Ntọt Mme Anditan̄a Obio Ubọn̄

Ndidi Ndidiọn̄ọ Ima Ima Abasi

KE EDIDE isua 16 ke emana, eyen Brazil kiet emi ekerede Antônio ama okop mfekuwem. Ekikere nte ke imọ iwọrọke n̄kpọ ama ada enye esịm edida n̄kpọsọn̄ ibọk ke idiọk usụn̄ ye mbumehe un̄wọn̄ ọkpọsọn̄ mmịn. Enye ama esikere aban̄a uwot idem ediwak ini. Edi ke mme ini ẹmi ke enye eketi se eka esie eketịn̄de ọnọ enye ete: “Abasi edi ima.” (1 John 4:8) Edi ima ima Abasi emi okodu ke m̀mọ̀n̄?

Ke odomode nditre mbumehe uda n̄kpọsọn̄ ibọk, Antônio ama oyom un̄wam oto oku ufọkabasi eke n̄kann̄kụk. Okposụkedi Antônio akakabarede enyene ifịk etieti ke Ufọkabasi Catholic, enye okosụk enyenyene ediwak mbụme. Ke uwụtn̄kpọ, mme ikọ Jesus oro, “Mbufo ẹyefiọk akpanikọ, akpanikọ oyonyụn̄ anam mbufo ẹwọrọ ufụn” ikan̄wan̄ake enye. (John 8:32) Nso orụk uwọrọ-ufụn ke Jesus ọkọn̄wọn̄ọ ndinọ? Ufọkabasi ikekemeke ndinọ ibọrọ ekededi oro ọnọde uyụhọ ke mme mbụme esie. Ke akpatre, Antônio ama ọkpọn̄ ufọkabasi onyụn̄ afiak ọtọn̄ọ ndida n̄kpọsọn̄ ibọk. Ke akpanikọ, mbumehe esie eketetịm ọdiọk.

N̄kpọ nte ukem ini emi, n̄wan Antônio, Maria, ama ọtọn̄ọ ndikpep Bible ye Mme Ntiense Jehovah. Ke adan̄aemi mîkọbiọn̄ọke ukpepn̄kpọ esie, Antônio akada Mme Ntiense nte “ido ukpono America emi anamde n̄kpọ ke ufọn ukara America.”

Ye unana edikop mmemidem, Maria ama esibon magazine Enyọn̄-Ukpeme ye Awake! oro ẹnemede mme ibuotikọ ẹmi enye ekekerede ke ẹyedemede udọn̄ Antônio ke nsio nsio itie ke ufọk. Sia Antônio ekesimade ndikot n̄wed, enye ama esitop enyịn esịn ke mme magazine oro ke ini n̄wan esie mîkodụhe. Ke akpa ini ke uwem esie, enye ama okụt ibọrọ ọnọ mme mbụme Bible esie. Enye eti ete: “Mma ntọn̄ọ n̄ko ndikụt ima ye mfọnido oro n̄wan mi ye Mme Ntiense ẹkewụtde mi.”

Ke ufọt ufọt 1992, Antônio ama ebiere ete ke imọ n̄ko iyama ndikpep Bible ye Mme Ntiense Jehovah. Nte ededi, enye ama aka iso ndida n̄kpọsọn̄ ibọk ke idiọk usụn̄ nnyụn̄ n̄n̄wọn̄ mmịn ọkpọsọn̄ ọkpọsọn̄. Ke okoneyo kiet nte enye ye ufan esie ẹketode obio-in̄wan̄ kiet ẹnyọn̄ ufọk, mme bodisi ẹma ẹmụm mmọ. Ke ini mme bodisi ẹkekụtde nte enye akamade cocaine, mmọ ẹma ẹtọn̄ọ nditịm enye. Bodisi kiet ama emenede enye ọtọ ke mbat onyụn̄ anyan enye ikan̄ ke iso. Mme bodisi eken ẹma ẹfiori ẹte: “Wot enye!”

Nte Antônio akanade ke mbat, enye ama ekere aban̄a uwem esie. N̄kukụre nti n̄kpọ oro enye ekekemede nditi ẹkedi ubon esie ye Jehovah. Enye ama ọbọn̄ akam ibio ibio, eben̄ede un̄wam Jehovah. Ye unana akpan ntak, mme bodisi ẹma ẹsana enye ẹyak. Enye ama ọnyọn̄ ufọk, enịmde ke akpanikọ ete ke Jehovah ekekpeme imọ.

Antônio ama ọtọn̄ọ ndikpep Bible ye obufa ifịk. Sụn̄sụn̄, enye ama anam mme ukpụhọde man enem Jehovah esịt. (Ephesus 4:22-24) Ebede ke ndikọri mfara ke idem, enye ama ọtọn̄ọ ndin̄wana ye mfịna uda n̄kpọsọn̄ ibọk esie. Kpa ye oro, enye ama oyom un̄wam ibọkusọbọ. Ọfiọn̄ iba oro enye okodude ke ufọkibọk unam ukpụhọde ama ọnọ enye ifet ndikot ediwak n̄wed Bible, esịnede n̄wed Ifiọk Oro Adade Osịm Nsinsi Uwem. Ekem Antônio ama abuana se enye ekekpepde oto mme n̄wed ẹmi ye mbon udọn̄ọ eken.

Ke Antônio ama ọkọkpọn̄ ufọkibọk, enye ama aka iso ndikpep Bible ye Mme Ntiense. Mfịn, Antônio, Maria, nditọiban mmọ iba, ye eka Antônio ẹnam utom Jehovah ọtọkiet nte ubon oro okopde inemesịt onyụn̄ adianade kiet. Antônio ọdọhọ ete: “Idahaemi mmọfiọk se mme ikọ oro ‘Abasi edi ima,’ ẹnen̄erede ẹwọrọ.”

[Ndise ke page 8]

Ndikwọrọ ikọ ke Rio de Janeiro