Jehovah Okpon Akan Esịt Nnyịn

“MMỌ eke ẹbakde Jehovah . . . ẹnem enye esịt,” ntem ke andiwet psalm ekewet. Ke akpanikọ, Andibot adat esịt ndikụt nte kpukpru asan̄autom esie ẹdide owo ẹsịnde ukeme ndimụm ndinen idaha esie n̄kama. Abasi ọdiọn̄ mme anam-akpanikọ ikọt esie, esịn udọn̄ ọnọ mmọ, onyụn̄ ọdọn̄ mmọ esịt ke mme ini unana idotenyịn. Enye ọdiọn̄ọ ete ke mme andituak ibuot nnọ imọ ẹdi mme anana-mfọnmma owo, ntre se enye oyomde oto mmọ edi ata idem n̄kpọ.—Psalm 147:11.

Ekeme ndidi ididịghe ọkpọsọn̄ n̄kpọ inọ nnyịn ndinịm ke akpanikọ nte ke Jehovah enyene akwa ima ọnọ mme asan̄autom esie ke ofụri ofụri. Nte ededi, etie nte ndusụk owo ẹsinen̄ede ẹkere ẹban̄a mme ndudue mmọ tutu mmọ ẹnịm ke akpanikọ ẹte ke Jehovah ikemeke-keme ndima mmimọ. Mmọ ẹkeme ndisịm ubiere ẹte: “Ami mmenen̄ede ndiọk n̄kan se Jehovah amade.” Edi akpanikọ, kpukpru nnyịn imesinyene mme etikwo etikwo ekikere ke ini ke ini. Edi etie nte ndusụk owo ẹsin̄wana kpukpru ini ye ekikere unana ediwọrọ n̄kpọ.

Mfụhọ Mfụhọ Ekikere

Ke mme ini Bible ndusụk mbon oro ẹkenamde akpanikọ ẹma ẹsikop ọkpọsọn̄ mfụhọ. Job ama  asua uwem esie onyụn̄ ekere ke Abasi ama ọkpọn̄ imọ. Hannah, oro akakabarede edi eka Samuel, ini kiet okodu ke ọkpọsọn̄ mfụhọ kaban̄a itie unana eyen onyụn̄ atua eyet etieti. David ama ‘ofụhọ eti-eti,’ ndien Epaphroditus ama okop editịmede esịt koro etop udọn̄ọ esie akanamde nditọete esie ẹfụhọ.—Psalm 38:6; 1 Samuel 1:7, 10; Job 29:2, 4, 5; Philippi 2:25, 26.

Nso kaban̄a mme Christian mfịn? Eyedi udọn̄ọ, usọn̄, m̀mê mme ọkpọkpọ idaha eken ẹbiọn̄ọ ndusụk owo ndinam ekese nte mmọ ẹkpemade ndinam ke edisana utom. Emi ekeme ndinam mmọ ẹsịm ubiere nte ke mmimọ imokpu Jehovah ye mme ekemmọ andinịm ke akpanikọ. Mîdịghe ndusụk owo ẹkeme ndiduọhọ idemmọ kpukpru ini ke ntak mme ndudue oro mmọ ẹkenamde ke ini edem, ẹyịkde m̀mê Jehovah efen ọnọ mmimọ. Eyedi mbon efen oro ẹtode ubon oro etiede mfịna mfịna ẹnịm ke akpanikọ ke mmimọ ikam idotke-dot se ẹkpemade. Didie ke emi ekeme nditịbe?

Ndusụk owo ẹkọri ẹwọrọ owo ke ubon oro ima mîdịghe n̄wọrọnda edu edi ibụk, ikọ isụn̄i, ye ndịk ẹdide. Ekeme ndidi akananam mmọ ifiọkke nte etiede ndinyene ete oro enen̄erede ama mmọ, emi oyomde mme ifet nditoro nnyụn̄ nnọ nsịnudọn̄, oro ofụmide n̄kpri ndudue onyụn̄ eben̄ede idem ndifen idem ata ikpọ ndudue, oro ima esie onyụn̄ anamde ofụri ubon enyene ifụre. Sia akanam mmọ mînyeneke ima ima ete eke isọn̄, ekeme ndidi ọkpọsọn̄ n̄kpọ nnọ mmọ ndifiọk se ndinyene ima ima Ete eke heaven ọwọrọde.

Ke uwụtn̄kpọ, Fritz ewet ete: “Edu unana ima ete mi ama enen̄ede otụk mi ke ini n̄kedide ekpri eyenọwọn̄ ye ke ini uyen mi. * Akananam enye ikotoroke mi, ndien ami n̄kadianake enye idem. Ke akpanikọ, ekese ini, n̄kesifefehe enye.” Nte utịp, Fritz, emi odude ke iduọk isua 50 idahaemi, osụk ekekere ke imọ iwọrọke n̄kpọ. Ndien Margarette anam an̄wan̄a ete: “Ete ye eka mi ikenyeneke esịtmbọm ye ima. Ke ini n̄kọtọn̄ọde ndikpep Bible, ekedi ọkpọsọn̄ n̄kpọ ọnọ mi ndidiọn̄ọ nte enyene-ima ete etiede.”

Se ededi oro edide ntak, mme utọ ekikere oro ẹkeme ndiwọrọ nte ke ndusụk idaha, idịghe ima akpan akpan onụk nnyịn ndinam n̄kpọ Abasi, edi ke akamba udomo edi esịt ubiomikpe m̀mê ndịk onụk. Esitie nte ke mfọnn̄kan ukeme nnyịn ikemke. Udọn̄ ndinem Jehovah ye mme ekemmọ andinịm ke akpanikọ esịt ekeme ndinam nnyịn ikere ke nnyịn ikemeke ndinam kpukpru se iyomde ndinam. Nte utịp, nnyịn imekeme nditre ndisịm utịtmbuba nnyịn, iduọhọ idem nnyịn, inyụn̄ ikop iduọesịt.

Nso ke ikeme ndinam? Eyedi oyom iti idem nnyịn adan̄a nte Jehovah enyenede esịtmbọm. Owo kiet oro ọkọdiọn̄ọde aban̄a ima ima edu Abasi emi ekedi apostle John.

‘Abasi Okpon Akan Esịt Nnyịn’

Ke utịt akpa isua ikie E.N., John ama ewet n̄wed ọnọ ẹsọk mme ekemmọ andinịm ke akpanikọ ete: “Nnyịn iyada emi ifiọk ite nnyịn ida ye akpanikọ, inyụn̄ isọn̄ọ esịt ke iso Esie ke n̄kpọ eke esịt obiomde nnyịn: koro Abasi okponde akan esịt nnyịn, onyụn̄ ọfiọkde kpukpru n̄kpọ.” Ntak emi John ekewetde mme ikọ ẹmi?—1 John 3:19, 20.

John ama ọdiọn̄ọ in̄wan̄în̄wan̄ ete ke esịt ekeme ndibiom asan̄autom Jehovah. Eyedi esịt ama obiom John ke idemesie. Nte akparawa oro ekenyenede ikan̄îkan̄ edu, John ama ọbọ edinen̄ede oto Jesus Christ ke ini ke ini ke enye ndikanam n̄kpọ nsọn̄ido nsọn̄ido ye mbon efen. Ke akpanikọ, Jesus ama ọnọ John ye eyeneka esie James ‘udori enyịn̄, ete, Boanerges, oro edi, Nditọ obuma.’—Mark 3:17; Luke 9:49-56.

Ke isua 60 oro ẹketienede, John ama osụhọde idem onyụn̄ akabade edi Christian oro adade ukem ukem, enyenede ima, ye mbọm. Etisịm ini oro enye, nte akpatre apostle oro okodude ke uwem, ekewetde akpa leta esie eke odudu spirit, enye ama ọfiọk ete ke Jehovah isibiomke mme asan̄autom esie kiet kiet ikpe ke kpukpru n̄kpri ndudue. Utu ke oro, enye edi Ete oro enyenede ima, esịtmbọm, ntatubọk, ye mbọm, emi enyenede ntotụn̄ọ ima ọnọ kpukpru mbon oro ẹmade enye ẹnyụn̄ ẹtuakde ibuot ẹnọ enye ke akpanikọ. John ekewet ete: “Abasi edi ima.”—1 John 4:8.

Jehovah Adat Esịt ke Se Nnyịn Inamde inọ Enye

Abasi ọfiọk mme ndammana mmeme ye ndudue nnyịn, ndien enye esikere aban̄a emi. David ekewet ete: “Koro enye ọfiọkde nte iborode; emeti  ete ke nnyịn idi ntan.” Jehovah ọfiọk nte idaha nnyịn ke uwem etịpde esịn ke nnyịn ndidi se nnyịn idide. Ke akpanikọ, enye ọdiọn̄ọ nnyịn ọfọn akan nte nnyịn idiọn̄ọde idem nnyịn.—Psalm 103:14.

Enye ọfiọk ete ke ediwak nnyịn ikpama ndinam ukpụhọde, edi nnyịn ikemeke ndikan mme unana mfọnmma nnyịn. Ẹkeme ndimen idaha nnyịn ndomo ye eke apostle Paul, emi ekewetde ete: “Nnamke eti n̄kpọ eke ọdọn̄de mi ndinam, edi idiọk-n̄kpọ eke mîdọn̄ke mi ndinam, oro ke nnanam.” Kpukpru nnyịn idu ke ukem en̄wan emi. Ke ndusụk idaha emi ekeme ndisụn̄ọ ke nnyịn ndinyene esịt oro obiomde nnyịn ikpe.—Rome 7:19.

Ẹti emi kpukpru ini: Nte Jehovah esede nnyịn edi akpan n̄kpọ akan nte nnyịn isede idem nnyịn. Ini ekededi emi enye okụtde nte nnyịn isịnde ukeme ndinem enye esịt, enye isikopke uyụhọ kpọt edi n̄ko esikop idatesịt. (Mme N̄ke 27:11) Okposụkedi se nnyịn inamde ekemede nditie nte ekpekpri ke enyịn nnyịn, unyịme ye eti uduakesịt nnyịn adat enye esịt. Enye ese ebe se nnyịn inamde; enye ọfiọk se nnyịn iyomde ndinam; enye ọfiọk mme uduak ye mme udọn̄ nnyịn. Jehovah ekeme ndifiọk esịt nnyịn.—Jeremiah 12:3; 17:10.

Ke uwụtn̄kpọ, ediwak ke otu Mme Ntiense Jehovah ke ndammana usụn̄ ẹdi mbon oro ẹsikopde bụt ẹnyụn̄ ẹtiede idop idop, mbon ẹmi mîmaha ndisio idem nnyan. Ye utọ mbon oro, ndikwọrọ eti mbụk to ke ufọk sịm ufọk ekeme ndidi ata ọkpọsọn̄ n̄kpọ. Edi, ke udọn̄ ndinam n̄kpọ Abasi nnyụn̄ n̄n̄wam mbọhọidụn̄ mmọ onụkde, idem mbon oro ẹkopde bụt ẹsikpep ndika mbịne mme mbọhọidụn̄ mmọ n̄ketịn̄ nnọ mmọ mban̄a Bible. Mmọ ẹkeme ndikere ke se mmimọ inamde edi ekpri, ndien emi ekeme ndinam mmọ ẹtaba idara mmọ. Esịt mmọ ekeme ndidọhọ mmọ nte ke an̄wan̄wa utom ukwọrọikọ mmọ iwọrọke n̄kpọ. Edi Jehovah enen̄ede adat esịt aban̄a ọkpọsọn̄ ukeme oro utọ mbon oro ẹsịnde ke utom mmọ. Akan oro, mmọ ikemeke nditịm mfiọk ini ye ebiet oro mme n̄kpasịp akpanikọ oro mmọ ẹtọde ẹdisiahade, ẹkọri, ẹnyụn̄ ẹn̄wụm mfri.—Ecclesiastes 11:6; Mark 12:41-44; 2 Corinth 8:12.

Mme Ntiense eken ẹnyene udọn̄ọ oro ọkọbọde mmọ mîdịghe ẹsọn̄ ke emana. Ye mmọ, ndidụk mme mbono esop kpukpru ini ke Ufọkmbono Obio Ubọn̄ ekeme ndisan̄a ye ubiak ye editịmede esịt. Mmọ ndikpan̄ utọn̄ nnọ utịn̄ikọ aban̄ade utom ukwọrọikọ ekeme nditi mmọ mban̄a se mmọ ẹkesinamde ye se mmọ ẹsụk ẹyomde ndinam, okposụkedi oro unana nsọn̄idem mîyakke mmọ ẹnam. Utọ mbon oro ẹkeme ndinyene ekikere ubiomikpe koro mmọ mîkemeke ndinam item oro ẹnọde ke udomo oro mmọ ẹkpemade ndinam. Edi, Jehovah enen̄ede abat edinam akpanikọ ye ime mmọ ke ọsọn̄urua n̄kpọ. Adan̄a nte mmọ ẹkade iso ndinam akpanikọ, enye ifreke mbụk edinam akpanikọ mmọ.—Psalm 18:25; 37:28.

‘Ndisọn̄ọ Esịt Nnyịn’

Etisịm ini emi John ọkọsọn̄de, anaedi enye ama ọfiọk ekese aban̄a nte Abasi enyenede esịtmbọm. Ti ke enye ama ewet ete: ‘Abasi okpon akan esịt nnyịn, onyụn̄ ọfiọk kpukpru n̄kpọ.’ N̄ko-n̄ko, John ama esịn udọn̄ ọnọ nnyịn ‘ndisọn̄ọ esịt nnyịn.’ Nso ke mme ikọ John oro ẹkewọrọ?

Nte ekemde ye Vine’s Expository Dictionary of Old and New Testament Words, ikọedinam Greek oro ẹkabarede “ndisọn̄ọ” ọwọrọ “ndisịn mbukpek, ndikara m̀mê ndidụri nda, ndikpek.” Ke ikọ efen, man isọn̄ọ esịt nnyịn, oyom nnyịn idụri esịt nnyịn ida, ikpekde enye ndinịm ke akpanikọ nte ke Jehovah ama nnyịn. Didie?

Fritz, oro ikasiakde ke mbemiso ke ibuotikọ emi, anam utom nte ebiowo ke kiet ke otu esop Mme Ntiense Jehovah ke se ikande isua 25 onyụn̄ okụt nte ke ọkpọkpọ ukpepn̄kpọ ekeme ndisọn̄ọ nnọ imọ nte ke Jehovah ama imọ. “Mmesikpep Bible ye mme n̄wed nnyịn kpukpru ini ye ntịn̄enyịn. Emi an̄wam mi ndifre mban̄a ini edem nnyụn̄ nnyene utịbe utịbe ini iso nnyịn in̄wan̄în̄wan̄ ke ekikere. Ke ndusụk idaha, mmesiti mban̄a ini edem, ndien esitie mi ke idem nte ke Abasi ikpekemeke-keme ndima mi. Edi, ke ofụri ofụri, mmokụt nte ke ukpepn̄kpọ ofụri ini  ọsọn̄ esịt mi, anam mbuọtidem mi ọkọri, onyụn̄ an̄wam mi ndika iso nnyene idatesịt nnyụn̄ nda ukem ukem.”

Edi akpanikọ, ekeme ndidi edikot Bible ye editie n̄kere idikpụhọkede ata idaha nnyịn. Edi, enye ekeme ndikpụhọde usụn̄ nte nnyịn isede idaha nnyịn. Ndida mme ekikere ẹtode Ikọ Abasi nsịn ke esịt nnyịn an̄wam nnyịn ndikere n̄kpọ nte enye ekerede. Akan oro, ukpepn̄kpọ anam nnyịn ikọri ke ifiọk emi inyenede iban̄a mbọm Abasi. Sụn̄sụn̄ nnyịn imekeme ndinyịme nte ke Jehovah iduọhọke nnyịn iban̄a idaha emi nnyịn ikodude ikọri ikpon, enye inyụn̄ iduọhọke nnyịn ke mme mmeme nnyịn. Enye ọdiọn̄ọ ke mme mfịghe oro ẹfịghede ediwak nnyịn—inamke n̄kpọ m̀mê mmọ ẹdi eke ntụk m̀mê eke ikpọkidem—ediwak ini isitoho nnyịn, ndien enye ke ima ima usụn̄ esikere aban̄a emi.

Nso kaban̄a Margarette, oro ikasiakde ke mbemiso? Ke enye ama ekedifiọk Jehovah, edikpep Bible ama enyene akwa ufọn ọnọ enye n̄ko. Ukem nte Fritz, enye ekenyene ndikpụhọde ekikere oro enye ekenyenede aban̄a nte ete esie etiede. Akam ama an̄wam Margarette ada se enye ekekpepde esịn ke edinam. Margarette ọdọhọ ete: “Akpa kan̄a, n̄kada Jehovah nte n̄kpet n̄kpet ufan, sia n̄kenyenede ifiọk mban̄a mme ima ima ufan akan nte n̄kenyenede mban̄a ima ima ete. Mma n̄kpep ndin̄wan̄a ekikere, mme eyịghe, mme editịmede esịt, ye mme mfịna mi nnọ Jehovah sụn̄sụn̄. Mma nsitịn̄ ikọ nnọ enye ediwak ini ke akam, ke ukem ini oro mma ntan̄ kpukpru mbufa n̄kpọ oro n̄kekpepde mban̄a enye ndian ọtọkiet, ukem ukem nte mbuwed. Ke ndusụk ini ẹma ẹkebe, ima emi nnyenede nnọ Jehovah ama ọkọri okpon tutu idịghe ọkpọsọn̄ n̄kpọ inọ mi idahaemi ndida enye nte ima ima Ete mi.”

Ndibọhọ Kpukpru Editịmede Esịt

Adan̄a nte idiọk, akani editịm n̄kpọ emi osụk odude, owo ndomokiet ikemeke ndidori enyịn ndibọhọ mme editịmede esịt. Ye ndusụk Christian, emi ọwọrọ ke editịmede esịt m̀mê edinyene eyịghe mban̄a idem ekeme ndifiak ndemede onyụn̄ anam mmọ ẹkop mfụhọ. Edi nnyịn imekeme ndinịm ke akpanikọ nte ke Jehovah ọfiọk eti uduakesịt nnyịn ye ọkpọsọn̄ ukeme oro nnyịn isịnde ke utom esie. Enye idifreke ima oro nnyịn inyenede inọ enyịn̄ esie tutu amama.—Mme Hebrew 6:10.

Ke obufa isọn̄ ke idak Obio Ubọn̄ Messiah oro asan̄ade ekpere, kpukpru mbon oro ẹnamde akpanikọ ẹkeme ndidori enyịn ndibọhọ mme mfịghe ẹtode editịm n̄kpọ Satan. Nso ubọhọ ke oro edidi ntem! Adan̄aoro nnyịn iyokụt idem mme uyarade efen efen kaban̄a nte Jehovah enyenede esịtmbọm. Tutu ini oro, ẹyak kpukpru nnyịn inyene mbuọtidem nte ke ‘Abasi okpon akan esịt nnyịn, onyụn̄ ọfiọk kpukpru n̄kpọ.’—1 John 3:20.

[Mme Ikọ idakisọn̄]

[Se Ẹwetde ke Ikpọ Abisi ke page 30]

Jehovah idịghe ọsọn̄-ido akara ukara ufịk edi enye edi Ete oro enyenede ima, esịtmbọm, ye mbọm

[Ndise ke page 31]

Ndikpep Ikọ Abasi an̄wam nnyịn ndikere n̄kpọ nte enye ekerede