Odudu Akam

Utịn osụhọde ke obio Nahor ke Ufọt Ufọt Edem Usiahautịn. Eren kiet otode Syria emi ekerede Eliezer ada camel duop asan̄a edisịm obube mmọn̄ kiet ke edem obio. Okposụkedi eyịghe mîdụhe nte ke enye akpa mba onyụn̄ okop nsatitọn̄, Eliezer enen̄ede ekere aban̄a udọn̄ mbon efen. Enye oto esenidụt edi ndiyom n̄wan nnọ eyen eteufọk esie. Akan oro, ana enye oyom n̄wan emi ke otu iman eteufọk esie. Enye edisan̄a didie anam ọkpọsọn̄ utom emi?

ELIEZER enịm odudu akam ke akpanikọ. Ke enyenede n̄wọrọnda mbuọtidem emi ebietde eke eyenọwọn̄, enye esịn eben̄e nsụhọdeidem emi: “Jehovah Abasi ete mi Abraham, mbọk, nam iso ọfọn mi mfịn emi, nyụn̄ nam se ifọnde ye ete mi Abraham. Sese, ami mmọn̄ nda ke mben idịm mmọn̄, ndien nditọ iban mbio-obio ke ẹwọn̄ọ ndikoi mmọn̄: ndien ama edi eyen-an̄wan emi ndidọhọde enye nte, [Biomode] aban̄ fo, mbọk, man n̄n̄wọn̄; emi edinyụn̄ ọdọhọde, ete, n̄wọn̄, ndien nyọnọ mme camel fo mmọn̄ ẹn̄wọn̄ n̄ko, yak edi enye ke afo enịm ọnọ eyen fo Isaac: ndien ke ntre ke ndifiọk nte afo ọmọfọn ido ye ete mi.”—Genesis 24:12-14.

Mbuọtidem emi Eliezer enyenede ke odudu akam idịghe ikpîkpu. Kamse, ata akpa n̄wan emi edide edisịm obube mmọn̄ edi eyeyen eyeneka Abraham! Enyịn̄ esie edi Rebekah, ndien enye idọhọ ebe, asana ke ido uwem, onyụn̄ eye. Ke edide n̄wọrọnda, ikụreke ke enye ndinọ Eliezer mmọn̄ ọn̄wọn̄ edi enye ke mfọnido ọnọ kpukpru camel esie mmọn̄ ẹn̄wọn̄. Ekem, ke ubon ẹma ẹkesop idem ọtọkiet, Rebekah enyịme nditiene Eliezer nnyọn̄ anyan idụt n̄kedi n̄wan Isaac eyen Abraham. Nso n̄wọrọnda ye in̄wan̄în̄wan̄ ibọrọ akam Eliezer ke emi ekedi ntem ke ini emi Abasi mîkesiwakke ndisịbe ndụk mme n̄kpọntịbe ke utịbe utịbe usụn̄ mi!

Nnyịn imekeme ndikpep ekese nto akam Eliezer. Enye owụt n̄wọrọnda mbuọtidem, nsụhọdeidem, ye udọn̄ unana ibụk esie kaban̄a se mbon efen ẹyomde. Akam Eliezer ama owụt n̄ko nsụkibuot esie nnọ usụn̄ emi Jehovah adade anam n̄kpọ ye ubonowo. Eyịghe idụhe nte ke enye ama ọfiọk aban̄a san̄asan̄a ima emi Abasi ekenyenede ọnọ Abraham ọkọrọ ye un̄wọn̄ọ Esie nte ke mme edidiọn̄ ini iso ẹdito Abraham ẹsịm ofụri ubonowo. (Genesis 12:3) Ntem, Eliezer ọkọtọn̄ọ akam esie ye mme ikọ ẹmi: “Jehovah Abasi ete mi Abraham.”

Jesus Christ ekedi andito ubon Abraham emi edidide usụn̄ oro ẹdade ẹdiọn̄ ofụri okopitem ubonowo. (Genesis 22:18) Edieke nnyịn iyomde ẹbọrọ akam nnyịn mfịn, oyom nnyịn iwụt ke nsụhọdeidem nte ke imenyịme usụn̄ emi Abasi anamde n̄kpọ ye ubonowo ebe ke Eyen esie. Jesus Christ ọkọdọhọ ete: “Edieke mbufo ẹdụn̄de Mi ke idem, ikọ Mi onyụn̄ odụn̄de mbufo ke esịt, ẹben̄e se ẹyomde, ndien ẹyenam ẹnọ mbufo.”—John 15:7.

 Anditiene Christ emi okokụtde nte mme ikọ Jesus ẹmi ẹdide akpanikọ ekedi apostle Paul. Enye ndikenịm odudu akam ke akpanikọ ikedịghe ikpîkpu. Enye ama esịn udọn̄ ọnọ mme ekemmọ Christian ete ẹda kpukpru editịmede esịt mmọ ẹbịne Abasi ke akam onyụn̄ ọsọn̄ọ ete: “Mmenyene ukeme ndinam kpukpru n̄kpọ ke odudu Andisọn̄ọ mi idem.” (Philippi 4:6, 7, 13) Ndi emi ọwọrọ ete ke ẹma ẹnọ Paul kpukpru se enye ekeben̄ede Abasi ke akam? Ẹyak nnyịn ise.

Owo Inọhọ Kpukpru Se Ẹben̄ede

Ke anana-ibụk utom ukwọrọikọ esie, Paul ama osobo se enye okokotde “n̄kukịm ke obụkidem.” (2 Corinth 12:7) Ekeme ndidi emi ekedi mfụhọ ye editịmede esịt ẹtode mme andibiọn̄ọ ye “nditọ-ete abian̄a.” (2 Corinth 11:26; Galatia 2:4) Mîdịghe ekeme ndidi enye ekedi ata ata ubiak otode uyịre uyịre udọn̄ọ enyịn. (Galatia 4:15) Sededi emi enye ekedide, “n̄kukịm ke obụkidem” emi ama anam idem emem Paul. Enye ekewet ete: “N̄kekpe Ọbọn̄ ubọk utịm ikata, nte adaha ọkpọn̄ mi.” Nte ededi, owo ikọnọhọ Paul se enye ekeben̄ede. Ẹma ẹnam an̄wan̄a Paul nte ke mme ufọn n̄kpọ eke spirit oro enye ama ọkọbọbọ oto Abasi, utọ nte odudu ndiyọ mme idomo, ẹma ẹkem. N̄ko-n̄ko, Abasi ọkọdọhọ ete: “Odudu mi ọfọn ama ke mmem-idem.”—2 Corinth 12:8, 9.

Nso ke nnyịn ikpep ito uwụtn̄kpọ Eliezer ye Paul? Jehovah Abasi ke akpanikọ esikpan̄ utọn̄ ọnọ akam mbon oro ẹsụhọrede idem ẹyom ndinam n̄kpọ esie. Edi emi iwọrọke ite ke kpukpru ini enye esinọ mmọ se mmọ ẹben̄ede koro Abasi esise n̄kpọ aka anyan. Enye ọfiọk se ifọnde ye nnyịn akan nte nnyịn ifiọkde. Ke edide akpan n̄kpọ akan, kpukpru ini enye esinam n̄kpọ ke n̄kemuyo ye uduak esie emi enye eketịn̄de nte ẹwetde ke Bible.

Ini Ukọkudọn̄ọ eke Spirit

Abasi ọn̄wọn̄ọ ndikọk ubonowo kpukpru udọn̄ọ eke obụk, eke ekikere, ye eke ntụk ke Tọsịn Isua Ukara emi Eyen esie edikarade isọn̄. (Ediyarade 20:1-3; 21:3-5) Mme ata Christian ẹbet ini iso emi ẹn̄wọn̄ọde mi ye ọkpọsọn̄ udọn̄, ẹnyenede ọyọhọ mbuọtidem ke odudu Abasi ndinam enye edi ata idem n̄kpọ. Ke adan̄aemi mîdorike enyịn utọ utịbe utịbe ukọkudọn̄ọ oro nditịbe idahaemi, mmọ ẹbọn̄ akam ẹnọ Abasi ẹben̄e ndọn̄esịt ye odudu esie ndiyọ mme idomo. (Psalm 55:22) Ke ini mmọ ẹdọn̄ọde, mmọ ẹkeme n̄ko ndibọn̄ akam mben̄e ndausụn̄ Abasi ndinyene mfọnn̄kan usọbọ emi okụk mmọ ekemde.

Ndusụk ido ukpono ẹsịn udọn̄ ẹnọ mbon udọn̄ọ ndibọn̄ akam nyom ẹkọk mmọ idahaemi, ẹnyande ubọk ẹwụt mme utịbe utịbe ukọkudọn̄ọ oro Jesus ye mme apostle esie ẹkenamde. Edi akpan uduak ama odu akanamde ẹnam mme utọ utịben̄kpọ oro. Mmọ ẹkewụt ẹte ke Jesus Christ ekedi ata Messiah ẹnyụn̄ ẹwụt ke ẹma ẹmen mfọn Abasi ẹkpọn̄ idụt mme Jew ẹsọk obufa esop Christian. Ke ini oro, ẹkeyom mme utịbe utịbe enọ man ẹsọn̄ọ mbuọtidem esop Christian emi ẹketọn̄ọde obufa obufa. Ke ini obufa esop emi ọkọsọn̄ọde ada, yak idọhọ ntre, onyụn̄ ọsọn̄de idem, mme utịbe utịbe enọ ‘ẹma ẹkabade ẹdi ikpîkpu.’—1 Corinth 13:8, 11.

Ke akpan ini emi, Jehovah Abasi ke ọnọ mme andituak ibuot nnọ enye ndausụn̄ ke utom ukọkudọn̄ọ eke spirit emi edide akpan n̄kpọ akan. Ke adan̄aemi mmọ ẹsụk ẹnyenede ini, oyom mme owo ẹsọsọp ẹnam eben̄e emi: “Mbufo ẹyom Jehovah, ke ini ẹkemede ndikụt enye, ẹseme ẹkot enye, ke ini enye ekperede: yak idiọk owo ọkpọn̄ usụn̄ esie, yak oburobụt owo ọkpọn̄ ekikere esie: onyụn̄ afiak etiene Jehovah: ndien enye ayatua enye mbọm; etiene Abasi nnyịn, koro Enye ayawak ndidahado.”—Isaiah 55:6, 7.

Ẹkọk mme anamidiọk ẹmi ẹkabarede esịt udọn̄ọ eke spirit emi ebe ke ndikwọrọ eti mbụk Obio Ubọn̄ Abasi. (Matthew 24:14) Ebede ke ndinọ mme asan̄autom esie odudu ndinam utom unyan̄a uwem emi, Jehovah Abasi ke an̄wam ediwak miliọn owo ẹtode kpukpru idụt ndikabade esịt n̄kpọn̄ mme idiọkn̄kpọ mmọ ndinyụn̄ nnyene eti itie ebuana ye enye mbemiso utịt idiọk editịm n̄kpọ emi. Ke akpanikọ, ẹbọrọ akam kpukpru mbon oro ẹbọn̄de akam ke ofụri esịt ẹben̄e utọ ukọkudọn̄ọ eke spirit oro ye kpukpru owo ẹmi ẹbọn̄de akam ẹyom un̄wam ndinam utom ukọkudọn̄ọ emi.

[Ebiet Ẹdade Ndise Ẹto ke page 3]

Eliezer ye Rebekah/The Doré Bible Illustrations/Dover Publications