Nte Afo Emenyene “Ekikere Christ”?

“Abasi ime ye ndọn̄esịt akpakam ọnọ mbufo ndinyene esịt kiet . . . nte Christ Jesus etemede.”—ROME 15:5.

1. Ke nso usụn̄ ke ẹwụt Jesus ke ediwak ndise Christendom, ndien ntak emi mîdịghe nnennen ndise Jesus?

 “AKANANAM owo ikwe enye asakde imam.” Ẹtịn̄ ẹban̄a Jesus ntre ke n̄wed oro ẹwụtde ke abian̄a nte ke akani akwa owo ukara Rome kiet ekewet. Ẹdọhọ ke n̄wed emi, emi ẹdiọn̄ọde ke uduot oro enye odude idahaemi tọn̄ọ ke n̄kpọ nte ọyọhọ isua ikie 11, emenyene odudu ke idem ediwak mme ewet-ndise. * Ke ediwak ndise, ẹwụt Jesus nte owo emi etiede mfụhọ mfụhọ emi mîwakke ndituak inua imam, edieke edide akananam asak imam. Edi oro idịghe nnennen ndise Jesus, emi mme Gospel ẹwụtde nte ima ima, enyene-esịtmbọm erenowo emi enyenede ntotụn̄ọ ntụk.

2. Didie ke ikeme ndikọri “esịt kiet . . . nte Christ Jesus etemede,” ndien nso ke emi editịm nnyịn idem ndinam?

² Nte an̄wan̄ade, man idiọn̄ọ ata Jesus, ana nnyịn inam nnennen ifiọk aban̄ade utọ owo oro Jesus ekenen̄erede edi ke adan̄aemi okodude mi ke isọn̄ akara ekikere ye esịt nnyịn. Ẹyak nnyịn ke ntre idụn̄ọde ndusụk mbụk Gospel ẹmi ẹnamde nnyịn ifiọk “ekikere Christ”—oro edi, ntụk esie, mbufiọk esie, ekikere esie, ye ifiọk esie. (1 Corinth 2:16) Nte nnyịn idụn̄ọrede, ẹyak nnyịn ikere nte nnyịn ikemede ndikọri “esịt kiet . . . nte Christ Jesus etemede.” (Rome 15:5) Ntem, nnyịn imekeme nditịm idem ọfọn akan ke uwem nnyịn ye nte nnyịn inamde n̄kpọ ye mbon efen nditiene uwụtn̄kpọ oro enye ekenịmde ọnọ nnyịn.—John 13:15.

Edi Mmemmem Ndisan̄a N̄kpere

3, 4. (a) Nso ikedi idaha mbụk oro ẹwetde ke Mark 10:13-16? (b) Didie ke Jesus akanam n̄kpọ ke ini mbet esie ẹkedomode ndikpan n̄kpri nditọ nditiene enye?

³ Mme owo ẹma ẹsan̄a ẹkpere Jesus. Ke nsio nsio idaha, mme owo ke nsio nsio isua emana ye idaha ke uwem ẹma ẹsan̄a ẹkpere enye ifụre ifụre. Kere ban̄a n̄kpọntịbe oro ẹwetde ke Mark 10:13-16. Emi akada itie ke ekperede utịt utom esie nte enye akasan̄ade aka Jerusalem ke akpatre ini, ndisobo ubiak ubiak n̄kpa.—Mark 10:32-34.

 ⁴ Kere ban̄a n̄kpọntịbe emi. Mme owo ẹtọn̄ọ ndida nditọwọn̄, esịnede nseknditọ, nsọk Jesus ẹte ọdiọn̄. * Nte ededi, mbet ẹdomo ndikpan nditọwọn̄ ẹmi nditiene Jesus. Ndusụk, mbet ẹkere ẹte ke Jesus ke akpanikọ iyomke nditọwọn̄ ẹfịna imọ ke mme akpan urua ẹmi. Edi mmọ inenke. Ke ini Jesus ọfiọkde se mbet ẹnamde, enye inemke esịt. Jesus okot nditọwọn̄ ẹmi ada, ọdọhọde ete: “Ẹyak n̄kpri nditọ ẹtiene Mi; ẹkûkpan mmọ.” (Mark 10:14) Ekem enye anam n̄kpọ emi owụtde ata mbọm ye ima ima edu. Mbụk oro ọdọhọ ete: “Enye emen mmọ akama, odori mmọ ubọk, onyụn̄ ọdiọn̄ mmọ.” (Mark 10:16) Nte an̄wan̄ade, nditọwọn̄ ẹmi ẹdu ke ifụre nte Jesus emende mmọ akama ke ima ima ubọk esie.

5. Nso ke mbụk emi odude ke Mark 10:13-16 asian nnyịn aban̄a utọ owo emi Jesus ekedide?

⁵ Ibio ibio mbụk oro etịn̄ ediwak n̄kpọ aban̄a utọ owo oro Jesus ekedide ọnọ nnyịn. Tịm fiọk ete ke ẹma ẹkeme ndisan̄a n̄kpere enye. Okposụkedi enye ama ekenyenyene n̄kokon̄ idaha ke heaven, enye ikesịnke owo ndịk ke idem m̀mê ndise mme anana-mfọnmma owo ke ndek. (John 17:5) Nte idịghe akpan n̄kpọ n̄ko nte ke idem nditọwọn̄ ẹma ẹdu ke ifụre ye enye? Ke akpanikọ, mmọ ikpakasan̄ake ikpere anana-esịtmbọm owo emi mîkopke inemesịt emi akananam mîtuakke inua imam m̀mê ndisak imam! Mme owo ke ofụri isua emana ẹma ẹsan̄a ẹkpere Jesus koro mmọ ẹma ẹkụt nte ke enye ekedi owo mbọm oro ekerede aban̄a mme owo ndien mmọ ẹma ẹnịm ke akpanikọ ẹte ke enye idibịnke mmimọ.

6. Didie ke mbiowo ẹkeme ndinam enen̄ede emem utom ndisan̄a n̄kpere mmọ?

⁶ Ke itiede ikere mbụk emi, nnyịn imekeme ndibụp idem nnyịn ite, ‘Nte ami mmenyene ekikere Christ? Nte ẹkeme ndisan̄a n̄kpere mi?’ Ke ndiọkeyo emi, mme erọn̄ Abasi ẹyom mme ekpemerọn̄ oro ẹkemede ndisan̄a n̄kpere, irenowo ẹmi ẹbietde “ọtọ udịbe ofụm.” (Isaiah 32:1, 2; 2 Timothy 3:1) Mbiowo, edieke mbufo ẹnyenede udọn̄ ofụri esịt ẹban̄a nditọete mbufo ẹnyụn̄ ẹnyịmede ndiyak ini ye ukeme mbufo nsịn ke ndin̄wam mmọ, mmọ ẹyekụt ke mbufo ẹmekere ẹban̄a mmimọ. Mmọ ẹyekụt emi ke iso mbufo, ẹkop enye ke uyoikọ mbufo, ẹnyụn̄ ẹkụt enye ke eti edu mbufo. Utọ ata ima ye edikere mban̄a oro ekeme ndinam emem utom ọnọ mbon en̄wen, esịnede nditọwọn̄, ndisan̄a n̄kpere mbufo ye mbuọtidem. Christian an̄wan kiet anam ntak emi enye ekekemede ndiyarade ekikere esie nnọ ebiowo kiet an̄wan̄a: “Enye eketịn̄ ikọ ye ami ke ima ima usụn̄ oro owụtde mbọm. Mîkpedịghe ntre, ekeme ndidi n̄kpeketịn̄ke ikọ ndomokiet. Enye ama anam mi ndu ke ifụre.”

 Ekere Aban̄a Mbon Efen

7. (a) Didie ke Jesus okowụt ke imọ ima ikere iban̄a mbon efen? (b) Ekeme ndidi nso ikanam Jesus anam nnan kiet okụt usụn̄ sụn̄sụn̄?

⁷ Jesus ama owụt edikere mban̄a. Enye ama ọsọp okụt nte etiede mbon efen ke idem. Edikam ndada n̄kụt mbon ukụt ama otụk enye ntotụn̄ọ ntotụn̄ọ tutu onụk enye ndimen ndutụhọ mmọ mfep. (Matthew 14:14) Enye n̄ko ama ekere aban̄a unana ukeme ye udọn̄ mbon efen. (John 16:12) Inikiet, mme owo ẹma ẹda nnan kiet ẹsọk enye ẹnyụn̄ ẹben̄e Jesus ẹte ọkọk enye. Jesus ama anam owo emi afiak okụt usụn̄, edi enye akanam emi sụn̄sụn̄. Ke akpa, owo emi okokụt mme owo mbukpọn̄ mbukpọn̄ kpọt—“ẹsan̄ade nte ẹdide eto.” Ekem, Jesus ama anam enye okụt n̄kpọ etịm ọfọn. Ntak emi enye ọkọkọkde owo emi sụn̄sụn̄? Ekeme ndidi akanam emi man anam owo emi ekesidude ke ekịm okûdịghe ndikụt un̄wana awak-uduot ererimbot ke mbuari.—Mark 8:22-26.

8, 9. (a) Nso iketịbe ndondo oro Jesus ye mbet esie ẹma ẹkedụk ikpehe Decapolis? (b) Bụk nte Jesus ọkọkọkde inan oro.

⁸ Kere n̄ko ban̄a n̄kpọntịbe oro akadade itie ke Passover eke 32 E.N. Jesus ye mbet esie ẹma ẹdụk ikpehe Decapolis, ke edem usiahautịn Inyan̄ Galilee. Do, ibịghike ata ediwak otuowo ẹma ẹkụt mmọ ẹnyụn̄ ẹda ediwak mbon udọn̄ọ ye mbon oro ẹbiomode ndo ẹsọk Jesus, ndien enye ọkọk mmọ kpukpru. (Matthew 15:29, 30) Nte enemde, Jesus ama owụt eren kiet san̄asan̄a edikere mban̄a. Mark andiwet Gospel, n̄kukụre owo emi ewetde n̄kpọntịbe emi enịm, obụk se iketịbede.—Mark 7:31-35.

⁹ Owo emi ekedi inan inyụn̄ ikemeke nditịm ntịn̄ ikọ. Ekeme ndidi Jesus ama ọfiọk nnyekidem m̀mê ndo owo emi akpan akpan. Ekem, Jesus ama anam n̄kpọ oro ke ndusụk udomo ekedide esen esen. Enye ama ada owo emi adaha, ọkpọn̄ otuowo, aka ndedịbe ebiet. Do Jesus ama ada idiọn̄ọ anam owo emi ọfiọk se enye okoyomde ndinam. Jesus “esịn enye nnuenubọk ke utọn̄, onyụn̄ ọkọk etap, otụk enye ke edeme.” (Mark 7:33) Ekem, Jesus emenede enyịn ese heaven onyụn̄ ọbọn̄ akam ke mmụm. Edinam emi ekpekeme ndidọhọ eren oro, ‘Se ami nyomde ndinam nnọ fi oto ke odudu Abasi.’ Ke akpatre, Jesus ọkọdọhọ ete: “Yak esịrede.” (Mark 7:34) Ndien owo oro ama afiak ekeme ndikop n̄kpọ, enye n̄ko ama ekeme nditịn̄ ikọ ọfọn.

10, 11. Didie ke nnyịn ikeme ndiwụt edikere mban̄a nnọ ntụk mbon efen ke esop? ke ubon?

¹⁰ Nso edikere mban̄a ke Jesus okowụt mbon efen ntem! Enye ama enen̄ede ekere aban̄a ntụk mmọ, ndien ima ima edikere mban̄a emi, n̄ko, ama onụk enye ndinam n̄kpọ ke usụn̄ oro ekerede aban̄a mme ntụk mmọ. Nte mme Christian, nnyịn iyanam ọfọn ndikọri nnyụn̄ n̄wụt ekikere Christ ke afan̄ emi. Bible ọnọ nnyịn item ete: “Mbufo kpukpru ẹnyene esịt kiet, ẹkop mbọm ye kiet eken, ẹtie ima-ima nte nditọete, ẹnyene mfefere esịt, ẹnyụn̄ ẹsụhọde idem.” (1 Peter 3:8) Ke akpanikọ, emi oyom nnyịn itịn̄ ikọ inyụn̄ inam n̄kpọ ke usụn̄ oro owụtde edikere mban̄a ọnọ ntụk mbon efen.

¹¹ Ke esop, nnyịn imekeme ndiwụt edikere  mban̄a inọ ntụk mbon efen ebe ke ndinọ mmọ uku, inamde n̄kpọ ye mmọ ukem nte nnyịn ikpamade ẹnam n̄kpọ ye nnyịn. (Matthew 7:12) Oro ayabuana ndikpeme se nnyịn itịn̄de ọkọrọ ye nte nnyịn itịn̄de enye. (Colossae 4:6) Ti ke ‘n̄ken̄inua ekeme ndikịm nte ofụt.’ (Mme N̄ke 12:18) Nso kaban̄a ke ubon? Ebe ye n̄wan oro ẹnen̄erede ẹma kiet eken ẹsọp ẹkere ẹban̄a ntụk kiet eken. (Ephesus 5:33) Mmọ ẹfep nditịn̄ n̄kpọsọn̄ ikọ, uyịre uyịre edikụt ndudue nnọ, ye ikọ isụn̄i—kpukpru ẹkemede ndidemede iyatesịt oro owo mîkemeke ndinam okụre mmemmem mmemmem. Nditọ n̄ko ẹnyene ntụk, ndien mme ima ima ete ye eka ẹkere ẹban̄a emi. Ke ini oyomde ẹnọ edinen̄ede, mme utọ ete ye eka oro ẹnam emi ke usụn̄ oro okponode uku nditọ mmọ inyụn̄ isueneke mmọ nte mîdotke. * (Colossae 3:21) Ntem, ke ini nnyịn iwụtde mbon efen edikere mban̄a, nnyịn iwụt ke imenyene ekikere Christ.

Enyịme Ndiberi Edem ke Mmọ En̄wen

12. Nso ekikere oro adade ukem ukem onyụn̄ edide ata idem n̄kpọ ke Jesus ekenyene aban̄a mbet esie?

¹² Jesus ama enyene ekikere oro adade ukem ukem onyụn̄ edide ata idem n̄kpọ aban̄a mbet esie. Enye ama etịm ọfiọk ete ke mmọ ikedịghe mfọnmma. Kamse, enye ama ekeme ndifiọk esịt mme owo. (John 2:24, 25) Kpa ye oro, idịghe sụk unana mfọnmma mmọ ke enye okokụt edi ama okụt nti edu mmọ. Enye ama okụt n̄ko se mme owo ẹmi Jehovah odụride ada ẹkemede ndinam ke ini iso. (John 6:44) Eti usụn̄ emi Jesus ekesede mme mbet esie ama owụt idem ke usụn̄ oro enye akanamde n̄kpọ ye mmọ. Akpa kan̄a, enye ama enyịme ndiberi edem ke mmọ.

13. Didie ke Jesus okowụt nte ke imọ ima iberi edem ke mbet imọ?

¹³ Didie ke Jesus okowụt ibetedem oro? Ke enye ama ọkọkpọn̄ isọn̄, enye ama ayak ndodobi mbiomo ọnọ mme mbet oro ẹyetde aran. Enye ama ayak mbiomo edise mban̄a udọn̄ n̄kpọ Obio Ubọn̄ esie eke ofụri ererimbot esịn mmọ ke ubọk. (Matthew 25:14, 15; Luke 12:42-44) Ke ini utom esie, enye ama owụt ọkpọkọm ke n̄kpri usụn̄ nte ke imọ ima iberi edem ke mmọ. Ke ini enye ke utịbe utịbe usụn̄ akanamde udia awak ọnọ otuowo, enye ama ayak mbiomo edideme udia emi ọnọ mbet esie.—Matthew 14:15-21; 15:32-37.

14. Didie ke afo ekeme ndibụk mbụk oro ẹwetde ke Mark 4:35-41 ibio ibio?

¹⁴ Kere, n̄ko, ban̄a mbụk oro ẹwetde ke Mark 4:35-41. Ke idaha emi Jesus ye mbet esie ẹma ẹdụk ubom ẹwat ẹka edem usiahautịn Inyan̄ Galilee. Ndondo oro mmọ ẹwatde ẹwọrọ, Jesus ama ana ke etak ubom onyụn̄ ede ọkpọsọn̄ idap. Nte ededi, ibịghike, “akwa oyobio etịbe.” Utọ oyobio oro ekedi ọsọ n̄kpọ ke Inyan̄ Galilee. Ke ntak usụk usụk itie esie (otụn̄ọde ke n̄kpọ nte mita 200), ofụm ofiop do akan ke n̄kann̄kụk oro, ndien emi anam ofụm adaha. Ke adianade ye emi, ọkpọsọn̄ ofụm esito ke Obot Hermon, emi odude ke edem edere, efịme esịm Itịghede Jordan. Ekeme ndidi edieke enye odobode ana ini kiet, ibịghike ọkpọsọn̄ oyobio afiak ọtọn̄ọ. Kere ban̄a emi: Jesus nte eyịghe mîdụhe ama ọfiọk aban̄a ọsọ oyobio emi, koro ẹkebọk enye ke Galilee. Kpa ye oro, enye ama ede ke emem, eberide edem ke usọ mbet esie, ẹmi ndusụk ke otu mmọ ẹkedide mme ọkọiyak.—Matthew 4:18, 19.

15. Didie ke nnyịn ikeme ndikpebe unyịme Jesus ndiberi edem ke mbet esie?

¹⁵ Nte nnyịn imekeme ndikpebe unyịme Jesus ndiberi edem ke mbet esie? Ọsọn̄ ndusụk owo ndiyak mbiomo nnọ mbon efen. Ana mmọ ẹsụk ẹdi ibuot kpukpru ini, yak idọhọ ntre. Mmọ ẹkeme ndikere ẹte, ‘Edieke nyomde ẹnam n̄kpọ ọfọn, ana ami nnam enye ke idemmi!’ Edi edieke anade nnyịn inam kpukpru n̄kpọ ke idem nnyịn, nnyịn idu ke itiendịk edikpa mba ndien ndusụk iwọrọde ikpọn̄ ubon nnyịn ke ini oro mîkpanaha  ikpọn̄. Akande oro, edieke nnyịn mîyakke utom ye mbiomo oro ẹdotde inọ mbon efen, nnyịn idiyakke mmọ ẹnyene mbufiọk ye ukpep oro ẹyomde. Oyowụt eti ibuot ndikpep ndiberi edem ke mbon efen, iyakde mme n̄kpọ inọ mmọ. Nnyịn iyanam ọfọn ndibụp idem nnyịn ke akpanikọ ite, ‘Ndi ami mmenyene ekikere Christ ke n̄kpọ emi? Ndi mmesiyak ndusụk utom nnọ mbon efen ke unyịme esịt, mbuọtde idem mmọ ndinam ofụri ukeme mmọ?’

Enye Ama Enyene Mbuọtidem ke Mbet Esie

16, 17. Ke akpatre okoneyo eke uwem esie ke isọn̄, nso ke Jesus ọkọsọn̄ọ etịn̄ ọnọ mme apostle esie, okposụkedi enye ama ọkọfiọk ete ke mmọ ẹyekpọn̄ imọ?

¹⁶ Jesus ama owụt nte enye esede mbet esie in̄wan̄în̄wan̄ ke akpan usụn̄ en̄wen. Enye ama anam mmọ ẹfiọk ẹte ke imọ ima inyene mbuọtidem ke idem mmọ. Emi ama owụt idem in̄wan̄în̄wan̄ ke ikọ edifiak nnọ nsọn̄ọ emi enye eketịn̄de ọnọ mme apostle esie ke akpatre okoneyo eke uwem esie ke isọn̄. Tịm fiọk se iketịbede.

¹⁷ Ekedi ọyọhọ mbubịteyo ọnọ Jesus. Enye ama ọnọ mbet esie ukpep oro ẹkụtde ke enyịn kaban̄a nsụhọdeidem ebe ke ndiyet mmọ ukot. Ke oro ebede, enye ama ọtọn̄ọ udia mbubịteyo oro edidide editi n̄kpa esie. Ekem, mme apostle ẹma ẹtọn̄ọ ntak ẹneni ọkpọsọn̄ eneni kaban̄a m̀mê anie ke otu mmimọ edi n̄kponn̄kan. Ke osụk enyenede ime, Jesus ikọtọkke mmọ edi ama ọkọk ibuot ye mmọ. Enye ama asian mmọ se inade ke iso: “Kpukpru mbufo ẹyeduọn̄ọ ke idomo kaban̄a Mi ke okoneyo emi: koro ẹwet ẹte, Nyowot ekpemerọn̄, ndien otu erọn̄ ayasuana.” (Matthew 26:31; Zechariah 13:7) Enye ama ọfiọk ete ke mme n̄kpere-n̄kan nsan̄a imọ ẹyefen̄e ẹkpọn̄ imọ ke ini oro imọ iyomde un̄wam. Edi, enye ikobiomke mmọ ikpe. Ke edide ata isio ye oro, enye ama asian mmọ ete: “Edi ke mma nset ke n̄kpa, nyebem mbufo iso n̄ka ke Galilee.” (Matthew 26:32) Ih, enye ama ọsọn̄ọ etịn̄ ye mmọ nte ke okposụkedi mmọ ẹdikpọn̄de imọ, imọ idikpọn̄ke mmọ. Ke ini enyene-ndịk afanikọn̄ emi ama ekebe, enye ayafiak osobo ye mmọ.

18. Ke Galilee, Jesus ọkọnọ mbet esie ewe ndodobi utom ndinam, ndien didie ke mme apostle ẹkenam enye?

¹⁸ Jesus ama anam ikọ esie. Ke ukperedem, ke Galilee, Jesus oro ekesetde ke n̄kpa ama owụt mme anam-akpanikọ apostle 11 idem, emi etiede nte ẹma ẹboho ọtọkiet ye ediwak mbon efen. (Matthew 28:16, 17; 1 Corinth 15:6) Do, Jesus ama ọnọ mmọ ndodobi utom ndinam: “Mbufo ẹka ẹkenam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye Edisana Spirit: ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo.” (Matthew 28:19, 20) N̄wed Utom ọnọ nnyịn in̄wan̄în̄wan̄ uyarade nte ke mme apostle ẹma ẹnam utom oro. Mmọ ke edinam akpanikọ ẹma ẹda usụn̄ ke utom edikwọrọ eti mbụk ke akpa isua ikie.—Utom 2:41, 42; 4:33; 5:27-32.

19. Nso ke edinam Jesus ke enye ama ekeset ke n̄kpa ekpep nnyịn aban̄a ekikere Christ?

¹⁹ Nso ke mbụk emi ayararede n̄kpọ mi ekpep nnyịn aban̄a ekikere Christ? Jesus ama okụt mme apostle esie ke ndiọkn̄kan idaha mmọ, edi enye ama “ama mmọ tutu akpatre.” (John 13:1) Kpa ye mme ndudue mmọ, enye ama anam mmọ ẹfiọk ẹte ke imọ imenyene mbuọtidem ke mmọ. Tịm fiọk ete ke ikakwan̄ake Jesus ndinyene mbuọtidem. Ibetedem ye mbuọtidem oro enye ekenyenede ke mmọ nte eyịghe mîdụhe ama ọsọn̄ọ mmọ idem ndibiere ke esịt  mmọ ndinam utom emi enye ọkọdọn̄de mmọ ẹnam.

20, 21. Didie ke nnyịn ikeme ndiwụt ke imenyene in̄wan̄în̄wan̄ ekikere iban̄a mme ekemmọ andinịm ke akpanikọ?

²⁰ Didie ke nnyịn ikeme ndinyene ekikere Christ ke afan̄ emi? Kûkere idiọk uban̄a mme ekemmọ andinịm ke akpanikọ. Edieke afo enyenede idiọk ekikere aban̄a mmọ, ekeme ndidi mme ikọ ye mme edinam fo ẹyeyarade emi. (Luke 6:45) Nte ededi, Bible asian nnyịn ete ke ima “enenịm se ifọnde ke akpanikọ.” (1 Corinth 13:7) Ima etie in̄wan̄în̄wan̄, itiehe etikwo etikwo. Enye ọbọbọp utu ke ndiwowụri. Mme owo ẹsisọsọp ẹnam n̄kpọ ke ẹnamde n̄kpọ ye mmọ ke ima ye nsịnudọn̄ akan ke ẹsịnde ndịghe. Nnyịn imekeme ndinam mmọ efen ẹkọri inyụn̄ isịn udọn̄ inọ mmọ ebe ke ndinyene mbuọtidem ke idem mmọ. (1 Thessalonica 5:11) Ukem nte Christ, edieke nnyịn inyenede in̄wan̄în̄wan̄ ekikere iban̄a nditọete nnyịn, nnyịn iyanam n̄kpọ ye mmọ ke usụn̄ oro anamde mmọ ẹkọri onyụn̄ anamde mmọ ẹda ofụri ukeme mmọ ẹnam n̄kpọ.

²¹ Ndikọri nnyụn̄ n̄wụt ekikere Christ aka anyan akan sụk edikpebe ndusụk n̄kpọ oro Jesus akanamde. Nte ẹketịn̄de ke ibuotikọ oro ekebemde iso, edieke anade nnyịn inen̄ede inam n̄kpọ nte Jesus, ana nnyịn ibem iso ikpep ndise mme n̄kpọ nte enye ekesede. Mme Gospel ẹnam nnyịn ikụt ikpehe en̄wen ke edu esie, ekikere ye ntụk esie kaban̄a utom oro ẹkenọde enye anam, nte ibuotikọ oro etienede edinemede.

[Mme Ikọ idakisọn̄]

Nte Afo Emekeme Ndinam An̄wan̄a?

• Didie ke Jesus akanam n̄kpọ ke ini mbet esie ẹkedomode ndibiọn̄ọ nditọwọn̄ nditiene enye?

• Ke mme usụn̄ ewe ke Jesus okowụt edikere mban̄a ọnọ mbon en̄wen?

• Didie ke nnyịn ikeme ndikpebe unyịme Jesus ndiberi edem ye mbet esie?

• Didie ke nnyịn ikeme ndikpebe mbuọtidem oro Jesus ekenyenede ke idem mme apostle esie?

[Mme Mbụme Ukpepn̄kpọ]

[Ndise ke page 16]

Nditọwọn̄ ẹma ẹdu ke ifụre ye Jesus

[Ndise ke page 17]

Jesus ama anam n̄kpọ ye mbon en̄wen ke mbọm

[Ndise ke page 18]

Mbiowo oro ẹkemede ndisan̄a n̄kpere ẹdi edidiọn̄