Nnyịn Idi Mmọ Ẹmi Ẹbuọtde Idem

Ndinọ Etop Ndọn̄esịt ke Italy

JEHOVAH edi “Abasi kpukpru ndọn̄esịt.” Sia ẹkpepde ndikpebe enye, mme asan̄autom esie ‘ẹkeme ndidọn̄ mmọ ẹmi ẹdude ke ukụt ekededi esịt.’ (2 Corinth 1:3, 4; Ephesus 5:1) Emi edi kiet ke otu mme akpan uduak utom ukwọrọikọ emi Mme Ntiense Jehovah ẹnamde.

Ndin̄wam N̄wan Emi Odude ke Unana

Akpan akpan ke mme isua ndondo emi, unana, ekọn̄, ye udọn̄ ndiyom ebiet emi uwem ọfọnde akan onụk ediwak owo ndiwọrọ n̄kodụn̄ ke mme idụt ẹmi uforo odude akan. Edi idịghe mmemmem n̄kpọ ndikpụhọde nda ekekem ye mbufa n̄kann̄kụk. Manjola okodụn̄ ye ekemmọ mbon Albania ke Borgomanero. Sia enye okodụn̄de ke Italy ye unana edinyene n̄wed unyịme nto ukara, enye ama emen̄e ndinyene nneme ye Wanda, emi edide kiet ke otu Mme Ntiense Jehovah. Nte ededi, ke akpatre Wanda ama enịm ini ndisobo ye Manjola, emi ọkọsọpde owụt akwa udọn̄ ke ndikpep Ikọ Abasi, idem okposụkedi mfịna usem akanamde emi edi ọkpọsọn̄ n̄kpọ. Nte ededi, ke ama akawaha ikafan̄, Wanda ikekemeke aba ndikụt owo ke ufọk. Nso iketịbe? Wanda ama edifiọk ete ke kpukpru mme andidụn̄ ke ufọk oro ẹma ẹfen̄e koro ẹkeyoyom kiet ke otu mmọ—ufan eren Manjola—ke ntak uwotowo!

Ọfiọn̄ inan̄ ke ukperedem, Wanda ama afiak osobo ye Manjola. Wanda eti ete: “Ke etiede udọn̄ọ udọn̄ọ ye ọkpọ ọkpọ, enye ekebiet owo emi n̄kpọ enen̄erede ọsọn̄ ye enye.” Manjola ama anam an̄wan̄a ete ke akani ufan imọ eren okodu ke ufọk-n̄kpọkọbi ye nte ke mme ufan oro imọ ikakade ibịne ikoyom un̄wam ẹma ẹkpu imọ idiọk idiọk. Ke mbrenyịn, enye ama ọbọn̄ akam ọnọ Abasi oyom un̄wam. Ekem enye ama eti Wanda, emi eketịn̄de n̄kpọ aban̄a Bible. Manjola okokop inemesịt didie ntem nditọn̄ọ ntak n̄kụt enye!

Ẹma ẹfiak ẹtọn̄ọ ukpepn̄kpọ Bible, ndien ikebịghike Manjola ama ọtọn̄ọ ndidụk mme mbono esop Christian. Enye ama okụt unen ke ndibọ unyịme eke ibet ndidụn̄ ke Italy. Ke isua kiet ebede, Manjola ama akabade edi Ntiense emi anade baptism. Ke ọbọde ndọn̄esịt oto mme un̄wọn̄ọ Abasi, enye ama afiak ọnyọn̄ Albania ndikabuana ọnọ-ndọn̄esịt etop Bible ye mbon idụt esie.

Ndinọ Ikọ Ntiense ke Itienna Mme Ọwọrọidụn̄

Ediwak esop ke Italy ẹnam mme ndutịm ndikwọrọ ikọ nnọ mme ọwọrọidụn̄ nte Manjola. Ke uwụtn̄kpọ, esop kiet ke Florence ama anam mme ndutịm ndika kpukpru ini n̄kese itienna mme ọwọrọidụn̄. Mme  andidụn̄ ke itienna oro—ediwak ẹtode N̄kan̄ Edem Usiahautịn Europe, Macedonia, ye Kosovo—ẹma ẹsobo nsio nsio nsọn̄ọn̄kpọ. Ndusụk ẹma ẹnyene mfịna uda n̄kpọsọn̄ ibọk ye ọkpọsọn̄ mmịn. Ediwak ẹkedu uwem ẹto uyịp n̄kpri inọ.

Ndikwọrọ ikọ ke n̄kann̄kụk emi ekedi ọkpọsọn̄ n̄kpọ. Nte ededi, ke akpatre ọkwọrọikọ uyọhọ-ini emi ekekerede Paola ama osobo ye Jaklina, eyenan̄wan emi otode Macedonia. Ke ẹma ẹkenyene nneme ikafan̄, Jaklina ama esịn udọn̄ ọnọ ufan esie Susanna ndidụn̄ọde Bible. Ekem, Susanna ama enyene nneme ye iman eken. Ikebịghike, owo ition ke ubon oro ẹma ẹkpep Bible kpukpru ini, ẹdụk mme mbono esop Christian, ẹnyụn̄ ẹda se mmọ ẹkekpepde ẹsịn ke edinam. Kpa ye mme mfịna oro mmọ ẹsobode, mmọ ẹbọ ndọn̄esịt ẹto Jehovah ye Ikọ esie.

Owo N̄ka Nun Ọbọ Ndọn̄esịt Oto Jehovah

Ke obio Formia, ọkwọrọikọ uyọhọ-ini emi ekerede Assunta ama enyene nneme ye n̄wan kiet emi akasan̄ade udọn̄ọ udọn̄ọ. N̄wan emi ekedi owo n̄ka nun emi odude ke n̄ka ido ukpono emi esinọde mbon udọn̄ọ ye mbon n̄kpọnnam un̄wam ke ufọkibọk ye ke mme ufọkidụn̄.

Assunta ama ọdọhọ owo n̄ka nun oro ete: “Afo n̄ko omosobo ndutụhọ, nte idịghe ntre? Edi n̄kpọ mfụhọ nte ke kpukpru nnyịn imenyene mme mfịna ndiyọ.” Ke okopde oro, owo n̄ka nun emi ama ọduọk eyet onyụn̄ anam an̄wan̄a nte ke imọ ima inyene ọkpọsọn̄ mfịna unana nsọn̄idem. Assunta ama esịn udọn̄ ọnọ enye, ọdọhọde ete ke Abasi Bible ekeme ndidọn̄ enye esịt. Owo n̄ka nun oro ama ọbọ mme magazine ẹmi ẹkọn̄ọde ke Bible oro Assunta ọkọnọde enye.

Ke isan̄ efen emi mmọ ẹkenyenede nneme, owo n̄ka nun oro, emi enyịn̄ esie ekedide Palmira, ama enyịme ete ke imọ ikodu ke ata ọkpọsọn̄ ndutụhọ. Ke anyan ini enye okodụn̄ ke ufọkn̄wed kiet emi mbon n̄ka nun ẹkenyenede. Ke ini enye ọkọkpọn̄de ke esisịt ini ke ntak udọn̄ọ, owo ikayakke enye afiak aka do aba. Kpa ye oro, Palmira ama ekere ke imenyene mbiomo ke iso Abasi ke ntak akan̄a emi imọ ikanamde ke ini ikedide owo n̄ka nun. Enye ama aka ebịne mme ọkọkudọn̄ọ okoyom “usọbọ,” edi se enye okosobode ama anam enye okop mfụhọ. Palmira ama enyịme ndikpep Bible, ndien enye ama odụk mme mbono esop Christian ke isua kiet. Ekem enye ama ọwọrọ okodụn̄ ke ebiet efen, ndien Ntiense oro ikekwe enye aba. Isua iba ẹma ẹbe mbemiso Assunta akafiakde okụt enye. Palmira ama osobo ọkpọsọn̄ ukọbọ oto ubon esie ye mme ọkwọrọ ederi. Kpa ye oro, enye ama afiak ọtọn̄ọ ukpepn̄kpọ Bible esie, anam n̄kọri eke spirit, onyụn̄ ana baptism nte kiet ke otu Mme Ntiense Jehovah.

Ih, etop ‘Abasi ndọn̄esịt’ esịn udọn̄ ọnọ ediwak owo. (Rome 15:4, 5) Ntem, Mme Ntiense Jehovah ke Italy ẹbiere ndika iso n̄kpebe Abasi ebe ke ndida utịbe utịbe etop ndọn̄esịt esie nsọk mmọ efen.