Mme Gospel—Eneni ke Aka Iso

Nte mme mbụk Gospel ẹban̄ade emana Jesus Christ ẹdi akpanikọ?

Nte enye ọkọkwọrọ Ukwọrọikọ oro ke Obot?

Nte ẹma ẹnen̄ede ẹnam Jesus eset ke n̄kpa?

Nte enye ama enen̄ede ọdọhọ ete: “Ami ndi usụn̄ ye akpanikọ ye uwem”?—John 14:6.

 N̄KPỌ nte nditọ ukpepn̄kpọ 80 ẹma ẹneme mme orụk n̄kpọ ẹmi ke Mbono Jesus, emi ẹsinịmde ikaba ke isua toto ke 1985. Otu nditọ ukpepn̄kpọ ẹmi ẹbọrọ mme utọ mbụme oro ke esen esen usụn̄. Mme andibuana ke mbono emi ẹsịn n̄wed ndiwụt ebiet mmọ ẹdade ke ikọ kiet kiet oro ẹdọhọde nte Jesus eketịn̄de ke mme Gospel. Ndatndat n̄wed owụt ekikere oro nte ke Jesus ekenen̄ede etịn̄ ikọ oro. N̄wed emi edide pin̄k ọwọrọ ke ikọ oro ebiet n̄kpọ emi Jesus ekpetịn̄de. Ntọn̄ ntọn̄ n̄wed owụt ke mme  ekikere oro ẹkpere se Jesus eketịn̄de, edi idịghe enye eketịn̄ ikọ oro. Obubịt n̄wed ọwọrọ ke idịghe enye eketịn̄ ikọ oro, ọnọde ekikere nte ke mbon ukperedem emana ẹketịn̄ ikọ oro.

Ke ẹtienede usụn̄ edinam emi, mme andibuana ke Mbono Jesus ẹfụmi ofụri n̄kpọ oro ẹkebụpde ke mbụme oro ẹdude ke ntọn̄ọ ntọn̄ọ. Ke akpanikọ, mmọ ẹsịn obubịt n̄wed ẹnọ mbahade 82 eke ikie ke otu mme ikọ oro ẹdọhọde nte Jesus eketịn̄de ke mme Gospel. Nte mmọ ẹdọhọde, etie nte mbahade 16 eke ikie kpọt ke otu mme n̄kpọntịbe oro ẹbụkde ẹban̄a Jesus ke mme Gospel ye mme uwetn̄kpọ eken ẹdi se ẹkemede ndiberi edem.

Utọ edikụt ndudue oro nnọ mme Gospel idịghe obufa n̄kpọ. Ke 1774 ẹma ẹn̄wana ye mme Gospel ke ẹma ẹkesio uwetn̄kpọ enyenede page 1,400 eke Hermann Reimarus, kpa prọfesọ mme usem Edem Usiahautịn ke Hamburg, Germany, ke enye ama akakpa. Ke n̄wed oro Reimarus ama owụt akwa eyịghe emi enye enyenede nte ke mme Gospel idịghe mbụk akpanikọ. Ubiere esie ọkọkọn̄ọ ke edinam ndụn̄ọde ke usem ye se itiede nte mme ntuaha oro ẹkụtde ke mme mbụk Gospel inan̄ ẹban̄ade uwem Jesus. Toto ke ini oro, mme okụt-ndudue ẹwak ndinyene eyịghe nte ke mme Gospel idịghe akpanikọ, ke ndusụk udomo ẹbiatde mbuọtidem emi mme owo ẹnyenede ke mme uwetn̄kpọ ẹmi.

Ọsọ edu emi mme utọ nditọ ukpepn̄kpọ oro ẹnyenede edi nte ke mmọ ẹda mme mbụk Gospel nte n̄ke ido ukpono oro nsio nsio owo ẹketịbide ẹdi. Mme mbụme ẹmi nditọ ukpepn̄kpọ oro ẹnyenede eyịghe ẹsiwakde ndibụp ẹdi: Nte se mmọ ẹnịmde ke akpanikọ akpakanam mme andiwet Gospel inan̄ oro ẹdian n̄kpọ ke se ikenen̄erede itịbe? Nte idaha oro okodude ke n̄kann̄kụk mme akpa Christian ama anam mmọ ẹkpụhọ m̀mê ẹdian n̄kpọ ke mbụk Jesus? Mme ikpehe ewe ke mme Gospel ẹtie nte ẹdi mbụk akpanikọ utu ke n̄ke?

Mme owo ẹmi ẹkekọride ke n̄kann̄kụk oro owo mînịmke edidu Abasi ke akpanikọ m̀mê oro owo mîsikaha ufọkabasi ẹnịm ke Bible—esịnede mme Gospel—edi n̄wed emi ọyọhọde ye mbụk eset ye n̄ke. Edi mbon efen ẹkop itekesịt ẹban̄a mbụk uduọkiyịp, ufịk, unana edidianakiet, ye edu unana uten̄e Abasi eke Christendom. Mme utọ owo oro ikwe ntak emi mmọ ẹkpebiọn̄de utọn̄ ke mme uwetn̄kpọ oro Christendom adade ke edisana. Mmọ ẹkere ẹte ke anaedi n̄wed emi osiode ido ukpono mbubịk edi ọkọn̄ọ ke ikpîkpu n̄ke.

Nso idi ekikere fo? Nte afo akpayak ndusụk nditọ ukpepn̄kpọ ẹmi ẹfan̄ade ẹte ke mme Gospel idịghe mbụk akpanikọ ẹnam fi enyene ukem eyịghe oro? Ke ini afo okopde ẹdọhọde ke mme andiwet Gospel ẹkewet n̄ke, nte afo akpayak emi anam mbuọtidem emi afo enyenede ke mme uwetn̄kpọ mmọ esehede? Nte mbụk unana uten̄e Abasi eke Christendom akpanam fi enyene eyịghe nte ke mme Gospel idịghe se ẹkpeberide edem? Nnyịn imọnọ fi ikot ndidụn̄ọde ndusụk akpanikọ ẹmi ẹdude.

[Ndise ke page 4]

Nte mme Gospel ẹdọn̄ọ mme n̄ke m̀mê akpanikọ?

[Ebiet Ẹdade N̄kpọ Ẹto]

Jesus Asan̄ade ke Inyan̄/The Doré Bible Illustrations/Dover Publications

[Ebiet Ẹdade Ndise Ẹto ke page 3]

Edem edem, page 3-5 ye 8: Ẹbọ ẹto Freer Gallery of Art, Smithsonian Institution, Washington, D.C.