Ntọt Mme Anditan̄a Obio Ubọn̄

Ndin̄wam Kpukpru Orụk Owo ke Netherlands

ABRAHAM ekedi owo emi enyenede n̄wọrọnda mbuọtidem. “Ke adan̄aemi ẹkotde enye,” nte apostle Paul ọkọdọhọde, Abraham ama okop uyo Abasi onyụn̄ “ọwọrọ aka, ifiọkke n̄kan̄ eke enye akade.” Ke ama akada ofụri ubon esie ọwọrọ, Abraham ama “akabade edi odudụn̄ ke isọn̄ emi Abasi ọkọn̄wọn̄ọde ọnọ enye” ke isua ikie oro okosụhọde ke uwem esie.—Mme Hebrew 11:8, 9.

Kpasụk ntre mfịn, ediwak ke otu Mme Ntiense Jehovah ẹmenyịme n̄kpọ-ata eke ediwọrọ n̄ka idụt en̄wen man ẹkenam utom ke ebiet emi udọn̄ okponde akan. Mbon en̄wen ẹkpep isio isio usem man mmọ ẹkpenọ isenowo ẹmi ẹwọrọde idụn̄ ẹdi idụt mmọ ikọ ntiense. Nte mme uwụtn̄kpọ ẹmi ẹtienede mi ẹwụtde, eti edu emi emeberede ‘usụn̄ akamba ọnọ ndinam akwa utom’ ke Netherlands, emi owo miliọn kiet ke otu owo miliọn 15 ẹmi ẹdụn̄de do ẹtode mme idụt en̄wen.—1 Corinth 16:9.

◻ Bahram, akani andikpep en̄wan unyan̄a idem mbon China, okoto idụt kiet ke Ufọt Ufọt Edem Usiahautịn. Enye ama ọbọ Bible kiet ye ndusụk n̄wed Watch Tower. Ke ufan̄ ọfiọn̄ kiet, Bahram ama ọfiọk ete ke imọ imokụt akpanikọ. Ẹma ẹtọn̄ọ ukpepn̄kpọ ye enye ye n̄wan esie, edi mfịna kiet ama odu—andikpep mmọ Bible ikesemke usem mmọ. Mmọ ẹkesinyene nneme ebe ke ndida idem nnam idiọn̄ọ, ẹdade “ubọk ye ukot” ẹtịn̄ ikọ, nte mmọ ẹtide. Nte ini akakade, Bahram ye n̄wan esie ẹma ẹkeme ndikụt esop kiet emi ẹkesemde usem emana mmọ, ndien ke oro ebede mmọ ẹma ẹnam usọp usọp n̄kọri. Bahram edi Ntiense emi ama akana baptism idahaemi.

◻ N̄wan ye ebe ẹdide mme asiakusụn̄ ẹmi ẹtode Netherlands ẹma ẹsan̄a ẹbịne eren kiet emi otode Indonesia oro akadade ke iso akwa ufọkurua kiet. Enye ke idatesịt ama okop n̄kpaidem ke ini n̄wan ye ebe emi ẹketịn̄de ikọ ye enye ke usem esiemmọ. Ẹma ẹnam mme ndutịm adan̄aoro ndiwaha ntiene enye ke ufọk esie. Ẹma ẹdifiọk ẹte ke enye ama odụn̄ ke Russia ke se iwakde ibe isua 20, ndien ke ini emi enye ama akabade edi abiausọbọ udọn̄ọ iban. Enye ọkọdọhọ ete ke imọ inịmke edidu Abasi ke akpanikọ, edi enye ama enyịme ete ke ini ekededi emi imọ imụmde uman, imọ imesikere ite, “Sese nte idemowo ọfọnde ama! Nso utịben̄kpọ ke emi edi ntem!” Enye ama enyịme ndikpep Bible ndien ikebịghike ama edinịm ke akpanikọ ete ke Andibot odu emi ekerede aban̄a ubonowo. (1 Peter 5:6, 7) Idahaemi enye edi eyenete emi ama akana baptism onyụn̄ odu ke esop emi ẹsemde Indonesian ke Amsterdam.

◻ Ke Rotterdam, kiet ke otu n̄kponn̄kan itiembehe nsụn̄ikan̄ ke ererimbot, otu mme asiakusụn̄ ẹnyene mbufiọk ke ndikwọrọ ikọ nnọ nsio nsio otu usem oro ẹsibehede do ke usen ke usen. Nte utịp ifịk ifịk utom otu mme ọkwọrọikọ ẹmi, ediwak mme awatinyan̄, esịnede etubom nsụn̄ikan̄, akwa owo nsụn̄ikan̄, ye akani owo ukpeme, ẹmenyịme akpanikọ. Idahaemi mmọ n̄kọ ẹn̄wam ndisuan eti mbụk Obio Ubọn̄ Abasi ke ofụri ererimbot.—Matthew 24:14.

Nte edide ke mme ikpehe eken ke ererimbot, Mme Ntiense Jehovah ke Netherlands ẹbiere ndinam udeme mmọ ke nditan̄a nsinsi eti mbụk nnọ kpukpru idụt, esien, usem, ye obio.—Ediyarade 14:6.