Nnyịn Idi Mmọ Ẹmi Ẹbuọtde Idem

Ndida Ukpepn̄kpọ Bible Mbọp Mbuọtidem ke India

ỌTỌN̄ỌDE ke ikpọ Obot Himalaya ẹmi snow ẹfụkde ke edem edere esịm mbenesụk Inyan̄ibom India emi etiede ufiop ufiop ke edem usụk, India edi idụt nsio nsio uduot, ke ikpehe isọn̄ ye ke ido ukpono. Ke otu mme andidụn̄ ẹmi ẹwakde ẹbe biliọn kiet, n̄kpọ nte mbahade 83 eke ikie ẹdi mbon Hindu, mbahade 11 eke ikie ẹdi mbon Muslim, ndien se isụhọde akpan akpan ẹdi mme inua-okot Christian, mbon Sikh, mbon Buddha, ye mbon Jain. Kpukpru mmọ ẹnyene ifụre utuakibuot. The World Book Encyclopedia ọdọhọ ete: “Ido ukpono enyene akpan udeme ke uwem mbon India.”

Ndidu uwem ekekem ye mbuọtidem Christian mmọ anam ẹdiọn̄ọ Mme Ntiense Jehovah, ẹmi ẹwakde ẹbe 21,200 ke India. Ukem nte mme nsan̄a mmọ eke spirit ke mme ikpehe ererimbot eken, Mme Ntiense ke India ẹda nte ke ọfọn ndin̄wam mbọhọidụn̄ mmimọ ndikọri ọkpọsọn̄ mbuọtidem ke Ikọ Abasi, kpa Edisana Bible. (2 Timothy 3:16, 17) Kere ban̄a nte ubon kiet ke Chennai ke edem usụk India ẹkedide ẹdifiọk akpanikọ Bible.

Mbemiso Mme Ntiense Jehovah ẹkesobode mmọ, ubon emi akabuana ifịk ifịk ke n̄ka ukọkudọn̄ọ eke Catholic, ẹmi ẹdọhọde nte isikụtde mme n̄kukụt, itịn̄de ikọ ke usem, inyụn̄ ikọkde mbon udọn̄ọ. Mmọ ẹkedi mme ọwọrọiso ke ufọkabasi ye ke obio, idem mme owo ẹma ẹsikot ndusụk mme andibuana ke ubon oro “swami,” emi ọwọrọde “ọbọn̄.” Ekem usen kiet Ntiense kiet ama aka ekese ubon oro onyụn̄ ada Bible owụt mmọ nte ke Jesus edi Eyen Abasi, idịghe Ata Ọkpọsọn̄ Abasi, nte ẹwakde ndinịm ke akpanikọ. Ntiense oro ama owụt mmọ n̄ko nte ke enyịn̄ Abasi edi Jehovah ndien nte ke uduak Jehovah kaban̄a isọn̄ edi ndinam enye edi ediye paradise.—Psalm 83:18; Luke 23:43; John 3:16.

Ke ntak oro mmọ ẹkenyenede ukpono ẹnọ Ikọ Abasi ẹnyụn̄ ẹmade se mmọ ẹkekopde, mme andibuana ke ubon emi ẹma ẹnyịme ukpepn̄kpọ Bible ofụri ini ye Mme Ntiense Jehovah. Emi ama anam mme ọdiọn̄ọ mmọ ke ufọkabasi mmọ ẹsisak mmọ. Kpa ye oro, ubon oro ama ọsọn̄ọ ebiere ndika iso ke ukpepn̄kpọ Bible mmọ. Nte ifiọk mmọ akatarade mbuọtidem mmọ onyụn̄ ọkọride ọsọn̄, mmọ ẹma ẹtre mme edinam nsunsu ido ukpono mmọ. Mfịn, owo ita ke ubon emi ẹdi ifịk ifịk Ntiense oro ẹma ẹkena baptism, ndien eka mmọ esinam utom nte asiakusụn̄ unọ un̄wam ini ekededi emi enye ekemede.

Mbuọtidem Ndikan Mme N̄kpọ-Nnam

Sunder Lal, akparawa emi odụn̄de ke obio-in̄wan̄ kiet ke Punjab, ama oyom ọkpọsọn̄ mbuọtidem ye uko man abuana eti mbụk Obio Ubọn̄ Abasi ye mbon efen. (Matthew 24:14) Ntak kiet ekedi, enye ama ọkpọn̄ edinịm ediwak abasi ke akpanikọ emi ubon esie ye mbon obio esie ẹkenịmde man atuak ibuot ọnọ ata Abasi, Jehovah. Nte ọyọhọ ntak iba, Sunder Lal inyeneke ukot.

Tutu esịm 1992, uwem Sunder Lal ọkọyọhọ ye usụn̄ edinam kiet kpukpru ini. Enye akanam utom nte udiana abiaibọk esinyụn̄ etiene ubon esie atuak ibuot ọnọ nsio nsio abasi ke idak ndausụn̄ andikpep emi mmọ ẹkemekde. Ekem okoneyo kiet, enye ama ọduọ ke adan̄aemi okoyomde ndibe usụn̄ tren. Tren ama ọdọk enye ukot onyụn̄ esịbe ukot esie mbiba ke ifụhi efep. Okposụkedi enye mîkakpaha, emi ama etịmede ofụri uwem esie. Nte an̄wan̄ade, Sunder Lal ama enen̄ede ofụhọ onyụn̄  akam ekere ndiwot idem. Ubon esie ẹma ẹnọ enye un̄wam, edi enye ikenyeneke idotenyịn ini iso.

Ekem kiet ke otu Mme Ntiense Jehovah ama ekese Sunder Lal onyụn̄ ada Bible owụt enye nte ke Abasi ọn̄wọn̄ọ ndinam isọn̄ edi inem inem paradise nnyụn̄ nnọ kpukpru mbon oro ẹmade ẹnyụn̄ ẹbakde enye mfọnmma nsọn̄idem. Sunder Lal ama enyịme ukpepn̄kpọ Bible, ndien ke ufan̄ isua kiet enye ama ekpep n̄kpọ ifịk ifịk. Ẹma ẹnọ enye ikot ndidụk mme mbono esop Christian ndien ke akpatre enye ama etiene aka, etiede ke enan̄ukwak emi ufan kiet akawatde. Okposụkedi uwat oro akanamde enye okop ubiak, utịp ama okpon. Ẹma ẹsọn̄ọ se enye ekekpepde ke ọkpọkpọ ukpepn̄kpọ Bible nte enye okosobode ye mbon efen ẹmi ẹkenen̄erede ẹnịm mme un̄wọn̄ọ ẹdude ke Ikọ Abasi ẹnyụn̄ ẹdude uwem ekekem ye mme ukpepn̄kpọ Bible.

Sunder Lal ama ọtọn̄ọ ndibuana eti mbụk ye mme mbọhọidụn̄ esie, ndien ke 1995 enye ama ana baptism. Ke ntọn̄ọ ntọn̄ọ, enye ekesibuana ke utom ukwọrọikọ ebe ke ndinyọni to ke enyịnusụn̄ sịm enyịnusụn̄ ke obio-in̄wan̄ esie, ndien enye ekesisan̄a ntre. Edi idahaemi enye enyene enọ otode nditọete esie eke spirit—enan̄ukwak mbon n̄kpọ-nnam emi ẹbotde akpan akpan man ẹkeme “ndiwat” ke ubọk. Ye un̄wam enan̄ukwak esie, enye ekeme ndida ke idemesie idahaemi onyụn̄ ekeme ndiwat kilomita 12 man okodụk mme mbono esop. Ndusụk ini enye esiwat ke ọkpọsọn̄ oyobio; ke mme ini efen idaha eyo esifiop ebe Celsius 43.

Ke adianade ye edidụk mme mbono esop, Sunder Lal enịm ediwak ukpepn̄kpọ Bible ye mbon en̄wen ẹmi ẹyomde un̄wam ndikọri ọkpọsọn̄ mbuọtidem ke ata Abasi, Jehovah. Ke akpanikọ, itiaba ke otu akpa nditọ ukpepn̄kpọ Bible esie ẹna baptism idahaemi, kpa ntre ye ita efen ẹmi enye ọkọkwọrọde ikọ ọnọ edi ẹmi mme ekemmọ Ntiense ẹkekpepde Bible.

Nte Bible ọdọhọde, “idịghe kpukpru owo ẹnyene mbuọtidem.” (2 Thessalonica 3:2) Edi kaban̄a “mmọ ẹmi ẹkenịmde ẹnọ nsinsi uwem,” ndikpep Ikọ Abasi kpukpru ini ekeme ndibọp mbuọtidem mmọ ọsọn̄. (Utom 13:48) Utọ ukpepn̄kpọ oro n̄ko anam enyịn an̄wan̄a mmọ ye idotenyịn utịbe utịbe ini iso—kpa n̄kpọ oro ibat owo oro ọkọride-kọri ke India owụtde mbuọtidem.

[Ndise obio ke page 30]

(Ama oyom ndikụt nte enye enen̄erede etie, se n̄wed)

AFGHANISTAN

PAKISTAN

NEPAL

BHUTAN

CHINA

BANGLADESH

MYANMAR

LAOS

THAILAND

VIETNAM

CAMBODIA

SRI LANKA

INDIA

[Ebiet Ẹdade N̄kpọ Ẹto]

Mountain High Maps® Copyright © 1997 Digital Wisdom, Inc.