Mme Mbụme Ẹtode Mme Andikot

Ke Rome 12:19, ndi apostle Paul okowụt ke mme Christian ikpenyeneke ndiyat esịt, ke ini enye ọkọdọhọde ete: “Ẹkûsio usiene ẹnọ idem mbufo, ndima mme ufan mi, edi ẹbọk idem ke usụn̄ ẹnọ iyatesịt Abasi”?

Ke nditịm ntịn̄, enye ikọdọhọke. Apostle Paul eketịn̄ mi aban̄a iyatesịt Abasi. Nte ededi, emi iwọrọke ite ke inamke n̄kpọ edieke mme Christian ẹyakde idem ẹnọ iyatesịt. Bible ọnọ nnyịn item in̄wan̄în̄wan̄ ọbiọn̄ọ ediyat esịt. Kere ban̄a uwụtn̄kpọ ifan̄ ẹban̄ade item otode Abasi.

“Tre ifụtesịt, nyụn̄ kpọn̄ ifiopesịt: kûyat esịt kûnyụn̄ unam idiọk baba.” (Psalm 37:8) “Owo ekededi eke ayatde esịt ye eyen-ete esie esesịn idem ke ikpe.” (Matthew 5:22) “Ubọk-utom obụkidem ayarade, oro edi use, ye mbubiam ido, ye obukpo ido, ye edikpono-ndem, ye edibre-idiọn̄, ye usua, ye utọk, ye ufụp ye iyatesịt.” (Galatia 5:19, 20) “Ẹsion̄o kpukpru ndot-ndot ekikere, ye ifụtesịt, ye iyatesịt, ye utọk, ye isụn̄i ẹfep ke otu mbufo.” (Ephesus 4:31) “Edi yak kpukpru owo ẹsọp ndikop ikọ, ẹkûsọp nditịn̄ ikọ, ẹkûsọp ndiyat esịt.” (James 1:19) N̄ko-n̄ko, n̄wed Mme N̄ke ọnọ nnyịn item ediwak ini ọbiọn̄ọ ediyak idem nnọ iyatesịt m̀mê ndinyene ntụhọ edisọp nyat esịt ke n̄kpri ndudue ye mme idiọkn̄kpọ oro owo anamde.—Mme N̄ke 12:16; 14:17, 29; 15:1; 16:32; 17:14; 19:11, 19; 22:24; 25:28; 29:22.

Udọn̄ikọ Rome 12:19 odu ke n̄kemuyo ye utọ item oro. Paul ama ọdọhọ ete yak ima nnyịn okûsan̄a ye mbubịk, yak idiọn̄ mmọ ẹmi ẹnamde nnyịn isịnenyịn, yak in̄wana ndikere se ifọnde mban̄a mbon en̄wen, yak ikûda idiọk isio owo usiene idiọk, ndien yak in̄wana nte ikekeme ndidu ke emem ye kpukpru owo. Ekem enye ama eteme ete: “Ẹkûsio usiene ẹnọ idem mbufo, ndima mme ufan mi, edi ẹbọk idem ke usụn̄ ẹnọ iyatesịt Abasi: koro ẹwet ẹte, Jehovah ete, Usiene enyene Mi, Ami nyosio usiene.”—Rome 12:9, 14, 16-19.

Ih, nnyịn ikpenyeneke ndiyak iyatesịt onụk nnyịn ndisio usiene. Ifiọk nnyịn kaban̄a mme idaha ye ekikere nnyịn kaban̄a unenikpe ifọnke ima. Edieke nnyịn iyakde iyatesịt onụk nnyịn inam n̄kpọ ndisio usiene, nnyịn iyawak ndinam ndudue. Oro ediyụhọ uduak Asua Abasi, kpa Devil. Paul ama ewet ke itie en̄wen ete: “Ẹyat esịt, ndien ẹkûdue; ẹkûyak utịn osụhọde edisịm iyatesịt mbufo: ẹkûnyụn̄ ẹnọ Satan ufan̄.”—Ephesus 4:26, 27.

Eti usụn̄ edinam, kpa usụn̄ edinam emi esịnede ọniọn̄ akan, edi ndiyak Abasi ebiere ini emi enye edisiode usiene ye owo emi enye edisiode usiene ọnọ. Enye ekeme ndinam oro ye ọyọhọ ifiọk, ndien usiene ekededi emi enye edisiode oyowụt mfọnmma unenikpe esie. Nnyịn imekeme ndikụt nte ke se ikọ Paul ke Rome 12:19 ọkọwọrọde edi oro ke ini nnyịn itịmde ifiọk nte enye eketịn̄de otụk Deuteronomy 32:35, 41, emi esịnede mme ikọ ẹmi: “Ufen ye usiene ẹdi okịm.” (Men Mme Hebrew 10:30 domo.) Ntem, idem okposụkedi ikọ oro “Abasi” mîdụhe ke uwetn̄kpọ Greek, ediwak mme akabade n̄wed eyomfịn ẹsịn enye ke Rome 12:19. Emi ada ekesịm mme utọ edikot nte “yak Abasi osio usiene” (The Contemporary English Version); “ẹbọk idem ke usụn̄ ẹnọ iyatesịt Abasi” (Edisana ŋwed Abasi Ibom); “yak Abasi ọnọ ufen edieke enye edinọde” (The New Testament in Modern English); “yak ufan̄ nọ usiene Abasi.”—The New English Bible.

Idem ke ini mme asua akpanikọ ẹsụn̄ide ẹnyụn̄ ẹkọbọde nnyịn, nnyịn imekeme ndinyene mbuọtidem ke ikọ Jehovah Abasi emi Moses okokopde: “Jehovah, Jehovah, Abasi mbọm, ye mfọn, ye anyan ime, awak ima ye akpanikọ, enịm ima ọnọ ediwak tọsịn, efen mme ukwan̄-n̄kpọ, ye ndudue, ye idiọk ido, edi iyakke mbon-isop ẹbọhọ.” (Sịghisịghi ubọkn̄wed edi eke nnyịn.)—Exodus 34:6, 7.