Didie ke Spirit Abasi Anam Utom Mfịn?

ENYE ekedi mbụn̄ọ toto ke idịbi eka esie. Kpukpru usen, enye ama esitie ke inuaotop temple oro ẹkekotde Ediye man eben̄e n̄kpọ oto mbon oro ẹkebede ẹdụk temple. Nte ededi, ke idaha kiet, eben̄e-eben̄e oro okobiomode ndo mi ama ọbọ enọ oro ekenyenede ufọn akan n̄kpri okụk ifan̄. Ẹma ẹnam enye okop nsọn̄idem!—Utom 3:2-8.

Kpa ye oro edide apostle Peter ye John ‘ẹkemenede enye ke enyọn̄’ ẹnam “enye okop odudu ke ukot esie,” mmọ ikadaha itoro inọ idemmọ ke ndikọk udọn̄ọ oro. Ntak-a? Peter ke idemesie anam an̄wan̄a ete: “Mbufo nditọ Israel, nsinam idem akpade mbufo aban̄a owo emi? Nsinyụn̄ inam mbufo ẹwụkde enyịn ẹse nnyịn, nte edide nnyịn ida odudu idem nnyịn m̀mê uten̄e eke nnyịn iten̄ede Abasi inam enye asan̄a?” Ke akpanikọ, Peter ye John ẹma ẹdiọn̄ọ ẹte ke mmimọ ikanamke utọ n̄kpọ oro ke odudu mmimọ, edi ikada edisana spirit Abasi inam.—Utom 3:7-16; 4:29-31.

Ke ini oro, ẹkenọ mme utọ “n̄kpọ odudu” oro ndiwụt nte ke obufa esop Christian ama enyene unyịme Abasi. (Mme Hebrew 2:4) Edi ke ẹma ẹkeyọhọ uduak mmọ, apostle Paul ọkọdọhọ ke mmọ “ẹyekabade ẹdi ikpîkpu.” * (1 Corinth 13:8) Ntem, idahaemi nnyịn ikwe nte Abasi ọnọde odudu ẹda ẹnam ukọkudọn̄ọ, ẹtịn̄ ntịn̄nnịm ikọ, m̀mê ẹbịn mme demon ẹfep ke ata esop Christian.

Nte ededi, ndi emi ọwọrọ ete ke edisana spirit Abasi idụhe aba ke edinam? N̄wan̄ansa-o! Ẹyak nnyịn ikere iban̄a ndusụk usụn̄ en̄wen oro spirit Abasi akanamde utom ke akpa isua ikie onyụn̄ anamde ke eyo nnyịn.

“Spirit Akpanikọ”

Usụn̄ kiet emi edisana spirit Abasi anamde utom edi nditọt, ndinọ un̄wana, ndinyụn̄ nyarade mme akpanikọ. Esisịt ini mbemiso n̄kpa esie, Jesus ama asian mme mbet esie ete: “Mmenyene ediwak n̄kpọ kan̄a ndineme ye mbufo, edi mbufo ikemeke ndiyọ mmọ ke emi. Edi ke adan̄aemi Enye oro edidide, kpa Spirit akpanikọ, Enye ayada mbufo odụk ke ofụri akpanikọ.”—John 16:12, 13.

Ẹma ẹn̄wan̄a “Spirit akpanikọ” ẹduọk ke Pentecost 33 E.N. ke ini ẹkedade edisana spirit ẹnịm n̄kpọ nte mbet 120 ẹmi ẹkesopde idem ke ubet enyọn̄ ke Jerusalem baptism. (Utom 2:1-4) Apostle Peter ama odu ke otu mbon oro ẹkedude ke usọrọ eke isua ke isua oro. Ke ọyọhọde ye edisana spirit, Peter ama “adaha ke enyọn̄” onyụn̄ atat, m̀mê anam, ndusụk akpanikọ ẹban̄ade Jesus an̄wan̄a. Ke uwụtn̄kpọ, enye ama obụk nte ‘ubọk nnasia Abasi ekemenerede Jesus eyen Nazareth ẹnịm ke enyọn̄.’ (Utom 2:14, 22, 33) Spirit Abasi ama onụk Peter n̄ko nditan̄a uko uko nnọ mme Jew ẹmi ẹkekpan̄de utọn̄ ẹnọ enye ete: “Yak ufọk Israel ẹtịm ẹfiọk ẹte, Abasi ama anam Enye edi Ọbọn̄ ye Christ, kpa Jesus emi mbufo ẹkewotde ke [eto, NW].” (Utom 2:36) Nte utịp etop Peter eke odudu spirit, n̄kpọ nte tọsịn owo ita ‘ẹma ẹnyịme’ ikọ esie ẹnyụn̄ ẹna baptism. Ke usụn̄ emi, edisana spirit Abasi ama an̄wam ke ndida mmọ usụn̄ nsịm akpanikọ.—Utom 2:37-41.

Edisana spirit Abasi ama anam utom n̄ko nte andikpep ye anditi. Jesus ọkọdọhọ ete: “Ibetedem, kpa Edisana Spirit, emi Ete edinọde edi ke enyịn̄ Mi, Enye eyekpep mbufo kpukpru n̄kpọ, onyụn̄ anam mbufo ẹti kpukpru se Ami n̄ketịn̄de nnọ mbufo.”—John 14:26.

Didie ke edisana spirit akanam utom nte andikpep? Spirit Abasi ama an̄wam mme mbet nditi mme n̄kpọ oro mmọ ẹkekopde ẹto Jesus ke mbemiso edi oro mîketịmke in̄wan̄a mmọ. Ke  uwụtn̄kpọ, mme apostle ẹma ẹdiọn̄ọ ẹte ke ini enye akadade ke ikpe, Jesus ọkọdọhọ Pontius Pilate, owo Rome oro ekedide andikara Judea, ete: “Obio Ubọn̄ Mi idịghe eke ererimbot emi.” Edi, ke ini emi Jesus okoyomde ndidọk n̄ka heaven ke se ibede usen 40 ke ukperedem, mme apostle ẹkesụk ẹnyenyene ukwan̄ ekikere nte ke ẹdiwụk Obio Ubọn̄ oro mi ke isọn̄. (John 18:36; Utom 1:6) Nte an̄wan̄ade, mme apostle ikekemeke ndifiọk ọyọhọ ọyọhọ se ikọ Jesus ọkọwọrọde tutu ke ẹma ẹken̄wan̄a edisana spirit Abasi ẹduọk mmọ ke Pentecost 33 E.N.

Spirit Abasi ama anam utom n̄ko nte anditi ebe ke ndinam mmọ ẹfiak ẹti nsio nsio ukpepn̄kpọ Jesus. Ke uwụtn̄kpọ, mme ntịn̄nnịm ikọ ẹban̄ade n̄kpa ye ediset ke n̄kpa Christ ẹma ẹn̄wan̄a mmọ ke obufa usụn̄ ye un̄wam edisana spirit. (Matthew 16:21; John 12:16) Ndifiak nti mme ukpepn̄kpọ Jesus ama anam mme apostle ẹkeme nditịn̄ ikọ uko uko mban̄a idaha mmọ ke iso ndidem, mme ayaraiwat, ye mme adaiso ido ukpono.—Mark 13:9-11; Utom 4:5-20.

Adianade do, edisana spirit Abasi ama an̄wam ke ndida mme akpa Christian usụn̄ n̄ka efakutom ukwọrọikọ oro okon̄wụmde mfri. (Utom 16:6-10) Spirit Abasi ama onụk mme akpa Christian n̄ko nditiene n̄wet Ikọ Abasi, kpa Bible, ke ufọn ofụri ubonowo. (2 Timothy 3:16) Nte an̄wan̄ade, ndien, edisana spirit ama anam utom ke nsio nsio usụn̄ ke akpa isua ikie. Owo ikọnọhọ enye man ẹda ẹnam mme utịben̄kpọ kpọt.

 Edisana Spirit ke Eyo Nnyịn

Edisana spirit ke anam utom kpasụk ntre ke ufọn mme ata Christian ke eyo nnyịn. Ekpri otu nditọ ukpepn̄kpọ Bible ke Allegheny, Pennsylvania, U.S.A., ẹma ẹkụt emi ke utịt utịt ọyọhọ isua ikie 19. Ifịk ifịk nditọ ukpepn̄kpọ Bible ẹmi ẹma ẹnyene udọn̄ ndifiọk “akpanikọ.”—John 8:32; 16:13.

Owo kiet ke otu emi, Charles Taze Russell, ama etịn̄ aban̄a ukeme oro enye ekesịnde ndiyom akpanikọ N̄wed Abasi ete: “Mma mbọn̄ akam . . . nte ẹnọ mi ukeme ndision̄o asari ekededi oro ekemede ndidi ubiọn̄ọ ke esịt ye ekikere mi mfep ndien spirit esie ada mi usụn̄ esịm nnennen ifiọk.” Abasi ama ọbọrọ akam nsụhọdeidem emi.

Nte Russell ye mme nsan̄a esie ẹkedụn̄ọrede N̄wed Abasi ifịk ifịk, ediwak n̄kpọ ẹma ẹdin̄wan̄a mmọ. Russell ama anam an̄wan̄a ete: “Nnyịn ima idikụt ite ke ediwak isua ikie, nsio nsio n̄ka ye mme otu ẹma ẹbahade mme ukpepn̄kpọ Bible ke otu idemmọ, ẹbuakde mmọ ye ediwak ekikere ye ndudue owo.” Emi ama ada ekesịm se enye okokotde “ediwọn̄ọde akpanikọ nte mîdotke.” Ke akpanikọ, ẹma ẹdịp mme akpanikọ N̄wed Abasi ke idak ukpepn̄kpọ mme okpono ndem ẹmi ẹma ẹkebe ẹdụk Christendom ke ediwak isua ikie. Edi Russell ama ebiere ndidiọn̄ọ nnyụn̄ ntan̄a akpanikọ.

Ebede ke Zion’s Watch Tower and Herald of Christ’s Presence, Russell ye mme nsan̄a esie ẹma ẹsua uko uko ẹnọ mme nsunsu ukpepn̄kpọ ido ukpono oro ẹkewụtde Abasi ke ukwan̄ usụn̄. Mmọ ẹma ẹfiọk ẹte—ke edide isio ye ọwọrọetop ekikere ido ukpono—ukpọn̄ esikpa, nte ke ima ikpa nnyịn ika udi, ye nte ke Jehovah edi ata Abasi kierakiet ndien ke ntre idịghe ubak Abasi-Ita-ke-Kiet.

Nte ededi, nte afo ekemede ndikere, utọ ediyarade mme nsunsu ukpepn̄kpọ oro ama ayat mme ọkwọrọ ederi Christendom esịt. Ke ẹnyenede ọkpọsọn̄ udọn̄ ndimụm ikpọ itie mmọ n̄kama, ediwak ọkwọrọ ederi Catholic ye Protestant ẹma ẹtịm ubịnikọt emi uduak ekedide ndibiat enyịn̄ Russell. Edi idem ikememke enye ye mme nsan̄a esie. Ye mbuọtidem, mmọ ẹma ẹberi edem ke spirit Abasi ndinọ ndausụn̄. Russell ama ọdọhọ ete: “Nsọn̄ọ emi Ọbọn̄ nnyịn ọnọde edi nte ke . . . edisana spirit Ete, emi ẹnọde ke ntak ye ke eben̄e Jesus Andifak, Esịne-Ufọt ye Ibuot nnyịn, edidi andikpep nnyịn.” Ndien enye ke akpanikọ ama ekpep! Mme ifịk ifịk Nditọ Ukpepn̄kpọ Bible ẹmi ẹma ẹka iso ndin̄wọn̄ edisana mmọn̄ akpanikọ ẹtode Bible ẹnyụn̄ ẹtan̄a akpanikọ emi ke ofụri ererimbot.—Ediyarade 22:17.

Esop Mme Ntiense Jehovah eke eyomfịn aka iso nditiene ndausụn̄ edisana spirit Abasi ke se ibede isua ikie idahaemi. Nte spirit Jehovah akade-ka iso ndinam enyịn eke spirit mmọ ẹn̄wan̄a, Mme Ntiense ẹnyịme ndinam mme ukpụhọde oro ẹyomde man ẹda ẹkekem ye ifiọk eke idahaemi.—Mme N̄ke 4:18.

‘Mbufo Ẹyedi Mme Ntiense Mi’

Jesus ama owụt usụn̄ efen oro edisana spirit Abasi anamde utom ke ini enye ọkọdọhọde mme  mbet esie ete: “Mbufo ẹyebọ odudu, ke Edisana Spirit ama edi edidoro mbufo ke idem: mbufo ẹyenyụn̄ ẹdi mme ntiense Mi . . . tutu esịm utịt ererimbot.” (Utom 1:8) “Odudu” ye “Edisana Spirit” oro Jesus ọkọn̄wọn̄ọde ndinọ mme mbet esie man ẹkeme ndinam utom oro Abasi ọkọnọde mmọ osụk ododu ke edinam mfịn.

Nte otu, ẹtịm ẹdiọn̄ọ Mme Ntiense Jehovah ke ntak utom ukwọrọikọ mmọ. (Se ekebe.) Ke akpanikọ, Mme Ntiense Jehovah ẹkwọrọ etop akpanikọ ke se ibede idụt ye otu isuo 230. Ke kpukpru idaha oro ẹkemede ndikere mban̄a, esịnede edisịn uwem mmọ ke itiendịk ke mme ebiet oro ekọn̄ ọnọmọde, mmọ ẹmenede uyo mmọ uko uko ke ndinọ Obio Ubọn̄ Abasi ibetedem. Ifịk oro mmọ ẹnyenede ẹban̄a utom ukwọrọikọ Christian ọnọ ọkpọsọn̄ uyarade nte ke edisana spirit ke anam utom mfịn. Ndien ana in̄wan̄în̄wan̄ nte ke Jehovah Abasi ke ọdiọn̄ mme ukeme mmọ.

Ke uwụtn̄kpọ, isua oko ẹma ẹyak se ibede hour biliọn kiet ẹsịn ke ndikwọrọ eti mbụk Obio Ubọn̄ Abasi. Ye nso utịp? N̄kpọ nte owo 323,439 ẹma ẹyarade uyakidem mmọ nnọ Abasi ebe ke baptism mmọn̄. Ke adianade do, ẹma ẹnịm ukpepn̄kpọ Bible 4,433,884 ke urua ke urua ye mbon oro ẹnyenede udọn̄ obufa. Ke ofụri ofụri, ẹma ẹnịm n̄wed 24,607,741, magazine 631,162,309, ye n̄kpri n̄wed ye ndiye uduot n̄kpri n̄wed 63,495,728. Nso okopodudu n̄kpọ ntiense ke emi edi ntem nte ke spirit Abasi ke anam utom!

Spirit Abasi ye Afo

Ke ini owo anamde n̄kpọ nte ọfọnde aban̄a eti mbụk, anamde uwem esie odu ke n̄kemuyo ye mme idaha Abasi, onyụn̄ owụtde mbuọtidem ke enọ ufak, usụn̄ eberede ọnọ enye ndinyene edisana idaha ye Abasi. Apostle Paul ọkọdọhọ utọ mbon oro ete: ‘Abasi . . . ọnọ mbufo Edisana Spirit Esie.’—1 Thessalonica 4:7, 8; 1 Corinth 6:9-11.

Ndinyene spirit Abasi ada ediwak nti edidiọn̄ edi. Nso utọ edidiọn̄? Akpa n̄kpọ edi, Ikọ Abasi eke odudu spirit ọdọhọ ete: “Mbun̄wụm spirit edi ima, ye idatesịt, ye emem, ye ime, ye mfọn-ido, ye eti ido, ye edinam akpanikọ, ye ifụre ifụre ido, ye mfara ke idem.” (Galatia 5:22, 23) Ke ntre, edisana spirit Abasi edi ọkpọsọn̄ odudu oro onụkde owo ndinam eti n̄kpọ, anamde owo owụt mme edu Abasi.

Adianade do, edieke afo okotde Bible onyụn̄ adade se afo ekpepde esịn ke edinam, spirit Abasi ekeme ndin̄wam fi ọkọri ke ọniọn̄, ifiọk, ikike, ukeme ndinam ubiere, ye ukeme ukere n̄kpọ. Edidem Solomon ama ọbọ “eti ibuot ye asian eti-eti, ye ọniọn̄ esịt” koro enye okoyomde ndinem Abasi esịt utu ke owo. (1 Ndidem 4:29) Sia Jehovah ọkọnọde Solomon edisana spirit, ke akpanikọ enye iditreke ndinọ mbon oro ẹyomde ndinem enye esịt edisana spirit esie mfịn.

Edisana spirit Abasi an̄wam mme Christian n̄ko ndin̄wana ye Satan ye mme demon, idiọk editịm n̄kpọ emi, ye ntụhọ unam idiọk eke mmeme ikpọkidem mmọ. Didie ke oro ekeme nditịbe? Apostle Paul ọbọrọ ete: “Mmenyene ukeme ndinam kpukpru n̄kpọ ke odudu andisọn̄ọ mi idem.” (Philippi 4:13) Ekeme ndidi edisana spirit idimenke mme mfịna m̀mê mme idomo ifep; nte ededi, enye ekeme ndin̄wam fi ndiyọ mmọ. Ebede ke ndikọn̄ mbuọtidem ke spirit Abasi, nnyịn imekeme ndibọ “akwa ubom odudu” ndida n̄kan mfịna m̀mê nnanenyịn ekededi.—2 Corinth 4:7; 1 Corinth 10:13.

Ke ini afo ekerede aban̄a kpukpru uyarade ẹdude, eyịghe idụhe nte ke edisana spirit Abasi ke anam utom mfịn. Spirit Jehovah ọnọ mme asan̄autom esie odudu ndinọ ikọ ntiense mban̄a ikpọ uduak esie. Enye aka iso ndiyarade un̄wana eke spirit, onyụn̄ anam mbuọtidem nnyịn ọsọn̄, an̄wamde nnyịn ndika iso nnam akpanikọ nnọ Andibot nnyịn. Nnyịn ikeme ndiwụt esịtekọm didie ntem nte ke Abasi osu un̄wọn̄ọ esie ke ndinọ mme anam-akpanikọ asan̄autom esie edisana spirit mfịn!

[Mme Ikọ idakisọn̄]

[Ekebe ke page 10]

Se Mbon Efen Ẹtịn̄de Ẹban̄a Mme Ntiense Jehovah

“Ke adan̄aemi mme ufọkabasi eken ẹkpede mme ọnọitem man ẹtap mme owo ẹsịn ke ufọkabasi m̀mê ẹn̄wanade ye mme eneni eyomfịn, utọ nte idan̄ ukemuduot ye usion̄o idịbi, Mme Ntiense idianake ye ererimbot emi akade-ka iso ndikpụhọde. Mmọ ke ẹsụk ẹkwọrọ ikọ ke ofụri isọn̄.”—The Orange County Register eke Ikpehe Orange, California, U.S.A.

“Ke ini edide edisịm edinam ẹdiọn̄ọ ido ukpono mmọ, ibat ibat n̄ka ido ukpono ẹnyene ifiopesịt . . . nte Mme Ntiense Jehovah.”—The Republic eke Columbus, Indiana, U.S.A.

“Mmọ ẹdi n̄kukụre mbon oro ẹkwọrọde ‘eti mbụk’ to ke enyịnusụn̄ sịm enyịnusụn̄, ẹdade mme edumbet Bible ẹsịn ke edinam.”—Życie Literackie, Poland.

“Ke n̄kponn̄kan ubịnikọt ukwọrọikọ oro akanam ẹdiọn̄ọde, Mme Ntiense Jehovah ẹkwọrọ etop Jehovah ke ofụri ererimbot.”—News-Observer, Tamaqua, Pennsylvania, U.S.A.

[Mme ndise ke page 9]

Edisana spirit Abasi ọnọ nnyịn un̄wana eke spirit,

. . . anam inyene nti edu Christian,

. . . onyụn̄ an̄wam nnyịn ke utom ukwọrọikọ ofụri ererimbot