Ntịn̄nnịm Ikọ Abasi Ọnọ Idotenyịn  Kaban̄a Ini Iso

YE UN̄WAM Ikọ Abasi, kpa Edisana Bible, mme ata Christian ẹse ini iso ye mbuọtidem, idotenyịn, ye ekikere mfọnọn̄kpọ. Sia ẹsọn̄ọde itie ebuana mmọ ye Jehovah Abasi, mmọ ẹsak iso ẹse ini iso. Nte akpa utịn̄ikọ ke mme Mbono District “Ntịn̄nnịm Ikọ Abasi” akanamde an̄wan̄a, Mme Ntiense Jehovah ẹdi nti nditọ ukpepn̄kpọ ntịn̄nnịm ikọ Bible ke ediwak isua. Ntre, nso ke Jehovah ekenịm ọnọ ikọt esie ke mme mbono ẹmi? Ye Bible ke ubọk, kpukpru mme andidụk ẹma ẹyom ndidiọn̄ọ ye ọkpọsọn̄ udọn̄. Ẹtịm ibuotikọ usen kiet kiet ke mbono oro nte san̄asan̄a ekpri ibuotikọ.

AKPA USEN: Ndisan̄a ke Un̄wana Ikọ Abasi

Utịn̄ikọ oro “Ikọ Abasi Amada Nnyịn Usụn̄” ama anam an̄wan̄a nte ke ikọt Jehovah ẹtie nte owo oro ọtọn̄ọde isan̄ ke ekịm okoneyo. Nte utịn asiahade, enye okụt sụk mbukpọn̄, edi ke ini utịn ayamade esịm ufọt uwemeyo, enye okụt kpukpru n̄kpọ ọfọn. Nte ẹkebemde iso ẹtịn̄ ke Mme N̄ke 4:18, ikọt Jehovah ẹmedikụt usụn̄ ọfọn ke nyayama un̄wana akpanikọ otode ntịn̄nnịm ikọ Abasi. Owo iyakke mmọ ẹtụn usụn̄ ke ekịm eke spirit.

Utịn̄ikọ ibuotikọ mbono, “Biọn̄ Utọn̄ ke Ntịn̄nnịm Ikọ Abasi,” ama eti mme andikpan̄ utọn̄ nte ke mme owo oro ẹberide edem ke Jehovah ẹbọhọ edikpu oro mbon oro ẹtienede mme nsunsu messiah ye mme nsunsu prọfet ẹkụtde. Ke edide ata isio, mme n̄kpọ oro ẹdade ẹdiọn̄ọ ata Messiah, Jesus Christ, ẹdi barasuene! Ke uwụtn̄kpọ, utịbe utịbe edikpụhọde mbiet Jesus ama anam ẹbem iso ẹda ẹkụt itie esie nte Edidem Obio Ubọn̄ Abasi oro ẹdoride ke ebekpo. Tọn̄ọ nte ọkọbọ odudu Obio Ubọn̄ ke 1914, Jesus n̄ko edi “ntantaọfiọn̄ usenubọk” emi ẹsiakde ke 2 Peter 1:19. “Nte Ntantaọfiọn̄ Usen edide Messiah, enye ọtọt obufa usen, m̀mê ini, oro esierede ọnọ kpukpru okopitem ubonowo,” ntre ke etịn̄ikọ ọkọdọhọ.

Utịn̄ikọ oro “Ndiyama nte Se Inọde Un̄wana” emi ẹkedade ẹtọn̄ọ edinam uwemeyo ama anam Ephesus 5:8, ebiet emi apostle Paul ọnọde nnyịn item ete ‘isan̄a nte nditọ un̄wana,’ an̄wan̄a. Mme Christian ẹdi mme ọnọ-un̄wana, idịghe sụk ke ndibuana Ikọ Abasi ye mbon efen edi n̄ko ke ndida Bible nsịn ke edinam ke uwem mmọ ke ndikpebe Jesus.

Man idi utọ mme ọnọ-un̄wana ẹmi, ana nnyịn ‘Ikop Idatesịt Ndikot Ikọ Abasi.’ Ẹketat ibuotikọ emi ke nneme ikpehe ita. Ke ama okokot oto Abraham Lincoln, emi okokotde Bible “mfọnn̄kan ẹnọ oro akanam Abasi ọnọde owo,” akpa etịn̄ikọ ama obụp otuowo se edu ukotn̄wed mmọ ayararede aban̄a ntotụn̄ọ esịtekọm mmọ kaban̄a Ikọ Jehovah. Ẹma ẹsịn udọn̄ ẹnọ mme andikpan̄ utọn̄ ndikot Bible ye ntịn̄enyịn, ẹdade ini ndikụt mme n̄kpọ ke N̄wed Abasi ndinyụn̄ nda mbufa n̄kpọ ndian ye mme n̄kpọ oro ẹma ẹkefọfiọk.

Udiana ikpehe ke nneme oro ama enen̄ede owụt ufọn ukpepn̄kpọ, idịghe enyọn̄ enyọn̄ edikot n̄wed, edieke anade nnyịn idia “ọkpọsọn̄ udia.” (Mme Hebrew 5:13, 14) Etịn̄ikọ ama ọdọhọ ete ke ukpepn̄kpọ eyenen̄ede edi se ibọpde-bọp edieke nnyịn ibakde “iwụk esịt nnyịn,” ukem nte oku Israel oro Ezra akanamde. (Ezra 7:10) Edi ntak emi ukpepn̄kpọ edide akpan n̄kpọ ntre? Koro enye enyenede n̄kpọ ndinam nnennen nnennen ye itie ebuana nnyịn ye Jehovah. Ntem, ukpepn̄kpọ Bible enyene ndidi n̄kpọ oro ọsọn̄de urua, enemde, onyụn̄ ọfọnde, idem okposụkedi emi abuanade edinọ ekikere ntụnọ onyụn̄ abuanade ukeme. Didie ke nnyịn ikeme ndinyene ini nnọ ukpepn̄kpọ oro enyenede ufọn? Ebe ke ‘ndidedep ifet’ nto mme edinam oro mînen̄ekede idi akpan n̄kpọ, ntre ke akpatre etịn̄ikọ ke nneme oro ọkọdọhọ. (Ephesus 5:16) Ih, ukpọhọde edinyene ini edi ndida ini oro nnyịn inyenede nnam n̄kpọ nte ọfọnde.

Utịn̄ikọ oro “Abasi Ọnọ Mbon Mba Odudu” ama owụt nte ke ediwak owo ẹkpa mba mfịn. Man nnyịn ikeme ndinyene “akwa ubom odudu” ke utom ukwọrọikọ Christian, oyom nnyịn iberi edem ke Jehovah, emi ‘ọnọde mbon mba odudu.’ (2 Corinth 4:7; Isaiah 40:29) Mme n̄kpọ oro ẹnọde nsọn̄idem ẹsịne Ikọ Abasi, akam, esop Christian, edibuana ke utom ukwọrọikọ kpukpru ini, mme esenyịn Christian, ye uwụtn̄kpọ edinam akpanikọ mbon efen. Ibuotikọ oro “Ẹdi Mme Anditeme Adan̄aemi” ama owụt ufọn mme Christian ndidi mme andikpep ọkọrọ ye mme ọkwọrọikọ ndinyụn̄ nam utom ọkpọsọn̄ ndifori “usọ unọ ukpep” mmọ.—2 Timothy 4:2, NW.

Akpatre utịn̄ikọ usen oro, “Mme Andin̄wana ye Abasi Idikanke,” ama etịn̄ aban̄a ndiọi ukeme oro ẹsịnde ke ndondo emi ke ndusụk idụt ndikot Mme Ntiense Jehovah enyene-ndịk n̄ka. Edi iyomke nnyịn ifehe ndịk, koro Isaiah 54:17 ọdọhọ ete: “Baba n̄kpọ ekọn̄ kiet eke ẹbotde ẹban̄a fi idikwe unen; afo oyonyụn̄ anam ikọ etịp kpukpru edeme eke ẹdahade ẹda ẹnam ikọ ye afo. Jehovah ọdọhọ ete, Emi edi udeme ikọt Jehovah, edinen ido mmọ onyụn̄ oto ye ami.”

ỌYỌHỌ USEN IBA: Mme N̄kpọ Oro Ẹdade N̄wed Ntịn̄nnịm Ikọ Abasi Ẹnam Ẹfiọk

Ke ẹma ẹkeneme itien̄wed Abasi eke usen oro, mbon oro ẹkedụkde ẹma ẹkop ọyọhọ nneme iba ke mbono oro, ke ibuotikọ oro “Ndinọ  Jehovah Ubọn̄ nte Mme Ọnọ-Un̄wana.” Akpa utịn̄ikọ ama owụt nte ke uduak mme Christian edi ndinọ Jehovah ubọn̄ ebe ke ndikwọrọ ikọ ke kpukpru ebiet. Udiana ikpehe ama etịn̄ ufọn ndida mbon oro ẹnyenede udọn̄ n̄wụt esop Abasi. Didie? Ebe ke ndida minit ition m̀mê duop mbemiso m̀mê ke ukpepn̄kpọ Bible kiet kiet okụrede ndiwụt nte esop Abasi anamde utom. Ọyọhọ utịn̄ikọ ita ke nneme emi ama ọsọn̄ọ owụt ufọn ndinọ Abasi ubọn̄ ebe ke nti utom.

Utịn̄ikọ oro “Nen̄ede Ma Mme N̄kpọ Editi Jehovah” ama asat mme ufan̄ikọ ke Psalm 119 eneme. Ke akpanikọ, nnyịn imoyom mme n̄kpọ editi, koro kpukpru nnyịn imenyene ntụhọ ndifre n̄kpọ. Do, edi akpan n̄kpọ didie ntem nnyịn ndikọri ima nnọ mme n̄kpọ editi Jehovah, ukem nte andiwet psalm ọkọkọride!

Ekem ẹma ẹnyene akpan nneme—utịn̄ikọ baptism ke ibuotikọ oro “Ndinam Ntịn̄nnịm Ikọ Ada Esịm Baptism.” Ẹma ẹti mbon oro ẹyomde ndina baptism ẹte ke mmọ ikpebeke Christ ke ndina baptism kpọt edi n̄ko ke nditiene nde ikpat esie ketket. (1 Peter 2:21) Nso ifet ke mbufa owo ẹmi ẹnyene ntem ndibuana ke edisu eke John 10:16, emi Jesus ekebemde iso etịn̄ nte ke imọ iyatan̄ “mme erọn̄ en̄wen” ibok man ẹnam utom ọtọkiet ye mme mbet oro ẹyetde aran ke spirit!

Ke ntọn̄ọ edinam uwemeyo, utịn̄ikọ oro “Kop Se Spirit Ọdọhọde” ama anam an̄wan̄a nte ke spirit Jehovah etịn̄ ikọ ọnọ nnyịn ebe ke Bible, “asan̄autom emi anamde akpanikọ, onyụn̄ enyenede ọniọn̄,” ye ubieresịt nnyịn oro Bible ọnọde ukpep. (Matthew 24:45) Ntem, iyomke mme Christian ẹkop ata ata uyo otode heaven man ẹfiọk nte ẹkemede ndinem Abasi esịt. Nneme emi eketienede, “Sọn̄ọ Yịre ke Ukpepn̄kpọ eke Ekemde ye Uten̄e Abasi,” ama akpak mme Christian ete ẹkûtiene mbiara ekikere emi ererimbot emi asuande. Ke akpanikọ, ọkpọsọn̄ udọn̄ oro owo mîkpemeke ekeme ndinam nnyịn ikot mme ntọt oro ẹnọde unan ẹtode mbon nsọn̄ibuot ye n̄kpọutom Satan eken. Ọfọn didie ntem ndikot Bible ọkọrọ ye kpukpru ibuotikọ ke Enyọn̄-Ukpeme ye Awake!

Ibuotikọ utịn̄ikọ efen ekedide “Mụm Ido Nti Ikọ Kama” ama owụt ufọn edimehe ọyọhọ ọyọhọ ye “ido,” m̀mê ndutịm N̄wed Abasi, edide akpanikọ. (2 Timothy 1:13, NW) Ndimụm ido emi n̄kama idịghe ukpọhọde edinyene uten̄e Abasi kpọt edi n̄ko ke ndidiọn̄ọ n̄kpọ emi mîdụhe ke n̄kemuyo ye akpanikọ.

Kere nte Jehovah ekpesede fi nte se ẹyomde. Nso ukpono ke oro ekpedi ntem! Ọkọn̄ọde ke ntịn̄nnịm ikọ Haggai, utịn̄ikọ oro “‘Se Ẹyomde’ ke Ẹyọhọ Ufọk Jehovah” ama enen̄ede edi n̄kpọ nsịnudọn̄ koro enye ama ọnọ mme andikpan̄ utọn̄ nsọn̄ọ nte ke Jehovah enen̄ede ama andibuana kiet kiet ke “akwa otuowo.” (Ediyarade 7:9) Ke ntre, Jehovah eyekpeme mmọ ke akpatre ‘edinyen̄e’ mme idụt ke ini “akwa ukụt” oro edide. (Haggai 2:7, 21, 22; Matthew 24:21) Nte ededi, kan̄a ke emi, ana ikọt Jehovah ẹdu ke ukpeme ke n̄kan̄ eke spirit, nte ẹkenamde an̄wan̄a ke ikpehe oro “Mme Itien̄wed Ntịn̄nnịm Ikọ Ẹdemede Nnyịn Ndidu ke Ukpeme.” Etịn̄ikọ ama okot oto ikọ Jesus: “Ẹkpeme ndien: koro mbufo mîfiọkke usen eke Ọbọn̄ mbufo edide.” (Matthew 24:42) Didie ke nnyịn ikeme ndisọn̄ọ ndu ke ukpeme eke spirit? Ebe ke ndika iso nyọhọ ye utom Jehovah, ibọn̄de akam kpukpru ini, inyụn̄ ikade iso nditie mbet akwa usen Jehovah.

Akpatre utịn̄ikọ ke usen oro ekedi ke ibuotikọ oro “Ntịn̄nnịm Ikọ ke Utịt Ini.” Ẹyeti enye ke ediwak isua oro ẹdidide. Ntak-a? Koro etịn̄ikọ ama ọtọt edisio obufa n̄wed oro—Nọ Ntịn̄enyịn ke Prọfesi Daniel! Etịn̄ikọ ama ọdọhọ ete: “N̄wed emi edide page 320, emi enyenede ndiye ndise mi eneme kpukpru ikpehe ke n̄wed Daniel.” Nso uyarade oro ọsọn̄ọde mbuọtidem ke emi edi ntem nte ke Jehovah ke esịn un̄wana ke ntịn̄nnịm Ikọ esie!

ỌYỌHỌ USEN ITA: Ntịn̄nnịm Ikọ Abasi Akananam Ikpụhu

Akpatre usen mbono emi ọkọtọn̄ọ ye nneme oro “Mme Ntịn̄nnịm Ikọ eke Edimek Ini.” Ikpehe ita ẹmi ẹma ẹdụn̄ọde ntọt ubiereikpe nsobo Jehovah ita oro prọfet Habakkuk ọkọnọde. Akpa akaban̄a otụtutọn̄ Judah ndien udiana akaban̄a Babylon oro eketiede ufịk ufịk. Akpatre, emi mî sụhu kan̄a, enyene n̄kpọ ndinam ye nsobo kpukpru ndiọi owo emi asan̄ade ekpere. Ke etịn̄de aban̄a Armageddon, eyenete ekenemede akpatre ikpehe ke nneme oro ama esịn otu owo eti udomo mbak Abasi ke idem ke ini enye ọkọdọhọde ete: “Ke akpanikọ, eyenyene uten̄e ke ini Jehovah edisanade ofụri akwa odudu esie ayak.”

“Ndiwụt Esịtekọm Mban̄a N̄kpọ-Akpa eke Spirit Nnyịn” ekedi ibuotikọ aduai-owo-idem drama Bible eke mbono oro. Edinam emi okodụn̄ọrede edu owo mi ama owụt ukpụhọde ke edu Jacob ye Esau kaban̄a mme n̄kpọ eke spirit. Esau ama esịn n̄kpọ-akpa eke spirit esie ke ndek, anamde ẹyak ẹnọ Jacob, emi akadade enye nte n̄kpọuto. Ẹma ẹbụp mme andidụk mbono ẹte: “Nso [n̄kpọ-akpa eke spirit] ke Jehovah ọnọ nnyịn?” Etịn̄ikọ ama ọbọrọ ete: “Akpanikọ oro odude ke Ikọ esie, kpa Bible; idotenyịn nsinsi uwem; ye ukpono ndida ke ibuot esie nte mme anditan̄a eti mbụk.”

Utịn̄ikọ efen ekedi ke ibuotikọ oro “Nso ke Ọsọn̄urua N̄kpọ-Akpa Nnyịn Ọwọrọ Ọnọ Fi?” Nnyịn iwụt nnennen edu kaban̄a n̄kpọ-akpa eke spirit nnyịn ke ndinịm utom Jehovah ye mme ifetutom eke spirit akpa mbemiso mme udọn̄ n̄kpọ obụkidem. Ke usụn̄ emi nnyịn iyọbọp uwem nnyịn ikanade itie ebuana nnyịn ye Jehovah, ke edide ata isio ye Adam, Esau, ye nditọ Israel ẹmi mîkanamke akpanikọ.

Utịn̄ikọ an̄wa oro, “Ndinam Kpukpru N̄kpọ Ẹdi Mbufa—Nte Ẹkebemde Iso Ẹtịn̄,” ama adian akpan ntịn̄nnịm ikọ inan̄ aban̄ade “mbufa enyọn̄” ye “obufa isọn̄” ọtọkiet. (Isaiah 65:17-25; 66:22-24; 2 Peter 3:13; Ediyarade 21:1, 3-5) Nte an̄wan̄ade, Jehovah ama enyene n̄kponn̄kan edisu mme ntịn̄nnịm ikọ ẹmi ke ekikere akan enye oro okosude ọnọ ikọt esie oro ẹkefiakde ẹwụk ke 537 M.E.N. Ih, enye ekenyene ekikere aban̄a ukara Obio Ubọn̄ esie (“mbufa enyọn̄”) ye mme andidu ke idak esie eke isọn̄ (“obufa isọn̄”), ẹmi ẹdidụn̄de ke ubọn̄ ubọn̄ paradise ofụri ekondo.

Utịn̄ikọ oro “Idotenyịn Nnyịn nte Ikọ Abasi Adade Nnyịn Usụn̄” ama ada mbono oro ekeberi ke usụn̄ oro aduaide owo idem onyụn̄ edemerede udọn̄. Enye ama eti kpukpru owo nte ke “ẹsịbe ini omụhọ” kaban̄a edinam utom editan̄a Obio Ubọn̄ emi mma. (1 Corinth 7:29) Ih, nnyịn ida ke ata enyịnusụn̄ edisu ubiereikpe Jehovah kaban̄a Satan ye ofụri idiọk editịm n̄kpọ esie. Ekikere nnyịn akpakam edi ukem nte eke andiwet psalm emi ọkọkwọde ete: “Ukpọn̄ nnyịn ebebet Jehovah: enye edi andin̄wam nnyịn ye otu-ekọn̄ nnyịn.” (Psalm 33:20) Nso ubọn̄ ubọn̄ idotenyịn ina ke iso ntem ibet mbon oro idotenyịn mmọ ọkọn̄ọde ke ntịn̄nnịm ikọ Abasi!

[Ndise ke page 7]

Drama oro akaduaide owo idem ama esịn udọn̄ ọnọ ediwụt esịtekọm kaban̄a n̄kpọ-akpa eke spirit eke mme asan̄autom Jehovah

[Ndise ke page 7]

Ediwak owo oro ẹkenamde ntịn̄nnịm ikọ Abasi ẹma ẹna baptism