Nnyịn Idi Mmọ Ẹmi Ẹbuọtde Idem

Ndibuana Idotenyịn Christian ke Senegal

IYAK edi akpan udia toto ke eset. Ke ediwak tọsịn isua, mme owo ẹmekọ iyak ke mme inyan̄, n̄kpọdiọhọ mmọn̄, ye akpa ererimbot. Ndusụk ke otu mme apostle Jesus Christ ẹkedi mme ọkọiyak ke Inyan̄ Galilee. Nte ededi, Jesus ama owụt mmọ orụk ukọiyak efen. Emi ekedi ukọiyak eke spirit oro mîdidaha ufọn isọk mme ọkọiyak ikpọn̄îkpọn̄ edi adade ọsọk iyak n̄ko.

Ke afan̄ emi, Jesus ama asian Peter emi ekedide ọkọiyak ete: “Tọn̄ọ ke emi afo ọyọkọ owo.” (Luke 5:10) Ke ẹnam orụk ukọiyak emi mfịn ke se iwakde ibe idụt 230, esịnede Senegal. (Matthew 24:14) Mi “mme ọkọ-owo” eke eyomfịn ẹbuana idotenyịn Christian mmọ ye mbon en̄wen uko uko.—Matthew 4:19.

Senegal odu ke ata utịt utịt edem usoputịn Africa. Enye atara ọtọn̄ọde ke mme ikpehe utatan desat ẹmi ẹdude adan̄a kiet ye Sahara ke edem edere ekesịm mme mbịtmbịt akai ẹdude ke ikpehe Casamance ke edem usụk. Senegal edi isọn̄ emi ufiop ufiop ofụm desat ọkọrọ ye mbịtmbịt, inem inem ofụm Atlantic ẹsifụmede. Owo ẹwakde ẹbe miliọn usụkkiet ẹdụn̄ mi. Ẹda ntatubọk mmọ ẹdiọn̄ọ mme andidụn̄ Senegal. Ata ediwak mmọ idọhọke ke idi Christian. Ediwak ẹdi mme ekpemerọn̄, ke adan̄aemi mbon eken ẹkpemede enan̄, camel, ye ebot. Mme ọtọin̄wan̄ ẹdu n̄ko, ẹmi ẹtọde mbansan̄, mfriukịm, ye edesi. Ih, mme ọkọiyak ẹdu n̄ko, ẹmi ẹsimende mme iyịre ẹmi iyak ẹyọhọde ẹto Inyan̄ibom Atlantic ye ediwak ikpọ akpa ẹmi ẹwetde ẹbe ke idụt oro ẹdi. Mbubehe ukọiyak enyene akpan udeme ke ndutịm uforo Senegal. Ke akpanikọ, udia oro ẹtịmde ẹma ke idụt oro edi ceebu jën, kpa inem inem udia ẹdade edesi, iyak, ye ikọn̄ ẹtem.

“Mme Ọkọ-Owo”

Mme ifịk ifịk ọkwọrọ Obio Ubọn̄ Abasi 863 ẹdu ke Senegal. Ukọiyak eke spirit ọkọtọn̄ọ mi ke ntọn̄ọ ntọn̄ọ iduọk isua 1950. Ẹketọn̄ọ ọfis n̄kọk itieutom Watch Tower Society ke Dakar, kpa ibuot obio, ke 1965. “Mme ọkọiyak” ẹdide isụn̄utom ẹma ẹtọn̄ọ ndito mme nsannsan idụt ndibehe. Utom “ukọiyak” ama ọtọn̄ọ, ndien edibuana idotenyịn Christian ke Senegal ama aka iso ye iwụk. Nte ini akade, ẹma ẹbọp mbufa ufọkutom n̄kọk itieutom ke Almadies, ke adan̄a Dakar, ndien ẹma ẹyak ẹnọ Jehovah ke June 1999. Nso ini idara ke oro ekedi ntem!

N̄kpọ-Ata eke Edinyịme Akpanikọ

Ke ẹka ẹbịne mme owo ẹtode nsio nsio idaha ke uwem kpukpru ini, ndien ndusụk mmọ ẹnyịme etop idotenyịn emi odude ke Ikọ Abasi. Okposụkedi ediwak owo mînyeneke ifiọk iban̄a Bible, mmọ ẹkop idatesịt ndikpep nte ke ibịghike mme un̄wọn̄ọ oro Jehovah Abasi ọkọn̄wọn̄ọde ọnọ mme anam-akpanikọ prọfet eke eset ẹyesu.

Ediwak ini esiyom uko man ẹsọn̄ọ ẹda ẹnọ mme edumbet Christian, akpan akpan ke ini mme ido edinam ubon ẹbuanade. Ke uwụtn̄kpọ, udọ uwak iban edi ọsọ n̄kpọ ke Senegal. Ke uwụtn̄kpọ, eren kiet ekenyene iban iba ke ini enye ọkọtọn̄ọde ndikpep Bible. Nte enye eyenyene uko ndinyịme akpanikọ Christian nnyụn̄ nnam n̄kpọ ke n̄kemuyo ye se N̄wed Abasi oyomde ete owo edi ebe n̄wan kiet kpọt? (1 Timothy 3:2) Ndien nte enye eyenyịme ndidu ye n̄wan uyen esie, kpa n̄wan oro enye ekebemde iso ọdọ? Oro edi se enye akanamde, ndien enye ke anam utom idahaemi nte ifịk ifịk ebiowo ke kiet ke otu ikpọ esop oro ẹdude ke ikpehe Dakar. Akpa n̄wan esie n̄ko enyịme akpanikọ ke adianade ye kpukpru nditọ esie 12, emi akpa n̄wan amande 10 ndien enye oro ekedide udiana n̄wan esie amande 2.

N̄kpọ ubiọn̄ọ efen ke ndinyịme idotenyịn Christian ekeme ndidi unana ifiọkn̄wed. Ndi emi ọwọrọ ete ke owo oro mînyeneke ifiọkn̄wed ikemeke ndinyịme nnyụn̄ nnam akpanikọ? N̄wan̄ansa-o. Kere ban̄a uwụtn̄kpọ Marie, eka n̄kpri nditọ itiaita oro anamde utom ọkpọsọn̄. Enye ama ọsọsọp okụt ufọn edineme itie Bible kpukpru usen ye n̄kpri nditọ esie mbemiso mmọ ẹkade ufọkn̄wed ye mbemiso enye akade utom. Edi didie ke enye ekekeme ndinam emi, sia enye mîkekemeke ndikot n̄wed? Kpukpru tụhi-tụhi usenubọk, enye ama esimen ekpri n̄wed  Ẹdụn̄ọde N̄wed Abasi ke Usen ke Usen akada ke efak emi utatan ọyọhọde ke iso ufọk esie. Nte mme owo ẹsan̄ade ẹbe, enye oyobụp m̀mê mmọ ẹkeme ndikot n̄wed. Ke ini enye okụtde owo emi ekemede ndikot, enye ayak ekpri n̄wed oro ọnọ onyụn̄ ọdọhọ ke ofụri esịt ete: “N̄kemeke ndikot n̄wed, ntre mbọk nte afo akpama ndikot ikpehe emi nnọ mi mfịn?” Enye ama esinen̄ede akpan̄ utọn̄ ke se ẹkotde. Ekem enye ọkọm andisan̄a mbe oro onyụn̄ ọsọsọp odụk ufọk esie man akada itien̄wed oro enyene inem inem nneme ye nditọ esie mbemiso mmọ ẹkade n̄wed!

Kpukpru Orụk Owo Ẹyere Ikot

Ke Senegal, ẹkeme ndikụt mme owo nte ẹtiede ke efak ẹnyam iyak, ikọn̄, m̀mê mfri ke urua, mîdịghe nte ẹtiede ke idak akamba ukịm ẹn̄wọn̄ ndotndot awawa tea ẹkotde ataya. Sia ẹkebierede ndibuana eti mbụk ye kpukpru owo ẹmi mmọ ẹdisobode, nditọete iba ẹma ẹnyene nneme ye eren kiet emi obiomode ndo emi ekeben̄ede eben̄e ke efak. Ke ẹma ẹkekọm enye, mmọ ẹma ẹdọhọ ẹte: “Ekese owo ẹsinọ fi okụk edi ituakke ida inyene nneme. Nnyịn idi man isian fi iban̄a n̄kpọ emi edide ata akpan n̄kpọ oro abuanade ini iso fo.” Idem ama akpa eben̄e-eben̄e oro. Nditọete oro ẹma ẹka iso ẹte: “Nnyịn ikpama ndibụp fi mbụme kiet. Afo ekere ke nso idi ntak emi ekese ndutụhọ ẹdude ke ererimbot?” Eben̄e-eben̄e ama ọbọrọ ete: “Edi uduak Abasi.”

Do nditọete oro ẹma ẹda N̄wed Abasi ẹkọk ibuot ye enye ẹnyụn̄ ẹnam Ediyarade 21:4 an̄wan̄a. Etop oro ọnọde idotenyịn mi ye akpanikọ oro nte ke owo ama enyene udọn̄ ke idemesie tutu atuak ada ndineme Bible ama enen̄ede otụk eben̄e-eben̄e oro. Mmọn̄eyet ama asiaha enye. Utu ke ndiben̄e okụk, enye ama ekpe nditọete oro ubọk ete ẹsion̄o kpukpru okụk ẹmi ẹkedude ke usan eben̄e esie! Enye ama ọsọn̄ọ eyịre tutu emi odụri ntịn̄enyịn mbon ẹmi ẹsan̄ade ẹbe. Edi ye ata ọkpọsọn̄ ukeme ke nditọete oro ẹkekpek enye ẹte ada okụk esie. Ke akpatre enye ama enyịme edi ama eyịre ete mmọ ẹfiak ẹdise imọ.

Akamba ufọkn̄wed ntaifiọk ke Dakar n̄ko anam n̄kpọ oro ẹmụmde ke iyịre eke spirit awak. Eyen ufọkn̄wed kiet emi ekpepde ibọkusọbọ do emi ekerede Jean-Louis ama ọtọn̄ọ ndikpep Bible. Enye ama ọsọsọp enyịme akpanikọ, ayak uwem esie ọnọ Jehovah, onyụn̄ ana baptism. Udọn̄ esie ekedi ndinam n̄kpọ Abasi ke utom usiakusụn̄ uyọhọ ini, edi enye ama ama ukpepn̄kpọ ibọkusọbọ esie n̄ko. Ke ntak ediomi oro enye akanamde ye idụt emana esie, ama obiomo enye ke idem ndikụre ukpepn̄kpọ esie. Edi, enye ama ọtọn̄ọ ndinam utom nte asiakusụn̄ unọ un̄wam ke ukem ini oro. Ibịghike ke ama ọkọbọ n̄weditoro esie nte abiausọbọ oro odotde, ẹma ẹnọ enye ikot ndikanam utom ke akamba ufọkidụn̄ Bethel ke Africa nte dọkta ubon. Akparawa efen emi ẹkesobode ke Ufọkn̄wed Ntaifiọk Dakar anam utom n̄ko idahaemi ke ufọkidụn̄ Bethel ke idụt emana esie.

Ke akpanikọ, ukọiyak eke spirit ke Senegal akama utịp. Ẹnen̄ede ẹwụt esịtekọm ẹnọ mme n̄wed Bible eke Mme Ntiense Jehovah ndien ẹsio idahaemi ke usem Wolof. Ndikop eti mbụk ke usem emana mmọ esịn udọn̄ ọnọ ediwak mbon esịt akpanikọ ndiyere ikot ye inemesịt. Ye edidiọn̄ Jehovah, eyịghe idụhe nte ke ẹyemụm ediwak ndamban̄a iyak efen efen, nte ifịk ifịk “mme ọkọ-owo” ke Senegal ẹkade iso ndida mbuọtidem ye uko mbuana idotenyịn Christian.

[Ndise obio/Ndise ke page 31]

(Ama oyom ndikụt nte enye enen̄erede etie, se n̄wed)

SENEGAL

[Ndise]

Ndibuana idotenyịn Christian ke Senegal

[Ebiet Ẹdade N̄kpọ Ẹto]

Mountain High Maps® Copyright © 1997 Digital Wisdom, Inc.