Jehovah Idinamke Ubịghi

“[N̄kukụt] ama ebịghi, bet enye; koro enye mîditreke [ndisu], mîdinyụn̄ ibehe ini.”—HABAKKUK 2:3.

1. Ewe ubiere ke ikọt Jehovah ẹnam, ndien emi onụk mmọ ndinam nso?

 “NYADA ke itie-ukpeme mi.” Ubiere prọfet Abasi oro Habakkuk ekedi oro. (Habakkuk 2:1) Ikọt Jehovah eke ọyọhọ isua ikie 20 emi ẹmewụt ukem ubiere oro. Ntem, mmọ ẹmenam n̄kpọ ifịk ifịk ẹban̄a ikot oro ẹkenọde ke n̄wọrọnda mbono ẹkenịmde ke September 1922 ẹte: “Emi edi akakan usen. Sese, Edidem ada ubọn̄! Mbufo ẹdi mme ọnọ-ntọt esie. Mmọdo ẹtan̄a, ẹtan̄a, ẹtan̄a, Edidem ye obio ubọn̄ esie.”

2. Ke ẹma ẹkenam ẹfiak ẹdu ke idaha ndinam ifịk ifịk utom ke Ekọn̄ Ererimbot I ama okokụre, nso ke mme Christian oro ẹyetde aran ẹkekeme nditan̄a?

² Ke Ekọn̄ Ererimbot I ama okokụre, Jehovah ama anam nsụhọ oro ẹyetde aran ẹdu ke idaha ndinam ifịk ifịk utom. Ukem nte Habakkuk, owo mmọ kiet kiet ekeme nditan̄a ete: “[Nyenịm] idem ke enyọn̄ ọkpọsọn̄ ọtọ obio, nnyụn̄ ntịn̄ enyịn man n̄kụt se enye edidọhọde mi.” Ẹda mme ikọ Hebrew oro ẹkabarede “tịn̄ enyịn” ye “kpeme” ndien ndien ke ediwak ntịn̄nnịm ikọ.

‘Idibehe Ini’

3. Ntak emi anade nnyịn ikpeme?

³ Nte Mme Ntiense Jehovah ẹnọde ntọt Abasi mfịn, ana mmọ ẹdu ke edidemede kpukpru ini man ẹnam mme ikọ oro ẹkedade ẹberi akwa ntịn̄nnịm ikọ Jesus: “Mbufo ẹkpeme ndien; koro mbufo mîfiọkke ini eke ete-ufọk edidide, m̀mê ke mbubịteyo, m̀mê ke ufọt okoneyo, m̀mê ke ini ekikọ ọkpọkde, m̀mê ke usiere; mbak enye edidi ke mbuat edikụt mbufo nte ẹdede. Se ndọhọde mbufo, mmonyụn̄ ndọhọ kpukpru owo nte, Ẹkpeme.” (Mark 13:35-37) Ukem nte Habakkuk, ye nte asan̄ade ekekem ye mme ikọ Jesus, ana nnyịn ikpeme!

4. Didie ke idaha nnyịn ebiet eke Habakkuk ke n̄kpọ nte 628 M.E.N.?

⁴ Eyedi Habakkuk ekewet n̄wed esie okụre ke n̄kpọ nte 628 M.E.N., idem mbemiso Babylon ekedide odudu ukara ererimbot. Ke ediwak isua, ẹma ẹtan̄a ubiereikpe Jehovah ẹnọ ọsọn̄ibuot Jerusalem. Edi, n̄kpọ ikodụhe ndiwụt in̄wan̄în̄wan̄ ini emi ẹdinamde ubiereikpe oro. Anie ekpekenịm ke n̄kpọ nte isua 21 kpọt ke ukperedem nte ke Babylon edidi andisobo oro Jehovah emekde? Kpasụk ntre mfịn, nnyịn ifiọkke ‘usen m̀mê hour oro’ ẹnịmde ẹnọ editịm n̄kpọ emi ndisịm utịt, edi Jesus ama ebem iso odụri nnyịn utọn̄ ete: “Ẹben̄e idem; koro ke ini eke mbufo mîdorike enyịn, Eyen Owo eyedi.”—Matthew 24:36, 44.

5. Nso inen̄ede idi n̄kpọ nsịnudọn̄ ke mme ikọ Abasi oro ẹwetde ke Habakkuk 2:2, 3?

⁵ Ye eti ntak, Jehovah ama ọnọ Habakkuk aduai-owo-idem utom emi: “Wet n̄kukụt emi, nyụn̄ kap enye sịn ke itiat n̄wed, man andikot enye ọsọp ukot. Koro n̄kukụt anade kan̄a ọnọ ini emi ẹnịmde; ndien enye oyosioro uyo ke utịt, idinyụn̄ isụho nsu: enye ama ebịghi, bet enye; koro enye mîditreke ndidi, mîdinyụn̄ ibehe ini.” (Habakkuk 2:2, 3) Mfịn, idiọkido ye afai ẹtara ẹyọhọ ke ofụri isọn̄, owụtde ke nnyịn imenen̄ede ikpere “akwa usen Jehovah emi enyenede ndịk.” (Joel 2:31) Ke akpanikọ, mme  ikọ nsọn̄ọ ẹmi Jehovah ọnọde ẹdi n̄kpọ nsịnudọn̄: ‘Idibehe ini’!

6. Didie ke nnyịn ikeme ndibọhọ usen ubiereikpe emi edide?

⁶ Didie, ndien, ke nnyịn ikeme ndibọhọ usen ubiereikpe oro edide? Jehovah ọbọrọ ebe ke ndiwụt ukpụhọde emi ke ufọt edinen owo ye idiọkowo: “Sese, owo ntan̄idem! ukpọn̄ esie inenke enye ke idem: ndien edinen owo oyodu uwem ke mbuọtidem esie.” (Habakkuk 2:4) Mme atan̄-idem ye mme ọdiọk-itọn̄ andikara ye mme owo ẹmeda iyịp ediwak miliọn mbon oro mîduehe ẹyọhọ mbụk eyomfịn, akpan akpan ke ekọn̄ ererimbot mbiba ye ke nsobo ekpụk. Ke edide isio, mme ama-emem asan̄autom Abasi ẹmi ẹyetde aran ẹmeyọ ke edinam akpanikọ. Mmọ ẹdi “edinen idụt emi enịmde akpanikọ.” Idụt emi, ke adianade ye mme nsan̄a esie, kpa “mme erọn̄ en̄wen,” ẹtiene item emi: “Mbufo ẹbuọt idem ye Jehovah ke nsinsi; koro Jah Jehovah edide nsinsi itiat.”—Isaiah 26:2-4; John 10:16.

7. Nte ekemde ye se Paul akadade Habakkuk 2:4 etịn̄, nso ke ana nnyịn inam?

⁷ Ke ewetde n̄wed ọnọ ẹsọk mme Christian ẹdide mme Hebrew, apostle Paul okokot oto Habakkuk 2:4 ke ini akasiande ikọt Jehovah ete: “Ana nte mbufo ẹnyene ime man ẹbọ se Abasi ọkọn̄wọn̄ọde, ke ẹma ẹkenam se Enye amade. Koro osụk ata ekpri esisịt, ndien Enye emi edide eyedi, idinyụn̄ ibịghike. Edi edinen owo Mi edidu uwem ke mbuọtidem: ndien edieke enye edịghede afiak edem, ukpọn̄ Mi idikopke inemesịt ye enye.” (Mme Hebrew 10:36-38) Eyo nnyịn idịghe ini nditek ke ifịk m̀mê ndikọmọ ke mbubehe uma inyene obụkidem ye idat idat usụn̄ unọ idem inemesịt eke ererimbot Satan. Nso ke ana nnyịn inam tutu “ata ekpri esisịt” ini oro okụre? Ukem nte Paul, ana nnyịn emi idude ke edisana idụt Jehovah ‘inyanade ibịne se inade ke iso; isịn ifịk ibịne utịt mbuba’ nsinsi uwem. (Philippi 3:13, 14) Ndien ukem nte Jesus, ana nnyịn ‘iyọ kaban̄a idatesịt eke anade nnyịn ke iso.’—Mme Hebrew 12:2.

8. Anie edi “owo” eke Habakkuk 2:5, ndien ntak emi enye mîdikwe unen ndomokiet?

⁸ Habakkuk 2:5 etịn̄ aban̄a “owo” emi, ke edide isio ye mme asan̄autom Jehovah, okpude ndisịm utịt mbuba esie, idem okposụkedi enye ‘anamde udọn̄ esie an̄wan̄a nte udi.’ Anie edi owo emi ‘mîkopke uyụhọ’ mi? Ye ukem ọkpọsọn̄ udọn̄ emi Babylon eke eyo Habakkuk ekenyenede, ntan̄ndian “owo” emi, kpa mme odudu ukaraidem—edide ẹdi Fascist, Nazi, Communist, m̀mê idem inua-okot ukara mbio obio—an̄wana ekọn̄ man atat isọn̄ esie. Enye n̄ko ọdọn̄ mme ukpọn̄ oro mîduehe ke Sheol, kpa udi, ọyọhọ. Edi abian̄a abian̄a ntan̄ndian “owo” eke ererimbot Satan emi, emi iseri idemesie oyụhọde enye nte mmịn, ikwe unen ndomokiet ke ndidomo ‘nditan̄ kpukpru mme idụt ke idemesie, nnyụn̄ mbon kpukpru mme obio ke ọtọ esie.’ Jehovah Abasi kpọt ekeme  ndinam ofụri ubonowo adiana kiet, ndien enye edinam emi ebe ke Obio Ubọn̄ Messiah.—Matthew 6:9, 10.

Akpa ke Otu In̄wan̄în̄wan̄ Nnama Ition

9, 10. (a) Nso ke Jehovah aka iso nditọt ebe ke Habakkuk? (b) Kaban̄a edidia idiọk udori, nso idaha idu mfịn?

⁹ Ebede ke prọfet esie Habakkuk, Jehovah aka iso nditọt udịm udịm nnama ition, mme ubiereikpe oro anade ẹnam ke ndinam isọn̄ ọfọn man edi se mme anam-akpanikọ andituak ibuot nnọ Abasi ẹdụn̄de. Utọ mbon eti esịt ẹmi ‘ẹmen ikwọ’ oro Jehovah ọnọde. Nnyịn ikot ke Habakkuk 2:6 ite: “Osụk ọdiọk ọnọ owo eke ọkọde ediwak n̄kpọ eke mînyeneke enye: adan̄a didie? onyụn̄ adade mbiomo n̄kpọ ubiọn̄ odori idemesie.”

¹⁰ Mi ẹdori nsọn̄uyo ke edidia idiọk udori. Ke ererimbot emi akande nnyịn okụk, mme imọ owo ẹdọdiọn̄ ẹforo, mme ubuene ẹnyụn̄ ẹdọdiọn̄ ẹbuene. Mme anam-mbubehe unyam n̄kpọsọn̄ ibọk ye mbon n̄wo ẹnyene akaka uforo, ke adan̄aemi ediwak ke otu usụhọde owo ẹkpade biọn̄. Ẹdọhọ ẹte ke mbahade kiet ke itie inan̄ ke otu ibatowo ẹmi ẹdude ke ererimbot ẹdi mme ọkpọikpọi ubuene. Mme idaha udu uwem ẹnyene ndịk ke ediwak idụt. Mbon ẹmi ọdọn̄de mmọ ndikụt edinen ido ke isọn̄ ẹfiori ẹte: “Adan̄a didie” ke ukwan̄ikpe emi ọtọt ntem! Edi, utịt ke ekpere! Ke akpanikọ, n̄kukụt ‘idibehe ini.’

11. Habakkuk etịn̄ nso aban̄a ediduọk iyịp owo, ndien ntak emi nnyịn ikemede ndidọhọ ke akwa ubiomikpe iyịp odu ke isọn̄ mfịn?

¹¹ Prọfet oro asian idiọkowo ete: “Koro afo owode ediwak mme idụt, kpukpru mme idụt eke ẹsụhọde ẹyenyụn̄ ẹbụme fi, ẹban̄a iyịp owo, ye afai isọn̄, ye eke obio, ye eke kpukpru mme andidụn̄ ke esịt.” (Habakkuk 2:8) Nso ubiomikpe iyịp ke nnyịn ikụt ke isọn̄ mfịn ntem! Jesus ama etịn̄ in̄wan̄în̄wan̄ ete: “Kpukpru owo eke ẹmende ofụt ẹyekpan̄a ke ofụt.” (Matthew 26:52) Edi, ke ọyọhọ isua ikie 20 kpọt, mme idụt ye mme otu ekpụk ẹmi ẹnyenede ubiomikpe iyịp ẹdi ntak n̄kpan̄a mme owo ẹmi ẹbede miliọn ikie. Ọdọdiọk ọnọ mbon ẹmi ẹbuanade ke akpakịp uduọkiyịp emi!

Ọyọhọ Nnama Iba

12. Nso idi ọyọhọ nnama iba emi Habakkuk ekewetde aban̄a, ndien didie ke nnyịn ikeme nditịm mfiọk nte ke idiọk inyene idinyeneke ufọn?

¹² Ọyọhọ nnama iba, emi ẹwetde ke Habakkuk 2:9-11, enyene “owo eke adiade idiọk udori ọnọ ufọk esie, onyụn̄ emenerede efọk esie enịm ke enyọn̄; man enye ọbọhọ ubọk idiọk-n̄kpọ!” Idiọk udori idinyeneke ufọn, nte andiwet psalm anamde an̄wan̄a ete: “Kûdịghe koro owo akabarede edi owo inyene, koro ubọn̄ ufọk esie ọtọtde. Koro enye mîdidaha baba n̄kpọ kiet ke n̄kpa esie; ubọn̄ esie idisụhọkede itiene enye.” (Psalm 49:16, 17) Ntem, odot ẹtịm ẹfiọk ọniọn̄ ọniọn̄ item Paul: “Sọn̄ọ dọhọ mme enyene-n̄kpọ ke eyo emi, ete mmọ ẹkûmenede idem, ẹkûnyụn̄ ẹdori enyịn ke se iyan̄ade owo nte [inyene], edi ẹdori enyịn ke Abasi, emi ọnọde nnyịn kpukpru n̄kpọ uwak-uwak, ete idara ke esịt.”—1 Timothy 6:17.

13. Ntak emi nnyịn ikpakade iso ndinọ ntọt Abasi?

¹³ Edi akpan n̄kpọ didie ntem ete ẹnọ etop ubiereikpe Abasi mfịn! Ke ini mme Pharisee ẹkebiọn̄ọde otuowo nditoro Jesus nte “Edidem emi edide ke enyịn̄ Jehovah,” enye ama ọdọhọ ete: “Ndọhọ mbufo nte, Edieke mme mmọ ẹmi ẹkpedopde uyo, mme itiat ẹkpesio n̄kpo.” (Luke 19:38-40) Kpasụk ntre, edieke ikọt Abasi mfịn ẹkpekpude ndiyarade idiọkido emi odude ke ererimbot emi, ‘itiat ekpetie ke ibibene eseme.’ (Habakkuk 2:11) Ntre ẹyak nnyịn ika iso inọ ntọt Abasi uko uko!

 Ọyọhọ Nnama Ita ye N̄kpọ Aban̄ade Ubiomikpe Iyịp

14. Mme ido ukpono ererimbot ẹnyene ubiomikpe iyịp ewe?

¹⁴ Ọyọhọ nnama ita emi Habakkuk ọkọtọtde aban̄a ubiomikpe iyịp. Habakkuk 2:12 ọdọhọ ete: “Osụk ọdọdiọk ọnọ owo eke adade iyịp ọbọp obio, onyụn̄ ọsọn̄ọde enịm obio ke ukwan̄ n̄kpọ!” Ke editịm n̄kpọ emi, ukwan̄ido ye uduọkiyịp ẹwak ndisan̄a ikpat kiet. Nte an̄wan̄ade, mme ido ukpono ererimbot ẹdi ntak akpakịp enyene-ndịk uduọkiyịp ke mbụk. Nnyịn ikam inyene ndisiak mme Ekọn̄ Ido Ukpono, ẹmi ẹkemende mme inua-okot Christian ẹketọ ye mbon Muslim; Ukara Ufịk Ido Ukpono Catholic ke Spain ye Latin America; Ekọn̄ Isua Edịp-ye-Duop ke Europe ke ufọt Protestant ye Catholic; ye enye emi ẹkeduọkde iyịp ẹkan ke otu kpukpru mmọ, ekọn̄ ererimbot iba eke isua ikie nnyịn, ẹmi mbiba ẹketọn̄ọde ke ikpehe Christendom.

15. (a) Nso ke mme idụt ẹka iso ndinam ye ibetedem m̀mê unyịme ufọkabasi? (b) Nte Edidiana Mme Idụt ekeme ndikpan edida n̄kpọekọn̄ nyọhọ ererimbot emi?

¹⁵ Kiet ke otu ndiọkn̄kan ikpehe ke ekọn̄ ererimbot ọyọhọ iba ekedi akpakịp Nsobo eke Orụk eke mbon Nazi, emi ẹkesobode ediwak miliọn mme Jew ye mbon eken ẹmi mîduehe ke Europe. Ke ata ndondo emi ke ukara Roman Catholic ke France ẹnyịme nte ke ima ikpu ndibiọn̄ọ ediwot ediwak tọsịn owo ke mme itie ikie ke mme itie uwotowo Nazi. Edi, mme idụt ẹka iso ẹtịm idem ẹnọ uduọkiyịp, ẹnyenede ibetedem m̀mê unyịme ufọkabasi. Ke etịn̄de aban̄a Ufọkabasi Orthodox Russia, magazine Time (nsiondi ofụri ererimbot) ọkọdọhọ ke ndondo emi ete: “Ufọkabasi emi ẹfiakde ẹdemede mi ama enyene idiọk odudu n̄ko ke ikpehe emi owo mîkekereke-kere ini kiet ko: udịmekọn̄ Russia. . . . Ndiben̄e edidiọn̄ nnọ mme ubomofụm ekọn̄ ye mme itieidụn̄ mbonekọn̄ emekpere ndikabade ndi ido edinam. Ke November, ke Ufọkidụn̄ N̄ka Mọn̄k Danilovsky ke Moscow, kpa ifịm ukara Ete Ido Ukpono Russia, ufọkabasi ama aka anyan ekesịm ndida edidiọn̄ nnọ itie ubon n̄kpọekọn̄ nuclear Russia.” Nte Esop Edidiana Mme Idụt ekeme ndikpan edifiak nda mme ibak ibak n̄kpọekọn̄ nyọhọ ererimbot emi? Ikemeke! Nte ekemde ye n̄wedmbụk n̄kpọntịbe The Guardian eke London, England, andibọ Enọ Emem Nobel kiet ama etịn̄ ete: “Se ikamade ndutịme ikan edi nte ke idụt ition ẹmi ẹdide mme akpan andibuana ke Esop Ifụre UN ẹdi akpan idụt ition ẹmi ẹnyamde n̄kpọekọn̄ ke ererimbot.”

16. Jehovah edinam nso ye mme idụt ẹmi ẹsịnde nsọk ẹnọ ekọn̄?

¹⁶ Ndi Jehovah eyebiere ikpe ọnọ mme idụt ẹmi ẹsịnde nsọk ẹnọ ekọn̄? Habakkuk 2:13 ọdọhọ ete: “Sese, nte idịghe Jehovah mme udịm esịn mme idụt ẹkpa utom ẹnọ idem ikan̄, esịn mme obio ẹkpa mba ke ikpîkpu?” “Jehovah mme udịm”! Ih, Jehovah enyene udịmekọn̄ eke heaven edide mme angel, emi enye edidade osobo mme owo ye mme idụt ẹmi ẹmade ekọn̄!

17. Ifiọk Jehovah ediyọhọ ererimbot ekesịm nso udomo ke enye ama ekebiere ikpe ọnọ otu mme idụt afai?

¹⁷ Nso iditiene ke Jehovah ama ekebiere ikpe ọnọ otu mme idụt afai oro? Habakkuk 2:14 ọnọ ibọrọ: “Ifiọk ubọn̄ Jehovah ọyọyọhọ ke ererimbot, kpa nte mmọn̄ ofụkde inyan̄.” Nso akwa idotenyịn ke emi edi ntem! Ke Armageddon, ẹyewụt unen itie edikara Jehovah ke nsinsi. (Ediyarade 16:16) Enye ọsọn̄ọ ọnọ nnyịn nte ke imọ ‘iyokpono ebiet ukot imọ,’ kpa isọn̄ emi nnyịn idụn̄de. (Isaiah 60:13) Ofụri ubonowo ọyọbọ ukpep ke usụn̄ uwem Abasi, man otodo ifiọk ubọn̄ ubọn̄ uduak  Jehovah ọkpọyọhọ ererimbot kpa nte mmọn̄ ọyọhọde isọn̄ inyan̄.

Ọyọhọ Nnama Inan̄ ye Ition

18. Nso idi ọyọhọ nnama inan̄ emi Habakkuk ọtọtde, ndien didie ke emi owụt idem ke idaha ido uwem ererimbot mfịn?

¹⁸ Ẹtịn̄ ẹban̄a ọyọhọ nnama inan̄ ke Habakkuk 2:15 ye mme ikọ ẹmi: “Osụk ọdọdiọk ọnọ owo eke ọnọde mbọhọidụn̄ esie n̄kpọ ọn̄wọn̄; eke ọtọhọde ifụtesịt fo, onyụn̄ anamde enye ọn̄wọn̄ akpa, man enye okụt mmọ iferi!” Emi ọnọ ekikere aban̄a ebeubọk idaha ntụtutọn̄ ererimbot eyomfịn. Oburobụt ido esie, emi mme anana-ukpan otu ido ukpono ẹkam ẹnọde ibetedem, aka iso ndidọdiọk n̄kan. Ndiọi udọn̄ọ, utọ nte AIDS ye mme udọn̄ọ eken ẹmi ẹmende ẹto idan̄, ke ẹsuana usọp usọp ke ofụri isọn̄. Utu ke ndiwụt “ubọn̄ Jehovah,” emana ami-ndi-akpa eke mfịn ke ọdọdiọn̄ osụhọde odụk idiọk edinam onyụn̄ ekpere ndibọ ubiereikpe Abasi. Ke ‘bụt ọyọhọde enye ke idem utu ke ubọn̄,’ ọsọn̄ibuot ererimbot emi ọmọn̄ ọn̄wọn̄ n̄kpọ oto kọp iyatesịt Jehovah, emi adade aban̄a uduak emi enye enyenede ọnọ enye. ‘Bụt oyonyụn̄ odoro ke ubọn̄ esie.’—Habakkuk 2:16.

19. Se ẹtịn̄de mbemiso ọyọhọ nnama ition emi Habakkuk ọkọtọtde enyene ebuana ye nso, ndien ntak emi mme utọ ikọ oro ẹnyenede se ẹwọrọde ke ererimbot mfịn?

¹⁹ Se ẹtịn̄de mbemiso ọyọhọ nnama ition etịm odụri owo utọn̄ ọbiọn̄ọ edituak ibuot nnọ edisọi mbiet. Jehovah anam prọfet oro atan̄a mme okopodudu ikọ ẹmi: “Osụk ọdọdiọk ọnọ owo eke ọdọhọde eto, ete, Demede! men idem! ọdọhọ imụm itiat, ete, Enye eyeteme! Sese, mmọ ẹkụbi enye gold ye silver; baba ibifịk inyụn̄ idụhe enye ke esịt.” (Habakkuk 2:19) Tutu esịm mfịn emi, Christendom ye se ẹkotde mme okpono ndem ẹtuak ibuot ẹnọ mme cross mmọ, Edisana Mary, mme mbiet, ye mme mbiet owo ye unam eken.  Mmọ ẹmi ndomokiet idikemeke ndidaha nda nnyan̄a mme andituak ibuot nnọ mmọ ke ini Jehovah edidide ndibiere ikpe. Ndikụbi mmọ gold ye silver iwọrọke n̄kpọ ndomokiet ke ndimen ndomo ye ubom nsinsi Abasi, Jehovah, ye mme ubọn̄ eke mme odu uwem edibotn̄kpọ esie. Nnyịn ikpakam itoro anana-mbiet enyịn̄ esie ke nsinsi!

20. Ke ewe ndutịm temple ke nnyịn inyene ifet ndinam utom idara idara?

²⁰ Ih, Abasi nnyịn, Jehovah, odot kpukpru itoro. Ye ekikere ntotụn̄ọ ukpono inyenede inọ enye, ẹyak nnyịn inam ọkpọsọn̄ ntọt emi ẹnọde ẹban̄a ukpono ndem do. Edi kpan̄ utọn̄! Jehovah ke osụk etetịn̄ ikọ: “Jehovah odu ke edisana temple esie: ofụri ererimbot, dop uyo ke iso esie.” (Habakkuk 2:20) Nte eyịghe mîdụhe prọfet oro ekenyene temple Jerusalem ke ekikere. Nte ededi, nnyịn mfịn imenyene ifet ndituak ibuot ke ndutịm temple eke spirit emi etịm okponde akan, ke ebiet emi ẹdoride Ọbọn̄ nnyịn Jesus Christ nte Akwa Oku. Mi, ke okụre temple oro eke isọn̄, nnyịn isop idem, inam utom, inyụn̄ ibọn̄ akam, inọde Jehovah ukpono emi odotde ye ubọn̄ ubọn̄ enyịn̄ esie. Ndien nso idatesịt ke nnyịn inyene ntem ke ndinọ ima ima Ete nnyịn eke heaven utuakibuot ofụri esịt nnyịn!

Nte Afo Emeti?

• Didie ke afo ese ikọ Jehovah oro: ‘Idibehe ini’?

• Nso ke mme nnama oro Habakkuk ọkọtọtde ẹda ẹban̄a ke eyomfịn?

• Ntak emi nnyịn ikpakade iso ndinọ ntọt Jehovah?

• Ke ewe okụre temple ke nnyịn inyene ifet ndinam utom?

[Mme Mbụme Ukpepn̄kpọ]

[Mme ndise ke page 15]

Ukem nte Habakkuk, mme asan̄autom Abasi eke eyomfịn ẹdiọn̄ọ ẹte ke Jehovah idinamke ubịghi

[Mme ndise ke page 18]

Ndi afo omowụt esịtekọm ọnọ ifet edituak ibuot nnọ Jehovah ke okụre temple eke spirit esie?

[Ebiet Ẹdade Ndise Ẹto ke page 16]

U.S. Army photo