Wọrọ Kpọn̄ Ikpehe N̄kpọndịk!

EDI utom mme ekpepn̄kpọ mban̄a obot nsụn̄ikan̄ ndidomo se ẹkụtde nnyụn̄ ndụn̄ọde mme uyarade ndien ekem ẹtọt ke obot nsụn̄ikan̄ oro ọmọn̄ obomo. (Ke ndondo oro Obot Fugen okobomode, mme bodisi ẹkenyene ndikpan mme owo ndibe ndụk ikpehe n̄kpọndịk oro.) Ukem ntre, nditọ ukpepn̄kpọ Bible ẹkụt idiọn̄ọ “akpatre ini eyo emi” ẹnyụn̄ ẹtọt mbon efen ẹban̄a n̄kpọndịk oro ekperede.—Matthew 24:3.

Ke ukem ibuot Bible oro ọtọtde aban̄a nsobo ofụri ekondo oro ekperede, nnyịn imekeme ndikot se ẹtịn̄de mi ẹban̄a mme idaha ẹdibemde iso ẹdu: “Idụt ayadaha an̄wana ye idụt, obio edidem kiet oyonyụn̄ adaha an̄wana ye obio edidem efen: akan̄ ye unyek-isọn̄ ẹyenyụn̄ ẹdu ke nsio-nsio ebiet. . . . Ediwak prophet nsu ẹyedaha ẹda ẹnam ediwak owo ẹwaha ẹkpọn̄ usụn̄. Ndien sia mme ukwan̄ido ẹditọtde, ima ediwak owo oyosụhọ. . . . Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.”—Matthew 24:7-14.

Iyomke nnyịn idi mme odụn̄ọde mbụk n̄kpọntịbe man ifiọk nte ntịn̄nnịm ikọ emi osude idahaemi. Nnyịn imokụt emi akpan akpan ọtọn̄ọde ke 1914. Isua ikie emi omokụt ekọn̄ ererimbot iba, ediwak ekọn̄ mbio obio, ekọn̄ eke n̄kann̄kụk, ye en̄wan eke orụk ye eke ido ukpono. Ubonowo omosobo akan̄ nte utịp mme utọ ekọn̄ oro, ke adianade ye unana emi mme oto-obot afanikọn̄ ẹdide ntak. Unyekisọn̄ omowot ediwak owo. Mme ndedịbe n̄ka ẹmi ẹnyenede ndiọi adausụn̄ ye mme anditiene ẹmi ẹnyenede ukwan̄ ifiopesịt ẹmewọn̄ọ ẹdi. ‘Ukwan̄ido nditọt’ amanam mme owo iwụtke ima aba, ndien ediwụt ima mbọhọidụn̄ idịghe aba ido mme owo.

Ke ẹnam utom ukwọrọikọ ofụri ererimbot, emi edide ikpehe efen ke idiọn̄ọ oro. Kam wọn̄ọde ka ikpaedem magazine emi, ndien afo oyokụt mme ikọ oro “Ọnọ Ntọt Obio Ubọn̄ Jehovah” nte ubak ibuotikọ esie. Enyọn̄-Ukpeme,  emi ẹmịn̄de ke usem 132 ẹnyụn̄ ẹsuande awak ebe miliọn 22, edi akpan n̄kpọutom ọnọ mbon oro ẹtan̄ade “gospel Ubọn̄ Abasi emi” ke ofụri isọn̄. Gospel oro esịne etop oro nte ke Andibot ekondo, Jehovah Abasi, owụk Obio Ubọn̄ eke heaven oro edisobode idiọk editịm n̄kpọ emi onyụn̄ anam isọn̄ edi paradise. Ke akpanikọ, idahaemi ẹkụt idiọn̄ọ nte ke Abasi ọyọsọp anam n̄kpọ, owụtde ete ke uwem mme owo ke editịm n̄kpọ emi odu ke itiendịk.—Men 2 Timothy 3:1-5; 2 Peter 3:3, 4; Ediyarade 6:1-8 domo.

Usen Jehovah Emi Enyenede Ndịk

Nso iditịbe ke ini ama ekem Jehovah ndibiere ikpe? Kpan̄ utọn̄ nte enye etịn̄de in̄wan̄în̄wan̄ aban̄a se ididade itie adan̄aoro: “Nyonyụn̄ nnọ mme utịbe n̄kpọ ke enyọn̄ ye ke isọn̄, iyịp, ye ikan̄, ye nsụn̄ikan̄ ẹbiet adaha. Utịn ayakabade edi ekịm, ọfiọn̄ oyonyụn̄ akabade edi iyịp, ke akwa usen Jehovah emi enyenede ndịk mîka-idịghe.”—Joel 2:30, 31.

Usen oro, emi enyenede ndịk onyụn̄ akamade nsobo akan obot nsụn̄ikan̄ ndibomo m̀mê unyekisọn̄ ekededi ke n̄kann̄kụk, emekpere. Prọfet Zephaniah ọdọhọ ete: “Akwa usen Jehovah emekpere, emekpere, oyonyụn̄ ọsọp eti-eti, . . . ofụri idụt ayata ikan̄ ufụp esie; koro enye ayanam kpukpru mme andidụn̄ isọn̄ ama ke iwiwa.” Okposụkedi “silver mmọ ye gold mmọ [mîdikemeke] ndinyan̄a mmọ baba ke usen ifụtesịt Jehovah,” usụn̄ odu ndibọhọ enyene-ndịk usen oro.—Zephaniah 1:14-18.

Ke owụtde nte ẹkemede ndibọhọ, Zephaniah ọdọhọ ete: “Ke ikan̄ iyatesịt Jehovah mîka-isịmke kan̄a mbufo. Mbufo kpukpru sụn̄-sụn̄ mbio isọn̄ . . . ẹyom Jehovah; mbufo ẹyom edinen ido, ẹyom sụn̄-sụn̄ ido: m̀mê mbufo ẹyedịbe ke usen iyatesịt Jehovah.” (Zephaniah 2:2, 3) Nnyịn imekeme ndibọhọ ebe ke ‘ndiyom Jehovah, ndiyom edinen ido, ye ndiyom sụn̄sụn̄ ido.’ Mmanie mfịn ẹyom Jehovah?

Afo nte eyịghe mîdụhe ada ikọ oro “Jehovah” abuan ye Mme Ntiense Jehovah ke ntak utom ukwọrọikọ mmọ. Ekeme ndidi afo ọkọbọ magazine emi oto kiet ke otu mmọ. Ẹdiọn̄ọ mmọ nte nti nditọisọn̄ ẹmi ẹdude eti uwem. Mmọ ẹsịn ukeme ndimen “obufa owo” nsịne, emi abuanade edikọri sụn̄sụn̄ ido. (Colossae 3:8-10) Mmọ ẹnyịme ẹte ke emi esisụn̄ọ oto edibọ ukpep nto esop Jehovah oro ẹkụtde ke enyịn, emi mme esop n̄kann̄kụk eke Mme Ntiense Jehovah ke ofụri isọn̄ ẹdade ke ibuot esie. Ih, afo emekeme ndibọhọ ye “otu nditọ-ete” eke Mme Ntiense Jehovah ke ofụri ererimbot.—1 Peter 5:9.

Ka Ebiet Ubọhọ Idahaemi

Man ibọhọ ebe ke ndiyom Jehovah, nnyịn inyene ndidi mme ufan esie. Nso ke oro abuana? Bible ọnọ ibọrọ: “Nte mbufo ifiọkke ite, edidi ufan ye ererimbot edi edidi usua ye Abasi? mmọdo owo ekededi eke oyomde ndidi ufan ye ererimbot anam idem usua ye Abasi.” (James 4:4) Man idi mme ufan Abasi, ana nnyịn idian̄ade idem nnyịn ikpọn̄ ntotụn̄ọ itie ebuana ekededi ye idiọk ererimbot emi, emi nsọn̄ibuot ye Abasi enịmde idiọn̄ọ.

Bible ọnọ nnyịn item ete: “Ẹkûma ererimbot, ye se idude ke ererimbot. Edieke owo ekededi amade ererimbot, ima Ete idụhe enye ke esịt. Koro ofụri-ofụri se idude ke ererimbot, mbumek obụkidem, ye mbumek enyịn, ye ikpîkpu ubọn̄ uwem emi, itoho Ete, edi oto ke ererimbot. Ndien ererimbot ke ebebe efep, ye mbumek esie; edi owo eke anamde se Abasi amade ododu ke nsinsi.” (1 John 2:15-17) Udọn̄ obụkidem akara ata ediwak owo mfịn—udọn̄ idan̄ emi owo mîkpemeke, ubịne inyene ke idiọkitọn̄, ye edikama odudu nnam n̄kpọ ke idiọk usụn̄. Edi man owo odu ke n̄kan̄ Jehovah, ana enye akan mme utọ udọn̄ oro.—Colossae 3:5-8.

Ekeme ndidi afo emesikot magazine emi ke ini ke ini, ndien ekeme ndidi afo emenyịme usụn̄ nte enye anamde mme ntịn̄nnịm ikọ Bible an̄wan̄a. Edi, ekeme ndidi afo ememen̄e ndinam n̄kaiso usio-ukot ndibuana ye Mme Ntiense Jehovah. Nte ededi, edieke nnyịn isakde iso ise afanikọn̄, nte ndikokop ntọt kpọt ekpekem? Nte nnyịn ikemede ndikụt nto se iketịbede ke ini Obot Fugen okobomode,  oyom nnyịn inam ntọt ẹnọde. Ti, ke nsụhọde n̄kaha mme ọkọmbụk n̄kpọntịbe ye osio-ndise 15 ẹmi uduak mmọ ekedide edisọsọp nnọ ntọt oro ẹdemerede udọn̄ ẹma ẹtaba uwem mmọ. Ke akpanikọ, osio-ndise kiet akakpa ye nnuenubọk esie ke ukwak usio ndise. Ekpepn̄kpọ mban̄a obot nsụn̄ikan̄ kiet—emi ọkọdọhọde ete, “Edieke ndikpade usen kiet, nyom ndikpa ke mben obot nsụn̄ikan̄”—ama ataba uwem esie kpa nte enye ekekerede. Kpukpru mmọ ẹkeyak idem mmọ ẹsịn ke utom mmọ ye se mmọ ẹkebịnede. Edi, mmọ ẹma ẹda uwem mmọ ẹsio isop—kpa utịp edifụmi ntọt ẹnọde.

Ediwak owo mfịn ẹkop etop aban̄ade ubiere Abasi ndisobo idiọk editịm n̄kpọ emi ẹnyụn̄ ẹfiọk, ke ndusụk udomo, ẹte ke ntọt emi enyene nsọn̄ọ. Mmọ ẹkeme ndikere, ‘Ekeme ndidi enye eyedi nte ini akade, edi idịghe mfịn.’ Mmọ ẹsịk usen Jehovah mfefere mfefere ẹnịm ke ini iso mbak ediwọn̄ọde mmọ ọkpọn̄ se itiede nte ata akpan n̄kpọ ke enyịn mmọ idahaemi.

Baruch ama enyene utọ mfịna oro. Sia ekedide ewetn̄wed ọnọ prọfet Jeremiah eke eset, Baruch ama ọtọt nditọ Israel uko uko aban̄a nsobo Jerusalem emi ekekperede. Edi, ke idaha kiet enye ama akabade akpa mba ke utom esie. Ke ntak oro, Jehovah ama ọnọ enye edinen̄ede: “Ndien afo osụk oyom ikpọ n̄kpọ ke idem fo. Kûyom.” Edide inyene, uwọrọiso, m̀mê n̄kpọ obụkidem emi ekemede ndinọ ukpeme, Baruch ikenyeneke ‘ndiyom ikpọ n̄kpọ ke idem esie.’ Akana enye enyene udọn̄ ke n̄kpọ kiet, edinam uduak Abasi ke ndin̄wam mme owo ẹda ke n̄kan̄ Esie. Nte utịp, enye ọyọbọ ‘uwem esie ke n̄kpọ mbụme.’ (Jeremiah 45:1-5) Ke ẹmende ẹdomo, utu ke ‘ndiyom ikpọ n̄kpọ ke idem nnyịn,’ nnyịn ikpenyene ndiyom Jehovah, emi ekemede ndida nsịm edinyan̄a uwem nnyịn.

Ke Obot Fugen, se iwakde ibe mme bodisi ye mme enịme-ikan̄ 12 ẹmi ẹdide mme anamutom unyịmesịt ẹkedu ke utom ke ini ufiop mbat okotopde ọwọrọ ke obot nsụn̄ikan̄ ofụk mmọ. Mmọ ẹkedomo ndin̄wam nnyụn̄ n̄kpeme mbon oro ẹkedude ke itiendịk. Mmọ ẹketie nte iren ye iban ẹmi ẹnyenede nti uduak ẹmi ẹsịnde idem ke ndidomo ndinam ererimbot emi ọfọn. Kpa ye oro uduak mmọ ekemede ndidi eti, “owo ikemeke ndinen̄ede n̄kpọ eke ẹkwan̄ade.” (Ecclesiastes 1:15) Owo ikemeke ndinen̄ede editịm n̄kpọ emi akwan̄ade mi. Nte owụt eti ibuot owo ndinam idemesie “ufan ye ererimbot” ebe ke ndidomo ndinyan̄a ndutịm ofụri ererimbot oro Abasi ebierede ndisobo mfep?

Ke Ama Ọkọwọrọ, Kûfiak Uka

Edi n̄kpọ kiet ndiwọrọ n̄kpọn̄ ndutịm emi odude ke itiendịk, edi edi n̄kpọ efen ndisọn̄ọ ndu ke ukpeme eke “ofụri otu nditọete.” (1 Peter 2:17, NW) Ẹyak nnyịn ikûfre mme ọtọin̄wan̄ oro, ke ẹma ẹkewọn̄ọ, ẹkefiakde ẹka ndikese in̄wan̄ mmọ ke n̄kpere Obot Fugen. Ndusụk, ama ọdọn̄ mmọ ndifiak n̄kodu “inem” uwem emi mmọ ẹkesidude. Edi afo ọmọfiọk ete ke ubiere mmọ ndifiak n̄ka ikowụtke eti ibuot. Eyedi oro ikedịghe akpa ini emi mmọ ẹkedomode ndibe ndụk ikpehe n̄kpọndịk oro. Ekeme ndidi mmọ ẹkebe ẹdụk ikpehe n̄kpọndịk oro ke ata esisịt ini ndien n̄kpọ ndomokiet iketịbeke. Ini efen, ekeme ndidi mmọ ẹma ẹdu ebịghi esisịt, ndien n̄kpọ ndomokiet isụk itịbeke. Ndusụk, ikebịghike edibe adan̄a ukpeme oro ama akabade emehe mmọ ndien mmọ ikokopke ndịk ndidu mbịghi ke ikpehe oro okodude ke itiendịk.

Jesus Christ ama etịn̄ ete ke ukem idaha oro oyodu ke “akpatre ini eyo emi.” Enye ọkọdọhọ ete: “Koro nte mmọ ẹdiade ẹnyụn̄ ẹn̄wọn̄de n̄kpọ, ẹdọde ndọ ẹnyụn̄ ẹdade owo ẹnọ ndọ ke mme usen eke ẹkebemde ukwọ iso, tutu esịm usen emi Noah odụkde ke ubom, mînyụn̄ ifiọkke tutu ukwọ edi edimen mmọ kpukpru efep; kpasụk ntre ke edidi Eyen Owo eyedi.”—Matthew 24:3, 38, 39.

Tịm fiọk ete ke Jesus ama asiak edidia n̄kpọ, edin̄wọn̄ n̄kpọ, ye edidọ ndọ. Ndomokiet ke otu n̄kpọ ẹmi ke idemmọ ikwan̄ake ke enyịn Jehovah. Nso ikakwan̄a ndien? Mbon eyo Noah “ikodụhe ke ukpeme” (NW), ẹdude uwem oro owụhọde ke edinam ofụri ini mmọ. Owo ikemeke  ndidu “inem” uwem ke mbabuat idaha. Ke ama ọkọwọrọ ke, m̀mê adian̄arede idemfo ọkpọn̄, ererimbot oro asan̄ade aka nsobo mi, ana afo an̄wana ọbiọn̄ọ udọn̄ ekededi ndifiak mbịne n̄kpọ ekededi oro ekemede ndinyene nto enye. (1 Corinth 7:31) Afo emekeme ndiyo n̄kpọn̄ ikpehe emi ẹnọde ukpeme eke spirit onyụn̄ afiak edi ye unana edida unan, owo ndomokiet inyụn̄ ikwe. Nte ededi, oro ekeme ndinam fi okûkop ndịk onyụn̄ anam fi afiak aka ererimbot, odude ebịghi esisịt. Ibịghike emekeme ndikọri edu oro: “Utịt ididịghe mfịn.”

N̄ko, kere ban̄a mme awat-ubomisọn̄ ita oro ẹketabade uwem mmọ ke ndibet mme ọkọmbụk n̄kpọntịbe ye mme osio-ndise ke ini mbat obot nsụn̄ikan̄ okotopde ọduọhọ ke itịghede. Ndusụk owo mfịn ẹkeme nditiene mbon en̄wen ẹmi ẹfiakde ẹka ererimbot. Inamke n̄kpọ m̀mê nso ntak idu, ana in̄wan̄în̄wan̄ nte ke ndidi se ẹkpekde ẹfiak ẹka ikpehe n̄kpọndịk idotke ye n̄kpọndịk oro odude.

Kpukpru mbon unọmọ ke ini Obot Fugen okobomode ẹma ẹbe adan̄a ẹdụk ikpehe n̄kpọndịk. Okposụkedi mmọ ẹkedoride enyịn ẹte ke usen kiet obot oro oyobomo, owo ndomokiet ikekereke ke edidi ke usen oro. Ke ẹkụtde idiọn̄ọ utịt editịm n̄kpọ emi, ediwak owo ẹdori enyịn usen Jehovah ndidi ini ekededi edi idịghe usọp usọp. Ndusụk owo ẹkam ẹkere ẹte ke usen oro ikemeke-keme ndidi “mfịn.” Ke akpanikọ utọ edu oro edi n̄kpọndịk.

Apostle Peter ọkọtọt ete: “Usen Ọbọn̄ edibuat nte inọ.” Oyom nnyịn idu ke edidemede, ‘itiede ibet inyụn̄ isọn̄ọde iyom edidi Usen Abasi,’ inamde ‘ofụri se ikekeme man Enye ekpesịm nnyịn nte itiede ke emem, inana ntọi, inyụn̄ inana ndo ke enyịn Esie.’ (2 Peter 3:10-14) Ke ẹma ẹkesobo idiọk editịm n̄kpọ emi, paradise isọn̄ ke idak Obio Ubọn̄ Abasi ọyọtọn̄ọ. Akpakam owo idehede ibian̄a nnyịn ndibe ndụk ikpehe n̄kpọndịk ke ntak ekededi emi esịt nnyịn ekemede ndinọ, sia usen oro nnyịn ibede adan̄a ifiak ika ererimbot ekemede ndidi usen Jehovah.

Dịbe ye ikọt Jehovah nyụn̄ sọn̄ọ du ye mmọ.

[Mme ndise ke page 7]

Dịbe ye ikọt Jehovah nyụn̄ sọn̄ọ du ye mmọ

[Ebiet Ẹdade Ndise Ẹto ke page 4]

Iwasa/Sipa Press