Ẹsịn Udọn̄ Ẹnọ Ọyọhọ Otu 108 eke Gilead Ndinam Edisana Utom

KE BIBLE, ẹwak ndida ikọ oro “edisana utom” ntịn̄ mban̄a utuakibuot nnọ Abasi. Enye oto ikọ Greek oro etịn̄de aban̄a edinam utom nnọ Abasi. (Rome 9:4, NW) Owo 5,562 oro ẹkekpan̄de utọn̄ ẹnọ edinam ukụre ukpep ọyọhọ otu 108 eke Ufọkn̄wed Enyọn̄-Ukpeme Ukpep Bible eke Gilead ẹma ẹkop mme etịn̄ikọ ẹnọde nti item oro ẹdin̄wamde mme andikụre ukpep ndinam edisana utom oro Jehovah Abasi enyịmede. *

Theodore Jaracz, owo Otu Ukara eke Mme Ntiense Jehovah, ekedi etieibuot okpokoro. Ẹkeda ọyọhọ ikwọ 52, “Our Father’s Name” (Enyịn̄ Ete Nnyịn) ẹberede edinam oro. Ọyọhọ udịm iba ke ikwọ oro ọdọhọ ete: “Nnyịn iyom usụn̄ ndikpono utịbe enyịn̄ fo n̄ko.” Oro ama enen̄ede owụt udọn̄ ofụri esịt nditọ ufọkn̄wed oro ẹkụrede ukpep (ẹmi ẹketode idụt 10) ndida ukpep mmọ nnam n̄kpọ ke mme efakutom isụn̄utom mmọ, ẹmi ẹdidide ke idụt 17.

Ke ntọn̄ọikọ esie, Brọda Jaracz ama odụri ntịn̄enyịn owụt ntotụn̄ọ ukpepn̄kpọ Bible ọfiọn̄ ition oro eketịmde nditọ ufọkn̄wed oro idem ọnọ utom ke an̄wautom esenidụt. Emi ama an̄wam mmọ “ẹdomo kpukpru n̄kpọ ẹse,” oro edi, ẹdụn̄ọde se mmọ ẹkekpepde ke mbemiso ke un̄wana Ikọ Abasi, ẹnyụn̄ “ẹmụm se ifọnde ẹkama.” (1 Thessalonica 5:21) Enye ama esịn udọn̄ ọnọ mmọ ndisọn̄ọ nda nnam akpanikọ nnọ Jehovah, Ikọ esie, ye utom oro ẹkekpepde mmọ. Nso idin̄wam mmọ nte mmọ ẹnamde ofụri emi?

Eti Item Kaban̄a Edinam Edisana Utom

Lon Schilling, andibuana ke Kọmiti Utịmutom Bethel, eketịn̄ ikọ ke ibuotikọ oro “Nte Afo Eyebe Udomo Ediwụt Eti Ibuot?” Enye ama owụt ufọn odude ke ndiwụt eti ibuot, emi owụtde ọniọn̄ Abasi. (James 3:17) Ediwụt eti ibuot abuana edinyịme nnọ, unana asari, ufat, edikere mban̄a, ye ediyọ. “Mbon eti ibuot ẹsiwụt edida ukem ukem ke mme edinam mmọ ye mbon efen. Mmọ isinamke n̄kpọ ibe ubọk,” ntre ke Brọda Schilling ọkọdọhọ. Nso ikeme ndin̄wam isụn̄utom owụt eti ibuot? Ndinyene ekikere oro adade ukem ukem mban̄a idem, ndida mme ifet oro ẹbererede n̄kpan̄ utọn̄ nnọ nnyụn̄ n̄kpep n̄kpọ nto mbon efen, ye edinyịme ndikere mban̄a mme ekikere mbon efen ye unana edifụmi mme edumbet Abasi.—1 Corinth 9:19-23.

“Ẹkûfre Ndidia Udia!” ekedi edemede-udọn̄ ibuotikọ ikpehe efen ke ndutịm, emi  Samuel Herd, owo Otu Ukara, ọkọnọde. Enye ama owụt ufọn edidia eti udia eke spirit man ẹka iso ẹdot ndinam edisana utom. “Ibịghike utom eke spirit mbufo ayatara nte mbufo ẹsịnde idem ofụri ofụri ke utom mbufo eke edikwọrọ ikọ ye edinọ ukpep. Ke ntre, oyoyom mbufo ẹdia uwak udia eke spirit man ẹkeme ndinyene odudu,” ntre ke Brọda Herd ọkọdọhọ. Edidia udia eke spirit kpukpru ini ekeme ndin̄wam isụn̄utom akan mfịghe eke spirit ye udọn̄ uka ufọk. Enye etịp esịn ke ndikop uyụhọ ye ubiere owo ndika iso nnam edisana utom oro ẹnọde enye.—Philippi 4:13.

Lawrence Bowen, andikpep kiet ke Gilead, ama esịn udọn̄ ọnọ nditọ ufọkn̄wed oro ẹkụrede ukpep ete “Ẹfiak Ẹka Editọn̄ọ.” Nso ke ikọ esie ọkọwọrọ? Enye ama ọdọhọ otuowo ẹkụbọde ẹka Mme N̄ke 1:7 (NW), emi ọdọhọde ete: “Uten̄e Jehovah edi editọn̄ọ ifiọk.” Etịn̄ikọ ama anam an̄wan̄a ete: “N̄kpọ ekededi oro ofụmide ata akpanikọ aban̄ade edidu Jehovah ikemeke-keme ndidot ndidi ata ifiọk m̀mê ndisụn̄ọ ke nnennen ifiọk.” Brọda Bowen ama emen mme ntọt ẹdude ke Ikọ Abasi, kpa Bible, odomo ye mbai ndise oro ẹsuanade oro oyomde ẹtan̄ ẹdian ke nde ke nde. Ke ẹma ẹketan̄  mbai oro ẹdian ọtọkiet, ndise ọwọrọ ada. Adan̄a nte ẹdiande mbai efen efen, ntre ke ndise oro akabade okpon onyụn̄ an̄wan̄a, ntre n̄ko ke owo ọkọri esịtekọm akan. Emi ekeme ndin̄wam kpukpru owo ẹnam edisana utom ẹnọ Abasi.

Wallace Liverance, esịn-owo-enyịn̄ ke Ufọkn̄wed Gilead, akada udịm udịm utịn̄ikọ oro ekeberi. Ibuotikọ esie ekedi “Wa Ekọm nọ Abasi.” Enye ama odụri ntịn̄enyịn owụt mbụk aban̄ade Jesus ndikọk owo akpamfia duop. (Luke 17:11-19) Edi owo kiet kpọt akafiak editoro Abasi onyụn̄ ọkọm Jesus. Brọda Liverance ama ọdọhọ ete: “Nte eyịghe mîdụhe, mbon eken ẹma ẹkop idatesịt ke enye ndikanam mmọ ẹsana. Mmọ ẹma ẹdat esịt ẹban̄a idemmọ, edi etie nte n̄kukụre se mmọ ẹkeyomde ekedi oku ndidọhọ ke mmọ ẹsana.” Edinam asana ke n̄kan̄ eke spirit oro osụn̄ọde oto edikpep akpanikọ, adianade ye esịtekọm, ẹkpenyene ndinụk owo ndikọm Abasi ke eti ido esie. Ẹma ẹsịn udọn̄ ẹnọ nditọ ufọkn̄wed ọyọhọ otu 108 eke Gilead nditie n̄kere kpukpru edinam ye eti ido Abasi man utom ye n̄waidem mmọ ẹwụt esịtekọm oro mmọ ẹnyenede ẹnọ Abasi.—Psalm 50:14, 23; 116:12, 17.

Mme Ifiọkutom ye Mme Ndụn̄ọde ke Nte Ẹkemede Ndinam Enye

Mark Noumair, andikpep efen ke Gilead, akada usụn̄ ke ikpehe efen ke ndutịm. Enye akaban̄a mme ifiọkutom an̄wautom otu oro ke ini mmọ ẹkebọde ukpep. Nditọ ufọkn̄wed oro ẹma ẹbiat n̄kpọ nte isua 12 ke utom ukwọrọikọ uyọhọ ini ke ẹbaharede ukem ukem mbemiso ẹkedide Gilead. Ke adan̄aemi ẹkedude ke ufọkn̄wed, mmọ ẹma ẹtọn̄ọ ediwak ukpepn̄kpọ Bible ye mme owo ẹtode nsio nsio idaha, owụtde nte ke nditọ ufọkn̄wed oro ẹma ẹfiọk ‘ndikabade ndi kpukpru n̄kpọ nnọ kpukpru owo.’—1 Corinth 9:22.

Ke etienede mme ifiọkutom nditọ ufọkn̄wed, Charles Molohan ye William Samuelson ẹma ẹnam ndụn̄ọde ye ndusụk mbonubon Bethel ye mme esenyịn oro ẹsan̄ade-san̄a oro ẹma ẹkedụk Gilead. Robert Pevy, kiet ke otu nditọete oro ẹkedade ẹnam ndụn̄ọde, akanam utom ke Philippines ke ama okokụre ukpep ke ọyọhọ otu 51 eke Gilead. Enye ama eti otu oro ete: “Ini ekededi oro mfịna odude, kpukpru owo ẹsinọ ekikere mmọ ke nte ẹkpekọkde mfịna oro. Kpukpru ini esidu owo oro ọdiọn̄ọde akan fi, owo oro ọnọde ekikere oro ọfọnde akan. Edi edieke afo odụn̄ọrede Bible onyụn̄ odomode ndikụt ekikere Abasi ke mme n̄kpọ, owo ndomokiet idikemeke ndikan enye. Oro edidi nnennen ibọrọ kpukpru ini.”

Ke ndida inem inem ndutịm eke spirit oro n̄kesịm utịt, John Barr, owo Otu Ukara, ama etịn̄ ikọ ke ibuotikọ oro “Nam Edisana Utom Ẹnyịmede nọ Jehovah.” Enye ama owụt nte ẹkemede ndinam edisana utom ke an̄wautom man ẹn̄wam mbon eti esịt ẹtuak ibuot ẹnọ Abasi ke usụn̄ oro enye enyịmede. Ke ama okokot mme ikọ Jesus ke Matthew 4:10, Brọda Barr ama ọdọhọ ete, “Edieke anade nnyịn ituak ibuot inọ Jehovah ikpọn̄, ana nnyịn ifep kpukpru n̄kari n̄kari orụk ukpono ndem, utọ nte isịnenyịn, uma inyene, ye editoro idem. Nnyịn idat esịt didie ntem ndifiọk nte ke mme isụn̄utom nnyịn ẹmewọrọ ata eti etop ke afan̄ emi ke ofụri isua ẹmi ọtọn̄ọde ke ntọn̄ọ ntọn̄ọ iduọk isua 1940! Ndien nnyịn imenịm ite ke mbufo mme andikụre ukpep ke ọyọhọ otu 108 eke Gilead ẹyetiene eti uwụtn̄kpọ mmọ. Mbufo ẹka ndinam edisana utom nnọ Jehovah, emi enye ikpọn̄ odotde ndibọ.”

Oro ekedi eti utịt ọnọ ndutịm oro ọbọpde-bọp do. Ini ama ekem ndikpan̄ utọn̄ nnọ mme etop ekọm ẹtode mbon eti esịt ẹtode ofụri ererimbot, ndinọ n̄weditoro, ye ndikot leta ediwụt esịtekọm otu oro, ke ukpep oro mmọ ẹkebọde. Ẹma ẹteme otu oro ẹkekụrede ukpep ẹte ẹnyene edu edisọn̄ọ nyịre ke utom mmọ ye ke ndinam n̄kpọ Jehovah. Kpukpru mme andidụk, esịnede isenowo ẹtode idụt 25, ẹma ẹdiana ke ndida edinam oro n̄keberi ke ikwọ ye akam.

[Mme Ikọ idakisọn̄]

[Ekebe ke page 23]

IDAHA OTU

Ibat idụt ẹtode: 10

Ibat idụt ẹnọde ẹka: 17

Ibat nditọ ufọkn̄wed: 46

Isua emana ke ẹbaharede ukem ukem: 34

Isua ẹdude ke akpanikọ ke ẹbaharede ukem ukem: 16

Isua ẹdude ke utom uyọhọ ini ke ẹbaharede ukem ukem: 12

[Ndise ke page 24]

Ọyọhọ Otu 108 Oro Ẹkụrede Ukpep ke Ufọkn̄wed Enyọn̄-Ukpeme Ukpep Bible eke Gilead

Ke udịm enyịn̄ ẹdude ke idak, ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet.

(1) Amadori, E.; Cook, O.; Byrne, M.; Lee, A. (2) Newsome, D.; Pederzolli, A.; Bigras, H.; Kato, T.; Gatewood, D. (3) Eade, D.; Eade, J.; Wells, S.; Jamison, J.; Gonzales, M.; Gonzales, J. (4) Kato, T.; Lohn, D.; Niklaus, Y.; Preiss, S.; Foster, P.; Ibarra, J. (5) Amadori, M.; Manning, M.; James, M.; Boström, A.; Gatewood, B.; Newsome, D. (6) Foster, B.; Jamison, R.; Hifinger, A.; Koffel, C.; Koffel, T.; Byrne, G. (7) Hifinger, K.; Manning, C.; Cook, J.; Boström, J.; Lohn, E.; Pederzolli, A. (8) James, A.; Wells, L.; Preiss, D.; Niklaus, E.; Lee, M.; Ibarra, P.; Bigras, Y.