Nte Jesus Christ Ekemede Ndin̄wam Nnyịn

SE Jesus Christ akanamde man an̄wam mme owo ke ini enye okodude ke isọn̄ ekedi utịbe. Emi ekenen̄ede edi ntre tutu ke ama okobụk ata ediwak n̄kpọntịbe eke uwem Jesus, owo kiet emi okokụtde ọdọhọ ete: “Ediwak n̄kpọ en̄wen ẹnyụn̄ ẹdu ẹmi Jesus akanamde: ndien edieke ẹkpewetde mmọ kpukpru, etie mi nte kpa idem ererimbot ikpekemeke ndikọhọ se ẹwetde.” (John 21:25) Sia Jesus akanamde ekese n̄kpọ ntre ke isọn̄, nnyịn imekeme ndibụp ite: ‘Didie ke enye ekeme ndidi andin̄wam nnyịn ke heaven? Nte nnyịn imekeme ndibọ ufọn nto ima ima mbọm Jesus idahaemi?’

Ibọrọ edi ata inem inem onyụn̄ ọnọ idotenyịn. Bible asian nnyịn ete ke Christ ekebe odụk “ata heaven, man Enye ada ke iso Abasi ke emi kaban̄a nnyịn.” (Mme Hebrew 9:24) Nso ke enye akanam ọnọ nnyịn? Apostle Paul anam an̄wan̄a ete: “[Christ] inyụn̄ idaha iyịp ebot ye enan̄ isan̄a ibe idụk, edi ada iyịp Esiemmọ odụk ke Edisana Ebiet [‘ata heaven’] ini kiet kpọt, ke Enye ama ọkọbọ nsinsi ufak ọnọ owo.”—Mme Hebrew 9:12; 1 John 2:2.

Nso eti mbụk ke oro edi ntem! Utu ke ndida utịt nsọk utịbe utịbe utom Jesus ke ufọn owo, enye ndikọdọk n̄ka heaven ama anam enye akam ekeme ndinam n̄kpọ efen efen nnọ ubonowo. Oro edi koro Abasi, ke akwa mfọnido esie oro owo mîdotke, ama emek Jesus ndinam utom nte “asan̄autom”—akwa oku—“ke ubọk nnasia ebekpo Andinyene ubọn̄ ke mme heaven.”—Mme Hebrew 8:1, 2.

“Asan̄autom”

Do, ke heaven, Jesus edidi asan̄autom ọnọ ubonowo. Enye edinam ukem utom emi akwa oku Israel ekesinamde ke ufọn mme andituak ibuot nnọ Abasi ke eset. Ndien nso utom ikedi oro? Paul anam an̄wan̄a ete: “Ẹmek kpukpru ikpọ oku ẹnịm ẹte ẹwa enọ ye uwa; mmọdo anade nte Akwa Oku emi [Jesus Christ emi ọdọkde ke enyọn̄] okponyụn̄ enyene se awade.”—Mme Hebrew 8:3.

Jesus ama enyene se awade emi ekenen̄erede okpon akan se akwa oku eset akawade. “Edieke iyịp ebot ye eke nyara enan̄” ekekemede ndida ndusụk udomo edisana idaha eke spirit nsọk Israel eset, “n̄wan̄wadiso ke iyịp Christ . . . ediyet esịt mbufo, anam mbufo ẹbọhọ utom n̄kpa, ẹnyụn̄ ẹnam n̄kpọ ẹnọ Abasi uwem.”—Mme Hebrew 9:13, 14.

N̄ko, Jesus edi n̄wọrọnda asan̄autom koro ẹma ẹnọ enye uwem oro mîkemeke ndikpa. Ke Israel eset ‘ẹkenam ediwak owo ẹdi oku ke adiana ke adiana, koro n̄kpa mîyakke mmọ ẹsụk ẹdu uwem.’ Edi nso kaban̄a Jesus? Paul ewet ete: “Enye . . . enyene idaha oku eke mîkemeke ndikpụhọde. Ke ntak emi Enye onyụn̄ ekeme ndinyan̄a mmọ ẹmi ẹsan̄ade ke Enye ẹkpere Abasi ọyọhọ-ọyọhọ, sia Enye odude ke nsinsi ndinam n̄kpe-ubọk nnọ mmọ.” (Mme Hebrew  7:23-25; Rome 6:9) Ih, nnyịn imenyene asan̄autom emi ‘odude ke nsinsi ndinam n̄kpe-ubọk nnọ nnyịn’ ke ubọk nnasia Abasi ke heaven. Kam kere se oro ọwọrọde ọnọ nnyịn idahaemi!

Ke ini Jesus okodude ke isọn̄, mme owo ẹma ẹbụn̄ọ ẹtiene enye ẹkeyom un̄wam, ndien ndusụk ini mmọ ẹma ẹsisan̄a ata anyan usụn̄ man ẹkebọ un̄wam ẹto enye. (Matthew 4:24, 25) Ke heaven, mme owo eke kpukpru idụt ẹkeme ndika mbịne Jesus mmemmem mmemmem. Ke eti itie esie ke heaven, enye ododu kpukpru ini nte asan̄autom.

Nso Orụk Akwa Oku ke Jesus Edi?

Nte ẹtịn̄de ẹban̄a Jesus Christ ke mme mbụk Gospel anam nnyịn ikûnyene eyịghe iban̄a un̄wam ye ima ima mbọm esie. Nso n̄waidem ke enye okowụt ntem! Ke se ikande ini kiet, ẹma ẹtịmede enye ke ndobo ndobo ebiet oro enye ye mme mbet esie ẹkeyomde ndibọ nduọkodudu oro idem mmọ okoyomde. Utu ke ndikere ke ẹbọ imọ ọsọn̄urua ini emem ye ndobo, ‘enye ama okop mbọm’ aban̄a mme owo ẹmi ẹkeyomde un̄wam esie. Idem ke ini Jesus akakpade mba, okopde biọn̄, ye nsatitọn̄, ‘enye ama adara mmọ’ onyụn̄ enyịme nditre ndidia udia ama akam edi enye eyekeme ndin̄wam mme anamidiọk ẹmi ẹkenyenede esịt akpanikọ.—Mark 6:31-34; Luke 9:11-17; John 4:4-6, 31-34.

Ke okopde mbọm, Jesus ama enen̄ede anam n̄kpọ ndiyụhọ se mme owo ẹkeyomde ke n̄kan̄ eke ikpọkidem, eke ntụk, ye eke spirit. (Matthew 9:35-38; Mark 6:35-44) N̄ko-n̄ko, enye ama ekpep mmọ ete ẹyom ubọhọ ye ndọn̄esịt eke ebịghide. (John 4:7-30, 39-42) Ke uwụtn̄kpọ, ọkpọkpọ ikot esie edemede udọn̄ didie ntem: “Ẹtiene Mi, kpukpru mbufo ẹmi ẹkpade mba ẹnyụn̄ ẹbiomde edidobi mbiomo, ndien Ami nyọnọ mbufo nduọk-odudu. Ẹmen ọkpọnọ Mi ẹkọn̄ọ ke itọn̄ mbufo, ẹnyụn̄ ẹkpebe Mi; koro mmenyene ifụre-ifụre ido nnyụn̄ nsụhọde idem ke esịt; ndien mbufo ẹyekụt nduọk-odudu ẹnọ ukpọn̄ mbufo.”—Matthew 11:28, 29.

Ima oro Jesus ekenyenede ọnọ owo ama enen̄ede okpon tutu enye ke akpatre ọnọ uwem esie kaban̄a anamidiọk ubonowo. (Rome 5:6-8) Ke afan̄ emi apostle Paul ama ọkọk ibuot ete: “Enye [Jehovah Abasi] emi mîkesịnke ndinọ Eyen Esiemmọ, edi ayakde Enye ọnọ ke ibuot nnyịn kpukpru, Enye edikeme didie nditre ndinọ nnyịn kpukpru n̄kpọ ndian ye enye? . . . Christ Jesus [edi enye] emi akakpade, n̄kpakam ndọhọ nte, [enye] emi ekesetde ke n̄kpa, emi odude ke ubọk nnasia Abasi, emi onyụn̄ anamde n̄kpe-ubọk ọnọ nnyịn.”—Rome 8:32-34.

Akwa Oku Emi Okopde Mbọm

Nte owo, Jesus ama okop biọn̄, nsatitọn̄, mmemidem, ndutụhọ, ubiak, ye n̄kpa. Nsịn̄ede ye mfịghe emi enye ọkọyọde ama etịm enye idem ke ata n̄wọrọnda usụn̄ ndinam utom nte Akwa Oku nnọ ubonowo oro okụtde ndutụhọ. Paul ekewet ete: “Ẹnam [Jesus] ebiet nditọ-ete Esie ke kpukpru n̄kpọ, man Enye ekpedi Akwa Oku emi atuade owo mbọm, onyụn̄ anamde akpanikọ ke n̄kpọ eke aban̄ade Abasi, okponyụn̄ osio isop aban̄a mme idiọk-n̄kpọ mbio-obio. Koro sia Enye okokopde ndutụhọ ke edikụt idomo, Enye ekeme ndinyan̄a mmọ ẹmi ẹdude ke idomo.”—Mme Hebrew 2:17, 18; 13:8.

Jesus ama owụt ete ke imọ imodot inyụn̄ inyịme ndin̄wam mme owo ẹsan̄a ẹkpere Abasi. Nte ededi, ndi emi ọwọrọ ete ke enye enyene ndikpekpek ọsọn̄ido ye anana-mbọm Abasi emi emen̄ede ndidahado? Ke akpanikọ inyeneke ndinam ntre, koro Bible ọsọn̄ọ etịn̄ ọnọ nnyịn ete ke ‘Jehovah ọfọn, onyụn̄ ama ndidahado.’ Enye ọdọhọ n̄ko ete: “Edieke nnyịn iyararede mme idiọk-n̄kpọ nnyịn, Enye edi anam-akpanikọ onyụn̄ enen, ete ifen mme idiọk-n̄kpọ nnyịn, inyụn̄ iyet nnyịn isana ke kpukpru mme ukwan̄n̄kpọ.”  (Psalm 86:5; 1 John 1:9) Ke akpanikọ, mme mbọm mbọm ikọ ye edinam Jesus ẹwụt mbiet mbọm ye ima Ete esie.—John 5:19; 8:28; 14:9, 10.

Didie ke Jesus ọnọ mme anamidiọk ubọhọ? Ebe ke ndin̄wam mmọ ẹnyene idara ye uyụhọ ke ukeme ofụri esịt oro mmọ ẹsịnde ndinem Abasi esịt. Ke ewetde n̄wed ọnọ ẹsọk mme ekemmọ Christian oro ẹyetde aran, Paul ama etịn̄ aban̄a idaha emi ibio ibio ete: “Sia nnyịn inyenede ndien ata akamba Akwa Oku, emi ama asan̄a ke mme heaven ebe, kpa Jesus Eyen Abasi, ẹyak nnyịn idọdiọn̄ isọn̄ọ inyịme ite idi ikọt Esie. Koro nnyịn mînyeneke Akwa Oku eke mîkemeke nditiene nnyịn n̄kụt mmem-idem nnyịn; edi Akwa Oku emi okokụtde idomo ke kpukpru nde kpa nte nnyịn, edi mînyeneke idiọk-n̄kpọ. Mmọdo ẹyak nnyịn isan̄a ikpere ebekpo mfọn ye uko, man nnyịn ibọ mbọm, inyụn̄ ikụt mfọn eke edin̄wamde nnyịn ke ini nnanenyịn.”—Mme Hebrew 4:14-16.

‘Un̄wam ke Ini Nnanenyịn’

Nte ededi, nso ke nnyịn ikeme ndinam ke ini isobode mme mfịna ẹmi nnyịn ikerede ke ẹkponi ẹkan se nnyịn ikemede ndise mban̄a—ọkpọsọn̄ udọn̄ọ, mfịghe ubiomikpe, ọkpọsọn̄ mmemidem, ye mfụhọ? Nnyịn imekeme ndida kpa ndutịm oro Jesus ke idemesie ekeberide edem kpukpru ini nnam n̄kpọ—kpa ọsọn̄urua ifet edibọn̄ akam. Ke uwụtn̄kpọ, ke okoneyo oro mbemiso ọkọnọde uwem esie kaban̄a nnyịn, “Enye . . . onyụn̄ ọdọdiọn̄ ọsọn̄ọ ọbọn̄ akam: ndien ibibiak Esie etie nte mme ntọi iyịp eke ẹtọide ke isọn̄.” (Luke 22:44) Ih, Jesus ọdiọn̄ọ nte etiede ndibọn̄ akam ọkpọsọn̄ ọkpọsọn̄ nnọ Abasi. “Enye ọkọbọn̄ akam onyụn̄ anam n̄kpe-ubọk ye ọkpọsọn̄ eseme ye mmọn̄-eyet ọnọ Abasi emi ekemede ndinyan̄a Enye nsio ke n̄kpa, Abasi onyụn̄ eyere Enye, koro Enye eten̄ede Abasi.”—Mme Hebrew 5:7.

Jesus ọdiọn̄ọ se ndidi se ‘ẹyerede’ ẹnyụn̄ ẹsọn̄ọde idem ọwọrọde ọnọ owo. (Luke 22:43) N̄ko-n̄ko, enye ama ọn̄wọn̄ọ ete: “N̄kpọ ekededi eke ẹdiben̄ede Ete, Enye ọyọnọ mbufo ke enyịn̄ Mi. . . . Ẹben̄e, ndien mbufo ẹyebọ, man idatesịt mbufo ọyọhọ.” (John 16:23, 24) Ntem, nnyịn imekeme ndikpe Abasi ubọk ye mbuọtidem nte ke enye eyenyịme Eyen esie ada odudu ye ufọn uwa ufak esie anam n̄kpọ ke ufọn nnyịn.—Matthew 28:18.

Nnyịn imekeme nditịm nnịm nte ke adade odudu emi enye enyenede ke heaven anam n̄kpọ, Jesus ayanam nnennen un̄wam odu ke ini nnanenyịn. Ke uwụtn̄kpọ, edieke edide nnyịn ima inam idiọkn̄kpọ emi ituade n̄kpọfiọk ke ofụri esịt, nnyịn imekeme ndibọ ndọn̄esịt nto akpanikọ oro nte ke “nnyịn imenyene Ekpe-emem [andin̄wam, NW] ke ufọt nnyịn  ye Ete, kpa Jesus Christ, emi edide edinen.” (1 John 2:1, 2) Andin̄wam nnyịn ye Andinọ Ndọn̄esịt ke heaven ayanam n̄kpeubọk ọnọ nnyịn man ẹbọrọ mme akam nnyịn ẹmi ibọn̄de ke enyịn̄ esie ye ke n̄kemuyo ye N̄wed Abasi.—John 14:13, 14; 1 John 5:14, 15.

Ndiwụt Esịtekọm Mban̄a Un̄wam Christ

Se ibuanade okpon akan edikpe Abasi ubọk ebe ke Eyen esie. Ye ufọn uwa ufak esie, ‘Christ ama afak’ onyụn̄ akabade edi, yak idọhọ, “Ọbọn̄ emi akafakde” ekpụk ubonowo. (Galatia 3:13; 4:5; 2 Peter 2:1) Nnyịn imekeme ndiwụt esịtekọm mban̄a kpukpru se Christ anamde ọnọ nnyịn ebe ke ndinyịme nte ke enye edi andinyene nnyịn inyụn̄ inyịme ikot esie idara idara: “Edieke owo ekededi oyomde nditiene Mi, yak enye otụk idem esie, onyụn̄ emen [eto ndutụhọ, NW] esie ke usen ke usen etiene Mi.” (Luke 9:23) Owo ‘nditụk idemesie’ idịghe sụk nditetịn̄ ke inua nte ke andinyene imọ okpụhọde. Kamse, Christ “akakpa aban̄a kpukpru owo, man mme odu-uwem ẹkûdu uwem aba ẹnọ idem mmọ, edi ẹdu ẹnọ Enye emi akakpade aban̄a mmọ.” (2 Corinth 5:14, 15) Ke ntre, esịtekọm oro iwụtde inọ ufak oyotụk ekikere, mme utịtmbuba, ye usụn̄ uwem nnyịn ntotụn̄ọ ntotụn̄ọ. Ntotụn̄ọ esịtekọm emi nnyịn inyenede inọ “Christ Jesus, emi akayakde Idem Esie ọnọ kaban̄a nnyịn,” ekpenyene ndinụk nnyịn ndikpep n̄kpọ efen efen mban̄a enye ye ima ima Ete esie, Jehovah Abasi. Nnyịn n̄ko ikpenyene ndidomo ndikọri ke mbuọtidem, ndidu uwem ntiene mme edumbet Abasi ẹmi ẹnọde ufọn, ndinyụn̄ ‘nsịn esịt nnam nti utom.’—Titus 2:13, 14; John 17:3.

Esop Christian edi ebiet oro nnyịn ibọde udia eke spirit ke ekemini, nsịnudọn̄, ye ndausụn̄. (Matthew 24:45-47; Mme Hebrew 10:21-25) Ke uwụtn̄kpọ, edieke owo ekededi ọdọn̄ọde ke n̄kan̄ eke spirit, enye ekeme ‘ndikot mbiowo Ufọk Abasi [oro ẹmekde].’ James adian nsọn̄ọ ete: “Ndien akam mbuọtidem ayanyan̄a enye emi ọdọn̄ọde, Ọbọn̄ oyonyụn̄ anam enye adaha ada; ndien edieke enye akanamde idiọk-n̄kpọ, ẹyefen enye.”—James 5:13-15.

Ke ndinam an̄wan̄a: Eren kiet emi esịnede ke  ufọk-n̄kpọkọbi ke South Africa ama ewet n̄wed ọnọ ẹsọk ebiowo esop kiet owụtde esịtekọm aban̄a “kpukpru Mme Ntiense Jehovah ẹmi ẹnamde eti utom emi Jesus Christ ọkọtọn̄ọde ke ndin̄wam mme owo ẹyom Obio Ubọn̄ Abasi.” Ekem enye ama ewet ete: “Mma nnen̄ede n̄kop idatesịt ndibọ leta fo. Udọn̄ oro afo owụtde aban̄a ubọhọ mi ke n̄kan̄ eke spirit omotụk mi ntotụn̄ọ ntotụn̄ọ. Emi ọnọ mi ntak efen efen nditọn̄ọ ndinyịme ikot emi Jehovah Abasi ọnọde ete n̄kabade esịt. Ke isua 27 mma ntụn nnyụn̄ nsop usụn̄ ke ekịm idiọkn̄kpọ, abian̄a, mme edinam oro ibet mînyịmeke, mme oburobụt edinam, ye mme nsunsu ido ukpono. Ke ẹma ẹkemen mi ẹwụt Mme Ntiense Jehovah, n̄kere ke mmokụt usụn̄ ke akpatre—nnennen usụn̄! Ukụre se nnyenede ndinam edi ndisan̄a ke enye.”

Un̄wam Efen Efen ke N̄kpet N̄kpet Ini Iso

Mme idiọk idaha ererimbot ẹdi in̄wan̄în̄wan̄ uyarade nte ke nnyịn idu uwem ke akpan ini oro ekenyenede ndibem “akwa ukụt” iso. Ata idahaemi, akwa otuowo eke ẹtode ke kpukpru obio, esien, idụt, ye usem ke ‘ẹyet ọfọn̄idem mmọ ẹnam afia ke iyịp Eyen-erọn̄.’ (Ediyarade 7:9, 13, 14; 2 Timothy 3:1-5) Ebede ke ndiwụt mbuọtidem ke uwa ufak Jesus, mmọ ke ẹbọ edifen mme idiọkn̄kpọ mmọ ndien ke ẹn̄wam mmọ ẹdi ẹdinyene n̄kpet n̄kpet itie ebuana ye Abasi—ke akpanikọ, ẹkabade ẹdi mme ufan esie.—James 2:23.

Eyenerọn̄, Jesus Christ, “eyedi Andikpeme [mme andibọhọ akwa ukụt], oyonyụn̄ ada mmọ aka ke idịm mmọn̄ uwem: ndien Abasi ọyọkwọhọde kpukpru mmọn̄eyet ke enyịn mmọ efep.” (Ediyarade 7:17) Christ ndien ayada utom esie nte Akwa Oku ekesịm utịt. Enye ayan̄wam kpukpru ufan Abasi ndibọ ufọn ọyọhọ ọyọhọ nto “idịm mmọn̄ uwem”—ke n̄kan̄ eke spirit, eke ikpọkidem, eke ekikere, ye eke ntụk. Se Jesus ọkọtọn̄ọde ke 33 E.N. ye se enye akade iso ndinam ke heaven toto ke ini oro ayasan̄a ekesịm mfọnmma.

Ke ntre, kûkpa mba ke ndiwụt ntotụn̄ọ esịtekọm nnọ kpukpru se Abasi ye Christ ẹkenamde—ẹnyụn̄ ẹsụk ẹnanam—ẹnọ nnyịn. Apostle Paul akakpak ete: “Ẹdat esịt ke Ọbọn̄ kpukpru ini . . . Ẹkûtịmede esịt ke baba n̄kpọ kiet, edi ke kpukpru n̄kpọ, ẹsan̄a ye akam ye n̄kpe-ubọk ye ekọm, ẹsian Abasi se mbufo ẹyomde. Ndien emem Abasi, emi ayan̄ade ifiọk owo, eyekpeme mbufo esịt ye ekikere ke Christ Jesus.”—Philippi 4:4, 6, 7.

Akpan usụn̄ kiet odu afo ndiwụt esịtekọm nnọ Jesus Christ, Andin̄wam nnyịn ke heaven. Ke utịn ama okosụhọde ke Wednesday, April 19, 2000, Mme Ntiense Jehovah ke ofụri ererimbot ẹyesop idem ndinịm Editi n̄kpa Christ. (Luke 22:19) Emi edidi ifet ndinam esịtekọm oro afo enyenede aban̄a uwa ufak Christ otụn̄ọ. Ẹnọ fi ufiop ufiop ikot ndidụk nnyụn̄ n̄kop nte utịbe utịbe ndutịm Abasi kaban̄a edinyan̄a ebe ke Christ ekemede ndinọ fi ufọn ke nsinsi. Mbọk bụp Mme Ntiense Jehovah ke n̄kann̄kụk fo ban̄a nnennen ini ye ebiet akpan mbono emi.

[Ndise ke page 7]

Jesus ọdiọn̄ọ nte etiede ndibọn̄ akam ọkpọsọn̄ ọkpọsọn̄ nnọ Abasi

[Mme ndise ke page 8]

Christ ayan̄wam nnyịn iyọ mme mfịna ẹmi ẹkponide ẹkan nnyịn ndise mban̄a ikpọn̄

[Ndise ke page 9]

Christ an̄wam nnyịn ebe ke ima ima mbiowo