Nyene Mbuọtidem ke Ntịn̄nnịm Ikọ Abasi!
Nyene Mbuọtidem ke Ntịn̄nnịm Ikọ Abasi!
“Ẹma ẹdọdiọn̄ ẹsọn̄ọ ikọ mme prophet ẹkan ẹnọ nnyịn.”—2 PETER 1:19.
1, 2. Nso ikedi akpa ntịn̄nnịm ikọ oro akanam ẹwetde, ndien nso mbụme kiet ke enye ekedemede?
JEHOVAH ekedi Ebiet emi akpa ntịn̄nnịm ikọ oro akanam ẹwetde okotode. Ke Adam ye Eve ẹma ẹkenam idiọkn̄kpọ, Abasi ama ọdọhọ urụkikọt ete: “Nyonyụn̄ nsịn usua ke ufọt fo ye n̄wan, ye ke ufọt ubon [“mfri,” NW] fo ye [mfri, NW] esie: enye ayanuak fi ibuot, afo oyonyụn̄ anuak enye nditịn̄-ikpat.” (Genesis 3:1-7, 14, 15) Ediwak isua ikie ẹyebe mbemiso ẹdiọn̄ọde mme ntịn̄nnịm ikọ oro ọyọhọ ọyọhọ.
2 Akpa ntịn̄nnịm ikọ oro ama ọnọ anamidiọk ubonowo ata idotenyịn. N̄wed Abasi ama anam ẹdiọn̄ọ Satan kpa Devil ke ukperedem nte “akani urụkikọt.” (Ediyarade 12:9) Edi anie edidi Mfri Abasi oro ẹken̄wọn̄ọde?
Ndiyom Mfri Oro
3. Didie ke Abel okowụt mbuọtidem ke akpa ntịn̄nnịm ikọ?
3 Ke mîbietke ete esie, Abel oro akabakde Abasi ama owụt mbuọtidem ke akpa ntịn̄nnịm ikọ oro. Abel nte an̄wan̄ade ama ọdiọn̄ọ ete ke oyom ẹduọk iyịp man ẹfụk idiọkn̄kpọ. Mbuọtidem ke ntre ama onụk enye ndiwa unam oro Abasi ekenyịmede ndibọ. (Genesis 4:2-4) Edi, Mfri oro ẹken̄wọn̄ọde okosụk edi ndịben̄kpọ.
4. Nso un̄wọn̄ọ ke Abasi ọkọnọ Abraham, ndien nso ke emi okowụt kaban̄a Mfri oro ẹken̄wọn̄ọde?
4 N̄kpọ nte isua 2,000 ke eyo Abel ama ekebe, Jehovah ama ọnọ ete-ekpụk oro Abraham ntịn̄nnịm un̄wọn̄ọ emi: “Nyọdiọn̄ fi akamba, nyonyụn̄ nnam ubon fo ẹwak eti-eti nte ntantafiọn̄ enyọn̄ . . . kpukpru mme idụt ke ererimbot ẹyenyụn̄ ẹkụt mfọn eke otode ke ubon fo.” (Genesis 22:17, 18) Mme ikọ oro ẹma ẹbuan Abraham ke edisu akpa ntịn̄nnịm ikọ oro. Mmọ ẹkewụt ẹte ke Mfri emi ẹdidade ẹbiat mme utom Satan ediwọrọ oto ubon Abraham. (1 John 3:8) “[Abraham ikeyịkke] ke unana mbuọtidem,” mme ntiense Jehovah oro ẹkedude mbemiso eyo mme Christian ẹmi ‘mîkọbọhọ se Abasi ọkọn̄wọn̄ọde ndinọ mmọ’ ikonyụn̄ iyịkke. (Rome 4:20, 21; Mme Hebrew 11:39) Utu ke oro, mmọ ẹma ẹmụm mbuọtidem mmọ ke ntịn̄nnịm ikọ Abasi ẹkama.
5. Mfri oro Abasi ọkọn̄wọn̄ọde okosu anie ke idem, ndien ntak emi afo ọbọrọde ntre?
5 Apostle Paul ama anam ẹdiọn̄ọ Mfri oro Abasi ọkọn̄wọn̄ọde ke ini enye ekewetde ete: “Ẹketịn̄ mme un̄wọn̄ọ ẹmi ẹnọ Abraham ye mfri esie. Enye idọhọke: ‘Mme mfri,’ nte n̄kpọ eke edide ediwak, edi etịn̄ aban̄a kiet: ‘Mfri fo,’ emi edide Christ.” (Galatia 3:16, NW) Mfri emi ẹdidade enye ẹdiọn̄ ofụri idụt ikesịneke kpukpru nditọ Abraham. Owo ikadaha mme andito ubon eyen esie Ishmael ye nditọ esie ẹmi Keturah akamande ndidiọn̄ ubonowo. Mfri edidiọn̄ ọkọwọrọ oto eyen esie Isaac ye eyeyen esie Jacob. (Genesis 21:12; 25:23, 31-34; 27:18-29, 37; 28:14) Jacob ama owụt nte ke “mme idụt” ẹyekop uyo ẹnọ Shiloh emi otode esien Judah, edi ke ukperedem Mfri oro ama osụhọde edisịm ubon David. (Genesis 49:10; 2 Samuel 7:12-16) Mme Jew akpa isua ikie ẹkedori enyịn owo kiet ndidi nte Messiah, m̀mê Christ. (John 7:41, 42) Ndien ntịn̄nnịm ikọ Abasi kaban̄a Mfri ama osu Eyen esie, Jesus Christ, ke idem.
Messiah Ọbiọn̄ọde!
6. (a) Didie ke ntịn̄nnịm ikọ urua 70 akpan̄wan̄a nnyịn? (b) Ini ewe ndien didie ke Jesus akanam “ndudue okụre”?
6 Prọfet Daniel ama ewet akpan ntịn̄nnịm ikọ aban̄ade Messiah. Ke akpa isua Darius eyen Media, enye ama ọfiọk ete ke isua 70 oro Jerusalem ekenyenede ndina ndon ọmọn̄ edisịm utịt. (Jeremiah 29:10; Daniel 9:1-4) Ke adan̄aemi Daniel osụk ọbọn̄de akam, angel Gabriel ama edi ediyarade ete ke ‘ẹdori urua ata ye duop eke ẹdinamde ndudue okụre.’ Ẹyesịbe Messiah ẹfep ke ufọt ọyọhọ urua 70. “Urua ata ye duop eke isua” ọkọtọn̄ọ ke 455 M.E.N. ke ini Edidem Artaxerxes I eke Persia ‘ọkọnọde uyo ete ẹtọn̄ọ ntak ẹbọp Jerusalem.’ (Daniel 9:20-27; Moffatt; Nehemiah 2:1-8) Messiah ekenyene ndidi ke urua 7 ye urua 62 ẹma ẹkebe. Isua 483 ẹmi ẹketọn̄ọ ke 455 M.E.N. ẹsịm 29 E.N., ke ini emi Jesus akanade baptism Abasi onyụn̄ eyetde enye aran nte Messiah, m̀mê Christ. (Luke 3:21, 22) Jesus ‘ama anam ndudue okụre’ ebe ke ndinọ uwem esie nte ufak ke 33 E.N. (Mark 10:45) Nso nti ntak ndinyene mbuọtidem ke ntịn̄nnịm ikọ Abasi ke mmọ ẹmi ẹdi ntem! *
7. Ke adade N̄wed Abasi, wụt nte Jesus okosude ntịn̄nnịm ikọ aban̄ade Messiah.
7 Mbuọtidem ke ntịn̄nnịm ikọ Abasi anam nnyịn ikeme ndidiọn̄ọ Messiah. Mme andiwet N̄wed Abasi Christian Usem Greek ẹma ẹda ekese ke otu ata ediwak ntịn̄nnịm ikọ ẹban̄ade Messiah oro ẹwetde ke N̄wed Abasi Usem Hebrew ẹkebuan nnennen ye Jesus. Ke ndinam an̄wan̄a: Eyenan̄wan emi mîfiọkke erenowo akaman Jesus ke Bethlehem. (Isaiah 7:14; Micah 5:2; Matthew 1:18-23; Luke 2:4-11) Ẹma ẹkot enye ẹsio ke Egypt, ndien ẹma ẹwot nseknditọ ke enye ama akamana. (Jeremiah 31:15; Hosea 11:1; Matthew 2:13-18) Jesus ama obiom mme udọn̄ọ nnyịn. (Isaiah 53:4; Matthew 8:16, 17) Nte ẹkebemde iso ẹtịn̄, enye ama awat ke abak ass odụk Jerusalem. (Zechariah 9:9; John 12:12-15) Mme ikọ andiwet psalm ẹma ẹsu ke ẹma ẹkekọn̄ Jesus ke eto ke ini mbonekọn̄ ẹkedemede edisịnen̄kpọ esie ke otu idemmọ ẹnyụn̄ ẹsịnde afia ẹban̄a ọfọn̄idem esie. (Psalm 22:18; John 19:23, 24) Akpanikọ oro nte ke owo ikobụn̄ke ọkpọ Jesus ye nte ke ẹma ẹkịm enye ẹma ẹsu ntịn̄nnịm ikọ n̄ko. (Psalm 34:20; Zechariah 12:10; John 19:33-37) Mmọ ẹmi ẹdi sụk ibat ibat uwụtn̄kpọ ntịn̄nnịm ikọ ẹban̄ade Messiah oro mme andiwet Bible ke odudu spirit Abasi ẹkedade ẹbuan ye Jesus. *
Ẹtoro Edidem Messiah!
8. Anie edi Andisọn̄ọ Usen, ndien didie ke ntịn̄nnịm ikọ oro ẹwetde ke Daniel 7:9-14 okosu?
8 Ke akpa isua Edidem Belshazzar eke Babylon, Jehovah ama ọnọ prọfet esie Daniel ndap ye mme n̄wọrọnda n̄kukụt. Prọfet oro ama ebem iso okụt ikpọ unam inan̄. Angel Abasi okowụt ke mmọ ẹdi “ndidem inan̄,” ntem owụtde nte ke mmọ ẹkeda ẹban̄a ukara ererimbot inan̄ oro ẹkedade itie ke adiana ke adiana. (Daniel 7:1-8, 17) Ekem Daniel ama okụt nte Jehovah, “Andisọn̄ọ Usen,” etiede ke nyayama ebekpo. Ke obiomde mme unam oro ikpe, enye ama ọbọ mmọ ukara onyụn̄ osobo ọyọhọ unam inan̄ oro. Ekem ẹma ẹyak nsinsi itie edikara emi edikarade “kpukpru mme idụt ye obio ye usem” ẹnọ “owo eke ebietde eyen owo.” (Daniel 7:9-14) Nso utịbe utịbe ntịn̄nnịm ikọ oro enyenede ebuana ye edidori “Eyen owo,” Jesus Christ, ke ebekpo ke heaven ke isua 1914 ke emi edi ntem!—Matthew 16:13.
9, 10. (a) Nsio nsio mbakidem mbiet eke ndap oro ẹkenyan ubọk ẹwụt nso? (b) Didie ke afo akpanam edisu Daniel 2:44 an̄wan̄a?
9 Daniel ama ọfiọk ete ke Abasi “emen ndidem efep, onyụn̄ enịm ndidem ke itie.” (Daniel 2:21) Ye mbuọtidem ke Jehovah, kpa ‘Andiyarade ndịbe n̄kpọ,’ prọfet oro ama asiak se ndap akwa mbiet Edidem Nebuchadnezzar eke Babylon ọwọrọde. Nsio nsio mbakidem esie ẹkenyan ubọk ẹwụt edidaha nda ye iduọ utọ ukara ererimbot nte Babylon, Media ye Persia, Greece, ye Rome. Abasi ama ada Daniel n̄ko ndiwụt nte mme n̄kpọntịbe ererimbot ẹdisan̄ade tutu ẹsịm ẹnyụn̄ ẹbe eyo nnyịn.—Daniel 2:24-30.
10 Ntịn̄nnịm ikọ oro ọdọhọ ete: “Ke eyo ndidem oro, Abasi enyọn̄ ayanam ubọn̄ eke mîdisoboke ke nsinsi, adaha ada: ndien idikpọn̄ke ubọn̄ emi inọ mbio efen: enye ayanuak onyụn̄ ama kpukpru mme idụt ẹmi, ndien enye ayada ke nsinsi.” (Daniel 2:44) Ke “ini mme Gentile” ama ekedisịm utịt ke 1914, Abasi ama owụk Obio Ubọn̄ eke heaven ke idak Christ. (Luke 21:24; Ediyarade 12:1-5) Ye odudu Abasi ẹma ẹsiak “itiat” Obio Ubọn̄ Messiah ini oro ẹsio ke “obot” itie edikara ofụri ekondo Abasi. Ke Armageddon itiat oro ọyọtọ mbiet oro anuak onyụn̄ ọkọk enye akabade ntọn̄. Nte obot ukara oro akarade “ofụri isọn̄,” Obio Ubọn̄ Messiah ayada ke nsinsi.—Daniel 2:35, 45; Ediyarade 16:14, 16. *
11. Edikpụhọde mbiet Jesus ekedi edibem iso n̄kụt nso, ndien didie ke n̄kukụt emi okotụk Peter?
11 Ye ukara Obio Ubọn̄ esie ke ekikere, Jesus ama ọdọhọ mme mbet esie ete: “Ndusụk owo ẹdu ke otu mmọ ẹmi ẹdade mi, ẹmi mîditabike n̄kpa, tutu mmọ ẹkụt Eyen Owo edide ndida ubọn̄.” (Matthew 16:28) Usen itiokiet ke ukperedem, Jesus ama ada Peter, James, ye John ọdọk ke akwa obot ndien ẹma ẹkpụhọde mbiet esie ke iso mmọ. Nte nyayama ikpaenyọn̄ okofụkde mme apostle, Abasi ama atan̄a ete: “Emi edi edima Eyen Mi, emi mmenem esịt ye Enye; ẹkop uyo Esie.” (Matthew 17:1-9; Mark 9:1-9) Nso edibem iso n̄kụt uyama Obio Ubọn̄ Christ ke emi ekedi ntem! Eyịghe idụhe Peter eketịn̄de aban̄a nyayama n̄kukụt oro ete: “Ndien ẹma ẹdọdiọn̄ ẹsọn̄ọ ikọ mme prophet ẹkan ẹnọ nnyịn.”—2 Peter 1:16-19. *
12. Ntak ini emi akpan akpan edide ini ndinanam mbuọtidem nnyịn ke ntịn̄nnịm ikọ Abasi n̄wụt?
12 “Ikọ mme prophet” nte an̄wan̄ade isịneke mme ntịn̄nnịm ikọ N̄wed Abasi Usem Hebrew ẹban̄ade Messiah kpọt, edi esịne n̄ko ikọ Jesus nte ke imọ iyedi “ke odudu ye akwa ubọn̄.” (Matthew 24:30) Edikpụhọde mbiet oro ama ọsọn̄ọ ntịn̄nnịm ikọ aban̄ade ubọn̄ ubọn̄ edidi Christ ke odudu Obio Ubọn̄. Ke mîbịghike, ediyarade esie ke ubọn̄ ediwọrọ nsobo ọnọ mme anana-mbuọtidem onyụn̄ ọwọrọ edidiọn̄ ọnọ mbon oro ẹnyenede mbuọtidem. (2 Thessalonica 1:6-10) Edisu ntịn̄nnịm ikọ Bible owụt ke “ukperedem ini” edi emi. (2 Timothy 3:1-5, 16, 17; Matthew 24:3-14) Nte Akwa Ebiereikpe Jehovah, Michael, emi edide Jesus Christ, odu ke mben̄eidem ndida utịt nsọk idiọk editịm n̄kpọ emi ke ini “akwa ukụt.” (Matthew 24:21; Daniel 12:1) Do, emi ke akpanikọ edi ini ndinanam n̄wụt nte ke nnyịn imenyene mbuọtidem ke ntịn̄nnịm ikọ Abasi.
Mụm Mbuọtidem ke Ntịn̄nnịm Ikọ Abasi Kama
13. Nso ikeme ndin̄wam nnyịn ndimụm ima oro inyenede inọ Abasi n̄kama nnyụn̄ nsọn̄ọ mbuọtidem nnyịn ke ikọ esie?
13 Ke akpanikọ nnyịn ima ikop nduaidem ke akpa ini oro nnyịn ikekpepde iban̄a mme edisu ntịn̄nnịm ikọ Abasi. Edi nte mbuọtidem nnyịn ọtọn̄ọ ndimem ndien ima nnyịn ebịt? Akpakam nnyịn itiehe nte mme Christian ke Ephesus oro ‘ẹkekpọn̄de akpa ima mmọ.’ (Ediyarade 2:1-4) Inamke n̄kpọ m̀mê nnyịn inam utom Jehovah ebịghi adan̄a didie, nnyịn imekeme ndikpọn̄ akpa ima nnyịn ibọhọke nnyịn ‘ibem iso iyom Obio Ubọn̄ Abasi ye edinen ido Esie’ man ibon n̄kpọuto ke heaven. (Matthew 6:19-21, 31-33) Ifịk ifịk ukpepn̄kpọ Bible, edibuana kpukpru ini ke mme mbono esop Christian, ye ifịk ifịk utom ukwọrọikọ Obio Ubọn̄ ẹyen̄wam nnyịn ndimụm ima oro inyenede inọ Jehovah, Eyen esie, ye N̄wed Abasi n̄kama. (Psalm 119:105; Mark 13:10; Mme Hebrew 10:24, 25) Nte utịp, emi ọyọsọn̄ọ mbuọtidem nnyịn ke ikọ Abasi.—Psalm 106:12.
14. Didie ke ẹnọ mme Christian oro ẹyetde aran utịp ke ntak mbuọtidem mmọ ke ntịn̄nnịm ikọ Jehovah?
14 Kpa nte ntịn̄nnịm ikọ Abasi okosude ke ini edem, ntre nnyịn imekeme ndinyene mbuọtidem ke se enye ekebemde iso etịn̄ aban̄a ini iso. Ke uwụtn̄kpọ, edidu Christ ke Obio Ubọn̄ edi ata idem n̄kpọ idahaemi, ndien mme Christian oro ẹyetde aran ẹmi ẹkenamde akpanikọ ẹsịm n̄kpa ẹkụt edisu ntịn̄nnịm un̄wọn̄ọ emi: “Owo eke akande, nyọnọ enye ndidia mfri eto uwem, emi odude ke Paradise Abasi.” (Ediyarade 2:7, 10; 1 Thessalonica 4:14-17) Jesus ọnọ mme andikan ẹmi ifet “ndidia mfri eto uwem” ke “Paradise Abasi” ke heaven. Ke Jesus Christ ama akanam mmọ ẹset, mmọ ẹtiene ẹbuana ke uwem eke mîkemeke ndikpa emi Jehovah, “Edidem emi akarade ke kpukpru eyo, emi mîkemeke ndikpa, enyịn mînyụn̄ ikemeke ndikụt Enye, kpa Abasi kierakiet,” ọnọde. (1 Timothy 1:17; 1 Corinth 15:50-54; 2 Timothy 1:10) Nso akwa utịp ke ẹnọ mmọ ntem ke ntak oro mmọ mîyakke ima emi mmọ ẹnyenede ẹnọ Abasi ebịt ye ke ntak emi mbuọtidem mmọ ke ntịn̄nnịm ikọ esie mîyokke!
15. Ẹkeda mmanie ẹsịn itiat idakisọn̄ “obufa isọn̄,” ndien mmanie ẹdi nsan̄a mmọ?
15 Esisịt ini ke mme anam-akpanikọ oro ẹyetde aran oro ẹkekpan̄ade ẹma ẹkeset ẹka “Paradise Abasi” ke heaven, ẹma ẹsion̄o nsụhọ Israel eke spirit oro ẹdude ke isọn̄ ke ufụn ‘Akwa Babylon,’ kpa ukara ererimbot eke nsunsu ido ukpono. (Ediyarade 14:8; Galatia 6:16) Ẹma ẹda mmọ ẹsịn itiat idakisọn̄ “obufa isọn̄.” (Ediyarade 21:1) Ntem “obio” ama amana, ndien ẹma ẹbọp enye akabade edi paradise eke spirit oro atarade esịm ofụri isọn̄ mfịn. (Isaiah 66:8) Akwa udịm mbon mbieterọn̄ oro ẹdide nsan̄a Israel eke spirit ke ẹbụn̄ọ ẹdụk do idahaemi, “ke utịt eyo” emi.—Isaiah 2:2-4; Zechariah 8:23; John 10:16; Ediyarade 7:9.
Ẹbem Iso Ẹtịn̄ Ini Iso Ubonowo ke Ntịn̄nnịm Ikọ Abasi
16. Nso idi idotenyịn mbon oro ẹsọn̄ọde ẹda ẹn̄wam mbon oro ẹyetde aran?
16 Nso idi idotenyịn mbon oro ẹsọn̄ọde ẹda ẹn̄wam mbon oro ẹyetde aran? Mmọ n̄ko ẹnyene mbuọtidem ke ntịn̄nnịm ikọ Abasi, ndien mmọ ẹdori enyịn ndidụk Paradise isọn̄. (Luke 23:39-43) Do mmọ ẹyen̄wọn̄ mmọn̄ ke “akpa mmọn̄ uwem” emi enịmde uwem ẹyenyụn̄ ẹda “ikọn̄ eto” oro ẹtọde ke mben akpa oro ẹkọk udọn̄ọ mmọ. (Ediyarade 22:1, 2) Edieke afo enyenede utọ utịbe utịbe idotenyịn oro, afo akpakam aka iso ndiwụt ntotụn̄ọ ima nnọ Jehovah onyụn̄ enyene mbuọtidem ke ntịn̄nnịm ikọ esie. Afo akpakam odu ke otu mbon oro ẹnyenede anana-utịt idatesịt nsinsi uwem ke Paradise isọn̄.
17. Uwem ke Paradise isọn̄ edisịne mme edidiọn̄ ewe?
17 Mme anana-mfọnmma owo ikemeke ndinam an̄wan̄a ọyọhọ ọyọhọ nte uwem editiede ke Paradise isọn̄ oro edide, edi ntịn̄nnịm ikọ Abasi ọnọ nnyịn ikike aban̄a mme edidiọn̄ oro ẹnade ẹbet okopitem ubonowo ini oro. Ke ini Obio Ubọn̄ Abasi edikarade ye unana ubiọn̄ọ, ẹnyụn̄ ẹnamde uduak esie ke isọn̄ kpa nte ẹnamde ke heaven, idiọkowo ndomokiet—ọkpọkọm idiọk unam—“idinamke idiọk, idinyụn̄ ibiatke n̄kpọ.” (Isaiah 11:9; Matthew 6:9, 10) Mbon nsụkidem ẹyeda isọn̄ ẹnyene, “ediwak emem ẹyenyụn̄ ẹnem mmọ esịt.” (Psalm 37:11) Otuowo oro ẹtiede biọn̄ ididụhe, koro “uwak ibokpot ẹyedu ke isọn̄ ke nsom ikpọ obot.” (Psalm 72:16) Mmọn̄eyet mfụhọ idisiahake aba owo. Udọn̄ọ eyebe efep, ndien idem n̄kpa ididụhe aba. (Isaiah 33:24; Ediyarade 21:4) Nte afo emekeme ndikụt—mbiaibọk idụhe, ibọkusọbọ idụhe, ufọkibọk m̀mê itie udọn̄ọ ibuot idụhe, edinam ubụkowo idụhe. Nso nyayama idotenyịn ke oro edi ntem!
18. (a) Nso ke ẹkenọ Daniel nsọn̄ọ ẹban̄a? (b) Nso ididi “udeme” Daniel?
18 Idem udi ubonowo edina ukpọk nte n̄kpa ediyakde ufan̄ ọnọ ediset ke n̄kpa. Edinen owo oro Job ama enyene utọ idotenyịn oro. (Job 14:14, 15) Kpa ntre ke prọfet Daniel ekenyene, koro angel Jehovah ama ọnọ enye nsọn̄ọ oro ọnọde ndọn̄esịt ete: “Edi afo ka okwo tutu esịm ke utịt: ndien afo ọyọduọk odudu, onyụn̄ ada ke udeme fo ke utịt mme usen.” (Daniel 12:13) Daniel ama anam utom Abasi ke edinam akpanikọ tutu esịm utịt uwem esie. Idahaemi enye ke ọduọk odudu ke n̄kpa, edi enye ‘ayadaha ada’ ke “ini ediset nti owo” ke ini Ukara Tọsịn Isua eke Christ. (Luke 14:14) Nso ididi “udeme” Daniel? Ọfọn, ke edisu esie emi aban̄ade Paradise, ntịn̄nnịm ikọ Ezekiel ọnọ ekikere ete ke kpukpru ikọt Jehovah ẹyenyene itie, idem ẹdemede isọn̄ oro ke nde ke nde ye ke usụn̄ oro enende. (Ezekiel 47:13–48:35) Ntre Daniel eyenyene itie ke Paradise, edi udeme esie do eyesịne se ikande isọn̄. Enye eyesịne itie esie ke uduak Jehovah.
19. Ẹyom nso man ẹdu uwem ke Paradise isọn̄?
19 Nso kaban̄a fi ye udeme fo? Edieke afo enyenede mbuọtidem ke Ikọ Abasi, kpa Bible, enen̄ede etie nte afo emenyene udọn̄ ndidu uwem ke Paradise isọn̄. Afo emekeme ndikam n̄kụt idemfo do, adarade ediwak edidiọn̄ esie, esede aban̄a isọn̄, onyụn̄ adarade mme akpan̄kpa oro ẹdisetde. Idem n̄kpọ, Paradise edi ebietidụn̄ ubonowo. Abasi okobot akpa owo iba oro ndidụn̄ ke utọ itie oro. (Genesis 2:7-9) Ndien enye oyom mme okopitem owo ẹdu uwem ke nsinsi ke Paradise. Nte afo ayanam n̄kpọ ke n̄kemuyo ye N̄wed Abasi man afo ekeme ndidu ke otu ediwak biliọn owo ẹmi ke akpatre ẹdidude uwem ke Paradise isọn̄? Afo emekeme ndidu do edieke afo enyenede ata ima ọnọ Ete nnyịn eke heaven, Jehovah, onyụn̄ enyenede ọkpọsọn̄ mbuọtidem ke ntịn̄nnịm ikọ Abasi.
[Mme Ikọ idakisọn̄]
^ ikp. 6 Se ibuot 11 ke Nọ Ntịn̄enyịn ke Prọfesi Daniel! ye “Seventy Weeks” (Urua Ata ye Duop) ke Insight on the Scriptures, ẹmi Watchtower Bible and Tract Society of New York, Inc., osiode.
^ ikp. 7 Se “All Scripture Is Inspired of God and Beneficial,” page 343-344, emi Watchtower Bible and Tract Society of New York, Inc., osiode.
^ ikp. 11 Se ibuotikọ oro “Biọn̄ Utọn̄ ke Ntịn̄nnịm Ikọ Abasi,” emi odude ke Enyọn̄-Ukpeme eke April 1, 2000.
Didie ke Afo Ọkpọbọrọ?
• Nso ikedi akpa ntịn̄nnịm ikọ, ndien anie ekedi Mfri oro ẹken̄wọn̄ọde?
• Nso ikedi ndusụk ntịn̄nnịm ikọ ẹban̄ade Messiah oro ẹkesude Jesus ke idem?
• Didie ke Daniel 2:44, 45 edisu?
• Ntịn̄nnịm ikọ Abasi anyan ubọk owụt nso ini iso ọnọ okopitem ubonowo?
[Mme Mbụme Ukpepn̄kpọ]
[Ndise ke page 18]
Ndi afo omodori enyịn ndidu uwem ke Paradise isọn̄?