Nte Afo Emeti?

Nte afo ama adara ndikot mme nsiondi Enyọn̄-Ukpeme eke ndondo emi? Ọfọn, se m̀mê afo emekeme ndibọrọ mme mbụme ẹtienede mi:

• Nso ikanam edi mmemmem n̄kpọ ndinyịme Christmas ke Korea?

Akani edinịm ke akpanikọ ama odu ke Korea ye ke ndusụk idụt eken aban̄a abasi itie utem udia oro ẹkekerede nte asan̄ade ke ekwa nsụn̄ikan̄ onyụn̄ adade mme enọ edi ke December. N̄ko, ke Ekọn̄ Ererimbot II ama okokụre, mbonekọn̄ United States ẹma ẹdeme mme enọ ye mme n̄kpọ un̄wam ke mme ufọkabasi n̄kann̄kụk.—12/15, page 4, 5.

• Ke ndisu Isaiah 21:8, ewe “owo ukpeme” ke Abasi enyene ke eyo nnyịn?

Mme Christian ẹmi ẹyetde aran ke spirit, oro ẹnamde utom nte otu owo ukpeme, ẹmenam mme owo ẹdu ke edidemede ẹban̄a se mme n̄kpọntịbe ererimbot ẹmi ẹsude mme ntịn̄nnịm ikọ Bible ẹwọrọde. Mmọ n̄ko ẹmenyụn̄ ẹn̄wam nditọ ukpepn̄kpọ Bible ndidiọn̄ọ nnyụn̄ mfep mme ukpepn̄kpọ ye mme edinam ẹmi mîkemke ye N̄wed Abasi.—1/1, page 8, 9.

• Mmanie ẹkedi “Nditọete Poland”?

Mmọ ẹkedi ekpri otu ido ukpono kiet oro okodude ke ọyọhọ isua ikie 16 ye 17 ke Poland oro ekesịnde udọn̄ ọnọ edisọn̄ọ nyịre ke Bible ndien ke ntre ẹsịnde mme ntatara ukpepn̄kpọ ufọkabasi, utọ nte Abasi-Ita-ke-Kiet, baptism nseknditọ, ye hell ikan̄. Nte ini akade, ẹma ẹkọbọ mmọ idiọk idiọk ẹnyụn̄ ẹnyịk mmọ ndisuana nyọhọ mme idụt en̄wen.—1/1, page 21-23.

• Ntak ẹkpeberide edem ke mme ntịn̄nnịm ikọ Bible utu ke mme ntịn̄nnịm ikọ oro mme ekpepn̄kpọ mban̄a ini iso m̀mê mme asiak-ntantaọfiọn̄ ẹtịn̄de?

Owo ikemeke ndiberi edem ke mbon ẹmi ẹdọhọde nte idide prọfet koro mmọ ẹfụmide Jehovah ye Bible. Mme ntịn̄nnịm ikọ Bible kpọt ẹkeme ndin̄wam fi ndifiọk nte mme n̄kpọntịbe ẹkemde ye uduak Abasi, adade nsinsi ufọn ọsọk fi ye ubon fo.—1/15, page 3.

• Nso idi ndusụk uyarade ẹwụtde nte ke nnyịn idu uwem ke ukperedem ini?

Nnyịn imekeme ndikụt utịp edisio Satan ke heaven nduọk. (Ediyarade 12:9) Nnyịn idu uwem ke ini akpatre “edidem” oro ẹtịn̄de ẹban̄a ke Ediyarade 17:9-11. Ibat mme ata Christian oro ẹyetde aran ke osụhọrede, edi etie nte ndusụk ẹyesụk ẹdu ke isọn̄ ke ini akwa ukụt ọtọn̄ọde.—1/15, page 12, 13.

• Ini ewe ke ẹkewet n̄wed Habakkuk, ndien ntak emi nnyịn ikpenyenede udọn̄ ke enye?

Ẹkewet n̄wed Bible emi ke n̄kpọ nte 628 M.E.N. Enye esịne ubiereikpe Jehovah kaban̄a Judah ye Babylon eset. Enye n̄ko etịn̄ aban̄a ubiereikpe Abasi oro edisịmde idiọk editịm n̄kpọ emi ke mîbịghike.—2/1, page 9.

• M̀mọ̀n̄ ke Bible ke nnyịn ikeme ndikụt ọniọn̄ ọniọn̄ item eka emi ẹnọde mme enyene-ido ibanndọ?

Akpatre ibuot n̄wed Mme N̄ke, ibuot 31, edi ata eti itie emi utọ item oro otode.—2/1, page 30, 31.

• Ntak emi nnyịn ikemede ndiwụt esịtekọm nte ke Jehovah amayarade “ekikere Christ” ọnọ nnyịn? (1 Corinth 2:16)

Ebede ke n̄wetnnịm n̄kpọ Gospel, Jehovah anam nnyịn ifiọk mme ekikere, ntụk, edinam, ye mme n̄kpọ ẹdide ebeiso ẹnọ Jesus. Emi ekeme ndin̄wam nnyịn ndinen̄ede ntie nte Jesus, akpan akpan ke nte nnyịn idade utom ukwọrọikọ unyan̄a uwem ke akpan n̄kpọ.—2/15, page 25.

• Nte Abasi esibọrọ mme akam mfịn?

Ih. Okposụkedi Bible owụtde nte ke Abasi isibọrọke kpukpru akam, mme ifiọk n̄kpọntịbe eyomfịn ẹwụt nte ke enye esiwak ndibọrọ mbon oro ẹbọn̄de akam ẹyom ndọn̄esịt ye un̄wam ke mme utọ n̄kpọ nte edikọk mme mfịna ndọ.—3/1, page 3-7.

• Nso ke nnyịn ikeme ndinam man ibọ odudu ito Abasi?

Nnyịn imekeme ndiben̄e enye ebe ke akam, ikot Bible man inyene ukeme eke spirit, inyụn̄ inyene nsọn̄idem ito ebuana Christian.—3/1, page 15, 16.

• Didie ke mme ete ye eka ẹkeme ndin̄wam nditọ mmọ ndibọ ekese ufọn nto mme mbono esop Christian?

Mmọ ẹkeme ndin̄wam nditọ mmọ ẹtre ndide idap, ndusụk ẹnamde mmọ ẹbem iso ẹde idap esisịt. Ẹkeme ndisịn udọn̄ nnọ nditọwọn̄ ndiwet “mme akpan n̄kpọ,” utọ nte ndiwet idiọn̄ọ ke babru kpukpru ini oro ẹtịn̄de mme ikọ m̀mê ẹsiakde mme enyịn̄ oro ẹmehede.—3/15, page 17, 18.

• Nso idi ndusụk n̄kpọ oro nnyịn ikemede ndikpep nto uwụtn̄kpọ Job?

Job ekenịm itie ebuana esie ye Abasi ke akpa, ikanamke asari ke ini anamde n̄kpọ ye mme ekemmọ owo, odomo ndinam akpanikọ nnọ nsan̄a ndọ esie, ekere aban̄a idaha eke spirit ubon esie, onyụn̄ ọyọ ke edinam akpanikọ ke idak idomo.—3/15, page 25-27.

• Nte Bible esịne ndedịbe uwetn̄kpọ oro anamde ẹnyene ikike ẹban̄a mme etop oro ẹnọde?

Baba. Ẹkeme ndidọhọ ke ndedịbe uwetn̄kpọ oro ẹkerede nte odude esịne ke mme n̄wed ererimbot. Mme uwetn̄kpọ oro ẹdọhọde nte ẹdude ke Bible ẹkeme ndikabade ndi ikpîkpu ebe ke nsio nsio usụn̄ oro ẹbọpde ikọ ke mme uwetn̄kpọ Hebrew.—4/1, page 30, 31.