Ntọt Mme Anditan̄a Obio Ubọn̄

Ẹma Ẹnọ Mbuọtidem Mmọ Utịp

APOSTLE Paul ekedi eren oro ekenyenede n̄wọrọnda mbuọtidem, ndien enye ama esịn udọn̄ ọnọ mme ekemmọ andinịm ke akpanikọ ndikọri mbuọtidem kpasụk ntre. Enye ọkọdọhọ ete: “Owo eke asan̄ade ekpere Abasi enyene ndinịm ete Enye ododu, onyụn̄ edi Andinọ mmọ ẹmi ẹyomde Enye utịp.” (Mme Hebrew 11:6) Mme ifiọkutom ẹtienede mi ẹmi ẹtode Mozambique ẹwụt nte Jehovah esinọde mbon ọkpọsọn̄ mbuọtidem utịp ye nte enye esibọrọde mme akam ofụri esịt.

• Eyenete an̄wan kiet edide ebeakpa otode edere edere mbahade obio ukara Niassa ama etịmede esịt aban̄a nte enye ye nditọ esie itiokiet ẹdisan̄ade ẹdụk Mbono District “Usụn̄ Uwem Abasi.” N̄kukụre ubọkutom esie ekedi edinyam mme n̄kpọ ke urua n̄kann̄kụk, edi nte usen mbono akasan̄ade ekpere, enye ekenyene okụk oro ekemde ndikpe usụn̄ ke tren nnọ idemesie ye ubon esie ke uka kpọt. Kpa ye oro, enye ama ebiere ndibuọt idem ke mme ndutịm Jehovah onyụn̄ aka iso eben̄e idem ndidụk mbono oro.

Enye ama odụk tren ye nditọ esie itiokiet. Ke usụn̄ isan̄ oro ọbọ-okụk ama asan̄a ebịne enye man ọnọ enye tiket. Ke okụtde kad mbenọfọn̄ esie, enye ama obụp m̀mê idiọn̄ọ nso ke enye adian oro. Eyenete an̄wan oro ama asian enye ete ke edi ndinam ẹdiọn̄ọ imọ nte andidụk mbono district eke Mme Ntiense Jehovah. Ọbọ-okụk oro ama obụp ete: “M̀mọ̀n̄ ke ẹdinịm mbono emi?” Ke ọfiọkde ete ke mbono oro edidi ke mbọhọ mbahade obio ukara Nampula, emi oyomde usụn̄ ke n̄kpọ nte kilomita 300, ke unana idotenyịn enye ama ọbọ enye sụk ubak ekọmurua oro ẹsinyamde tiket! Ekem enye ama ọnọ enye ye ubon esie mme tiket unyọn̄ ke ubak okụk ukpeusụn̄ esie eken. Eyenete oro okokop inemesịt didie ntem ndikenyene mbuọtidem ke Jehovah!—Psalm 121:1, 2.

• Ke n̄kpọ nte isua 25, n̄wan kiet emi ekenen̄erede enyene udọn̄ ke ido ukpono ama ọbọn̄ akam ọnọ Abasi ete owụt imọ nnennen usụn̄ ndituak ibuot nnọ enye. Ufọkabasi emi enye akabuanade akabuak mme edinam ido ukpono ye ido edinam obio, ndien enye ama enyene eyịghe m̀mê orụk utuakibuot emi ama enem Abasi esịt.

Enye obụk ete: “Kpukpru ini mma nsiti mme ikọ Jesus oro ẹwetde ke Matthew 7:7, NW: ‘Ẹka iso ẹben̄e, ndien ẹyenọ mbufo; ẹka iso ẹyom, ndien mbufo ẹyekụt; ẹka iso ẹtuak, ndien ẹyesio usụn̄ ẹnọ mbufo.’ Ye itien̄wed Abasi emi ke ekikere, mma mbọn̄ akam kpukpru ini nte Abasi owụt mi akpanikọ. Usen kiet pastọ ufọkabasi nnyịn ama ọdọhọ kpukpru mbon oro ẹnamde utom ke urua n̄kann̄kụk oro ete ẹda okụk ye ndusụk n̄kpọurua mmọ ẹsọk imọ man idiọn̄ mmọ. N̄kabat eben̄e emi nte se mîkemke ye N̄wed Abasi, ntre n̄kadaha enọ ndomokiet ndi. Ke ini pastọ okokụtde ete ke n̄kadaha ‘enọ’ ndi, enye ama ọtọn̄ọ ndinọ mi usọn̄enyịn ke iso ofụri ufọkabasi. Usen oro ke n̄kọdiọn̄ọ nte ke emi ikedịghe usụn̄ emi Abasi oyomde ẹtuak ibuot ẹnọ imọ, ntre mma n̄kpọn̄ ufọkabasi oro. Kan̄a ke emi, mma n̄kọbọ ke ndibọn̄ akam nyom akpanikọ.

“Ke akpatre, mma nnyene uko nnyụn̄ n̄kosobo ye iman kiet emi edide kiet ke otu Mme Ntiense Jehovah. Enye ama ọnọ mi tract, ndien ke mma n̄kokot mma ndiọn̄ọ ke ndondo oro nte ke Abasi ama ọbọrọ mme akam mi. Nte ini akade, nsan̄a mi n̄ko ama ọtọn̄ọ ndiwụt esịtekọm nnọ akpanikọ Bible, ndien nnyịn ima isịn ndọ nnyịn ke n̄wedibet. Nte ededi, ke ukperedem, ebe mi ama ọdọn̄ọ idiọk idiọk. Edi tutu enye akpa, enye ama esịn udọn̄ ọnọ mi ndika iso ke usụn̄ akpanikọ man nnyịn ikpekeme ndifiak nsobo ke Paradise.

“Mmowụt esịtekọm kpukpru ini nnọ Jehovah ke ndibọrọ mme akam mi nnyụn̄ n̄wụt mi nnennen usụn̄ ndituak ibuot nnọ enye. Ẹma ẹbọrọ mme akam mi n̄ko koro mmokụt nditọ mi mbitiaita nte ẹkabarede ẹdi mme asan̄autom Jehovah oro ẹyakde idem ẹnọ.”