ye Jehovah ke ofụri esịt fo; ndien kûberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo enịm.”—Mme N̄ke 3:5, 6.

Ke akpanikọ, odot nnyịn ibuọt idem ọyọhọ ọyọhọ ye Jehovah. Nte Andibot, enye “ọsọn̄ odudu” onyụn̄ edi Enye emi “nsọn̄idem” otode. (Isaiah 40:26, 29) Enye ekeme ndinam kpukpru se enye akaduakde. Kamse, enyịn̄ esie ke ata ata usụn̄ ọwọrọ “Enye Anam Akabade Edi,” ndien enye ọbọp mbuọtidem nnyịn ke ukeme esie ndisu se enye ọn̄wọn̄ọde! Akpanikọ oro nte ke ‘Abasi ikemeke ndisu nsu’ anam enye edi ata uwụtn̄kpọ akpanikọ. (Mme Hebrew 6:18) N̄wọrọnda edu esie edi ima. (1 John 4:8) Enye “emenen ke kpukpru usụn̄ esie, onyụn̄ ọfọn ido ke kpukpru se enye anamde.” (Psalm 145:17) Edieke nnyịn mîkemeke ndiberi edem ke Abasi, nnyịn ikeme ndiberi edem ke anie? Nte ededi, man iberi edem ke enye, oyom nnyịn ‘itabi inyụn̄ ise nte Jehovah ọfọnde’ ebe ke ndida se nnyịn ikpepde ito Bible nsịn ke edinam ke ọkpọkpọ uwem nnyịn ye ke nditie n̄kere ufọn oro emi osion̄ode edi.—Psalm 34:8.

Didie ke nnyịn ikeme ‘ndidiọn̄ọ Jehovah ke kpukpru usụn̄ nnyịn’? Andiwet psalm eke odudu spirit ọdọhọ ete: “Nyekere kpukpru se afo anamde, nyonyụn̄ n̄kere utom fo.” (Psalm 77:12) Sia owo mîkemeke ndikụt Abasi, editie n̄kere ikpọ edinam esie ye mme edinam esie ye ikọt esie edi akpan n̄kpọ ke ndikọri n̄kpet n̄kpet itie ebuana ye enye.

Akam n̄ko edi akpan usụn̄ ndidiọn̄ọ Jehovah. Edidem David ama aka iso ndiseme n̄kot Jehovah “ke ofụri usen.” (Psalm 86:3) David ama esiwak ndibọn̄ akam ke ofụri okoneyo, nte ke ini enye ekedide nyon̄ ke wilderness. (Psalm 63:6, 7) Apostle Paul ọkọnọ item ete: “Ẹbọn̄ akam ke Spirit kpukpru ini.” (Ephesus 6:18) Adan̄a ediwak ini didie ke nnyịn isibọn̄ akam? Nte nnyịn imadara ndinyene ọkpọkpọ nneme ofụri esịt ye Abasi? Ke ini isobode mme idaha oro ẹtiede idomo idomo, nte nnyịn imesiben̄e enye un̄wam? Nte nnyịn ke akam imesiyom un̄wam esie mbemiso inamde mme akpan ubiere? Akam esịt akpanikọ oro nnyịn ibọn̄de inọ Jehovah ayanam enye ama nnyịn. Ndien nnyịn imenyene nsọn̄ọ nte ke enye ayakpan̄ utọn̄ ọnọ akam nnyịn onyụn̄ ‘enen̄ede usụn̄ nnyịn enịm.’

Edidi ndisịme didie ntem ‘ndiberi edem ke asian nnyịn’ mîdịghe ke eke mme ọwọrọiso owo ke ererimbot ke ini nnyịn ikemede ndikọn̄ ọyọhọ mbuọtidem nnyịn ke Jehovah! Solomon ọdọhọ ete: “Kûse idem fo ke ọfiọkn̄kpọ.” Ke edide isio, enye ọnọ item ete: “Ten̄e Jehovah, nyụn̄ kpọn̄ idiọk. Ẹyenam idem ọsọn̄ fi, onyụn̄ ebịt fi ọkpọ.” (Mme N̄ke 3:7, 8) Eti ndịk editre ndiyat Abasi esịt ekpenyene ndikara kpukpru edinam, ekikere, ye ntụk nnyịn. Utọ ukpono ukpono mbak oro akpan nnyịn ndinam se idiọkde onyụn̄ edi se inọde usọbọ ye nduọkodudu ke n̄kan̄ eke spirit.

Nọ Jehovah Mfọnn̄kan

Ke nso usụn̄ efen ke nnyịn ikeme ndisan̄a n̄kpere Abasi? Edidem oro ọkọnọ item ete: “Kpono Jehovah ke inyene fo, ye ke akpa ubak kpukpru mbun̄wụm fo.” (Mme N̄ke 3:9) Ndikpono Jehovah ọwọrọ ndiwụt enye ntotụn̄ọ ukpono ndinyụn̄ ntoro enye an̄wan̄wa ebe ke ndibuana ke an̄wan̄wa utom editan̄a enyịn̄  esie nnyụn̄ nnọ emi ibetedem. Inyene ẹmi idade ikpono Jehovah ẹdi ini nnyịn, okụk nnyịn, ye odudu ye inyene obụkidem nnyịn. Mmọ ẹmi ẹkpenyene ndidi akpa mbun̄wụm—ata mfọnn̄kan. Ndi usụn̄ nte idade ọkpọkpọ inyene nnyịn inam n̄kpọ ikpowụtke ubiere nnyịn ‘ndibem iso nyom Obio Ubọn̄ ye edinen ido Abasi’?—Matthew 6:33.

Ndida inyene nnyịn n̄kpono Jehovah idịghe ikpîkpu. Solomon ọsọn̄ọ ete: “Ndien ebiet-unịm-n̄kpọ fo ọyọyọhọ kpak, obufa wine oyonyụn̄ ọyọhọ ke ebiet-udịghi fo ọduọhọ.” (Mme N̄ke 3:10) Ke adan̄aemi uforo eke spirit ke idemesie mîdaha ikesịm uforo n̄kpọ obụkidem, editat ubọk nda inyene nnyịn n̄kpono Jehovah ada uwak edidiọn̄ ẹdi. Ndinam uduak Abasi ekedi “udia” oro ekenịmde Jesus uwem. (John 4:34) Kpasụk ntre, ndinyene ebuana ke utom ukwọrọikọ ye edinam mbet oro adade ubọn̄ ọsọk Jehovah anam nnyịn ikọri. Edieke nnyịn ikọbọde ke utom oro, ebiet unịm n̄kpọ eke spirit nnyịn ọyọyọhọ kpak. Idatesịt nnyịn—oro obufa wine adade aban̄a—ọyọyọhọ ọduọhọ.

Nte nnyịn n̄ko isiberike edem ke Jehovah inyụn̄ ibọn̄ akam iben̄e enye udia eke ekemde ke usen kiet kiet? (Matthew 6:11) Ke akpanikọ, kpukpru se nnyịn inyenede ẹto ima ima Ete nnyịn eke heaven ẹsịm nnyịn. Jehovah ayan̄wan̄a mme edidiọn̄ efen efen ke udomo oro nnyịn idade inyene nnyịn inam n̄kpọ nditoro enye.—1 Corinth 4:7.

Dara Ntụnọ Jehovah

Ke okụtde ufọn ntụnọ ke ndinyene n̄kpet n̄kpet itie ebuana ye Jehovah, edidem Israel eteme nnyịn ete: “Eyen mi, kûsịn ufen Jehovah ke ndek; kûnyụn̄ uyak ntụnọ esie efek fi: Koro Jehovah otụnọde owo eke enye amade; kpa nte emi ete otụnọde eyen eke enemde enye esịt.”—Mme N̄ke 3:11, 12.

Nte ededi, ekeme ndidi ntụnọ ididịghe mmemmem n̄kpọ inọ nnyịn ndibọ. Apostle Paul ekewet ete: “Idahaemi kan̄a kpukpru ntụnọ itiehe inem-inem, edi ababiak; edi ke ukperedem, enye on̄wụm mfri emem ọnọ mmọ ẹmi ẹkebede ke nsịn̄ede esie, kpa mfri edisana ido.” (Mme Hebrew 12:11) Ẹyom nsuannọ ye ntụnọ nte ubak ukpep oro esịkde nnyịn ekpere Abasi. Edinen̄ede otode Jehovah—edide  nnyịn ibọ ito mme ete ye eka, ebe ke esop Christian, m̀mê ebe ke nditie n̄kere N̄wed Abasi ke ini ukpepn̄kpọ idemowo—edi ediwụt ima esie nnọ nnyịn. Ndidara enye ediwụt eti ibuot nnyịn.

Sọn̄ọ Mụm Ọniọn̄ ye Mbufiọk Kama

Ekem, Solomon ọsọn̄ọ etịn̄ ufọn ọniọn̄ ye mbufiọk ke ndikọri n̄kpet n̄kpet itie ebuana ye Abasi. Enye ọdọhọ ete: “Ọfọfọn ọnọ owo eke esịmede eti ibuot, ye owo eke okụtde asian. Koro udori esie ọfọnde akan udori silver, mbun̄wụm esie onyụn̄ ọfọn akan eti gold. . . . Enye edi eto uwem mmọ eke ẹmụmde enye ẹkama: onyụn̄ ọfọn ye mmọ eke ẹfatde enye.”—Mme N̄ke 3:13-18.

Ke etide nnyịn aban̄a nte Jehovah okowụtde ọniọn̄ ye mbufiọk ke utịbe utịbe utom edibot n̄kpọ, edidem oro ọdọhọ ete: “Jehovah akada eti ibuot enịm ererimbot ke itie esie: ada mbufiọk owụk ikpa-enyọn̄. . . . Eyen mi, kûyak mmọ ẹsop fi ke enyịn: kpeme ekikere ye ọniọn̄. Ndien mmọ ẹyekabade ẹdi uwem ukpọn̄ fo, ye mbana itọn̄ fo.”—Mme N̄ke 3:19-22.

Ọniọn̄ ye mbufiọk ẹdi mme edu Abasi. Nnyịn ikpoyomke ndikọri mmọ kpọt edi n̄ko ndisọn̄ọ mmụm mmọ n̄kama ke nditre nditek ubọk tutu amama ke ifịk ifịk edikpep N̄wed Abasi ye edida se nnyịn ikpepde nsịn ke edinam. Solomon aka iso ete: “Ndien afo ayasan̄a ke usụn̄ fo ke ifụre, ndien ukot fo idituahake.” Enye adian do ete: “Ke adan̄aemi afo anade ke isọn̄ udufeheke ndịk: ndien ke ini afo osụhọrede ana, idap eyenịn̄e fi.”—Mme N̄ke 3:23, 24.

Ih, nnyịn imekeme ndisan̄a ke ifụre inyụn̄ ide ye ifụre ekikere nte nnyịn ibetde usen ‘mbabuat nsobo’ oro edisịmde ererimbot Satan nte inọ. (1 Thessalonica 5:2, 3; 1 John 5:19) Idem ke ini akwa ukụt emi asan̄ade ekpere, nnyịn imekeme ndinyene nsọn̄ọ emi: “Kûfehe baba ndịk eke abuatde-buat, kûnyụn̄ ufehe oyobio mme idiọk owo, ke ini enye edidide. Koro Jehovah eyedi ibetedem fo, oyonyụn̄ ekpeme ukot fo mbak ẹdimụm.”—Mme N̄ke 3:25, 26; Matthew 24:21.

Nam Se Ifọnde

Solomon ọnọ item ete: “Kûsịn ndida eti n̄kpọ nnọ mmọ eke ẹkpenyenede enye, ke ini ubọk fo ẹkemede ndinam.” (Mme N̄ke 3:27) Ndinam se ifọnde nnọ mmọ efen abuana edida inyene nnyịn nnam n̄kpọ ke ntatubọk ke ufọn mmọ efen, ndien emi enyene ediwak ikpehe. Edi nte ndin̄wam mmọ efen ẹnyene n̄kpet n̄kpet itie ebuana ye ata Abasi idịghe mfọnn̄kan n̄kpọ ndinam nnọ mmọ ke “utịt ini” emi? (Daniel 12:4) Do, mmọ ẹmi ẹdi ini ndisịn ifịk ke utom edikwọrọ Obio Ubọn̄ ye edinam mbet.—Matthew 28:19, 20.

Enyene-ọniọn̄ edidem oro n̄ko abat ndusụk edinam oro nnyịn mîkpanamke, ọdọhọde ete: “Kûdọhọ mbọhọidụn̄ fo, ete, Ka, ndien fiak di, n̄kpọn̄ nyọnọ fi, ke odude ye afo. Kûkere mbọhọidụn̄ fo idiọk, sia enye ke odụn̄ ke ndueidem ye afo. Kûtọhọ ye owo ke ikpîkpu, ke enye mînamke fi idiọk. Kûfịbe ufụp ye owo afai, kûnyụn̄ umek usụn̄ esie baba kiet.”—Mme N̄ke 3:28-31.

Ke etịn̄de ibio ibio aban̄a ntak item esie, Solomon ọdọhọ ete: “Koro mme ọsọn̄-ibuot ẹdide se Jehovah asuade: edi enye odụk odu ye mbon edinen ido. Isụn̄i Jehovah odu ke ufọk mme idiọk owo: edi enye ọyọdiọn̄ idụn̄ mmọ eke ẹnende. Ke ini enye asakde mbon nsahi, enye ọfọn ido ndien ye mme osụk-esịt. Mbon eti ibuot ẹyedia ubọn̄: ndien ama edi mbon ndisịme, bụt oyofori mmọ.”—Mme N̄ke 3:32-35.

Edieke anade nnyịn inyene n̄kpet n̄kpet itie ebuana ye Jehovah, inaha nnyịn iduak idiọk ye ibak ibak uduak. (Mme N̄ke 6:16-19) Nnyịn idikeme ndinyene mfọn ye edidiọn̄ Abasi edieke nnyịn inamde se inende ke iso esie. Nnyịn n̄ko imekeme ndibọ ukpono oro owo mîben̄eke-ben̄e ke ini mbon en̄wen ẹkụtde nte ke nnyịn imanam n̄kpọ ekekem ye ọniọn̄ Abasi. Ke ntre, ẹyak nnyịn isịn mme n̄kari n̄kari usụn̄ idiọk ye afai afai ererimbot emi. Ke akpanikọ, ẹyak nnyịn ibịne eti usụn̄ uwem inyụn̄ ikọri n̄kpet n̄kpet itie ebuana ye Jehovah!

[Mme ndise ke page 25]

“Kpono Jehovah ke inyene fo”