Mfọnmma Uwem Idịghe Ikpîkpu Ndap!

Ererimbot oro ọfọnde ama—nso ke enye ọwọrọ ọnọ fi? Kere ban̄a n̄kaowo oro ubiatibet, edida n̄kpọsọn̄ ibọk ke idiọk usụn̄, akan̄, ubuene m̀mê ukwan̄ikpe mîdụhe. Kpukpru owo ẹdara ata eti nsọn̄idem eke ntụk ye eke ikpọkidem. Mfụhọ m̀mê unana inemesịt idụhe koro ẹkam ẹsiode n̄kpa ẹfep. Nte owụt ifiọk ndinyene udọn̄ mban̄a utọ ererimbot oro?

KE ADAN̄AEMI mîfụmike n̄kọri ke ifiọk ntaifiọk ye ifiọk ubotn̄kpọ, ata ediwak owo inen̄ekede inịm nte ke ifiọk m̀mê mbufiọk owo ayada ererimbot oro ọfọnde ama edi emi kpukpru owo ẹdidụn̄de ke emem ye inemesịt. Ke n̄kan̄ eken, ntụhọ owo nte eyịghe mîdụhe edi ndiyom ndinam mme n̄kpọ ẹfọn nnyụn̄ nnen̄ede mme unana mfọnmma. Nte ededi, edidaba ikpîkpu ndap idin̄wamke mbon oro mînyeneke ufọk ye mme ubuene, m̀mê ndinyene ufọn nnọ mbon oro ẹbiomode ndo ye mbon udọn̄ọ ẹmi ọdọn̄de mmọ ndibọhọ ndutụhọ mmọ. Ererimbot oro ọfọnde ama idikam idịghe ito ukeme owo ndision̄o n̄kpọ ndi. Nte ededi, kpa ye unana inemesịt ye ufịk oro ẹdude ke emi, nti ntak ẹdu ndinịm nte ke ererimbot oro edifọnde ama enen̄ede ekpere.

Ke ini afo ekerede aban̄a mfọnmma uwem, afo emekeme nditi uwem Jesus Christ. Jesus ikedịghe n̄kukụre mfọnmma owo oro akanam odude uwem ke isọn̄. Adam ye Eve, oro ẹkebotde ke mbiet Abasi, ẹma ẹdu mfọnmma uwem ke paradise. Nte ededi, mmọ ẹma ẹduọk ata eti idaha emi ke ntak nsọn̄ibuot mmọ ye Ete mmọ eke heaven. (Genesis 3:1-6) Nte ededi, Andibot, ama esịn mme owo udọn̄ ndidu uwem nsinsi ke esịt. Ecclesiastes 3:11 ọsọn̄ọ emi ete: “Enye [Abasi] anam kpukpru n̄kpọ ẹye ke ini mmọ: ama onyụn̄ esịn mmọ asian [“nsinsi ini,” NW] ke esịt, koro edieke asian mîdụhe, owo ikemeke ndikụt n̄kpọ emi Abasi anamde, ọtọn̄ọde ke ibuot tutu esịm utịt.”

Ke adan̄aemi unana mfọnmma ekesịnde ubonowo ke “ikpîkpu” uwem ye “itie ufịn mbiara,” tịm fiọk mme ikọ ndọn̄esịt apostle Paul oro: “Koro ofụri ekondo etiede ke ọkpọsọn̄ udọn̄, ebet ini eke ẹdiyararede nditọ Abasi. Koro ẹkenam ofụri ekondo osụk idem ọnọ  ikpîkpu n̄kpọ, itoho ke edinyịme esịt, edi oto ke Enye emi akanamde enye osụk ntre, ye idotenyịn, ete ke ẹyenyan̄a ekondo ke idemesie nde ẹsio ke itie ufịn mbiara, ẹsịn ke itie eyen-isọn̄ emi enyenede ubọn̄ eke nditọ Abasi.” (Rome 8:19-21) Bible anam an̄wan̄a nte ke ẹnam ndutịm Abasi kaban̄a edifiak nnọ owo mfọnmma uwem ebe ke Jesus Christ.—John 3:16; 17:3.

Ke adianade ye utịbe utịbe idotenyịn ini iso emi, kpukpru nnyịn imenyene ukeme edinam n̄kọri ke n̄kan̄ eke spirit, inamde n̄kọri nnyịn ayarade idem idahaemi.

Domo Ndiwụt Eti Ibuot

Jesus Christ ama ada n̄kpọ aban̄ade mfọnmma ke ata akpan n̄kpọ tutu enye ọdọhọ otuowo ete: “Mbufo ẹfọn ẹma ndien, kpa nte Ete mbufo ke heaven ọfọnde ama.” (Matthew 5:48) Nte Jesus ama enen̄ede odori enyịn ndikụt nte nnyịn inanade ndo ke idiọk editịm n̄kpọ emi? Baba. Nnyịn ke akpanikọ ikpenyene ndidomo ndikọri mme edu ntatubọk, mfọnido, ye ima nnọ ekemmọ owo, edi nnyịn imesiwak ndikpu ndinam se inende. Idem kiet ke otu mme apostle Jesus ama ewet ete: “Edieke nnyịn iyararede mme idiọk-n̄kpọ nnyịn, Enye edi anam-akpanikọ onyụn̄ enen, ete ifen mme idiọk-n̄kpọ nnyịn, inyụn̄ iyet nnyịn isana ke kpukpru mme ukwan̄n̄kpọ. Edieke nnyịn idọhọde ite akanam nnyịn inamke idiọkn̄kpọ, imakabade Enye inịm ke osu-nsu, ikọ Esie inyụn̄ idụhe nnyịn ke esịt.”—1 John 1:9, 10.

Nte ededi, nnyịn imekeme ndinam n̄kọri ke usụn̄ nte nnyịn isede idem nnyịn inyụn̄ inamde n̄kpọ ye mmọ en̄wen, ifepde ndinam n̄kpọ mbe ubọk. Anie ekeme ndinọ eti item kaban̄a edu oro adade ukem ukem onyụn̄ owụtde eti ibuot n̄kan enye emi ẹkụtde ke Ikọ Abasi kpa Bible? Ndikọri mme edu nte idatesịt ye mfaraidem ayan̄wam ndinam nnyịn inyene eti itie ebuana ye mbon en̄wen ke itieutom, ye nsan̄a ndọ nnyịn, ye ke ndinam n̄kpọ ye mme ete ye eka m̀mê nditọ nnyịn. Apostle Paul ọkọnọ mme Christian item ete: “Ẹdat esịt ke Ọbọn̄ kpukpru ini; nyọtọn̄ọ ntak ndọhọ, Ẹdat esịt. Ẹyak kpukpru owo ẹkụt [eti ibuot, NW] mbufo.”—Philippi 4:4, 5.

Mme Ufọn Ediwụt Eti Ibuot

Ke ini afo owụtde eti ibuot ke se odoride enyịn onyụn̄ efepde edu ediyom mfọnmma emi adade mfịghe ye edikpu edi, afo anam ufọn ọnọ idemfo ọkọrọ ye mbon en̄wen. Ndifiọk ata ukeme fo abuana ndinyene eti ibuot mban̄a se afo oyomde ndinam. Ti ete ke Abasi okobot nnyịn ndidụn̄ ke isọn̄ nnyụn̄ nnyene uyụhọ nto eti utom oro enyenede ufọn ọnọ nnyịn ye mbon en̄wen.—Genesis 2:7-9.

Edieke edide afo emesiyom n̄kpọ akaha oto idemfo, ntak mûbọn̄ke akam unọ Jehovah? Ndinyene mfọn Abasi ayada akwa nsụkesịt ọsọk fi. Jehovah ọdiọn̄ọ nte nnyịn itiede ye idaha unana mfọnmma nnyịn, ntre enye inanake eti ibuot inyụn̄ itiehe nsọn̄ido nsọn̄ido. Andiwet psalm ọsọn̄ọ ọnọ nnyịn ete: “Kpa nte ete atuade nditọ esie mbọm, kpa ntre ke Jehovah atua mmọ eke ẹbakde enye mbọm. Koro enye ọfiọkde nte iborode; emeti ete ke nnyịn idi ntan.” (Psalm 103:13, 14) Nnyịn ikpowụt esịtekọm didie ntem nte ke Abasi anam n̄kpọ ye mme owo ke utọ mbọm mbọm usụn̄ emi! Enye  ọdiọn̄ọ mme mmeme nnyịn, kpa ye oro nnyịn imọsọn̄ urua ke enyịn esie nte ndima nditọ.

Utu ke ndibịne edu ediyom mfọnmma, owụt eti ibuot didie ntem ndikọri ikike eke spirit ye ekikere oro adade ukem ukem! Akan oro, nnyịn imekeme ndinịm ke akpanikọ nte ke owo ndomokiet ikemeke ndibiọn̄ọ Jehovah ndisu uduak esie ndimenede ubonowo nsịm mfọnmma ke idak Obio Ubọn̄ Abasi. Edi nso ke mfọnmma eke owo ọwọrọ?

Mfọnmma Uwem Ọfọn Akan Edu Ediyom Mfọnmma

Mfọnmma iwọrọke owo ndidi oyom mfọnmma. Ke akpanikọ mbon oro ẹdinyenede ifet ndidu uwem ke Paradise ke isọn̄ ke idak Obio Ubọn̄ Abasi ididịghe mme owo ẹmi ẹtiede uyịre uyịre, ẹkụtde idem ke edinen. Kiet ke otu mme n̄kpọ ẹmi ẹyomde man ẹbọhọ akwa ukụt edi ntotụn̄ọ esịtekọm kaban̄a uwa ufak, nte akwa otuowo eke ofụri ererimbot oro John eketịn̄de aban̄a ẹkewụtde ẹte: “Yak edinyan̄a enyene Abasi nnyịn emi etiede ke ebekpo, onyụn̄ enyene Eyen-erọn̄.” (Ediyarade 7:9, 10, 14) Kpukpru mme andibọhọ akwa ukụt oro asan̄ade ekpere ẹyewụt esịtekọm nte ke Christ ama enyịme ndikpa nnọ mmimọ ye kpukpru mbon oro ẹwụtde mbuọtidem ke enye. Ima ima uwa esie edi isọn̄ ọnọ edida nsinsi ubọhọ nsọk unana mfọnmma ye mme mmeme esie.—John 3:16; Rome 8:21, 22.

Mfọnmma uwem editie didie? Utu ke umia mbuba ye ibụk ibụk udọn̄ ikpọ n̄kpọ, ima ye mfọnido ke otu mme owo ẹyenam uwem enem, ẹsion̄ode editịmede esịt ye unana uku idemowo ẹfep. Edi, mfọnmma uwem idifekke owo m̀mê ndinana inem. Ikọ Abasi inọhọ kpukpru ntọt ẹban̄ade Paradise edi obụk utọ uwem oro nnyịn ikpodoride enyịn ndikụt: “Ndien mmọ ẹyebọp ufọk ẹnyụn̄ ẹdụn̄ ke esịt: ẹyenyụn̄ ẹtọ in̄wan̄-vine, ẹnyụn̄ ẹdia mfri mmọ. Mmọ idibọpke, ndien owo en̄wen odụn̄; iditọhọ, ndien owo efen adia: koro usen ikọt mi ebietde usen eto, ndien edimek ikọt mi ẹyedia se ubọk mmọ ẹnamde. Mmọ idinamke utom ke ikpîkpu, idinyụn̄ imanke nditọ inọ n̄kpọndịk.”—Isaiah 65:21-23.

Utu ke ndikere mban̄a utọ unọ idem inemesịt, ikpọ ufọkurua, ifiọk ubotn̄kpọ, m̀mê ndutịm ukaisan̄ oro Obio Ubọn̄ oro edinamde odu, kere nte afo adarade edisu mme ikọ ẹmi: “Wolf ye eyen-erọn̄ ẹyedia n̄kpọ ọtọ kiet, lion oyonyụn̄ ata nnyanyan̄a nte enan̄: ndien ama edi urụkikọt, ntan eyedi udia esie. Owo idinamke idiọk, idinyụn̄ ibiatke n̄kpọ ke ofụri edisana obot mi: uyo Jehovah edi emi.” (Isaiah 65:25) Mfọnmma uwem edikpụhọde didie ntem ye se afo okụtde mfịn! Edieke afo edidide kiet ke otu mbon oro ẹdotde ndidu uwem ini oro, afo eyenyene ntak ndidori enyịn nte ke ima ima Ete fo eke heaven eyekpeme fi ye ubon fo. “Yak Jehovah onyụn̄ adat fi esịt; ndien enye ọyọnọ fi se esịt fo oyomde.”—Psalm 37:4.

Mfọnmma uwem idịghe ikpîkpu ndap. Ima ima uduak Jehovah kaban̄a ubonowo oyosu ọyọhọ ọyọhọ. Afo ye ubon fo ẹmekeme ndidu ke otu mbon oro ẹdinamde ẹsịm mfọnmma ẹnyụn̄ ẹdụn̄ ke nsinsi ke obufa ererimbot Abasi. Bible ama ebem iso etịn̄ ete: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:29.

[Ndise ke page 6]

Nnyịn imekeme ndinam n̄kọri ke usụn̄ nte nnyịn isede idem nnyịn ye mmọ en̄wen, ifepde edu ediyom mfọnmma m̀mê editie uyịre uyịre n̄kaha

[Ndise ke page 7]

Ntak mûdaha nte ke adara emem emem ye ndinen idaha ke Paradise?