Ntak Ubonowo Oyomde Andin̄wam

AKANI atan̄idem ye afai afai eren kiet ama enyịme ete: ‘Ami n̄kedi esuene esuene andikọbọ.’ Enye ekedi idiọk osụn̄i-isụn̄i emi ye unana esịtmbọm akafịnade onyụn̄ an̄wanade ye mme anditiene Jesus Christ ẹmi ẹbakde Abasi. Enye ama ọdọhọ ke inemesịt ete: “Edi Abasi akatua mi mbọm.” Okposụkedi etiede nte se isọn̄de owo ndinịm, afai afai andikọbọ emi ama akabade edi anam-akpanikọ Christian apostle Paul.—1 Timothy 1:12-16; Utom 9:1-19.

Idịghe kpukpru owo ẹnam mme orụk n̄kpọ oro Paul akanamde. Edi, kpukpru nnyịn imokpu ndisịm mme idaha Abasi. Ntak-a? Koro “kpukpru owo ẹma ẹnam idiọk-n̄kpọ, ẹnyụn̄ ẹtaba ubọn̄ Abasi.” (Rome 3:23) Akan oro, edi ata mmemmem n̄kpọ ndiyak unana idotenyịn akan nnyịn ubọk, ndusụk ikerede ke nnyịn imọdiọk ikaha ndibọ mbọm Abasi. Ke adan̄aemi ekekerede aban̄a ntụhọ unam idiọk esie, Paul ke idemesie ama ofiori ete: “Mbọm mi, owo nditaha! anie edinyan̄a mi osio ke ikpọkidem n̄kpa emi?” Ke ọbọrọde mbụme esiemmọ, enye ekewet ete: “Mmọkọm Abasi ke Jesus Christ Ọbọn̄ nnyịn.”—Rome 7:24, 25.

Didie ke edinen Andibot ekpekeme ndinyene ebuana ye mme anamidiọk? (Psalm 5:4) Tịm fiọk ete ke Paul ọkọdọhọ ete: “Mmọkọm Abasi ke Jesus Christ Ọbọn̄ nnyịn.” (Sịghisịghi ubọkn̄wed edi eke nnyịn.) Owo en̄wen emi ọkọbọde mbọm Abasi ama anam an̄wan̄a ete: “Edieke owo anamde idiọk-n̄kpọ, nnyịn imenyene Ekpe-emem [andin̄wam, NW] ke ufọt nnyịn ye Ete, kpa Jesus Christ, emi edide edinen; enye onyụn̄ edi usio-isop mme idiọk-n̄kpọ nnyịn, inyụn̄ idịghe eke nnyịn ikpọn̄, edi eke ofụri ererimbot nde.”—1 John 2:1, 2.

Ntak emi ẹkotde Jesus Christ “andin̄wam ke ufọt nnyịn ye Ete”? Ndien didie ke Jesus edi “usio-isop” mme idiọkn̄kpọ?

Ntak Ẹyomde Andin̄wam

Jesus ekedi isọn̄ man “ọnọ uwem Esie ndifak ediwak owo.” (Matthew 20:28) Ufak edi ekọmurua emi ẹkpede man ẹfiak ẹdep m̀mê ẹsana owo m̀mê n̄kpọ ẹyak. Orụk ikọedinam Hebrew oro ẹkabarede nte “ufak” ọnọ ekikere aban̄a ndifụk m̀mê ndisio  isop mme idiọkn̄kpọ. (Psalm 78:38) Ẹkeda ikọ Greek, utọ nte enye oro ẹkụtde ke Matthew 20:28, ẹtịn̄ akpan akpan ẹban̄a ekọmurua emi ẹkpede ndifak mbon n̄kpọkọbi ekọn̄ m̀mê man ẹsana ifịn ẹyak. Man ẹyụhọ se unenikpe oyomde, ẹmen n̄kpọ kiet ẹkpụhọ ye en̄wen emi edide ukem ukem ekọmurua.

Ubonowo ama edidụk ufụn idiọkn̄kpọ ke ntak emi akpa owo ọkọsọn̄de ibuot ye Abasi. Nte ẹwụtde ke Genesis ibuot 3, mfọnmma owo oro—Adam—ekemek nditiene usụn̄ nsọn̄ibuot ye Jehovah Abasi. Ke ndinam ntre, enye ama anyam idemesie ye nditọ esie ẹmi mîkamanake kan̄a esịn ke ufụn idiọkn̄kpọ ye n̄kpa. Adam ke ntem ama ọduọk enọ mfọnmma uwem eke owo esiemmọ ye eke nditọ esie.—Rome 5:12, 18, 19; 7:14.

Ke Israel eset, Abasi ama anam ndutịm ndida uwa unam nsio isop nnọ, m̀mê mfụk, mme idiọkn̄kpọ owo. (Leviticus 1:4; 4:20, 35) Ke nditịm ntịn̄, ẹkeda uwem unam oro ẹkedade ẹnam uwa ẹkpụhọ ye eke anamidiọk. (Leviticus 17:11) Mmọdo, ẹkeme nditịn̄ n̄ko mban̄a “usen usio-isop” nte “usen ufak.”—Leviticus 23:26-28.

Nte ededi, sia unam osụhọrede akan owo, ‘iyịp enan̄ ye ebot ikekemeke-keme ndimen mme idiọk-n̄kpọ mfep ofụri ofụri.’ (Mme Hebrew 10:1-4) Man uwa enyene ekọmurua oro ekemde ndisio isop nnọ, m̀mê ndimen, mme idiọkn̄kpọ mfep ke nsinsi, ana enye edi ukem ekọmurua ye se Adam ọkọduọkde. Unenikpe okoyom mfọnmma owo (Jesus Christ) edep se mfọnmma owo (Adam) ọkọduọkde. Mfọnmma uwem eke owo kpọt ekeme ndikpe ekọmurua ufak ndifak nditọ Adam nsio ke ufụn emi akpa ete mmọ akanyamde mmọ esịn. Edi “uwem ke uwem” edisịm se ata unenikpe oyomde.—Exodus 21:23-25.

Ke ini Adam akanamde idiọkn̄kpọ ẹnyụn̄ ẹbierede ikpe n̄kpa ẹnọ enye, nditọ esie ẹmi mîkamanake kan̄a ẹkesụk ẹdu enye ke idem ndien ke ntre ẹma ẹkpan̄a ye enye. Mfọnmma owo oro Jesus, kpa “akpatre Adam,” ama emek nditre ndinyene ubon. (1 Corinth 15:45) Enye ama enyene nditọ ẹmi mîkamanake kan̄a ke idem esie ke ini enye akakpade nte mfọnmma uwa owo. Ke ntre, ẹkeme ndidọhọ nte ke ekpụk ubonowo eke ini iso ẹmi ẹkedude enye ke idem ẹma ẹkpan̄a ye enye. Jesus ama ada anamidiọk, n̄kpakpa ubon Adam nte eke esiemmọ. Enye ama asana unen edinyene ubon eke esiemmọ ayak. Ebede ke ndiwa mfọnmma uwem esie eke owo, Jesus ama afiak edep ofụri ubonowo ẹmi ẹtode Adam man mmọ ẹkabade ẹdi ubon Esie, anamde Enye edi “Nsinsi Ete” mmọ.—Isaiah 9:6, 7.

Uwa ufak Jesus ama eberede usụn̄ ọnọ okopitem ubonowo ndibọ mbọm Abasi nnyụn̄ nnyene nsinsi uwem. Nte utịp, apostle Paul ama ewet ete: “N̄kpọ-eyen-utom idiọk-n̄kpọ edi n̄kpa, edi enọ Abasi edi nsinsi uwem ke Christ Jesus Ọbọn̄ nnyịn.” (Rome 6:23) Onụk nnyịn nditoro Jehovah ke ima ye mbọm emi asan̄ade ye ufak, emi enye ndinọ ufak akakpade enye ye ata edima Eyen esie ekese. (John 3:16) Ndien Jesus ke akpanikọ ama owụt idem nte “andin̄wam ke ufọt nnyịn ye Ete” ke ini ẹkenamde enye eset odụk uwem eke heaven onyụn̄ ọkọnọ Abasi ekọmurua uwa ufak esie ke heaven. * (Mme Hebrew 9:11, 12, 24; 1 Peter 3:18) Edi didie ke Jesus Christ anam n̄kpọ idahaemi nte andin̄wam nnyịn ke heaven?

[Mme Ikọ idakisọn̄]

[Ndise ke page 4]

Mfọnmma uwem Jesus eke owo ama akabade edi ekọmurua ẹkekpede ndifak nditọ Adam