Nam Ntọt Ẹnọde!

ỌKPỌSỌN̄ uyom! Ke June 3, 1991, Obot Fugen ke Japan ama osion̄o idiọk mmọn̄ ye ntọn̄ obot nsụn̄ikan̄, asan̄ade ye ọkpọsọn̄ uyom. Mmọn̄ emi abuahade ye ntọn̄ emi enen̄erede ofiop mi ama ewet osụhọde ke itịghede. Obot oro okobomode mi ama owot owo 43. Ediwak mbon oro ke mfọniso ẹkebọhọde ẹma ẹda unan ata idiọk idiọk. Ndusụk mmọ ẹma ẹfiori ẹte: “Mbọk mmọn̄, mmọn̄.” Mme enịme-ikan̄ ye mme bodisi ẹma ẹfen̄e idat idat ẹka ndin̄wam mmọ.

ẸMA ẹkụt eboho itiat obot nsụn̄ikan̄ ke etịn̄e Obot Fugen n̄kpọ nte urua iba ke mbemiso, ntre mbon ukara ye mme andidụn̄ do ẹma ẹdu ke edidemede. Ke se ibede urua kiet mbemiso afanikọn̄ oro, ẹma ẹnọ ntọt ẹte ẹwọrọ ẹkpọn̄ n̄kann̄kụk oro. N̄kpasịp usen kiet mbemiso obot oro obomode, mme bodisi ẹma ẹdọhọ mme ọkọmbụk n̄kpọntịbe ẹte ẹtre ndibe ndụk ikpehe emi ẹkekpande owo ndidụk. Edi, owo 43 oro ẹkekpan̄ade ke akama-n̄kpa uwemeyo oro ẹkedu ke ikpehe n̄kpọndịk oro.

Ntak emi ediwak owo ntre ẹkebede ẹdụk m̀mê ẹsọn̄ọde ẹdu ke ikpehe oro? Ndusụk mme ọtọin̄wan̄ ẹmi ẹma ẹkewọn̄ọ ẹkpọn̄ ufọk mmọ ẹma ẹfiak ẹka ndise mme inyene ye in̄wan̄ mmọ. Owo ita ẹdide mme ekpepn̄kpọ mban̄a obot nsụn̄ikan̄ ẹma ẹdomo ndisan̄a n̄kpere obot nsụn̄ikan̄ oro nte ẹkekeme man ẹyụhọ udọn̄ mmọ kaban̄a ukpepn̄kpọ. Ediwak mme ọkọmbụk n̄kpọntịbe ye mme osio-ndise ẹma ẹdomo ndisan̄a mbe adan̄a ẹkenịmde koro mmọ ẹkeyomde ndikụt kpukpru n̄kpọ ẹban̄ade edinam obot nsụn̄ikan̄ oro. Awat-ubomisọn̄ ita ẹmi mme ọkọmbụk n̄kpọntịbe ẹkedade ke ukpeokụk ẹma ẹdu ke ebiet oro. Mme bodisi ye mme enịme-ikan̄ ẹmi ẹdide mme anamutom unyịmesịt ẹma ẹdu ke utom. Owo kiet kiet ama enyene ntak emi akanamde enye ebe odụk ikpehe n̄kpọndịk oro—ndien utịp ekedi nte ke enye ama ọduọk uwem esie.

Nte Afo Odu ke Ikpehe N̄kpọndịk?

Ekeme ndidi idịghe kpukpru nnyịn idụn̄ ikpere obot nsụn̄ikan̄. Edi, nso edieke nnyịn isakde iso ise nsobo ofụri ekondo, esịnde kpukpru nnyịn ke ikpehe n̄kpọndịk emi esịnede ofụri ererimbot? N̄wed emi ntịn̄nnịm ntọt emi ẹkemede ndiberi edem otode ọtọt nnyịn aban̄a nsobo ofụri ererimbot emi edide ke usụn̄ emi: “Utịn ayakabade ekịm, ọfiọn̄  idinyụn̄ inọhọ un̄wana esie, mme ntantafiọn̄ ẹyenyụn̄ ẹto ke ikpa-enyọn̄ ẹduọn̄ọ, ẹyenyụn̄ ẹnyen̄e mme odudu ikpa-enyọn̄. . . . Kpukpru mme idụt isọn̄ ẹyenyụn̄ ẹfụhọ.” (Matthew 24:29, 30) Mi ẹdọhọ ke n̄kpọntịbe eke enyọn̄ emi oro editịbede ke ofụri ekondo otụk “kpukpru mme idụt isọn̄.” Ke ikọ efen, ntịn̄nnịm ikọ emi etịn̄ aban̄a nsobo emi editụkde kpukpru nnyịn.

N̄wed ntịn̄nnịm ikọ emi ẹkemede ndiberi edem mi edi Bible. Nte enemde, udọn̄ikọ itien̄wed oro ẹsiakde ke enyọn̄ emi ọnọ ọyọhọ ntọt aban̄a mme n̄kpọ oro ẹdidade ẹkesịm nsobo ofụri ekondo. Kpa nte eboho itiat obot nsụn̄ikan̄ ye mme idiọn̄ọ en̄wen ẹkenọde ikpọ owo obio Shimabara ntak ndinịm adan̄a ke ikpehe n̄kpọndịk, Bible ọnọ nnyịn ntak ndidu ke edidemede ndinyụn̄ ntịm idem mben̄e ubọhọ. Nnyịn imekeme ndikpep n̄kpọ nto akama-mmọn̄eyet n̄kpọntịbe oro ke Obot Fugen inyụn̄ ifiọk nte se inade ke iso okponde.

 [Ebiet Ẹdade Ndise Ẹto ke page 2]

IKPAEDEM: Yomiuri/Orion Press/Sipa Press

[Ebiet Ẹdade Ndise Ẹto ke page 3]

Yomiuri/Orion Press/Sipa Press