Ẹkpri Idem, Ẹnyene Esịt

EKPETIE fi didie ke idem nditịn̄ ikọ nnọ isenowo mban̄a Obio Ubọn̄ Abasi edieke afo ọkpọniọn̄de sentimita 76 (ikpat iba ye ubak) kpọt? Laura ekeme ndisian fi. Ke edide isua 33 ke emana, uniọn̄ esie edi oro, sentimita 76 kpọt. Enye ye eyeneka esie an̄wan, María, emi edide isua 24 ke emana onyụn̄ ọniọn̄de sentimita 86, ẹdụn̄ ke Quito, Ecuador. Yak mmọ ẹtịn̄ mme n̄kpọ ubiọn̄ọ oro mmọ ẹsobode ke utom ukwọrọikọ Christian mmọ.

“Man ikesịm efakutom ukwọrọikọ nnyịn ye mme mbono esop Christian, nnyịn isisan̄a n̄kpọ nte ubak kilomita kiet man ikodụk bọs. Ọtọn̄ọde ke ebiet emi bọs osụkde nnyịn, nnyịn iyafiak isan̄a ubak kilomita kiet man ikodụk bọs efen. Ke ndiọkiso, idat ebua ition ẹdụn̄ ke usụn̄ emi. Ebua ẹsinam nnyịn ndịk etieti koro mmọ ẹkperede ndikponi nte enan̄ mbakara. Man inam mmọ ẹkûfịna nnyịn edieke oro edide se ẹyomde, nnyịn ikesikama anyan eto, emi isidịpde ke mbenusụn̄ mbemiso idụkde bọs man ikeme ndifiak n̄kama ke ini ibede inyọn̄ ufọk.

“Ndidụk bọs ekesidi ata ọkpọsọn̄ n̄kpọ ọnọ nnyịn. Nnyịn isida ke enyọn̄ ibombom mbio ke itiembehe bọs man ikeme ndidụk mmemmem mmemmem. Ndusụk mme awat-ubomisọn̄ ẹsituak ẹda ẹkpere ibombom oro, edi ndusụk isituakke ida. Ke utọ idaha oro, enye emi ọniọn̄de akan ke otu nnyịn ayan̄wam enye emi omụhọde akan ndidụk. Ndidụk ọyọhọ bọs iba esiyom ibe ọkpọusụn̄ emi ubomisọn̄ ẹbede ndien ndien—emi oyom ata ukeme sia ukot nnyịn ẹmụhọde. Ke ntak emi nnyịn imụhọde, ndodobi ekpatn̄wed esidi n̄kpọ-ata efen efen ọnọ nnyịn. Man inam ekpat emi efere, nnyịn isikama Bible udomo ekpatọfọn̄ ndien n̄ko isụhọrede ibat n̄wed oro ikamade.

“Nnyịn mbiba idi emịk toto ke uyen. Mme mbọhọidụn̄ nnyịn ẹdiọn̄ọ ẹte ke nnyịn imesikop ndịk nditịn̄ ikọ ye isenowo. Ke ntre idem akpa mmọ onyụn̄ otụk mmọ esịt ndikụt nte nnyịn ikọn̄de usụn̄ufọk mmọ, ndien mmọ ẹsiwak ndikpan̄ utọn̄ nnọ nnyịn. Edi ke ebiet oro owo mîtịmke idiọn̄ọ nnyịn, mme owo kpukpru ini ẹsise nnyịn n̄kukụre nte mme ikpọn; ntem, mmọ isinen̄ekede inọ nnyịn n̄kpan̄utọn̄ oro odotde ye etop nnyịn. Kpa ye oro, ndikụt ima Jehovah anam nnyịn inyene uko ndika iso ke utom ukwọrọikọ. Editie n̄kere Mme N̄ke 3:5, 6 n̄ko ọnọ nnyịn uko.”

Nte Laura ye María ẹwụtde, ndiyọ kpa ye mmeme ikpọkidem ekeme ndinọ Abasi ubọn̄. Apostle Paul ama ọbọn̄ akam ete ẹsio imọ “n̄kukịm ke obụkidem,” eyedi ukụt eke ikpọkidem, ẹfep. Edi Abasi ọkọdọhọ enye ete: “Mfọn Mi ke ekekem fi; koro ẹnamde odudu mi ọfọn ama ke mmemidem.”  Ih, iyomke ẹmen ndo ikpọkidem ẹfep mbemiso nnyịn ikeme ndinam n̄kpọ Abasi. Ọyọhọ ibetedem ke Abasi ekeme ndin̄wam nnyịn ida idaha nnyịn inam n̄kpọ ke mfọnn̄kan usụn̄. Ke ntak oro Paul ekesede “n̄kukịm ke obụkidem” esie ke usụn̄ emi, enye ama ekeme ndidọhọ ete: “Ke adan̄aemi idem ememde mi, adan̄aoro ke ntịm nnyene nsọn̄idem.” (2 Corinth 12:7, 9, 10) Ndusụk isua ke ukperedem Paul ama ewet ete: “Mmenyene ukeme ndinam kpukpru n̄kpọ ke odudu andisọn̄ọ mi idem.”—Philippi 4:13.

Ke eyomfịn, Abasi ke ada iren, iban, ye nditọwọn̄ ẹmi ẹyakde idem ofụri ofụri ẹnọ enye anam ikpọ n̄kpọ. Ediwak mmọ ẹbiomo ndo ke ndusụk usụn̄. Okposụkedi kpukpru mmọ ẹdoride enyịn Abasi ndikọk udọn̄ọ mmọ ke Obio Ubọn̄ Esie, mmọ ibetke tutu Abasi ọkọk mme mfịna mmimọ mbemiso ẹdomode ndinam se mmọ ẹkemede ke utom esie.

Nte afo emenyene mmeme ikpọkidem? Sọn̄ esịt! Ebede ke mbuọtidem fo, afo emekeme ndidu ke otu mme owo nte Paul, Laura, ye María. Ẹkeme nditịn̄ mban̄a mmọ, nte ẹketịn̄de ẹban̄a iren ye iban mbuọtidem ke eset ẹte: “[Mmọ] ẹwọn̄ọ ẹkpọn̄ mmem-idem ẹkabade ẹkop idem.”—Mme Hebrew 11:34.

[Ndise ke page 8]

María

Laura

[Ndise ke page 9]

María an̄wam Laura odụk bọs

[Mme ndise ke page 9]

“Ebua ẹsinam nnyịn ndịk etieti koro mmọ ẹkperede ndikponi nte enan̄ mbakara”

Isọn̄ isọn̄: Laura ye María ye mbon oro ẹkekpepde Bible ye mmọ