Nte Afo Omotoro Idemfo ọnọ Mbon En̄wen?

‘Se mbon en̄wen ẹkerede ibeheke mi!’ Ke ini iyatesịt m̀mê edikpu, afo emekeme nditịn̄ n̄kpọsọn̄ ikọ ẹmi. Edi ke ndondo oro ibụmede iyatesịt oro osụhọrede, esịt ekeme nditịmede fi. Ntak-a? Koro ata ediwak nnyịn imenen̄ede ikere iban̄a se mbon en̄wen ẹkerede ẹban̄a nnyịn.

KE AKPANIKỌ, nnyịn ikpenyene ndikere mban̄a ekikere mbon efen. Ana nnyịn, akpan akpan nte mme Christian asan̄autom Jehovah Abasi oro ẹma ẹkedori ubọk, ikere nte odotde iban̄a nte mbon en̄wen ẹsede nnyịn. Kamse, nnyịn idi “n̄kpọ ndise inọ ererimbot.” (1 Corinth 4:9) Ke 2 Corinth 6:3, 4, nnyịn imokụt eti item apostle Paul: “Nnyịn inịmke ubiọn̄ọ baba kiet ke afan̄ mbufo, mbak owo editịn̄ n̄kpọ abiat utom eke inamde: edi ke kpukpru usụn̄ imowụt ite idi ata mme asan̄autom Abasi.”

Nte ededi, nso ke nditoro idem nnyịn nnọ mbon en̄wen ọwọrọ? Ndi ọwọrọ ndimenede idem nnyịn ke enyọn̄ m̀mê ndidụri ntịn̄enyịn nnọ idem nnyịn ye mme ukeme nnyịn nte mîdotke? Baba. Edi enye ọwọrọ ndinam mme ikọ 1 Peter 2:12: “Ẹkama idem nte odotde ke iso mme Gentile, man . . . mmọ ẹkpeda nti ido mbufo, ẹmi ẹdikụtde ke ini eke ẹdide ndidomo mbufo nse, ẹnọ Abasi ubọn̄.” Mme Christian ẹtoro idemmọ ebe ke ndiyak ido mmọ etịn̄ ikọ ke idemesie! Ke akpatre, emi ada itoro ọsọk Abasi, idịghe nnyịn. Nte ededi, nnyịn nditoro idem nnyịn nnọ mbon en̄wen ekeme ndinyene mme ọkpọkpọ ufọn n̄ko. Ẹyak nnyịn idụn̄ọde ikpehe ita oro emi ekemede ndidi ntre ye afo.

Nte Nsan̄a Ndọ Ini Iso

Da n̄kpọ aban̄ade ndọ ke uwụtn̄kpọ. Enye edi enọ emi otode Jehovah Abasi, enye emi  “ẹsiode kpukpru ubon ke enyọn̄ ye ke isọn̄ enyịn̄ ke Enye.” (Ephesus 3:14) Ekeme ndidi afo emenyene udọn̄ ndidọ ndọ ke ini iso. Ke edide ntre, adan̄a didie ke afo otoro idemfo nte nsan̄a ndọ ini iso? Ih, nso enyịn̄ ke afo anam ọnọ idemfo nte Christian eren m̀mê n̄wan oro mîdọhọ ndọ?

Ke ndusụk idụt emi edi n̄kpọ oro ubon ẹnen̄erede ẹkere ẹban̄a. Ke uwụtn̄kpọ, ke Ghana, ke ini owo iba ẹduakde ndidọ kiet eken, edi ido edinam eren ye n̄wan oro ẹduakde ndidọ ndọ ndisian mme ete ye eka mmọ. Ekem mme ete ye eka ẹmi ẹyesian mbon eken ke ubon. Do ubon eren oro ọyọtọn̄ọ ndidụn̄ọde etop emi n̄wan oro ọwọrọde ke n̄kann̄kụk. Ke ini ete ye eka ẹkụtde ẹte ke n̄wan oro odot, mmọ ẹyesian ubon eyenan̄wan oro ẹban̄a uduak eyeneren mmọ ndidọ eyenan̄wan oro. Ke emi ubon eyenan̄wan oro oyodụn̄ọde etop emi eren oro ọwọrọde mbemiso ẹnyịmede ndọ oro. Ntem n̄ke Ghana kiet ọdọhọ ete: “Bụp mbon oro ẹkpenyenede ifiọk ẹban̄a nsan̄a ndọ fo mbemiso odụkde ndọ.”

Nso kaban̄a mme idụt N̄kan̄ Edem Usoputịn, emi nte ido edide ẹsiyakde mme owo ẹmek mme nsan̄a ndọ mmọ? Idem ke n̄kan̄ oro, Christian eren m̀mê n̄wan oro ọkọride esịm ọyọhọ idaha oyowụt ọniọn̄ ndiyom itoro oro edide akpanikọ nto mbon oro ẹtịmde ẹfiọk owo oro enye aduakde ndidọ, utọ nte ete ye eka m̀mê mme ufan oro ẹkọride ẹsịm ọyọhọ idaha. Nte n̄wed oro Ukpọhọde Inemesịt Ubon ọdọhọde, eyenan̄wan ekeme ndibụp: “‘Nso orụk etop ke eren emi enyene? Mmanie ẹdi ufan esie? Nte enye enyene mfara ke idem? Enye esinam n̄kpọ didie ye mbonusọn̄? Nso orụk ubon ke enye oto? Enye esinam n̄kpọ didie ye mmọ? Nso idi edu esie kaban̄a okụk? Nte enye esida ọkpọsọn̄ mmịn ke idiọk usụn̄? Ndi enye esisọp ayat esịt, idem ọduọde obom? Nso mbiomo ke enye enyene ke esop, ndien enye ese aban̄a mmọ didie? Nte ami mmekeme ndinyene ntotụn̄ọ ukpono nnọ enye?’—Leviticus 19:32; Mme N̄ke 22:29; 31:23; Ephesus 5:3-5, 33; 1 Timothy 5:8; 6:10; Titus 2:6, 7.” *

Kpasụk ntre erenowo oyoyom ndinam ndụn̄ọde mban̄a Christian an̄wan ekededi oro enye ekerede ndidọ. Nte Bible ọdọhọde, Boaz ama enyene utọ udọn̄ oro ke idem Ruth, n̄wan oro enye ọkọdọde ke ukperedem. Ke ini Ruth okobụpde: “Nsinam afo enende iso ye ami, emi afo ọdiọn̄ọde mi emi ami ndide esen owo?” Boaz ọkọdọhọ ete: “Ẹma ẹtịm ẹdọhọ mi kpukpru se afo akanamde.” (Ruth 2:10-12) Ih, ikokụreke ke Boaz ke idemesie ndikụt nte ke Ruth ekedi n̄wan emi anamde akpanikọ, esịnde idem ke utoṃ, onyụn̄ anamde utom ọkpọsọn̄, edi enye n̄ko ama okop nti ikọ oto mbon efen.

Ukem ntre, ido fo eyenyene n̄kpọ ndinam ye mbon efen ndise fi nte nsan̄a ndọ oro odotde. Didie ke afo otoro idemfo ọnọ mbon en̄wen ke afan̄ emi nte enende?

Nte Anamutom

Itieutom edi ebiet efen emi edimụm eti ido n̄kama ekemede ndinyene ufọn nnọ fi. Ọkpọsọn̄ ndomoidem ekeme ndidu kaban̄a utom. Ẹsiwak ndibịn mbonutom ẹmi ẹdiọn̄ọde nte  mbon nsọn̄ibuot, ẹwakde ndika utom ke idiọk ini, mînyụn̄ inamke akpanikọ. Mme usiakifia ẹkeme n̄ko ndidọhọ mme anamutom oro ẹnyenede mbufiọk ẹtre utom man ẹsụhọde ubiatokụk. Ke ini mbon oro mînyeneke utom ẹyomde mbufa utom, mmọ ẹkeme ndikụt nte ke mme usiakifia ẹyedụn̄ọde ye n̄kani eteutom mmọ man ẹfiọk ido, edu, ye ifiọkutom mmọ. Ediwak Christian ẹkụt unen ke nditoro idemmọ nnọ mme eteutom ebe ke edu ukpono mmọ, usịnen̄kpọ oro owụtde iso o-bụt, eti ukamaidem, ye mme n̄wọrọnda edu Christian.

Edinam akpanikọ edi utọ edu oro—kpa enye oro ediwak eteutom ẹdade ke ebeiso n̄kpọ. Ukem nte apostle Paul, nnyịn iyom ‘ndinyene esịt eke mîbiomke nnyịn ke baba n̄kpọ kiet.’ (Mme Hebrew 13:18) Ẹma ẹtọt ẹban̄a uyịp n̄kpọ ke usiakifia udọk isọn̄ nyom n̄kpọuto kiet ke Ghana. Eseutom ke ikpehe kiet esede aban̄a udomutịm, edide Ntiense, ama aka iso ke utom esie ke adan̄aemi ẹkebịnde mbon eken. Ntak-a? Mme akamautom ẹma ẹkụt edinam akpanikọ esie ke ediwak isua. Ẹma ẹtịm ẹfiọk ọkpọsọn̄ utom esie ye edikpono mme akama-itie n̄ko. Ih, eti ido esie ikayakke enye ataba utom esie!

Nso idi mme n̄kpọ efen ẹmi Christian ekemede ndinam man otoro idemesie ke itieutom? Kpep ndisịn usọ ke utom ekededi emi ẹnọde fi. (Mme N̄ke 22:29) Nam utom ifịk ifịk ye ke ofụri esịt. (Mme N̄ke 10:4; 13:4) Nọ eteutom ye eseutom fo ukpono. (Ephesus 6:5) Edika utom ke ini, edinam akpanikọ, edinam n̄kọri, ye ọkpọsọn̄ utom ẹdi mme edu oro mme eteutom ẹmade, ndien mme edu oro ẹkeme ndin̄wam fi enyene utom idem ke ini utom ẹnanade.

Mme Ifetutom ke Esop

Ẹyom irenowo oro ẹkọride ẹsịm ọyọhọ idaha man ẹnọ ndausụn̄ ke esop Christian idahaemi akan nte akanam edide. Ntak-a? Isaiah eketịn̄ ntịn̄nnịm ikọ ete: “N̄wan̄ade ebiet tent fo, yak mmọ ẹnyụn̄ ẹnen̄ede ikpehe idụn̄ fo ẹkọn̄.” (Isaiah 54:2) Ke edisu ntịn̄nnịm ikọ emi, esop Jehovah eke ofụri ererimbot ke aka iso ndikọri.

Ntre edieke afo edide Christian eren, didie ke afo ekeme nditoro idemfo nte kiet emi odotde ndinam utom ke ifetutom oro ẹmekde-mek owo? Kere ban̄a uwụtn̄kpọ akparawa Timothy. Luke obụk ete ke ‘nditọete ẹmi ẹdude ke Lystra ye Iconium ẹma ẹbụk eti mbụk ẹban̄a Timothy.’ Ih, ebede ke eti edu esie, akparawa emi ama otoro idemesie ọnọ mbon en̄wen ke nsio nsio obio iba. Ke ntre Paul ama okot Timothy ndisan̄a ye enye ke utom ukwọrọikọ emi ẹsan̄ade-san̄a.—Utom 16:1-4.

Didie ke erenowo ekeme ‘ndinyanade mbịne itieutom esenyịn’ (NW) mfịn ke usụn̄ oro odotde onyụn̄ owụtde mbak Abasi? Ke akpanikọ idịghe ke ndibịn ikọt nyom edimek edi ebe ke ndikọri mme edu eke spirit oro ẹyomde kaban̄a mme utọ mbiomo oro. (1 Timothy 3:1-10, 12, 13; Titus 1:5-9) Enye ekeme n̄ko ndiwụt ke imọ ‘imoyom ndinam eti utom’ ebe ke ndibuana ọyọhọ ọyọhọ ke utom ukwọrọikọ ye edinam mbet. (Matthew 24:14; 28:19, 20) Mbon oro ẹtorode idemmọ nte Christian iren oro ẹkemede ndibiom mbiomo ẹnyene udọn̄ esịt akpanikọ ke mfọnọn̄kpọ nditọete mmọ eke spirit. Mmọ ẹtiene item apostle Paul emi: “Ẹnọ ikọt Abasi se inanade mmọ; ẹbịne ndikama isen owo.” (Rome 12:13) Ebede ke ndinam mme utọ n̄kpọ oro, Christian eren ekeme ndinen̄ede ‘ntoro idemesie nte asan̄autom Abasi.’

Kpukpru Ini

Nditoro idem nnyịn nnọ mbon en̄wen iwọrọke nditie n̄kari n̄kari m̀mê ndikabade ndi mme anam “utom enyịn owo.” (Ephesus 6:6) Ke ofụri ofụri, enye ọwọrọ nditoro idem nnyịn nnọ Andibot nnyịn, Jehovah Abasi, ebe ke ndinịm mbet ye mme edumbet esie ke ofụri esịt nnyịn. Edieke afo ọkọride idaha eke spirit fo onyụn̄ ọsọn̄ọde itie ebuana fo ye Jehovah Abasi, mbon en̄wen ẹyekụt n̄kọri ke usụn̄ oro afo anamde n̄kpọ ye mme andibuana ke ubon fo, mme nsan̄autom, ye mme ekemmọ Christian. Mmọ ẹyekụt n̄ko nsọn̄ọnda fo ye edida ukem ukem fo, eti ubiere fo, ukeme fo ndibiom mbiomo, ye nsụhọdeidem fo. Emi ayanam mmọ ẹma ẹnyụn̄ ẹkpono fi ndien, ke edide akpan n̄kpọ akan, afo eyenyene unyịme Jehovah Abasi ke ntak emi afo otorode idemfo ọnọ mbon en̄wen!

[Mme Ikọ idakisọn̄]

[Ndise ke page 19]

Ediwak ete ye eka ẹsida ọniọn̄ ẹbụp ẹban̄a etop oro owo emi eyen mmọ oyomde ndidọ enyenede

[Ndise ke page 20]

Eyenete eren otoro idemesie ọnọ mme ifetutom ebe ke ndikere mban̄a mbon en̄wen