Obufa Ererimbot—Nte Afo Oyodu Do?

“Baba eti n̄kpọ kiet idụhe mmọ ke esịt, ke mîbọhọke owo ndidat esịt, nnyụn̄ nnam se ifọnde ke uwem esie. Ndien n̄ko ama edi kpukpru owo eke ẹdiade n̄kpọ ẹnyụn̄ ẹn̄wọn̄de, ẹnyụn̄ ẹkụtde eti n̄kpọ ke kpukpru ọkpọsọn̄ utom mmọ, emi onyụn̄ edi enọ Abasi.”—ECCLESIASTES 3:12, 13.

1. Ntak emi nnyịn ikemede ndinyene idotenyịn mban̄a ini iso?

 EDIWAK owo ẹda Ata Ọkpọsọn̄ Abasi nte ọkpọsọn̄ ye owo nsọn̄ido. Edi, se idude ke enyọn̄ emi edi akpanikọ oro afo edikụtde ke Ikọ esie eke odudu spirit. Emi odu ke n̄kemuyo ye enye ndidi “Abasi inemesịt” (NW) ye enye ndisịn akpa ete ye eka nnyịn ke paradise isọn̄. (1 Timothy 1:11; Genesis 2:7-9) Ke ini iyomde ikike ndifiọk ini iso oro Abasi ọn̄wọn̄ọde ọnọ ikọt esie, idem ikpakpaha nnyịn ndikpep mban̄a mme idaha oro edidade nsinsi uyụhọ edi.

2. Nso idi ndusụk n̄kpọ oro afo odoride enyịn aban̄a?

² Ke ibuotikọ oro ekebemde iso, nnyịn ima idụn̄ọde ita ke otu itie inan̄ oro Bible ebemde iso etịn̄ aban̄a “mbufa enyọn̄ ye obufa isọn̄.” (Isaiah 65:17) Ẹwet kiet ke otu ntịn̄nnịm ikọ oro ẹkemede ndiberi edem do ke Ediyarade 21:1. Mme ufan̄ikọ oro ẹtienede ẹtịn̄ ẹban̄a ini oro Ata Ọkpọsọn̄ Abasi edikpụhọde idaha eke isọn̄ usọp usọp man ọfọn. Enye ọyọkwọhọde mmọn̄eyet mfụhọ nnyịn. Mme owo idikpaha aba ke ntak usọn̄, udọn̄ọ, m̀mê mbabuat n̄kpọntịbe. Eseme, ntuan̄a, ye ubiak ẹyebe ẹfep. Nso inem inem idotenyịn ke emi edi ntem! Edi  nte nnyịn imekeme ndinịm nte ke enye eyedi, ndien nso odudu ke idotenyịn oro ekeme ndinyene nnọ nnyịn idahaemi?

Mme Ntak Ndinyene Mbuọtidem

3. Ntak emi nnyịn ikemede ndiberi edem ke mme un̄wọn̄ọ Bible kaban̄a ini iso?

³ Tịm fiọk nte Ediyarade 21:5 akade iso ndibụk. Enye okot oto Abasi, emi etiede ke ebekpo esie eke heaven, nte ọdọhọde ete: “Sese, mmanam kpukpru n̄kpọ ẹdi mbufa.” Un̄wọn̄ọ Abasi oro ọfọn akan en̄wọn̄ọ ukaraidem idụt ekededi, mme unen eyomfịn ekededi, m̀mê se ededi oro owo aduakde aban̄a ini iso. Enye edi en̄wọn̄ọ oro ẹkemede ndiberi edem ofụri ofụri emi otode Enye Emi Bible ọdọhọde nte “mîkemeke ndisu nsu.” (Titus 1:2) Nte an̄wan̄ade, afo emekeme ndikere ke nnyịn ikpetre mi, idarade akama-inemesịt idotenyịn emi inyụn̄ iberide edem ke Abasi. Edi iyomke nnyịn itre mi. Ediwak n̄kpọ ẹdu ẹnọ nnyịn ndikpep mban̄a ini iso.

4, 5. Ewe mme ntịn̄nnịm ikọ Bible oro nnyịn ima ikeneneme ẹkeme ndisọn̄ọ mbuọtidem nnyịn kaban̄a se inade ke iso?

⁴ Kere ban̄a se ibuotikọ oro ekebemde iso eketịn̄de aban̄a mme un̄wọn̄ọ Bible kaban̄a mbufa enyọn̄ ye obufa isọn̄. Isaiah ama ebem iso etịn̄ aban̄a utọ obufa ndutịm oro, ndien ntịn̄nnịm ikọ esie ama enyene edisu ke ini mme Jew ẹkenyọn̄ọde ẹka obio emana mmọ ẹnyụn̄ ẹkefiak ẹwụk utuakibuot akpanikọ. (Ezra 1:1-3; 2:1, 2; 3:12, 13) Edi, nte oro ekedi ofụri se ntịn̄nnịm ikọ Isaiah akanyande ubọk owụt? Ke akpanikọ idịghe! Mme n̄kpọ ẹmi enye ekebemde iso etịn̄ ẹyesu n̄ko ke akamba udomo ke anyan ini ke iso. Ntak emi nnyịn isịmde utọ ubiere oro? Ke ntak se nnyịn ikotde ke 2 Peter 3:13 ye Ediyarade 21:1-5. Mme ufan̄ikọ oro ẹnyan ubọk ẹwụt obufa enyọn̄ ye obufa isọn̄ oro ẹdidade ufọn isọk mme Christian ke ofụri ekondo.

⁵ Nte ẹketịn̄de ke mbemiso, Bible ada ubak udịmikọ oro “mbufa enyọn̄ ye obufa isọn̄” utịm ikanan̄. Nnyịn imeneme iban̄a itie ita ke otu ẹmi imonyụn̄ isịm mme ubiere oro ẹkamade nsịnudọn̄. Bible ebem iso etịn̄ in̄wan̄în̄wan̄ ete ke Abasi oyosio idiọkido ye mme ntak ndutụhọ eken efep ye nte ke enye ayaka iso ọdiọn̄ ubonowo ke obufa editịm n̄kpọ emi enye ọn̄wọn̄ọde.

6. Nso ke ọyọhọ ntịn̄nnịm ikọ inan̄ emi etịn̄de aban̄a “mbufa enyọn̄ ye obufa isọn̄” ebem iso etịn̄ aban̄a?

⁶ Ẹyak nnyịn idahaemi idụn̄ọde ikọ kiet oro osụhọde kaban̄a “mbufa enyọn̄ ye obufa isọn̄,” ke Isaiah 66:22-24: “Kpa nte mbufa enyọn̄ ye obufa isọn̄, ẹmi ndinamde, ẹdade ke iso mi kpa ntre ke nditọ mbufo ye enyịn̄ mbufo ẹdida: emi edi uyo Jehovah. Ndien ama ekem, ke kpukpru ọfiọn̄, ye kpukpru sabbath, kpukpru obụkidem ẹyedi ẹdituak ibuot ke iso mi; uyo Jehovah edi emi. Ndien mmọ ẹyewọn̄ọ, ẹkese okpo mmọ ẹmi ẹkesọn̄de ibuot ye ami: koro ndọn̄ mmọ mîdikpaha, ikan̄ mmọ mîdinyụn̄ inịmeke; ndien mmọ ẹyedoro kpukpru obụkidem ndidien.”

7. Ntak emi nnyịn ikpekemede ndibiere nte ke Isaiah 66:22-24 oyosu ke ini iso?

⁷ Ntịn̄nnịm ikọ emi ama enyene ebuana ye edifiak n̄wụk mme Jew ke isọn̄ mmọ, edi edisu efen oyodu. Akana oro etịbe ediwak isua ke ẹma ẹkewet udiana leta Peter ye n̄wed Ediyarade, koro mmọ ẹnyande ubọk ẹwụt ‘obufa enyọn̄ ye obufa isọn̄.’ Nnyịn imekeme ndidori enyịn ndikụt akwa ye ọyọhọ edisu ke obufa editịm n̄kpọ. Kere ban̄a ndusụk mme idaha oro nnyịn ikemede ndidori enyịn ndidara.

8, 9. (a) Nso usụn̄ ifiọk ke ikọt Abasi ‘ẹdika iso ẹda’? (b) Nso ke ntịn̄nnịm ikọ oro nte ke mme asan̄autom Jehovah ẹyetuak ibuot “ke kpukpru ọfiọn̄, ye kpukpru sabbath” ọwọrọ?

⁸ Ediyarade 21:4 owụt nte ke n̄kpa ididụhe aba. Ubak udịmikọ oro ke Isaiah ibuot 66 enyịme ye oro. Nnyịn imekeme ndikụt ke Isa 66 ufan̄ikọ 22 nte ke Jehovah ọfiọk ete ke obufa enyọn̄ ye obufa isọn̄ ididịghe ke ekpri ibio ini. N̄ko-n̄ko, ikọt esie ẹyedu ẹbịghi; mmọ ‘ẹyeka iso ẹda ke iso’ esie. Se Abasi ama akananam ọnọ ndimek ikọt esie ọnọ nnyịn ntak ndinyene mbuọtidem. Mme Christian akpanikọ ẹmesobo ibak ibak ukọbọ, idem ẹsobode ukwan̄ ifiopesịt oro ẹsịnde ndisobo mmọ mfep. (John 16:2; Utom 8:1) Kpa ye oro, idem  ata n̄kpọsọn̄ asua ikọt Abasi, utọ nte Akwa Edidem Nero eke Rome ye Adolf Hitler, ikekemeke ndisọhi mbon oro ẹsọn̄ọde ẹda ye Abasi, ẹmi ẹkerede enyịn̄ esie, mfep. Jehovah emekpeme esop ikọt esie, ndien nnyịn imekeme nditịm nnịm nte ke enye ayanam enye aka iso ada ke nsinsi.

⁹ Ukem ntre, mbon ẹmi ẹnamde akpanikọ ẹnọ Abasi nte ubak obufa isọn̄, kpa n̄ka eke mme ata andituak ibuot ke obufa ererimbot, ẹyeka iso ẹda nte owo kiet kiet koro mmọ ẹyenọ Andibot kpukpru n̄kpọ edisana utuakibuot. Oro ididịghe ke ini ifet odude m̀mê ndinam enye ye unana ndutịm. Ibet Abasi, emi ẹkenọde Israel ebe ke Moses, ama esiyom ndusụk edinam utuakibuot kpukpru ọfiọn̄, etienede obufa ọfiọn̄, ye kpukpru urua, etienede usen Sabbath. (Leviticus 24:5-9; Numbers 10:10; 28:9, 10; 2 Chronicles 2:4) Ntre Isaiah 66:23 anyan ubọk owụt n̄kaiso edituak ibuot nnọ Abasi kpukpru ini, kpukpru urua ye kpukpru ọfiọn̄. Edu unana edinịm edidu Abasi ke akpanikọ ye mbubịk ido ukpono ididụhe adan̄aoro. “Kpukpru obụkidem ẹyedi ẹdituak ibuot ke iso” Jehovah.

10. Ntak emi afo ekemede ndinyene mbuọtidem nte ke ndiọi owo idibiatke obufa ererimbot ke nsinsi?

¹⁰ Isaiah 66:24 ọnọ nnyịn nsọn̄ọ nte ke emem ye edinen ido eke obufa isọn̄ ididụhe ke itiendịk tutu amama. Ndiọi owo idibiatke enye. Ti ete 2 Peter 3:7 ọdọhọ ete ke se inade nnyịn ke iso edi “usen eke Abasi edikpede ikpe ye mmọ ẹmi mîbakke Enye, edinyụn̄ osobo mmọ.” Mbon oro ẹdisobode ẹdidi mmọ ẹmi mîbakke Abasi. N̄kpọ idinamke mbon ẹmi mîduehe, ke mîbietke se isiwakde nditịbe ke ekọn̄ owo, emi mbio obio ẹmi ẹnọmọde ẹsiwakde ẹkan mbonekọn̄. Akwa Ebiereikpe ọnọ nnyịn nsọn̄ọ ete ke usen imọ edidi nsobo mmọ ẹmi mîbakke Abasi.

11. Nso ke Isaiah owụt nte edidide ini iso owo ekededi oro an̄wanade ye Abasi ye utuakibuot esie?

¹¹ Ndinen owo oro ẹdibọhọde ẹyekụt nte ke ntịn̄nnịm ikọ Abasi edi akpanikọ. Isa 66 Ufan̄ikọ 24 ebem iso etịn̄ ete ke “okpo mmọ ẹmi ẹkesọn̄de ibuot ye” Jehovah ẹdidi uyarade ubiereikpe esie. Ekeme ndidi in̄wan̄în̄wan̄ usem emi Isaiah adade ekeme nditie nte se inamde owo ndịk. Edi, enye odu ke n̄kemuyo ye se idide akpanikọ ke mbụk. Ifụm ye, ke ndusụk ini, okpo mme abiatibet oro ẹkewotde ke ẹma ẹkebiere ke idotke se ẹbụkde ke eti usụn̄ ẹma ẹsidu ke edem ibibene Jerusalem. * Do ke mîbịghike, ndọn̄ ye ikan̄ oro asakde ayata mbio ye mme okpo oro. Nte an̄wan̄ade, uwụtn̄kpọ Isaiah emi  anam akpatre ikpe oro Jehovah ebierede ọnọ mme abiatibet an̄wan̄a.

Se Enye Ọn̄wọn̄ọde

12. Isaiah owụt nso efen efen aban̄a uwem ke obufa ererimbot?

¹² Ediyarade 21:4 asian nnyịn ndusụk n̄kpọ oro mîdidụhe ke obufa editịm n̄kpọ oro edide. Nte ededi, nso ididu adan̄aoro? Uwem editie didie? Nte nnyịn imekeme ndinyene ntọt ekededi emi ẹkemede ndiberi edem? Ih. Isaiah ibuot 65 etịn̄ ke ntịn̄nnịm ikọ aban̄a mme idaha oro nnyịn ididarade edieke inyenede unyịme Jehovah ndidu uwem ke ini enye edibotde mbufa enyọn̄ ye obufa isọn̄ ke akpatre. Mbon oro ẹdinyenede nsinsi itie ke obufa isọn̄ idikọrike isọn̄ inyụn̄ ikpa ke akpatre. Isaiah 65:20 ọnọ nnyịn nsọn̄ọ ete: “Ndien eyen-nsek ke usen, ye mbiowo eke mîyọhọke ini esie, idiwọrọke aba do: koro akparawa ayakpa ke esịmde isua ikie; ndien isụn̄i ayada anam-idiọk ke esịmde isua ikie.”

13. Didie ke Isaiah 65:20 ọnọ nnyịn nsọn̄ọ nte ke ikọt Abasi ẹyenyene ifụre?

¹³ Ke ini emi okosude ke akpa ini ke idem ikọt Isaiah, enye ọkọwọrọ ke nseknditọ ke idụt oro ẹma ẹdu ke ifụre. Mme asua ikodụkke idi nditan̄ nseknditọ m̀mê ndiwot mme owo ke ini nsehe uwem mmọ, nte mbon Babylon ẹkenamde ini kiet ko. (2 Chronicles 36:17, 20) Ke obufa ererimbot oro edide, mme owo ẹyedu ke ifụre, ẹnyene emem, ẹkeme ndidara uwem. Edieke owo edimekde ndisọn̄ ibuot ye Abasi, owo idiyakke enye aka iso odu uwem. Abasi oyosio enye efep. Nso edieke ọsọn̄ibuot anamidiọk oro edide isua ikie? Enye ayakpa ‘nte akparawa’ ke ẹmende ẹdomo ye edinyene anana-utịt uwem.—1 Timothy 1: 19, 20; 2 Timothy 2:16-19.

14, 15. Ọkọn̄ọde ke Isaiah 65:21, 22, nso nti edinam ke afo ekeme ndidori enyịn mban̄a?

¹⁴ Utu ke ndiwụk ntịn̄enyịn ke nte ẹdisiode anamidiọk emi okoide-koi anam idiọk ẹfep, Isaiah obụk mme idaha udu uwem oro ẹdidude ke obufa ererimbot. Domo ndikụt idemfo ke idaha oro. Mme akpa n̄kpọ oro afo edikụtde ke enyịn ikike fo ẹdi mme n̄kpọ oro ẹkperede ufọk. Isaiah etịn̄ aban̄a ẹmi ke Isa 65 ufan̄ikọ 21 ye 22: “Mmọ ẹyebọp ufọk ẹnyụn̄ ẹdụn̄ ke esịt: ẹyenyụn̄ ẹtọ in̄wan̄-vine, ẹnyụn̄ ẹdia mfri mmọ. Mmọ idibọpke, ndien owo en̄wen odụn̄; iditọhọ, ndien owo efen adia: koro usen ikọt mi ẹbietde usen eto, ndien edimek ikọt mi ẹyedia se ubọk mmọ ẹnamde.”

¹⁵ Edieke afo mûnyeneke ifiọk ubọpn̄kpọ kan̄a mûnyụn̄ utọhọ ekpri in̄wan̄, ntịn̄nnịm ikọ Isaiah ọnọ ekikere nte ke ẹyenọ fi ukpep. Nte ededi, nte afo ayama ndikpep ye un̄wam andikpep emi enyenede ukeme, ndusụk eti mbọhọidụn̄ oro edinemde esịt ndin̄wam fi? Isaiah iketịn̄ke m̀mê ufọk fo edinyene mme window ẹmi ẹnyenede ikpehe man afo ekeme ndibọ ofụm n̄kan̄ ufiop isọn̄ m̀mê edinyene window akrasi emi ekemede nditie nse mme ukpụhọde ke mme idaha eyo. Nte afo edibọp ufọk emi ọkọm ọduọde edem mbiba man edịm ye snow  etre ndidụk? Mîdịghe nte idaha eyo n̄kann̄kụk edifọn ye mbatmbat ọkọm ufọk—nte kiet ke otu mbon oro ẹdude ke Ufọt Ufọt Edem Usiahautịn—ọkọm emi afo ye ubon fo ẹdikemede nditie ọtọkiet ndia nti udia nnyụn̄ nneme nneme?—Deuteronomy 22:8; Nehemiah 8:16.

16. Ntak emi afo ekemede ndidori enyịn obufa ererimbot ndinọ uyụhọ ke nsinsi?

¹⁶ Se idide akpan n̄kpọ ikan ndifiọk mme utọ ọyọhọ ntọt oro edi nte ke afo eyenyene ọkpọkpọ ufọkidụn̄. Enye edidi okwo—iditiehe nte mfịn emi afo ekemede ndibọ ufen mbọp ufọk edi ekem owo efen adia ufọn. Isaiah 65:21 ọdọhọ n̄ko ete ke afo ọyọtọ in̄wan̄ onyụn̄ adia mfri. Nte an̄wan̄ade, oro etịn̄ ibio ibio nte idaha editiede ke ofụri ofụri. Afo oyokop ata uyụhọ oto mme ukeme fo, kpa utịp utom fo. Ndien afo eyekeme ndinam oro ke anyan ini uwem—‘nte usen eto.’ Oro ke akpanikọ ekem ye se ẹtịn̄de nte ke “kpukpru n̄kpọ ẹdi mbufa”!—Psalm 92:12-14.

17. Nso un̄wọn̄ọ ke mme ete ye eka ẹdibọ nsịnudọn̄ ito akpan akpan?

¹⁷ Edieke afo edide ete m̀mê eka, mme ikọ emi ẹyetụk fi: “Mmọ idinamke utom ke ikpîkpu, idinyụn̄ imanke nditọ inọ n̄kpọ ndịk: koro mmọ ye ubon mmọ n̄ko ẹdide nditọ mmọ eke Jehovah ọdiọn̄de. Ndien ama ekem, ke mmọ mîka-ikotke kan̄a, ami nyeyere: ke mmọ ẹsụk ẹdọhọde ikọ, ami nyokop.” (Isaiah 65:23, 24) Nte afo emenyene mbufiọk aban̄a ubiak ‘ediman nditọ nnọ n̄kpọndịk’? Iyomke nnyịn isiak mme udịm udịm mfịna oro nditọwọn̄ ẹkemede ndinyene ẹmi ẹtịmerede mme ete ye eka ye mbon en̄wen esịt. Ke enyenede ebuana ye oro, kpukpru nnyịn imesikụt mme ete ye eka ẹmi ẹnọde mme ubọkọkọ, mme edinam, ye unọ idem inemesịt idemmọ ntịn̄enyịn tutu mmọ ẹdinyene esisịt ini ndibiat ye nditọ mmọ. Ke okpụhọrede ye oro, Jehovah ọn̄wọn̄ọ ọnọ nnyịn ete ke imọ iyokop inyụn̄ inam n̄kpọ iban̄a mme udọn̄ nnyịn idem ibemde iso ikere iban̄a mmọ.

18. Ntak emi afo ekemede ndidori enyịn ndidara mme unam ke obufa ererimbot?

¹⁸ Ke adan̄aemi afo ekerede aban̄a se afo ekemede ndidara ke obufa ererimbot, nyene idaha oro ntịn̄nnịm ikọ Abasi owụtde ke ekikere: “Wolf ye eyen-erọn̄ ẹyedia n̄kpọ ọtọ kiet, lion oyonyụn̄ ata nnyanyan̄a nte enan̄: ndien ama edi urụkikọt, ntan eyedi udia esie. Owo idinamke idiọk, idinyụn̄ ibiatke n̄kpọ ke ofụri edisana obot mi: uyo Jehovah edi emi.” (Isaiah 65:25) Mme ewet-ndise ẹdide owo ẹmedomo ndiwet ndise oro, edi emi idịghe ikpîkpu utom usọ emi mme ewet-ndise ẹwetde ke ntak uyai kpọt. Emi edidi ata idem n̄kpọ. Emem oyodu ke otu mme owo, ndien emi ayasan̄a ekekem ye emem emi edidude ye mme unam. Ediwak mme ekpepn̄kpọ mban̄a mme odu-uwem  n̄kpọ ye mme ama unam ẹbiat n̄wakn̄kan isua uwem mmọ ndikpep n̄kpọ mban̄a orụk unam ifan̄ m̀mê uduot kiet kpọt. Ke edide isio, kere se afo edikemede ndikpep ke ini ndịk owo mînamke mme unam aba. Adan̄aoro afo eyekeme ndisan̄a n̄kpere idem mme inuen ye n̄kpri edibotn̄kpọ ẹmi itieidụn̄ mmọ edide ke akai—ih, ese, ẹkpep n̄kpọ oto, onyụn̄ adara ndidu ye mmọ. (Job 12:7-9) Afo eyekeme ndinam oro ifụre ifụre, ye unana ndịk owo m̀mê unam. Jehovah ọdọhọ ete: “Mmọ idinamke idiọk, idinyụn̄ ibiatke n̄kpọ ke ofụri edisana obot mi.” Nso ukpụhọde ke emi edidi ntem ye se nnyịn ikụtde inyụn̄ isobode mfịn!

19, 20. Ntak emi ikọt Abasi ẹdide ata isio ye ata ediwak owo mfịn?

¹⁹ Nte iketịn̄de ke mbemiso, mme owo ikemeke ndibem iso ntịn̄ ini iso nnennen nnennen, kpa ye ntatara udọn̄ oro ẹnyenede ẹban̄a obufa tọsịn isua. Oro anam ediwak owo ẹkụt edikpu, ndutịme, mîdịghe ẹduọk idotenyịn. Peter Emberley, adausụn̄ ke ufọkn̄wed ntaifiọk kiet ke Canada, ekewet ete: “Ediwak [ikpọ owo] ke ẹsobo akpan mbụme eke uwem ke akpatre. Anie ke ami ndi? Nso ke ami nnen̄ede mbịne? Nso idi n̄kpọ-akpa emi n̄kpọn̄de nnọ emana efen? Mmọ ke ẹn̄wana ke ufọt ufọt isua uwem ndinam uwem enyene ifụre onyụn̄ enyene se ọwọrọde.”

²⁰ Afo emekeme ndifiọk ntak emi oro edide ntre ye ediwak owo. Mmọ ẹkeme ndiyom ndidara uwem ebe ke mme edinam ini nduọkodudu m̀mê orụk unọ idem nduọkodudu oro aduaide owo idem. Edi, mmọ ifiọkke se ini iso akamade, ntre uwem ekeme ndinana ufọn, ifụre, ye se enye enen̄erede ọwọrọ. Idahaemi da oro domo ye ekikere fo kaban̄a uwem, ke ekerede aban̄a se nnyịn ima ikeneneme. Afo ọmọfiọk ete ke mbufa enyọn̄ ye obufa isọn̄ ẹmi Jehovah ọn̄wọn̄ọde, nnyịn iyekeme ndise n̄kanade inyụn̄ idọhọ ke esịt nnyịn ite, ‘Ke akpanikọ, Abasi amanam kpukpru n̄kpọ ẹdi mbufa!’ Nnyịn ididara oro didie ntem!

21. Nso ọsọ n̄kpọ ke nnyịn ikụt ke Isaiah 65:25 ye Isaiah 11:9?

²¹ Idịghe ntan̄idem ndikere nte idụn̄de ke obufa ererimbot Abasi. Enye ọnọ ikot, idem etemede nnyịn, ndituak ibuot nnọ enye ke akpanikọ idahaemi man idot ndidu uwem ke ini ‘owo mînamke idiọk mîdinyụn̄ ibiatke n̄kpọ ke ofụri edisana obot esie.’ (Isaiah 65:25) Nte ededi, nte afo ama ọfiọk ete ke Isaiah ama ebem iso etịn̄ ukem ikọ oro ye nte ke enye esịn n̄kpọ emi edide akpan n̄kpọ ke nnyịn ndidara uwem ke obufa ererimbot? Isaiah 11:9 ọdọhọ ete: “Mmọ idinamke idiọk, idinyụn̄ ibiatke n̄kpọ ke ofụri edisana obot mi: koro ifiọk Jehovah ọyọyọhọ ke ererimbot, kpa nte mmọn̄ ofụkde inyan̄.”

22. Nso ke nnyịn ndineme ntịn̄nnịm ikọ inan̄ eke Bible ẹkpesọn̄ọ ubiere nnyịn ndinam?

²² “Ifiọk Jehovah.” Ke ini Abasi edinamde kpukpru n̄kpọ ẹdi mbufa, mme andidụn̄ isọn̄ ẹyenyene nnennen ifiọk ẹban̄a enye ye uduak esie. Oro eyesịne se iwakde ikan ndikpep n̄kpọ nto edibotn̄kpọ ẹdide unam. Emi abuana Ikọ esie eke odudu spirit. Ke uwụtn̄kpọ, kere ban̄a se nnyịn ikụtde ito ndidụn̄ọde sụk mme ntịn̄nnịm ikọ inan̄ oro ẹtịn̄de ẹban̄a “mbufa enyọn̄ ye obufa isọn̄.” (Isaiah 65:17; 66:22; 2 Peter 3:13; Ediyarade 21:1) Afo emenyene eti ntak ndikot Bible ke usen ke usen. Nte oro edi se afo esinamde kpukpru ini? Edieke mîdịghe, mme ukpụhọde ewe ke afo ekeme ndinam man afo okpokot ndusụk se Abasi etịn̄de ke usen kiet kiet? Afo oyokụt ete ke adianade ye ndidori enyịn ndidara obufa ererimbot, afo ọyọbọ idatesịt oro okponde idahaemi, kpa nte andiwet psalm ọkọbọde.—Psalm 1:1, 2.

[Mme Ikọ idakisọn̄]

Didie ke Afo Ọkpọbọrọ?

• Ntak emi nnyịn ikemede ndibiere nte ke Isaiah 66:22-24 ekebem iso etịn̄ se idude ke ini iso?

• Nso akpan akpan ke afo odori enyịn aban̄a ke otu mme n̄kpọ oro ẹtịn̄de ke ntịn̄nnịm ikọ ke Isaiah 66:22-24 ye Isaiah 65:20-25?

• Nso ntak ke afo enyene ndinyene idotenyịn mban̄a ini iso?

[Mme Mbụme Ukpepn̄kpọ]

[Mme ndise ke page 15]

Isaiah, Peter, ye John ẹma ẹbem iso etịn̄ ẹban̄a mme ikpehe “mbufa enyọn̄ ye obufa isọn̄”