‘O Abasi, Dọn̄ Un̄wana Fo Utom’
‘O Abasi, Dọn̄ Un̄wana Fo Utom’
“O dọn̄ un̄wana fo ye akpanikọ fo utom; mmọ ẹyeda mi usụn̄.”—PSALM 43:3.
1. Didie ke Jehovah ayarade mme uduak esie?
JEHOVAH enen̄ede owụt edikere mban̄a ke usụn̄ nte enye ayararede mme uduak esie ọnọ mme asan̄autom esie. Utu ke ndiyarade kpukpru akpanikọ inikiet ke nyayama un̄wana kiet emi ekemede ndibiat owo enyịn, enye anam mme n̄kpọ ẹn̄wan̄a nnyịn sụn̄sụn̄. Ẹkeme ndimen isan̄ nnyịn ke usụn̄ uwem ndomo ye akaisan̄ emi asan̄ade ke anyan afan̄. Enye ọtọn̄ọ isan̄ ke tụhi-tụhi usenubọk onyụn̄ okụt n̄kpọ esisịt. Nte utịn ọtọn̄ọde ndisiaha sụn̄sụn̄, anam-isan̄ oro ekeme ndidiọn̄ọ ibat ibat n̄kpọ oro ẹdude ke mme n̄kann̄kụk esie. Enye okụt mbon eken mbukpọn̄ mbukpọn̄. Edi nte utịn akade iso ndiyama, enye ekeme ndida n̄kụt n̄kpọ ke ata anyan usụn̄. Ntre ke edi ye un̄wana eke spirit emi Abasi ọnọde. Enye ayak nnyịn ifiọk ibat ibat n̄kpọ ke ini kiet. Eyen Abasi, Jesus Christ, ọkọnọ un̄wana eke spirit ke ukem usụn̄ oro. Ẹyak nnyịn ikere iban̄a nte Jehovah ọkọnọde ikọt esie un̄wana ke eset ye nte enye anamde ntre mfịn.
2. Didie ke Jehovah ọkọnọ un̄wana mbemiso eyo mme Christian?
2 Eyedi nditọ Korah ẹkewet Psalm 43 ọyọhọ 43. Nte mme Levite, mmọ ẹma ẹnyene ifet edikpep mme owo Ibet Abasi. (Malachi 2:7) Nte ededi, Jehovah ekedi Akwa Anditeme mmọ, ndien mmọ ẹkeberi edem ke enye nte Ntọn̄ọ kpukpru ọniọn̄. (Isaiah 30:20) Andiwet psalm ama ọbọn̄ akam ete: “O Abasi . . . dọn̄ un̄wana fo ye akpanikọ fo utom; mmọ ẹyeda mi usụn̄.” (Psalm 43:1, 3) Adan̄a nte nditọ Israel ẹkenamde akpanikọ ẹnọ enye, Jehovah ama ekpep mmọ mme usụn̄ esie. Ediwak isua ikie ke ukperedem, Jehovah ama ọnọ mmọ orụk un̄wana ye akpanikọ oro ekedide ata n̄wọrọnda. Abasi akanam oro ke ini enye ọkọdọn̄de Eyen esie edi isọn̄.
3. Ke nso usụn̄ ke ukpepn̄kpọ Jesus ekesịn mme Jew ke udomo?
3 Nte owo oro Jesus Christ, Eyen Abasi ekedi “un̄wana ererimbot.” (John 8:12) Enye ama ekpep mme owo “ediwak n̄kpọ ke n̄ke”—mbufa n̄kpọ. (Mark 4:2) Enye ama ọdọhọ Pontius Pilate ete: “Obio Ubọn̄ Mi idịghe eke ererimbot emi.” (John 18:36) Oro ekedi obufa ekikere ọnọ owo Rome ye mme Jew ẹmi ẹkemade idụt mmọ, koro mmọ ẹkekerede ẹte ke Messiah ayakan Obio Ukara Rome onyụn̄ anam Israel afiak enyene akpa ubọn̄ esie. Jesus okowụt mbiet un̄wana Jehovah, edi mme ikọ esie ikenemke mme andikara mme Jew esịt, koro mmọ ‘ẹkemade ubọn̄ eke otode owo ẹkan ubọn̄ eke otode Abasi.’ (John 12:42, 43) Ediwak owo ẹkemek ndisọn̄ọ nyịre ke item owo utu ke ndinyịme un̄wana eke spirit ye akpanikọ ẹtode Abasi.—Psalm 43:3; Matthew 13:15.
4. Nnyịn isan̄a didie ifiọk ke mme mbet Jesus ẹyeka iso ndikọri ke ifiọk?
4 Nte ededi, ibat ibat iren ye iban ẹmi ẹnyenede esịt akpanikọ ẹma ẹnyịme akpanikọ oro Jesus ekekpepde idara idara. Mmọ ẹma ẹka iso ndinam n̄kọri ke ifiọk emi mmọ ẹkenyenede ẹban̄a mme uduak Abasi. Nte ededi, nte Andikpep mmọ akasan̄ade ekpere utịt uwem esie eke isọn̄, mmọ ẹkesụk ẹnyenyene ekese ndikpep. Jesus ama ọdọhọ mmọ ete: “Mmenyene ediwak n̄kpọ kan̄a ndineme ye mbufo, edi mbufo ikemeke ndiyọ mmọ ke emi.” (John 16:12) Ih, mme mbet ẹyeka iso ndikọri ke ifiọk akpanikọ Abasi.
Un̄wana Aka Iso Ndiyama
5. Nso mbụme ikedemede ke akpa isua ikie, ndien mmanie ẹkenyene mbiomo edibiere enye?
5 Ke Jesus ama akakpa onyụn̄ eset, un̄wana otode Abasi ama enen̄ede ayama akan. Ke n̄kukụt emi ọkọnọde Peter, Jehovah ama ayarade ete ke ọtọn̄ọde ke emi mme Gentile ẹmi mîkanaha mbobi ẹkeme ndikabade ndi mme anditiene Christ. (Utom 10:9-17) Oro ekedi ediyarade! Edi, mbụme ama edemede ke ukperedem: Nte Jehovah ama oyom mme utọ Gentile oro ẹna mbobi ke mmọ ẹma ẹkekabade ẹdi mme Christian? Owo ikọbọrọke mbụme oro ke n̄kukụt emi, ndien oro ama ada esịm ọkpọsọn̄ eneni ke otu mme Christian. Akana ẹbiere, mbak editịmede ọsọn̄urua edidianakiet mmọ. Ke ntre, ke Jerusalem, “mme apostle ye mbiowo ẹsop idem ọtọkiet ndikere ikọ emi.”—Utom 15:1, 2, 6.
6. Nso ndutịm ke mme apostle ye mbiowo ẹketiene ke ini mmọ ẹkekerede ẹban̄a mbụme edina mbobi?
6 Didie ke mbon oro ẹkedude ke mbono oro ẹkpekeme ndibiere se idide uduak Abasi kaban̄a mme Gentile ẹmi ẹnịmde ke akpanikọ? Jehovah ikọdọn̄ke angel edida usụn̄ ke nneme oro, m̀mê enye ndikọnọ mbon oro ẹkedude n̄kukụt. Kpa ye oro, owo ikọkpọn̄ke mme apostle ye mbiowo ofụri ofụri ye unana ndausụn̄. Mmọ ẹma ẹkere ẹban̄a ikọ ntiense otode ndusụk Christian ẹdide mme Jew ẹmi ẹkekụtde nte Abasi ọkọtọn̄ọde ndinam n̄kpọ ye mbon idụt, an̄wan̄ade edisana spirit esie ọduọk mme Gentile ẹmi mîkanaha mbobi. Mmọ ẹma ẹdụn̄ọde N̄wed Abasi n̄ko ẹyom ndausụn̄. Nte utịp, mbet oro James ama ọnọ ekikere oro ọkọn̄ọde ke itien̄wed emi esịnde un̄wana. Nte mmọ ẹkekerede uyarade emi, uduak Abasi ama ana in̄wan̄în̄wan̄. Mbon idụt ikenyeneke ndina mbobi man ẹnyene unyịme Jehovah. Mme apostle ye mbiowo ẹma ẹsọsọp ẹwet ubiere emi ke n̄wed man mme ekemmọ Christian ẹkpekeme ndibọ ndausụn̄ nto enye.—Utom 15:12-29; 16:4.
7. Ke usụn̄ ewe ke mme Christian akpa isua ikie ẹkenam n̄kọri?
7 Ke mîbietke mme adaiso ido ukpono ẹdide mme Jew, ẹmi ẹkesọn̄ọde ẹyịre ke item mme ete ete mmọ, ata ediwak Christian ẹdide mme Jew ẹma ẹdat esịt ke ini mmọ ẹkebọde n̄wọrọnda obufa ifiọk uduak Abasi emi kaban̄a mbon idụt, idem okposụkedi ndinyịme enye okoyomde ẹnam ukpụhọde ke nte ẹsede mme Gentile ke ofụri ofụri. Jehovah ama ọdiọn̄ edu nsụhọdeidem mmọ, ndien “ufọk Abasi ẹsọn̄ọ ke mbuọtidem, ibat mmọ onyụn̄ ọtọt ke usen ke usen.”—Utom 15:31; 16:5.
8. (a) Nnyịn isan̄a didie ifiọk ite ke ẹkeme ndidori enyịn ke un̄wana efen efen ke akpa isua ikie ama ekebe? (b) Mme akpan mbụme ewe ke nnyịn idikere iban̄a?
8 Un̄wana eke spirit ama aka iso ndiyama ke ofụri akpa isua ikie. Edi Jehovah ikayarakede kpukpru ikpehe uduak esie inọ mme akpa Christian. Apostle Paul ọkọdọhọ mme ekemmọ andinịm ke akpanikọ ke akpa isua ikie ete: “Idahaemi nnyịn imokụt n̄kpọ ntre ntịmede-ntịmede, nte owo okụtde n̄kpọ ke ukụtiso.” (1 Corinth 13:12) Utọ ukụtiso oro ikenen̄ekede isem. Do, ke akpa, ifiọk oro ẹkenyenede ẹban̄a un̄wana eke spirit ekedi esisịt. Ke mme apostle ẹma ẹkekpan̄a, un̄wana ama osụhọde ke ndusụk ini, edi ke ndondo emi ifiọk N̄wed Abasi omokpon. (Daniel 12:4) Didie ke Jehovah ọnọ ikọt esie un̄wana mfịn? Ndien didie ke nnyịn ikpanam n̄kpọ ke ini enye anamde ifiọk N̄wed Abasi nnyịn atara?
Un̄wana Aka Iso Ndiyama Sụn̄sụn̄
9. Nso n̄wọrọnda ye enyene-uforo usụn̄ ukpep Bible ke mme akpa Nditọ Ukpepn̄kpọ Bible ẹkeda?
9 Ke eyomfịn akpa ata ata un̄wana oro etiede mbukpọn̄ mbukpọn̄ ọkọtọn̄ọ ndiyama ke utịt utịt ọyọhọ isua ikie 19 nte otu Christian iren ye iban ẹketọn̄ọde ndikpep N̄wed Abasi ifịk ifịk. Mmọ ẹma ẹtọn̄ọ usụn̄ ukpep Bible oro enyenede ufọn. Owo kiet obụp mbụme; ndien otu ẹdụn̄ọde kpukpru itien̄wed Abasi oro ẹnyenede ebuana. Ke ini eketiede nte ufan̄ikọ Bible kiet atuaha ye en̄wen, mme ifịk ifịk Christian ẹmi ẹma ẹsịn ukeme ndinam iba oro ẹdu ke n̄kemuyo. Ke mîbietke mme adaiso ido ukpono eke eyo oro, Nditọ Ukpepn̄kpọ Bible (nte ẹkediọn̄ọde Mme Ntiense Jehovah ini oro) ẹma ẹbiere ndiyak Edisana N̄wed Abasi, idịghe item m̀mê ukpepn̄kpọ owo, ada mmọ usụn̄. Ke mmọ ẹma ẹkekere ẹban̄a kpukpru uyarade N̄wed Abasi oro ẹdude, mmọ ẹma ẹwet ubiere mmọ ẹnịm. Ke usụn̄ oro ifiọk oro mmọ ẹnyenede ẹban̄a ediwak akpan ukpepn̄kpọ Bible ama atara.
10. Mme n̄wed un̄wam ukpep Bible ewe ke Charles Taze Russell ekewet?
10 N̄wọrọnda ke otu Nditọ Ukpepn̄kpọ Bible oro ekedi Charles Taze Russell. Enye ama ewet udịm udịm n̄wed un̄wam ukpep Bible itiokiet oro ẹkekotde Studies in the Scriptures. Brọda Russell ama aduak ndiwet ọyọhọ eboho itiaba, emi edinamde n̄wed Ezekiel ye Ediyarade eke Bible ẹn̄wan̄a. Enye ọkọdọhọ ete: “Ini ekededi emi ndikụtde se inamde n̄kpọ an̄wan̄a, nyewet ọyọhọ Eboho Itiaba.” Nte ededi, enye ama adian ete: “Edieke Ọbọn̄ anamde emi an̄wan̄a owo en̄wen, enye ekeme ndiwet.”
11. Nso ebuana idu ke ufọt edikem ini ye nnyịn ndidiọn̄ọ uduak Abasi?
11 Utịn̄ikọ C. T. Russell emi ẹwetde ke enyọn̄ emi owụt akpan n̄kpọ kiet ke ukeme nnyịn ndidiọn̄ọ ndusụk udịmikọ Bible—edikem ini. Brọda Russell ama ọdiọn̄ọ ete ke imọ ikemeke ndinyịk un̄wana ayama ke n̄wed Ediyarade kpa nte anam-isan̄ emi enyenede ọkpọsọn̄ udọn̄ mîkemeke ndinyịk utịn asiaha mbemiso ini emi ẹkenịmde ẹnọ enye ndisiaha.
Ẹyarade—Edi ke Edikem Ini Abasi
12. (a) Ini ewe ke ẹtịm ẹdiọn̄ọ ntịn̄nnịm ikọ Bible? (b) Nso uwụtn̄kpọ iwụt nte ke ukeme nnyịn ndidiọn̄ọ ntịn̄nnịm ikọ Bible ọkọn̄ọ ke ini emi Abasi enịmde? (Se ikọ idakisọn̄.)
12 Kpa nte mme apostle ẹkediọn̄ọde ediwak ntịn̄nnịm ikọ aban̄ade Messiah n̄kukụre ke Jesus ama akakpa onyụn̄ eset ke n̄kpa, mme Christian mfịn ẹdiọn̄ọ ntịn̄nnịm ikọ Bible ọyọhọ ọyọhọ n̄kukụre ke enye ama okosu. (Luke 24:15, 27; Utom 1:15-21; 4:26, 27) Ediyarade edi n̄wed ntịn̄nnịm ikọ, ntre nnyịn ikpenyene ndidori enyịn ndidiọn̄ọ enye ọyọhọ ọyọhọ nte mme n̄kpọntịbe ẹmi enye etịn̄de aban̄a ẹsude. Ke uwụtn̄kpọ, C. T. Russell ikpekemeke ndidiọn̄ọ nnennen se ndamban̄a ididuot unam oro ẹtịn̄de ẹban̄a ke Ediyarade 17:9-11 ọwọrọde, sia mme esop oro unam emi adade aban̄a, oro edi, Esop Ediomi Mme Idụt ye Edidiana Mme Idụt, mîkakam idụhe tutu ke enye ama akakpa. *
13. Nso isitịbe ndusụk ini ke ini ẹsịnde un̄wana ke ibuot nneme kiet ke Bible?
13 Ke ini mme akpa Christian ẹkediọn̄ọde nte ke mme Gentile ẹmi mîkanaha mbobi ẹkeme ndikabade ndi mme ekemmọ andinịm ke akpanikọ, ukpụhọde oro ama edemede obufa mbụme kaban̄a m̀mê oyom mbon idụt ẹna mbobi. Emi ama onụk mme apostle ye mbiowo ndifiak ndụn̄ọde ofụri n̄kpọ aban̄ade mbobi. Ukem idaha oro odu mfịn. Nyayama un̄wana oro ẹsịnde ke ibuot nneme kiet ke Bible ndusụk ini esinam ikọt Abasi oro ẹyetde aran, “asan̄autom emi anamde akpanikọ, onyụn̄ enyenede ọniọn̄,” ẹfiak ẹdụn̄ọde mme ibuotikọ ẹmi ẹnyenede ebuana, nte uwụtn̄kpọ ndondo emi oro etienede mi owụtde.—Matthew 24:45.
14-16. Didie ke ukpụhọde ke ekikere nnyịn kaban̄a temple eke spirit okotụk nte Ezekiel ibuot 40 esịm 48 an̄wan̄ade nnyịn?
14 Ke 1971 ẹma ẹsio n̄wed “The Nations Shall Know That I am Jehovah”—How? emi akanamde ntịn̄nnịm ikọ Ezekiel an̄wan̄a. Ibuot kiet ke n̄wed oro ama eneme n̄kukụt Ezekiel aban̄ade temple ibio ibio. (Ezekiel, ibuot 40-48) Ke ini oro, ẹkewụk ntịn̄enyịn ke nte n̄kukụt temple eke Ezekiel edisude ke obufa ererimbot.—2 Peter 3:13.
15 Nte ededi, ibuotikọ iba oro ẹkemịn̄de ke Enyọn̄-Ukpeme (Ikọmbakara) eke December 1, 1972, ama otụk usụn̄ nte n̄kukụt Ezekiel an̄wan̄ade nnyịn. Mmọ ẹkeneme ẹban̄a akwa temple eke spirit oro apostle Paul eketịn̄de aban̄a ke Mme Hebrew ibuot 10. Enyọn̄-Ukpeme ama anam an̄wan̄a nte ke Edisana ubet ye esịt okụre ke temple eke spirit oro enyene ebuana ye idaha mbon oro ẹyetde aran ke adan̄aemi mmọ ẹdude ke isọn̄. Ke ini ẹkefiakde ẹdụn̄ọde Ezekiel ibuot 40 esịm 48 ke ediwak isua ke ukperedem, ẹma ẹdifiọk nte ke kpa nte temple eke spirit odude ke edinam mfịn, ntre ke temple oro Ezekiel okokụtde ke n̄kukụt enyene n̄ko ndidu ke edinam mfịn. Didie ke edi ntre?
16 Ke n̄kukụt Ezekiel, ẹkụt nte mme oku ẹsan̄ade ke esịt okụre temple nte mmọ ẹn̄wamde mme esien ẹmi mîdịghe eke oku. Mme oku ẹmi nte an̄wan̄ade ẹda ẹban̄a “mme oku edidem,” mme asan̄autom Jehovah oro ẹyetde aran. (1 Peter 2:9) Nte ededi, mmọ idinamke utom ke okụre temple eke isọn̄ ke ofụri Tọsịn Isua Ukara Christ. (Ediyarade 20:4) Ke ata akamba ubak ke ikpehe ini oro, edieke mîdịghe ofụri ini oro, mbon oro ẹyetde aran ẹdinam n̄kpọ Abasi ke Ata Edisana eke temple eke spirit oro, “ata heaven.” (Mme Hebrew 9:24) Sia ẹkụtde nte mme oku ẹdide ẹsan̄a ẹka iso ẹsan̄a ẹfiak edem ke okụre temple Ezekiel, ana edi n̄kukụt oro enyene edisu mfịn, ke adan̄aemi ndusụk ke otu mbon oro ẹyetde aran ẹsụk ẹdude ke isọn̄. Nte ekemde, nsiondi magazine emi eke March 1, 1999, ama owụt ukpụhọde ekikere ke ibuot nneme emi. Ntem, tutu ekesịm utịt ọyọhọ isua ikie 20, ẹma ẹsịn un̄wana eke spirit ke ntịn̄nnịm ikọ Ezekiel.
Nyịme Ndikpụhọde Ekikere Fo
17. Mme ukpụhọde ewe ke afo anam ke ọkpọkpọ ekikere ke ama ekedifiọk akpanikọ, ndien didie ke mmọ ẹnọ fi ufọn?
17 Owo ekededi emi oyomde ndinyene ifiọk akpanikọ ana enyịme ndimụm ‘kpukpru ekikere nte mbuotekọn̄, nnam mmọ ẹsụk ibuot ẹnọ Christ.’ (2 Corinth 10:5) Oro isidịghe mmemmem kpukpru ini, akpan akpan ke ini mme ekikere ẹma ẹkenen̄ede ẹdọn̄ n̄kam. Ke uwụtn̄kpọ, mbemiso ekekpepde akpanikọ Abasi, ekeme ndidi afo ama esinịm ndusụk usọrọ ini nduọkodudu ido ukpono ye ubon fo. Ke ama ọkọtọn̄ọ ndikpep Bible, afo ama edifiọk ete ke mme usọrọ ẹmi ke akpanikọ ẹtọn̄ọ ẹto ukpono ndem. Ke akpa, ekeme ndidi afo ama emen̄e ndisịn se afo ekekpepde ke edinam. Nte ededi, ke akpatre, ima emi afo ekenyenede ọnọ Abasi ama ọsọn̄ akan ekikere ido ukpono, ndien afo ama etre ndibuana ke mme usọrọ oro mînemke Abasi esịt. Nte Jehovah idiọn̄ke ubiere fo?—Men Mme Hebrew 11:25 domo.
18. Didie ke nnyịn ikpanam n̄kpọ ke ini ẹsịnde un̄wana ke ifiọk emi inyenede iban̄a akpanikọ Bible?
18 Nnyịn imesibọ ufọn kpukpru ini ke ndinam mme n̄kpọ ke usụn̄ Abasi. (Isaiah 48:17, 18) Ntre ke ini ẹsịnde un̄wana ke ifiọk emi ikenyenede iban̄a itie kiet ke Bible, ẹyak nnyịn idara ke n̄kọri akpanikọ! Ke akpanikọ, nnyịn ndidi se ẹkade iso ẹsịn ke un̄wana ọsọn̄ọ nte ke nnyịn idu ke nnennen usụn̄. Enye edi “usụn̄ nti owo,” emi ebietde “un̄wana eke asiahade, aka iso ayama, tutu esịm ufọt uwemeyo.” (Mme N̄ke 4:18) Edi akpanikọ, idahaemi nnyịn ikụt ndusụk ikpehe ke uduak Abasi “ntịmede-ntịmede.” Edi ke edikem ini Abasi ama edisịm, nnyịn iyokụt ofụri uyama akpanikọ, ama akam edi ikpat nnyịn ẹsọn̄ọ ẹdu ke “usụn̄” oro. Kan̄a ke emi, nnyịn ikpakam idara ke akpanikọ emi Jehovah anamde an̄wan̄a, ibetde ẹsịn un̄wana ke mbon oro mîtịmke in̄wan̄a kan̄a.
19. Nso idi usụn̄ kiet ndiwụt nte ke nnyịn imama akpanikọ?
19 Didie ke nnyịn ikpowụt ima emi inyenede inọ un̄wana ke ata ata usụn̄? Usụn̄ kiet edi ke ndikot Ikọ Abasi kpukpru ini—ke usen ke usen edieke ikemede. Ndi afo ke etiene ndutịm ukot Bible ofụri ini? Magazine Enyọn̄-Ukpeme ye Awake! ẹnọ nnyịn n̄ko akpakịp nti udia eke spirit ndidia. Kere, n̄ko, ban̄a mme n̄wed, ndiye uduot n̄kpri n̄wed, ye mme n̄kpọ eken oro ẹtịmde ke ufọn nnyịn. Ndien nso kaban̄a mme ọnọ-nsịnudọn̄ ntọt ẹban̄ade mme utom ukwọrọikọ Obio Ubọn̄ oro ẹmịn̄de ke Yearbook of Jehovah’s Witnesses?
20. Nso ebuana idu ke ufọt un̄wana ye akpanikọ ẹtode Jehovah ye nnyịn ndibuana ke mme mbono esop Christian?
20 Ih, Jehovah ke utịbe utịbe usụn̄ ọmọbọrọ akam oro ẹwetde ke Psalm 43:3. Ke utịt utịt ufan̄ikọ oro nnyịn ikot ite: “[Un̄wana ye akpanikọ fo] ẹyeda mi ẹdi ke edisana obot fo, ye ke idụn̄ fo.” Nte afo omodori enyịn ndituak ibuot nnọ Jehovah, ke ebuana ye udịm udịm mbon efen? Item eke spirit oro ẹsinọde ke mme mbono esop nnyịn edi akpan usụn̄ kiet oro Jehovah ọnọde un̄wana mfịn. Nso ke nnyịn ikeme ndinam man esịtekọm oro nnyịn inyenede iban̄a mme mbono esop Christian ọkọri? Nnyịn imọnọ fi ikot ndida esịt akpanikọ ndụn̄ọde ibuot nneme emi ke ibuotikọ etienede mi.
[Mme Ikọ idakisọn̄]
^ ikp. 12 Ke C. T. Russell ama akakpa, ẹma ẹtịm n̄wed oro ẹkedade nte ọyọhọ eboho itiaba ke Studies in the Scriptures ke ukeme ndinam n̄wed Ezekiel ye Ediyarade ẹn̄wan̄a. Eboho oro ọkọkọn̄ọ, ubak ubak, ke se Russell eketịn̄de aban̄a mme n̄wed Bible oro. Nte ededi, ini ndiyarade se mme ntịn̄nnịm ikọ oro ẹwọrọde ikedịghe kan̄a, ndien ke ofụri ofụri, se ẹkenamde an̄wan̄a ke eboho Studies in the Scriptures oro eketie mbukpọn̄ mbukpọn̄. Ke mme isua oro ẹketienede, mfọnido Jehovah oro owo mîdotke ye mme n̄kpọntịbe eke ererimbot ẹma ẹnam mme Christian ẹfiọk nnennen nnennen se mme n̄wed ntịn̄nnịm ikọ oro ẹwọrọde.
Nte Afo Emekeme Ndibọrọ?
• Ntak emi Jehovah ayararede mme uduak esie sụn̄sụn̄?
• Didie ke mme apostle ye mbiowo ke Jerusalem ẹkebiere n̄kpọ aban̄ade edina mbobi?
• Ewe usụn̄ ukpep Bible ke mme akpa Nditọ Ukpepn̄kpọ Bible ẹkeda, ndien ntak emi enye ekedide n̄wọrọnda?
• Nam an̄wan̄a nte ẹyararede un̄wana eke spirit ke edikem ini Abasi.
[Mme Mbụme Ukpepn̄kpọ]
[Ndise ke page 12]
Charles Taze Russell ama ọdiọn̄ọ ete ke un̄wana ayayama ke n̄wed Ediyarade ke edikem ini Abasi