Sọn̄ọ Mụm Ukpepn̄kpọ Abasi Kama
Sọn̄ọ Mụm Ukpepn̄kpọ Abasi Kama
“Buọt idem fo ye Jehovah ke ofụri esịt fo; ndien kûberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo enịm.”—MME N̄KE 3:5, 6.
1. Didie ke ẹsio nnyịn ẹnyan ẹnọ ifiọk owo akan nte akanam edide ke mbemiso?
IDAHAEMI, n̄kpọ nte n̄wedmbụk n̄kpọntịbe eke usen ke usen 9,000 ẹdu ke ofụri ererimbot. Kpukpru isua ẹsimịn̄ n̄kpọ nte mbufa n̄wed 200,000 ke United States ikpọn̄. Nte ibat kiet emi ẹnamde owụtde, ke March 1998, n̄kpọ nte page ikpehe Ndutịm miliọn 275 ẹkedu ke Internet. Ẹdọhọ ke ẹda page miliọn 20 ẹdian ke ibat emi kpukpru ọfiọn̄. Mme owo ẹmenyene ntọt ke ibuotikọ ekededi ẹkan nte akanam ẹnyenede ke mbemiso. Ke adan̄aemi idaha emi enyenede mme ufọn, utọ akpakịp ntọt ẹmi ẹda mme mfịna ẹdi.
2. Mme mfịna ewe ẹkeme ndito edinyene akpakịp ntọt?
2 Ndusụk owo ẹmenyene mbumehe uyom ntọt, ẹtakde ke ndiyụhọ anana-utịt udọn̄ edinyene mbufa ntọt ke adan̄aemi ẹfụmide se idide akpan n̄kpọ ikan. Mbon efen ẹbọ ubak ubak ntọt ẹban̄a awak-n̄kukọhọ afan̄ ifiọk ndien ekem ẹda idemmọ nte nta mbon ifiọk. Ọkọn̄ọde ke ata esisịt ifiọk emi mmọ ẹnyenede, mmọ ẹkeme ndinam mme akpan ubiere oro ẹkemede ndinọ idemmọ m̀mê mbon efen unan. Ndien n̄kpọndịk odu kpukpru ini nte ke owo ekeme ndibọ ntọt oro edide nsu m̀mê mînenke. Ediwak ini usụn̄ ẹkemede ndiberi edem isidụhe ndisọn̄ọ nte ke akpakịp ntọt ẹmi ẹnen ẹnyụn̄ ẹda ukem ukem.
3. Mme ntọt ewe oro ẹban̄ade ediyom ọniọn̄ owo ke ẹkụt ke Bible?
3 Ọkpọsọn̄ udọn̄ edi edu owo ke anyan ini. Ẹma ẹdiọn̄ọ n̄kpọndịk edibiat ini n̄kaha nyom ntọt oro mîwọrọke usụn̄ m̀mê akam ọnọde unan ko ke edem ke eyo Edidem Solomon. Enye ọkọdọhọ ete: “Kop item: edinam ediwak n̄wed inyeneke edikụre; edikpep n̄kaha onyụn̄ esịn idem akpa mba.” (Ecclesiastes 12:12) Ediwak isua ikie ke ukperedem apostle Paul ama ewet n̄wed ọnọ ẹsọk Timothy ete: “Kpeme se ẹkeyakde ẹsịn fi ke ubọk. Fep idem ke mbukpo ndisịme ndutịn̄ ye ọkpọsọn̄ eneni, eke owo ẹkotde ke nsu, ẹte, ifiọk; ndusụk owo ẹma ẹnyịme ukpep-n̄kpọ oro, ẹdiyo ẹkpọn̄ mbuọtidem.” (1 Timothy 6:20, 21) Ih, oyom mme Christian mfịn ẹfep edisio idem nte mîdotke nnyan nnọ mme ekikere oro ẹnọde unan.
4. Nso idi usụn̄ kiet emi nnyịn ikemede ndiwụt ke imọbuọt idem ye Jehovah ye mme ukpepn̄kpọ esie?
4 Ikọt Jehovah n̄ko ẹnam ọfọn ndinam mme ikọ Mme N̄ke 3:5, 6: “Buọt idem fo ye Jehovah ke ofụri esịt fo; ndien kûberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo enịm.” Ndibuọt idem ye Jehovah esịne edisịn ekikere ekededi oro atuahade ye Ikọ Abasi, edide enye oto ekikere nnyịn m̀mê ekikere ekemmọ owo. Man ikpeme idaha eke spirit nnyịn, edi akpan n̄kpọ nte nnyịn inọ ukeme ikike nnyịn ukpep man nnyịn ikeme ndidiọn̄ọ ntọt oro ọnọde unan inyụn̄ ifep enye. (Mme Hebrew 5:14) Ẹyak nnyịn ineme ndusụk ebiet ẹmi utọ ntọt oro ẹtode.
Ererimbot Emi Satan Akarade
5. Nso idi ebiet kiet emi mme ekikere oro ẹnọde unan ẹtode, ndien anie edi ntak?
5 Ererimbot emi ọyọhọ ye mme ekikere oro ẹnọde unan. (1 Corinth 3:19) Jesus Christ ama ọbọn̄ akam ọnọ Abasi aban̄a mme mbet esie ete: “Mben̄eke nte Afo osio mmọ ke ererimbot efep, edi mmeben̄e nte ekpeme mmọ ke [ntak andidiọk, NW].” (John 17:15) Jesus ndikeben̄e nte ẹkpeme mme mbet esie ẹsio ke ubọk “andidiọk” owụt ke enye ọdiọn̄ọ odudu oro Satan enyenede ke ererimbot. Nnyịn ndidi mme Christian ikpemeke nnyịn inikiet inikiet isio ke ndiọi odudu oro ẹdude ke ererimbot emi. John ekewet ete: “Nnyịn imọfiọk ite, nnyịn idi eke Abasi, ofụri ererimbot onyụn̄ esịne ke ubọk andidiọk.” (1 John 5:19) Akpan akpan ke akpatre ikpehe ukperedem ini emi, ẹdori enyịn nte ke Satan ye mme demon esie ẹyenam mme ntọt oro ẹnọde unan ẹyọhọ ererimbot.
6. Didie ke ndutịm unọ idem inemesịt ekeme ndinam esịt owo odoro ufiọn?
6 Ẹdori enyịn n̄ko nte ke ndusụk ke otu ntọt oro ẹnọde unan mi ẹkeme nditie nte se mînọhọ unan. (2 Corinth 11:14) Ke uwụtn̄kpọ, kere ban̄a ndutịm unọ idem inemesịt, emi esịnede edinam TV, ndise senima, ikwọ, ye n̄wed. Ediwak owo ẹnyịme nte ke ekese idaha, ndusụk orụk unọ idem inemesịt ẹsịn udọn̄ ẹnọ mme esuene esuene edinam, utọ nte oburobụt ido, afai, ye edida ọkpọsọn̄ ibọk ke idiọk usụn̄. Ke akpa ini emi ẹkụtde usụn̄ unọ idem inemesịt kiet oro enen̄erede ọdiọk akan, mme owo ẹkeme ndikop n̄kpaidem. Edi edika iso nsio idem nnyan nnọ usụn̄ unọ idem inemesịt emi ekeme ndinam esịt owo odoro ufiọn. Nnyịn ikpedehede ida unọ idem inemesịt oro esịnde udọn̄ ọnọ mme ekikere oro ẹnọde unan nte se ẹnyịmede m̀mê se mînọhọ unan.—Psalm 119:37.
7. Nso orụk ọniọn̄ owo ekeme ndibiat mbuọtidem nnyịn ke Bible?
7 Kere ban̄a ebiet efen oro mme mbiara ntọt ẹkemede ndito—akpakịp ekikere oro ndusụk ntaifiọk ye nditọ ukpepn̄kpọ ẹmi ẹnenide ẹte ke Bible idịghe akpanikọ ẹmịn̄de. (Men James 3:15 domo.) Utọ n̄kpọ oro odu ndien ndien ke mme magazine idahaemi ye mme ọwọrọetop n̄wed, ndien enye ekeme ndibiat mbuọtidem owo ke Bible. Ndusụk owo ẹkop idatesịt ndida anana-utịt n̄kpọ oro ẹkerede-kere nsụhọde odudu Ikọ Abasi. Ukem n̄kpọndịk oro ama odu ke eyo mme apostle, nte ẹkemede ndikụt ke mme ikọ apostle Paul: “Ẹkpeme mbak owo ekededi edidu, eke adade ifiọk owo ye ikpîkpu abian̄a eke asan̄ade ye se owo ekpepde obụme mbufo; nte asan̄ade ekekem ye mme enyene-odudu eke ẹkarade ererimbot, mînyụn̄ isan̄ake ikekem ye Christ.”—Colossae 2:8.
Mme Asua Akpanikọ
8, 9. Didie ke nsọn̄ibuot owụt idem mfịn?
8 Mbon nsọn̄ibuot ẹkeme ndibiat idaha eke spirit nnyịn n̄ko. Apostle Paul ama ebem iso etịn̄ ete ke nsọn̄ibuot oyodu ke otu mbon oro ẹdọhọde ke idi Christian. (Utom 20:29, 30; 2 Thessalonica 2:3) Ke ndisu ikọ esie, ke mme apostle ẹma ẹkekpan̄a, akwa nsọn̄ibuot ama ada ekesịm ntọn̄ọ Christendom. Mfịn, akwa nsọn̄ibuot idụhe ke otu ikọt Abasi. Edi, ibat ibat owo ẹkpọn̄ otu nnyịn, ndien ndusụk ke otu mmọ ẹbiere ndibiat enyịn̄ Mme Ntiense Jehovah ebe ke ndisuan nsu ye ukwan̄ ntọt. Ndusụk owo ẹdiana ye mme otu en̄wen ke ndibiọn̄ọ edisana utuakibuot. Ke ndinam ntre, mmọ ẹda ke n̄kan̄ ata akpa owo nsọn̄ibuot, Satan.
9 Ndusụk mbon nsọn̄ibuot ẹdọdiọn̄ ẹda nsio nsio usụn̄ unyene nneme, esịnede Internet, ndisuan nsunsu ntọt mban̄a Mme Ntiense Jehovah. Nte utịp, ke ini mbon esịt akpanikọ ẹnamde ndụn̄ọde ẹban̄a se nnyịn inịmde ke akpanikọ, mmọ ẹkeme ndikụt nsunsu ekikere mbon nsọn̄ibuot. Idem ndusụk Mme Ntiense ke unana edidiọn̄ọ ẹma ẹsio idem ẹnyan ẹnọ ntọt oro ọnọde unan mi. Ke adianade do, ke ini ke ini mbon nsọn̄ibuot ẹsitiene ẹbuana ke mme edinam ekebe ndise m̀mê ekebe ukopikọ. Nso idi ọniọn̄ ọniọn̄ usụn̄ nditiene ke ikerede iban̄a emi?
10. Nso idi ọniọn̄ ọniọn̄ usụn̄ ndinam n̄kpọ mban̄a nsunsu ekikere mbon nsọn̄ibuot?
10 Apostle John ama eteme mme Christian ete ẹkûda mbon nsọn̄ibuot ẹsịn ke ufọk mmọ. Enye ekewet ete: “Edieke owo ekededi edide ke ọtọ mbufo, mînyụn̄ idaha ukpep-n̄kpọ emi idi, ẹkûda enye ẹsịn ke ufọk, ẹkûnyụn̄ ẹkọm enye: koro owo eke ọkọmde enye etiene abuana ke mme idiọk utom esie.” (2 John 10, 11) Ndifep ndinyene ebuana ekededi ye mme andibiọn̄ọ ẹmi eyekpeme nnyịn osio ke mbiara ekikere mmọ. Ndisio idem nnyịn nnyan nnọ mme ukpepn̄kpọ mbon nsọn̄ibuot ebe ke nsio nsio usụn̄ unyene nneme eyomfịn ọnọ unan ukem nte edida owo nsọn̄ibuot oro ke idemesie nsịn ke ufọk nnyịn. Nnyịn ikpedehede iyak ọkpọsọn̄ udọn̄ atap nnyịn esịn ke utọ akama-nsobo usụn̄ edinam oro!—Mme N̄ke 22:3.
Ke Esịt Esop
11, 12. (a) Nso ikedi ebiet kiet emi mme ekikere oro ẹnọde unan ẹketode ke esop akpa isua ikie? (b) Didie ke ndusụk Christian ẹkekpu ndisọn̄ọ nda mmụm mme ukpepn̄kpọ Abasi n̄kama?
11 Kere ban̄a ebiet en̄wen emi mme ekikere oro ẹnọde unan ẹkemede ndito. Ke adan̄aemi mîduakke ndikpep nsu, Christian emi ama akayak idem ọnọ ekeme ndikọri edu n̄ken̄inua. (Mme N̄ke 12:18) Ke ntak emi nnyịn idide mme anana-mfọnmma owo, kpukpru nnyịn ke ndusụk idaha iyedue ke edeme nnyịn. (Mme N̄ke 10:19; James 3:8) Nte an̄wan̄ade, ke eyo apostle Paul, ndusụk owo ẹma ẹdu ke esop ẹmi ẹketrede ndikpeme edeme mmọ ẹnyụn̄ ẹsịnde idem ke ndineni n̄kpri eneni mban̄a mme ikọ. (1 Timothy 2:8) Ama odu mbon efen ẹmi ẹkedade ekikere mmọ ke akpan n̄kpọ ẹkaha ẹnyụn̄ ẹkam ẹkade anyan ẹkesịm idaha edineni mban̄a odudu Paul. (2 Corinth 10:10-12) Utọ edu oro ama osụn̄ọ ke ntuaha oro mîdotke.
12 Ndusụk ini mme eneni ẹmi ẹma ẹtara ẹsịm “ọkpọsọn̄ eneni,” ẹbiatde emem esop. (1 Timothy 6:5; Galatia 5:15) Kaban̄a mbon oro ẹkedemerede mme eneni ẹmi, Paul ekewet ete: “Edieke owo ekededi ekpepde orụk n̄kpọ en̄wen, mînyụn̄ inyịmeke inọ nti ikọ, kpa ikọ Ọbọn̄ nnyịn Jesus Christ, ye ukpep-n̄kpọ eke ekemde ye uten̄e Abasi, enye edi owo n̄kohode-idem; enye ifiọkke n̄kpọ, edi esịt esie ọdọn̄ọ eneni ye en̄wan ikọ; edi n̄kpọ emi ada ufụp edi, ye en̄wan, ye isụn̄i, ye idiọk ekikere.”—1 Timothy 6:3, 4.
13. Nso ikedi edu ata ediwak Christian ke akpa isua ikie?
13 Edi n̄kpọ inemesịt nte ke eyo mme apostle ata ediwak ke otu mme Christian ẹma ẹnam akpanikọ ẹnyụn̄ ẹsọn̄ọ ẹwụk ntịn̄enyịn ke utom editan̄a eti mbụk Obio Ubọn̄ Abasi. Mmọ ẹkesịn idem ke utom edisan̄a nse “nditọ-akpa ye mme ebe-akpa ke ukụt mmọ” ẹnyụn̄ ẹkpeme idem “ke idiọk-n̄kpọ emi odude ke ererimbot,” ibiatke ini mmọ ke ndineni eneni mban̄a mme ikọ. (James 1:27) Mmọ ẹma ẹfep “idiọk nsan̄a” idem ke esịt esop Christian man ẹkpeme idaha eke spirit mmọ.—1 Corinth 15:33; 2 Timothy 2:20, 21.
14. Edieke nnyịn mîkpemeke, didie ke editịn̄ ekikere oro owo enyenede emi mîdiọkke ekeme ndikabade ndi mme eneni oro ẹnọde unan?
14 Ukem ntre, mme idaha oro ẹtịn̄de ẹban̄a ke ikpehe ekikere 11 iwụtke nte esop Mme Ntiense Jehovah mfịn ẹtiede. Kpa ye oro, nnyịn iyanam ọfọn ndinyịme nte ke mme utọ eneni oro mînyeneke ufọn do ẹkeme ndidu. Nte ededi, idiọkke ndineme mme mbụk Bible m̀mê ndikere mban̄a mme n̄kpọ ẹban̄ade obufa ererimbot emi ẹn̄wọn̄ọde oro owo mîyarakede kan̄a. Ndien idụhe se idiọkde ke nditịn̄ ekikere emi owo enyenede ke mme ọkpọkpọ n̄kpọ, utọ nte ọfọn̄ ye ukamaidem m̀mê unọ idem inemesịt oro ẹmekde. Nte ededi, edieke nnyịn isọn̄ọde iyịre ke ekikere nnyịn inyụn̄ iyatde esịt ke ini mbon efen mînyịmeke ye nnyịn, n̄kpri n̄kpọ ntre ẹkeme ndibahade esop ke akpatre. Ke akpanikọ, se itọn̄ọde nte ekpri ikọ oro mînọhọ unan ekeme ndikabade nnọ unan.
Ndikpeme Enọ Nnyịn
15. Ke nso udomo ke “ukpep-n̄kpọ mme demon” ekeme ndinọ nnyịn unan ke n̄kan̄ eke spirit, ndien nso item ke ẹnọ ke N̄wed Abasi?
15 Apostle Paul odụri owo utọn̄ ete: “Spirit enen̄ede ọdọhọ ete, ke ukperedem ini owo ẹyefiak edem ẹkpọn̄ mbuọtidem, ẹnyụn̄ ẹkpan̄ utọn̄ ẹnọ mme spirit abian̄a ye ukpep-n̄kpọ mme demon.” (1 Timothy 4:1) Ih, mme ekikere oro ẹnọde unan ẹkama ata n̄kpọndịk. Nte an̄wan̄ade, Paul ama ekpe edima ufan esie Timothy ubọk ete: “O Timothy, kpeme se ẹkeyakde ẹsịn fi ke ubọk. Fep idem ke mbukpo ndisịme ndutịn̄ ye ọkpọsọn̄ eneni, eke owo ẹkotde ke nsu, ẹte, ifiọk; ndusụk owo ẹma ẹnyịme ukpep-n̄kpọ oro, ẹdiyo ẹkpọn̄ mbuọtidem.”—1 Timothy 6:20, 21.
16, 17. Nso ke Abasi ọnọ nnyịn, ndien didie ke nnyịn ikpekpeme enye?
16 Didie ke nnyịn mfịn ikeme ndibọ ufọn nto ima ima ntọt emi? Ẹma ẹnọ Timothy enọ—ọsọn̄urua n̄kpọ ndise enyịn nnyụn̄ n̄kpeme. Nso ke enye ekedi? Paul anam an̄wan̄a ete: “Mụm nti ikọ eke okokopde mi ke inua kama tutu esịm usen oro nte item uwem fo, ke mbuọtidem ye ima eke odude ke Christ Jesus. Kpeme eti enọ eke ẹkeyakde ẹnọ fi oto ke Edisana Spirit emi odụn̄de nnyịn ke esịt.” (2 Timothy 1:13, 14) Ih, enọ Timothy ama esịne “nti ikọ,” “ukpep-n̄kpọ eke ekemde ye uten̄e Abasi.” (1 Timothy 6:3) Ke n̄kemuyo ye mme ikọ ẹmi, mme Christian mfịn ẹbiere ndikpeme mbuọtidem mmọ ye ofụri akpanikọ oro ẹnọde mmọ.
17 Ndikpeme enọ oro esịne edikọri mme utọ n̄kpọ nte nti ido ukpep Bible ye edikọbọ ke akam, ke adan̄aemi ‘ifọnde ido ye kpukpru owo, akpan-akpan ye mmọ ẹmi ẹtode ke ufọk mme andinịm ke akpanikọ.’ (Galatia 6:10; Rome 12:11-17) Paul aka iso ọnọ item ete: “Bịne edinen ido, ye uten̄e Abasi, ye mbuọtidem, ye ima, ye ime, ye nsụhọde-esịt. N̄wana eti en̄wan mbuọtidem; sọn̄ọ mụm nsinsi uwem kama, emi ẹkekotde fi edida enyene, afo okonyụn̄ etịn̄ eti ikọ mbuọtidem ke iso ediwak ntiense.” (1 Timothy 6:11, 12) Paul ndikada mme utọ ubak udịmikọ nte “n̄wana eti en̄wan” ye “sọn̄ọ mụm” anam an̄wan̄a nte ke ana nnyịn isịn ifịk inyụn̄ ibiere ndibiọn̄ọ mme odudu oro ẹnọde unan ke n̄kan̄ eke spirit.
Ẹyom Mbufiọk
18. Didie ke nnyịn ikeme ndida ukem ukem nte mme Christian ke nte isede ntọt ererimbot?
18 Edi akpanikọ, ndin̄wana eti en̄wan mbuọtidem oyom mbufiọk. (Mme N̄ke 2:11; Philippi 1:9) Ke uwụtn̄kpọ, okpowụt unana eti ibuot ndinyene eyịghe mban̄a kpukpru ntọt ererimbot. (Philippi 4:5, NW; James 3:17) Idịghe kpukpru ekikere owo ẹtuaha ye Ikọ Abasi. Jesus ama etịn̄ ete ke oyom mbon udọn̄ọ ẹka ẹbịne eti abiausọbọ—kpa ubọkọkọ ererimbot. (Luke 5:31) Kpa ye oro usọbọ ke eyo Jesus ọkọtọn̄ọde-tọn̄ọ ndikọri ke ndusụk udomo, enye ama enyịme ete ke ẹkeme ndibọ ndusụk ufọn nto un̄wam abiausọbọ. Mme Christian mfịn ẹsida ukem ukem ke se iban̄ade ntọt ererimbot, edi mmọ ẹtre ndisio idem nnyan nnọ ntọt ekededi oro ekemede ndinọ mmọ unan ke n̄kan̄ eke spirit.
19, 20. (a) Didie ke mbiowo ẹnam n̄kpọ ye mbufiọk ke ini ẹn̄wamde mbon oro ẹtịn̄de ikọ ye unana eti ibuot? (b) Esop esinam n̄kpọ didie ye mbon oro ẹkọbọde ke ndisịn udọn̄ nnọ mme nsunsu ukpepn̄kpọ?
19 Mbufiọk edi akpan n̄kpọ n̄ko ke n̄kan̄ mbiowo ke ini ẹyomde ẹn̄wam mbon oro ẹtịn̄de ikọ ye unana eti ibuot. (2 Timothy 2:7) Ndusụk ini, mme andibuana ke esop ẹkeme ndisịn idem ke ndineni mban̄a n̄kpri n̄kpọ ye eyịghe eyịghe eneni. Man ẹkpeme edidianakiet esop, mbiowo ẹkpenyene ndisọsọp nse mban̄a mme utọ mfịna oro. Ke ukem ini oro, mmọ ẹfep ndikere ke nditọete mmọ ẹnyene idiọk uduakesịt inyụn̄ isọpke ikaha ndida mmọ nte mbon nsọn̄ibuot.
20 Paul ama etịn̄ aban̄a utọ edu emi ẹkpedade ẹnọ un̄wam. Enye ọkọdọhọ ete: “Nditọ-ete, edieke ẹkụtde owo ke ndudue ekededi, mbufo, ẹmi ẹdide mbon spirit, ẹsan̄a ke spirit ifụre-ifụre ido, ẹda enye ẹfiak ẹsịn ke itie.” (Galatia 6:1) Ke etịn̄de nnennen aban̄a mme Christian ẹmi ẹn̄wanade ndikan eyịghe, Jude ekewet ete: “Ẹtua ndusụk mmọ ẹmi ẹdude ke [eyịghe] mbọm; ẹnyụn̄ ẹnyan̄a ndusụk mmọ, ẹdabade mmọ ẹsio ke ikan̄.” (Jude 22, 23) Nte ededi, edieke owo ọkọbọde ke ndisịn udọn̄ nnọ mme nsunsu ukpepn̄kpọ ke ẹma ẹkenọ enye item ndien ndien, oyom mbiowo ẹnam n̄kpọ ye iwụk man ẹkpeme esop.—1 Timothy 1:20; Titus 3:10, 11.
Ndikere Mme N̄kpọ eke Ẹdotde Itoro
21, 22. Nso ke nnyịn ikpasasat, ndien nso ke nnyịn ikpekere?
21 Esop Christian efep idem ke mme ikọ ẹmi ẹnọde unan oro ‘ẹtarade nte ọnọk.’ (2 Timothy 2:16, 17; Titus 3:9) Emi edi ntre edide mme utọ ikọ oro ẹwụt abian̄a abian̄a “ọniọn̄” ererimbot, nsunsu ekikere mbon nsọn̄ibuot, m̀mê ikọ unana eti ibuot ke esịt esop. Ke adan̄aemi eti udọn̄ ndikpep mbufa n̄kpọ ekemede ndinyene ufọn, ọkpọsọn̄ udọn̄ emi owo mîkpemeke ekeme ndisio nnyịn nnyan nnọ mme ekikere oro ẹnọde unan. Nnyịn inanake ifiọk iban̄a n̄kari Satan. (2 Corinth 2:11) Nnyịn imọfiọk ite ke enye ke esịn akamba ukeme ndiwọn̄ọde ntịn̄enyịn nnyịn man anam nnyịn itek ke ifịk ke utom emi inamde inọ Abasi.
22 Nte nti anamutom, ẹyak nnyịn isọn̄ọ imụm ukpepn̄kpọ Abasi ikama. (1 Timothy 4:6) Nnyịn ikpakam ida ini nnyịn inam n̄kpọ ọniọn̄ ọniọn̄ ebe ke ndisasat ntọt oro nnyịn imekde. Adan̄aoro nsunsu ekikere emi Satan esịnde udọn̄ ọnọ idinamke nnyịn isọp isehede. Ih, ẹyak nnyịn ika iso ndikere “n̄kpọ ekededi eke ẹdide akpanikọ, ye n̄kpọ ekededi eke ẹnyenede ukpono, ye n̄kpọ ekededi eke ẹnende, ye n̄kpọ ekededi eke ẹdide edisana, ye n̄kpọ ekededi eke odotde ete ẹma, ye n̄kpọ ekededi eke ọwọrọde eti etop; edieke eti ido odude ke n̄kpọ, edieke itoro onyụn̄ odude.” Edieke nnyịn ikerede mme utọ n̄kpọ oro, emem Abasi oyodu ye nnyịn.—Philippi 4:8, 9.
Nso ke Nnyịn Ikekpep?
• Didie ke ọniọn̄ ererimbot ekeme ndisịn idaha eke spirit nnyịn ke itiendịk?
• Nso ke nnyịn ikeme ndinam ndikpeme idem nnyịn mbiọn̄ọ ntọt mbon nsọn̄ibuot oro ọnọde unan?
• Nso orụk ikọ ke ẹkpefep ke esịt esop?
• Didie ke ẹwụt edida ukem ukem Christian ke ini ẹnamde n̄kpọ ẹban̄a akpakịp ntọt oro odude mfịn?
[Mme Mbụme Ukpepn̄kpọ]
[Ndise ke page 9]
Ediwak ọwọrọetop magazine ye n̄wed ẹtuaha ye edumbet Christian nnyịn
[Ndise ke page 10]
Mme Christian ẹkeme nditịn̄ ekikere mmọ ye unana edisọn̄ọ nyịre ke n̄kpọ