Ntọt Mme Anditan̄a Obio Ubọn̄

‘Mbufo Ẹmefiọk Ekese Ẹban̄a Bible’

KE INI Jesus oro ekedide isua 12 eketịn̄de ikọ uko uko ọnọ mme adaiso ido ukpono ke Jerusalem, ‘idem ama akpa kpukpru mmọ ẹmi ẹkekopde ikọ Esie aban̄a ọniọn̄ ye ibọrọ Esie.’ (Luke 2:47) Ukem ntre mfịn, ediwak uyen ẹdide mme asan̄autom Jehovah ẹsinyene uko nditịn̄ nnọ mme andikpep ye mme nsan̄a ufọkn̄wed mmọ mban̄a Abasi ye Bible, ndien ediwak ini mmọ ẹsinyene mme ukem idara idara utịp.

Tiffany, emi edide isua 14, ama odu ke otu nditọ ukpepn̄kpọ ẹmi ẹkenemede n̄kpọ ẹban̄a ntịn̄nnịm ikọ Bible aban̄ade urua 70 eke isua, emi ẹwetde ke Daniel 9:24-27. Andikpep ama etịn̄ n̄kpọ ifan̄ otụk mme ufan̄ikọ ẹmi onyụn̄ ọsọsọp esịbe nneme oro efep enyọn̄ enyọn̄.

Ke akpa, Tiffany ama emen̄e ndimenede ubọk. Enye ọdọhọ ete: “Edi ke ndusụk ntak, ama enen̄ede afịna mi nte ke owo ikanamke mme ufan̄ikọ oro ẹn̄wan̄a ọyọhọ ọyọhọ. Ndien inikiet inikiet, mma mmenede ubọk.” Andikpep oro ama okop n̄kpaidem nte ke owo ama enen̄ede enyene n̄kpọ nditịn̄ ke ibuot nneme oro, sia nneme oro mîkan̄wan̄ake ata ediwak nditọ ufọkn̄wed.

Ke ẹma ẹkenọ enye ifet ndinam ntịn̄nnịm ikọ oro an̄wan̄a, Tiffany ama adaha ke enyọn̄ etịn̄ ikọ ye unana edikama n̄wed utịn̄ikọ. Ke enye ama okokụre, ubet ukpepn̄kpọ ama odobo biai. Idem ama enyek Tiffany esisịt. Ekem otu nditọ ufọkn̄wed oro ẹma ẹkwak ubọk ke ata anyan ini.

Andikpep oro ama etịn̄ afiak etịn̄ ete: “Oro enen̄ede otụk owo, Tiffany, oro enen̄ede otụk owo.” Enye ama enyịme nte ke imọ ima ifiọk ke anaedi mme ntọt efen efen ẹdu kaban̄a mme ufan̄ikọ oro, edi ke Tiffany ekedi akpa owo oro akanam anamde mmọ ẹnen̄ede ẹn̄wan̄a imọ ntre. Ke utịt ukpepn̄kpọ oro, enye ama obụp Tiffany nte enye akasan̄ade ọdiọn̄ọ ekese n̄kpọ ntre aban̄a Bible.

Enye ama ọbọrọ ete: “Edi koro ami ndi kiet ke otu Mme Ntiense Jehovah. Ete ye eka mi ẹkenyene ndikpep mi ntịn̄nnịm ikọ oro ediwak ini mbemiso ami n̄kekemede ndidiọn̄ọ enye.”

Mme nsan̄a ubet ukpepn̄kpọ n̄ko ẹma ẹkop n̄kpaidem ẹban̄a ifiọk Bible esie. Eyen ufọkn̄wed kiet ama ọdọhọ Tiffany ete: “Idahaemi an̄wan̄a mi ntak emi mbufo Mme Ntiense Jehovah ẹsisan̄ade to ke enyịnusụn̄ sịm enyịnusụn̄; edi koro mbufo ẹfiọkde ekese ntre ẹban̄a Bible.” Mbon en̄wen ẹma ẹn̄wọn̄ọ nte ke tutu amama mmimọ ididaha enye inam mbubru aba ke ntak mme edinịm ke akpanikọ esie.

Ke ini Tiffany eketịn̄de ifiọkutom esie ọnọ ete ye eka esie, mmọ ẹma ẹnọ ekikere ẹte enye ọnọ andikpep esie n̄wed Ifiọk Oro Adade Osịm Nsinsi Uwem. Ke enye ama akanam ntre onyụn̄ owụt andikpep oro ikpehe oro anamde ntịn̄nnịm ikọ Daniel an̄wan̄a, enye ama ọsọsọp ọbọ n̄wed oro onyụn̄ ọkọm enye.

Ke akpanikọ, ke ini mme uyen Christian ẹtịn̄de ẹban̄a se ete ye eka mmọ ẹkpepde mmọ ẹban̄a Abasi ye Bible uko uko, mmọ ẹda itoro ye ubọn̄ ẹsọk Jehovah ẹnyụn̄ ẹda mme edidiọn̄ ẹsọk idemmọ.—Matthew 21:15, 16.