Abasi Esibọrọ Akam

Cornelius ekedi eren emi okoyomde mfọn Abasi ebe ke akam ofụri ini emi ọkọbọn̄de ke ofụri esịt. Akan oro, enye ama ada itie esie nte akwa owo ekọn̄ anam n̄kpọ ke eti usụn̄. Nte Bible ọdọhọde, enye ama ‘ọnọ mme ubuene ediwak n̄kpọ-mfọn.’—Utom 10:1, 2.

 KE INI oro, mme Jew ẹmi ẹnịmde ke akpanikọ, mme okpono Abasi ke ido mme Jew, ye mbon Samaria ẹkenam esop Christian. Cornelius ekedi owo Gentile emi mînaha mbobi mîkonyụn̄ idịghe ubak esop Christian. Nte oro ọwọrọ ke mme akam esie ẹkedi ikpîkpu? Baba. Jehovah Abasi ama okụt Cornelius ye mme utom akam esie.—Utom 10:4.

Ebede ke ndausụn̄ angel, ẹma ẹnam Cornelius edinyene ebuana ye esop Christian. (Utom 10:30-33) Nte utịp, enye ye mbonufọk esie ẹma ẹnyene ifet edikabade ndi mme akpa Gentile ẹmi mînaha mbobi oro ẹkedade ẹdisịn ke esop Christian. Jehovah Abasi ama okụt ete ke odot ndisịn ọkpọkpọ ifiọk n̄kpọntịbe Cornelius ke n̄wetnnịm n̄kpọ Bible. Nte eyịghe mîdụhe, enye ama anam ekese ukpụhọde man anam uwem esie odu ke ọyọhọ n̄kemuyo ye mme idaha Abasi. (Isaiah 2:2-4; John 17:16) Ifiọk n̄kpọntịbe Cornelius ekpenyene ndidi akwa n̄kpọ nsịnudọn̄ nnọ mme owo eke kpukpru idụt ẹmi ẹyomde mfọn Abasi mfịn. Kere ban̄a ndusụk uwụtn̄kpọ.

Mme Uwụtn̄kpọ Eyomfịn

N̄kaiferi kiet ke India ama enen̄ede oyom ndọn̄esịt. Ke ọdọde ndọ ke ini ekedide isua 21, enye ama aman nditọ iba. Edi ibịghike ke ama akaman ọyọhọ eyen iba, ebe esie ama akpa. Ke mbuari, ke edide isua 24, enye ama akabade edi ebeakpa emi enyenede adiaha edide ọfiọn̄ 2 ye akpan edide ọfiọn̄ 22. Eyịghe idụhe enye okoyomde ndọn̄esịt! M̀mọ̀n̄ ke enye akpaka? Okoneyo usen kiet, ke odude ke ọkpọsọn̄ mfụhọ, enye ama ọbọn̄ akam, ọdọhọde ete, “Ete eke heaven, mbọk da Ikọ fo dọn̄ mi esịt.”

Ke ndan̄nsiere, enye ama enyene esenowo. Enye ekedi kiet ke otu Mme Ntiense Jehovah. Usen oro, utom ukwọrọikọ esie eke ufọk ke ufọk ama ọsọn̄ koro owo ifan̄ kpọt ẹkedara enye. Ke akpade mba onyụn̄ okopde mmemidem, enye ama oyom ndinyọn̄ ufọk, edi nte ededi ama onụk enye ndikam n̄waha ufọk kiet efen. Edi do ke enye okosobo ye eyenan̄wan emi edide ebeakpa. Eyenan̄wan emi ama ọdọhọ enye odụk ufọk onyụn̄ ọbọ n̄wed oro akanamde Bible an̄wan̄a. N̄wan emi ama ọbọ akwa ndọn̄esịt oto ndikot n̄wed oro ye nneme  emi enye ekenyenede ye Ntiense oro. Enye ama ekpep n̄kpọ aban̄a un̄wọn̄ọ Abasi ndinam mme akpan̄kpa ẹset onyụn̄ ekpep aban̄a Obio Ubọn̄ Abasi, emi edinamde isọn̄ edi paradise ke mîbịghike. Ke edide akpan n̄kpọ akan, enye ama edifiọk onyụn̄ ama ata Abasi kierakiet, Jehovah, emi ọkọbọrọde akam esie.

Nora, emi odụn̄de ke obio George, South Africa, ama osio ọfiọn̄ kiet enịm ndibuana ke utom ukwọrọikọ uyọhọ-ini. Mbemiso ọkọtọn̄ọde, enye ama ọbọn̄ akam ifịk ifịk ọnọ Jehovah ete an̄wam imọ ikụt owo emi enyenede ata udọn̄ ke ndikpep Bible. Efakutom emi ẹkenọde enye anam utom ama esịne ufọk owo emi ekesinamde n̄kpọ ata nsọn̄ido nsọn̄ido ye Nora ke mme ini oro enye akawahade do ke ini edem. Ke enyenede uko, Nora ama afiak awaha ufọk oro. Ke n̄kpaidem, enye ama okụt ke obufa odudụn̄, emi ekerede Noleen, ama ọwọrọ edidụn̄ do. Akan oro, Noleen ye eka esie ẹma ẹbọn̄ akam ẹnọ Abasi ẹte an̄wam mmimọ idiọn̄ọ Bible. Nora anam an̄wan̄a ete: “Ke ini n̄kobụpde mmọ m̀mê ẹkpema ndikpep Bible, mmọ ẹma ẹkop idatesịt.” Noleen ye eka esie ẹma ẹnam n̄kọri usọp usọp. Nte ini akade, mmọ mbiba ẹma ẹtọn̄ọ ndibuana ye Nora ke utom ukọkudọn̄ọ eke spirit.

Uwụtn̄kpọ efen emi owụtde odudu akam edi eke n̄wan ye ebe ẹmi ẹdụn̄de ke Johannesburg ke South Africa. Ke okoneyo Saturday kiet ke 1996, ndọ Dennis ye Carol ama ekpere ndiwụre. Nte akpatre n̄kpọ, mmọ ẹma ẹbiere ndibọn̄ akam nyom un̄wam, ndien mmọ ẹkenam emi ndien ndien tutu eyo enen̄ede ọsọn̄. Ke ndan̄nsiere, ke n̄kanika 11, owo iba ke otu Mme Ntiense Jehovah ẹma ẹkọn̄ usụn̄ufọk mmọ. Dennis ama eberede usụn̄ onyụn̄ ọdọhọ mmọ ẹbet imọ ikot n̄wan imọ idi. Dennis ndien ama ọtọt Carol ete ke edieke enye ọdọhọde Mme Ntiense ẹmi ẹdụk ẹdi, ke ọyọsọn̄ ndidọhọ mmọ ẹnyọn̄ọ. Carol ama eti Dennis ete ke mmimọ ikọbọn̄ akam iyom un̄wam onyụn̄ ọdọhọ ete ke ekeme ndidi emi edi ibọrọ emi Abasi ọnọde ke akam mmimọ. Ntre ẹma ẹkot Mme Ntiense ẹmi ẹdụk ẹdi, ndien ẹma ẹtọn̄ọ ukpepn̄kpọ Bible ke n̄wed Ifiọk Oro Adade Osịm Nsinsi Uwem. Dennis ye Carol ẹma ẹkop nduaidem ke se mmọ ẹkekpepde. Kpa ke uwemeyo oro, mmọ ẹma ẹdụk akpa mbono esop mmọ ke Ufọkmbono Obio Ubọn̄ Mme Ntiense Jehovah ke n̄kann̄kụk oro. Ebede ke ndida ifiọk oro mmọ ẹkekpepde ẹto Bible nsịn ke edinam, Dennis ye Carol ẹma ẹkụt usọbọ ẹnọ mme mfịna ndọ mmọ. Mmọ idahaemi ẹdi mme okop-inemesịt anditoro Jehovah ẹmi ẹma ẹkena baptism ẹsinyụn̄ ẹbuanade edinịm ke akpanikọ mmọ ẹmi ẹkọn̄ọde ke Bible ye mme mbọhọidụn̄ mmọ kpukpru ini.

Nso Edieke Afo Ekerede ke Imọ Idotke Ndibọn̄ Akam?

Ndusụk mbon oro ẹnyenede esịt akpanikọ ẹkeme ndikere ke mmimọ idotke ndibọn̄ akam ke ntak idiọk usụn̄ uwem mmọ. Jesus Christ ama ọnọ mbụk aban̄a utọ owo oro, ọbọ tax emi ẹkesịnde ke ndek. Ke odụkde okụre temple, eren emi ama ekere ke imọ idotke ndidụk ebiet emi ẹkesidade ẹbọn̄ akam. “[Enye] ada nsannsan . . . amia ubọk ke ikpanesịt esie, ete, Abasi, tua mi, idiọk owo, mbọm.” (Luke 18:13) Nte Jesus ọdọhọde, ẹma ẹyere akam eren emi. Emi owụt ete ke Jehovah Abasi ke akpanikọ ọfọn ido onyụn̄ oyom ndin̄wam mme anamidiọk ẹmi ẹnen̄erede ẹkabade esịt.

Kere ban̄a akparawa South Africa kiet emi ekerede Paul. Ke ini ekedide ekpri eyeneren, Paul ama esitiene eka esie odụk mme mbono esop Christian. Edi ke mme isua oro enye okodude ke  ufọkn̄wed sekọndri, enye ama ọtọn̄ọ ndidụk nsan̄a ye n̄kparawa owo ẹmi mîketieneke mme usụn̄ Abasi. Ke ama ọkọkpọn̄ ufọkn̄wed, enye ama odụk udịmekọn̄ akani ukara asari South Africa. Ekem, ke unana idotenyịn, ufan an̄wan esie ama esịbe itie ebuana mmọ. Usụn̄ uwem unana uyụhọ emi ama anam Paul enen̄ede okop mfụhọ. Enye eti ete: “Mbubịteyo usen kiet, mma mbọn̄ akam nnọ Jehovah nnyụn̄ mben̄e un̄wam esie, idem okposụkedi mmen̄kọbọn̄ke akam nnọ Abasi ke esịt akpanikọ ke ediwak isua.”

Ikebịghike ke ama ọkọbọn̄ akam emi, eka Paul ama ọnọ enye ikot ete edidụk Editi n̄kpa Christ eke isua ke isua. (Luke 22:19) Ekedi esen esen n̄kpọ ọnọ Paul ndikụt nte eka esie anamde emi, sia enye okotụtde utọn̄ mîkonyụn̄ inyeneke udọn̄ ke Bible. “N̄kese ikot emi nte ibọrọ emi Jehovah ọnọde ke akam mi ndien mma n̄kere ke ana ndụk.” Toto ke ini oro ka iso, Paul ama ọtọn̄ọ ndidụk kpukpru mbono esop Christian. Ke ama ekekpep Bible ke ọfiọn̄ inan̄, enye ama odot ndina baptism. Akan oro, enye ama etre ukpep udiọn̄ ukwakutom onyụn̄ emek ubọkọkọ eke edibuana ke utom ukwọrọikọ uyọhọ-ini. Mfịn, Paul edi owo emi okopde inemesịt, ikopke aba mfụhọ iban̄a uwem esie eke ini edem. Ke isua 11 ẹmi ẹbede, enye anam utom ke ọfis n̄kọk itieutom Watch Tower Society ke South Africa.

Ke akpanikọ, Jehovah Abasi ke mfọnido esibọrọ akam onyụn̄ “edi Andinọ mmọ ẹmi ẹyomde Enye utịp.” (Mme Hebrew 11:6) Ibịghike akwa usen Jehovah eyedisịm onyụn̄ ada utịt ọsọk kpukpru idiọkido. Kan̄a kemi, Jehovah ke ọbọrọ akam emi ikọt esie ẹbọn̄de ẹben̄e odudu ye ndausụn̄ nte mmọ ẹbuanade ifịk ifịk ke akpan utom edinọ ikọ ntiense. Ntem, ke ẹda ediwak miliọn owo ẹmi ẹtode kpukpru idụt ẹdisịn ke esop Christian ẹnyụn̄ ẹda ifiọk Bible oro adade esịm nsinsi uwem ẹdiọn̄ mmọ.—John 17:3.

[Ndise ke page 5]

Akam ofụri esịt Cornelius ama ada esịm apostle Peter ndika n̄kese enye

[Ndise ke page 6]

Akam an̄wam ediwak owo ke mme ini mfụhọ

[Mme ndise ke page 7]

Ọfọn ndibọn̄ akam nyom un̄wam ndifiọk Bible

Mme ọdọ ndọ ẹkeme ndibọn̄ akam nyom un̄wam ndisọn̄ọ ndọ mmọ