Nso Idi Paradise Emi Jesus Ọkọn̄wọn̄ọde Ọnọ Anamidiọk Oro Akakpade Ekpere Enye?

MBỤK Luke owụt ete ke anamidiọk oro ẹkewotde ẹkpere Jesus Christ ama etịn̄ ikọ ndiwụt ke ida ke n̄kan̄ Jesus onyụn̄ eben̄e ete Jesus eti imọ ke adan̄aemi enye “edide ndida ubọn̄.” Ibọrọ Jesus ekedi: “Ke akpanikọ ke ndọhọ fi mfịn emi, Afo oyodu ye ami ke Paradise.” (Luke 23:39-43, NW) Nte ededi, anaedi idiọn̄ọ uduọk ibifịk oro ẹwụtde ke nte ẹkabarede mme ikọ ẹmi ọkọn̄ọ ke nte ikọ Jesus an̄wan̄ade akabade-n̄wed, sia owo mîkesịnke idiọn̄ọ uduọk ibifịk ke akpa uwetn̄kpọ usem Greek. Idiọn̄ọ uduọk ibifịk ke ido uwetn̄kpọ eyomfịn ikedịghe ọsọ n̄kpọ tutu ke n̄kpọ nte ọyọhọ isua ikie usụkkiet E.N. Ke adan̄aemi ediwak edikabade ẹsịnde kọma mbemiso ikọ oro “mfịn” ndien ke ntre ẹnamde etie nte ke anamidiọk oro ama odụk Paradise kpa ke usen oro, n̄kpọ ndomokiet idụhe ke mme itien̄wed Abasi eken ndisọn̄ọ emi. Jesus ke idemesie ama akpa onyụn̄ odu ke udi tutu ke ọyọhọ usen ita ndien ekem ẹma ẹnam enye eset nte “akpa mbun̄wụm” ediset ke n̄kpa. (Utom 10:40; 1 Corinth 15:20; Colossae 1:18) Usen 40 ke ukperedem enye ama ọdọk heaven.—John 20:17; Utom 1:1-3, 9.

Ke ntre, uyarade edi nte ke Jesus ndikada ikọ oro “mfịn” ikedịghe man ọnọ ini emi anamidiọk oro edidude ke Paradise edi, utu ke oro, man odụri ntịn̄enyịn owụt ini emi enye akanamde un̄wọn̄ọ oro, kpa ini emi anamidiọk oro okowụtde ndusụk udomo mbuọtidem ke Jesus. Emi ekedi usen emi ikpọ adaiso ido ukpono ke otu ikọt esie ẹkesịnde ẹnyụn̄ ẹbiomde Jesus ikpe ndien ke oro ebede ukara Rome ebierede ikpe n̄kpa ọnọ enye. Enye ama akabade edi owo emi ẹsịnde ke ndek ye n̄kpọ nsahi. Ntre anamidiọk oro ekekperede enye ama owụt n̄wọrọnda edu oro odotde itoro ke nditre nditiene mmọ eken edi, utu ke oro, etịn̄de ikọ ke ibuot Jesus onyụn̄ owụtde ke imenịm itie esie nte Edidem oro edide ke akpanikọ. Ke ẹdiọn̄ọde ẹte ke odot ndidori nsọn̄uyo ke ini emi ẹkenamde un̄wọn̄ọ emi utu ke ini emi enye osude, mme edikabade en̄wen, utọ nte mme edikabade Ikọmbakara eke Rotherham ye Lamsa, mme edikabade usem German eke Reinhardt ye W. Michaelis, ọkọrọ ye Curetonian Syriac eke ọyọhọ isua ikie ition E.N., ẹsịn uwetn̄kpọ oro ukem nte New World Translation okotde, emi ẹkotde ẹsịn mi.

Amaedi se Paradise oro Jesus eketịn̄de aban̄a edide, enye nte an̄wan̄ade idịghe  ukem n̄kpọ ye Obio Ubọn̄ Christ eke heaven. Mbemiso ke usen oro ẹma ẹnọ mme anam-akpanikọ mbet Jesus idotenyịn edidụk Obio Ubọn̄ heaven edi ke isọn̄ nte ke mmọ ẹma ‘ẹsọn̄ọ ẹda ye Enye ke idomo Esie,’ kpa n̄kpọ emi anamidiọk oro akanam mîkanamke, ndien enye ndikakpa ke eto n̄kpere Jesus ekedi ke ntak mme edinam ubiatibet esiemmọ. (Luke 22:28-30; 23:40, 41) Anamidiọk oro nte an̄wan̄ade ‘ikọtọn̄ọke ntak imana,’ ke mmọn̄ ye spirit, emi Jesus ọkọdọhọde ke edi se ẹyomde man ẹdụk Obio Ubọn̄ heaven. (John 3:3-6) Anamidiọk oro ikonyụn̄ idịghe kiet ke otu ‘mbon ẹmi ẹkande’ oro Christ Jesus emi ẹnọde ubọn̄ ọkọdọhọde nte ẹdidude ye imọ ke ebekpo imọ eke heaven ẹnyụn̄ ẹnyene udeme ke “akpa ediset ke n̄kpa.”—Ediyarade 3:11, 12, 21; 12:10, 11; 14:1-4; 20:4-6.

Ndusụk n̄wed ndụn̄ọde ẹnọ ekikere ẹte ke Jesus eketịn̄ aban̄a paradise ke Hades m̀mê Sheol, kpa se ẹdade nte ikpehe ke Hades m̀mê Sheol emi mbon oro Abasi enyịmede ẹdude. Ẹnọ ekikere ẹte ke mme andikpep ẹdide mme Jew eke ini oro ẹma ẹkpep ẹte ke utọ paradise oro odu ọnọ mbon ẹmi ẹkekpan̄ade ẹmi ẹkenyụn̄ ẹbetde ediset ke n̄kpa. Kaban̄a ukpepn̄kpọ mme andikpep oro, Dictionary of the Bible eke Hastings ọdọhọ ete: “Ukpepn̄kpọ ido ukpono oro otode mme Andikpep oro esịm nnyịn enyene mme n̄wọrọnda mbuaha ekikere ke mme mbụme ẹmi, ndien ọsọsọn̄ ndidiọn̄ọ mme usenọfiọn̄ ẹmi ẹkpenọde ediwak ke otu mmọ. . . . Ke ẹtienede se n̄wed oro etịn̄de, ekeme nditie nte ke ndusụk owo ẹkeda nte ke Paradise odu mi ke isọn̄, mbon en̄wen ẹkeda nte ke edi ubak Sheol, mbon en̄wen n̄ko ẹdọhọ ke idụhe ke isọn̄ m̀mê ke idak isọn̄, edi odu ke heaven . . . Edi eyịghe odu aban̄a, ke nsụhọde n̄kaha, ubak ke otu ẹmi. Ẹnen̄ede ẹkụt mme nsio nsio ekikere ẹmi ke ekperedem Ido Ukpono Mme Jew. Mmọ ẹtie nte ẹnen̄ede ẹnen ẹnyụn̄ ẹkama ọyọhọ ntọt ke eyo ntatenyịn Ukpepn̄kpọ Akwa Ifiọk Ido Ukpono Mme Jew . . . Edi owo idiọn̄ọke m̀mê mme n̄kpọ ẹmi ẹketọn̄ọ ini ewe. Akani ukpepn̄kpọ ido ukpono mme Jew ke nsụhọde n̄kaha . . . enyịme esisịt mîdịghe inyịmeke-nyịme ekikere aban̄ade Paradise eke ufọt ikpehe ini. Enye etịn̄ aban̄a Gehinnom oro anade ebet mme idiọk owo, ye Gan Eden, m̀mê in̄wan̄ Eden, oro anade ebet ndinen owo. Eyịghe edemede m̀mê enye aka anyan akan mme ekikere ẹmi onyụn̄ enyịme Paradise ke Sheol.”—1905, Eboho III, page 669, 670.

Idem ọkpọkọm mmọ ẹkpep utọ n̄kpọ oro, ekpedi ata unana eti ibuot ndinịm ke akpanikọ nte ke Jesus akpasuan utọ ekikere oro, ke ikerede iban̄a nte enye okobiomde mme edinam ido ukpono eke mme adaiso ido ukpono mme Jew oro mîkedịghe eke Bible, ikpe. (Matthew 15:3-9) Eyedi paradise emi anamidiọk owo Jew oro Jesus eketịn̄de ikọ ọnọ ọkọdiọn̄ọde ekedi Paradise isọn̄ emi ẹtịn̄de ẹban̄a ke akpa n̄wed ke N̄wed Abasi Usem Hebrew, Paradise eke Eden. Ke edide ntre, un̄wọn̄ọ Jesus nte owụtde ifiọk anyan ubọk owụt edifiak n̄wụk utọ idaha paradise isọn̄ oro. Un̄wọn̄ọ emi enye akanamde ọnọ anamidiọk ke ntre ọyọnọ utọ anamidiọk oro idotenyịn oro enyenede nsọn̄ọ ndiset ke n̄kpa ndinyene ifet ndidu uwem ke Paradise oro ẹfiakde ẹwụk.—Men Utom 24:15; Ediyarade 20:12, 13; 21:1-5; Matthew 6:10 domo.