Nte Afo Emesinịm Se Mûkemeke Ndikụt?

KE INI owo ọdọhọde ete, ‘Ami nsinịm se n̄kemede ndikụt kpọt,’ enye itịn̄ke emi ke ata ata usụn̄. Ke nditịm ntịn̄, kpukpru nnyịn imesinịm se nnyịn mîkemeke ndikụt.

Ke uwụtn̄kpọ, ekeme ndidi afo ama anam ndomonse ke ufọkn̄wed ndisọn̄ọ nte ke odudu maknet odu. Ẹkeme ndinam ndomonse oro ntem: Sịme mben̄e ukwak ke babru. Ekem men babru oro bri ke maknet. Ke ini babru oro enyekde, mben̄e ukwak oro ẹsịk ẹboho ke iso maknet oro nte n̄kpọ eke ẹbrede mfọni ẹnyụn̄ ẹkabade ẹtie nte maknet. Edieke edide afo ama anam  oro, nte afo ama ekeme ndida enyịn n̄kụt odudu maknet oro? Baba, edi utịp esie ke idem mben̄e ukwak oro edi se ẹkemede ndikụt in̄wan̄în̄wan̄, ọnọde fi uyarade oro anamde ẹnịm ke akpanikọ nte ke odudu maknet odu.

Nnyịn imesinịm mme n̄kpọ efen oro nnyịn mîkemeke ndikụt ye unana mfan̄a. Ke ini nnyịn isede ediye mbuwed m̀mê ikụtde ediye edibot n̄kpọ, nnyịn isiyịkke ke ewet-mbuwed m̀mê anamusọ oro odu. Ntre ke ini nnyịn ikerede iban̄a aya m̀mê iwụkde enyịn ise usoputịn, nte ikponụkke nnyịn ke nsụhọde n̄kaha ndikere nte ke anaedi mmọ ẹdi utom Akwa Ewet-Mbuwed m̀mê Anam N̄kpọuto?

Ntak Ndusụk Owo Mînịmke

Ke edide isio, ndusụk owo ẹtre ndinịm Abasi ke akpanikọ ke ntak se ẹkekpepde mmọ ke ufọkabasi. Emi ekedi ntre ye eren Norway kiet oro ẹkesiande enye ẹte ke Abasi esifọp mme idiọkowo ke ikan̄îkan̄ hell. Ikan̄wan̄ake eren emi utọ Abasi oro okpotụhọrede mme owo ke utọ usụn̄ oro, ntre enye ama akabade edi enye emi mînịmke edidu Abasi ke akpanikọ.

Nte ededi, ke ukperedem eren emi ama enyịme ndidụn̄ọde Bible, ndien kiet ke otu Mme Ntiense Jehovah ama an̄wam enye. Idem ama akpa enye ndifiọk nte ke Bible ikpepke nte ke ẹsitụhọde mme idiọkowo ke ikan̄îkan̄ hell. Bible emen n̄kpa odomo ye idap. Ke udi, nnyịn ikopke baba ubiak; nnyịn ifiọkke baba n̄kpọ kiet. (Ecclesiastes 9:5, 10) Eren oro ama ekpep n̄ko nte ke mme owo oro Abasi ebierede ikpe ọnọ nte mbon oro ẹdiọkde ke usụn̄ oro owo mîkemeke ndinen̄ede ẹdidu ke udi ke nsinsi. (Matthew 12:31, 32) Ẹyenam mme akpan̄kpa eken ẹset ke edikem ini Abasi, ye idotenyịn ndidu uwem ke nsinsi ke mme idaha Paradise. (John 5:28, 29; 17:3) Ukpepn̄kpọ emi ama esịne ifiọk. Enye ama odu ke n̄kemuyo ye ikọ Bible oro nte ke “Abasi edi ima.” (1 John 4:8) Eren emi ekenyenede esịt akpanikọ mi ama aka iso ndikpep Ikọ Abasi ndien, nte ini akakade, ama edinyene ima ọnọ Abasi Bible.

Mbon efen inịmke ke ima ima Andibot odu ke ntak oro nnanenyịn ye ukwan̄ikpe ẹwakde. Mmọ ẹnyịme ye eren Sweden emi ini kiet ko akanyande ubọk owụt heaven onyụn̄ obụpde ete: “Didie ke ata ọkpọsọn̄, atat-ubọk Abasi ekpekeme ndidu ko ke enyọn̄ ke ini nnyịn isobode ekese mbiara ye idiọkido mi ke isọn̄?” Ke ntak emi owo ndomokiet mîkekemeke ndibọrọ mbụme esie, enye n̄ko ama akabade edi owo emi mînịmke edidu Abasi ke akpanikọ. Ke ukperedem enye ama ọtọn̄ọ ndikpep Bible ye Mme Ntiense Jehovah. Enye ama ekpep nte ke Ikọ Abasi ọnọ ibọrọ oro ọnọde uyụhọ ke mbụme anyan  ini oro, Ntak emi Abasi ayakde idiọkido odu? *

Eren emi enyenede esịt akpanikọ mi ama ekpep nte ke idiọkido ndidu idịghe uyarade nte ke Abasi idụhe. Ke ndinam an̄wan̄a: Owo ekeme ndinam ikwa man ẹda ẹsịbe unam. Owo ekeme ndidep ikwa oro, idịghe man ada esịbe unam, edi man ada owot owo. Akpanikọ oro nte ke ẹkeda ikwa oro ẹnam n̄kpọ ke ukwan̄ usụn̄ iwụtke ke usụn̄ ekededi nte ke andinam enye idụhe. Ukem ntre, akpanikọ oro nte ke owo idaha isọn̄ inam n̄kpọ nte asan̄ade ekekem ye uduak oro ẹkebotde enye iwọrọke nte ke enye inyeneke Andibot.

Bible ekpep ete ke utom Abasi ọfọn ama. Enye “emi mînamke ukwan̄n̄kpọ, enye edi eti ye edinen.” (Deuteronomy 32:4) Abasi ọnọ owo nti enọ, edi ẹda ndusụk enọ ẹmi ẹnam n̄kpọ ke ukwan̄ usụn̄, osụn̄ọde ke ndutụhọ oro inua mîkemeke nditịn̄. (James 1:17) Nte ededi, Abasi eyetre ndutụhọ. Ke oro ebede, “mbon nsụkidem ẹyeda isọn̄ ẹnyene, . . . ẹnyụn̄ ẹdụn̄ ke esịt ke nsinsi.”—Psalm 37:11, 29.

Owo Sweden oro iketịn̄de iban̄a ke ntọn̄ọ ntọn̄ọ ama okop mfụhọ ke ini enye okokụtde nte mme ekemmọ owo ẹkụtde ndutụhọ. Ke akpanikọ, enye ndiwụt mbọm mbọm edikere mban̄a mbon efen ọsọn̄ọ nte ke Abasi odu. Didie ke edi ntre?

Ye ata ediwak owo, n̄kukụre n̄kpọ oro mmọ ẹnịmde ke akpanikọ edi edito ke unam mforo owo utu ke ndinịm ke Abasi odu. Mme ekpep-n̄kpọ mban̄a edito ke unam mforo owo ẹkpep ke “andikop odudu n̄kan esibọhọ odu”—nte ke owo ye unam ẹsin̄wana ye orụk mmọ kaban̄a ubọhọ. Andikop odudu n̄kan esibọhọ; mmemmem esikpa. Mmọ ẹdọhọ ke oro edi oto-obot ndutịm. Edi edieke edide “oto-obot” ọnọ mmemmem ndikpa man anam ufan̄ odu ọnọ andikop odudu, ukem nte owo Sweden oro, didie ke nnyịn ikeme ndinam an̄wan̄a nte ke ndusụk n̄kpọsọn̄ owo ẹsikop mfụhọ ke ini ẹkụtde nte ekemmọ owo osobode ndutụhọ?

Ndidi Ndifiọk Abasi

Nnyịn ikemeke ndikụt Abasi koro enye mînyeneke idem owo. Edi, Abasi oyom nnyịn ifiọk imọ. Usụn̄ kiet emi nnyịn ikemede ndimehe ye enye edi ke ndidụn̄ọde mme n̄wọrọnda utom esie—kpa “mme mbuwed” ye “mme edibot n̄kpọ” obot. Ke Rome 1:20, Bible ọdọhọ ete: “Koro tọn̄ọ nte ẹkebot ererimbot owo ẹtịm ẹkụt ndịbe ndịbe n̄kpọ ẹmi ẹnyenede [Abasi], kpa nsinsi odudu Esie ye idaha Esie nte Abasi; ẹda mme n̄kpọ ẹmi Enye akanamde ẹtịm ẹfiọk.” Ih, ukem nte edidụn̄ọde mbuwed m̀mê edibot n̄kpọ ekemede ndinọ fi ikike mban̄a edu anamusọ, nditie n̄kere mme utịbe utom Abasi ekeme ndin̄wam fi emehe ye edu esie nte ọfọnde.

Nte ededi, nnyịn ikemeke ndibọrọ kpukpru n̄kpọsọn̄ mbụme eke uwem ebe ke ikpîkpu edise mme utom obot Abasi. Edi nnyịn imekeme ndikụt ibọrọ nnọ mme utọ mbụme oro ebe ke ndidụn̄ọde N̄wed Abasi, kpa Bible. Okoto edikot Bible ye in̄wan̄în̄wan̄ ekikere ke iren iba oro iketịn̄de iban̄a ke ntọn̄ọ ntọn̄ọ ẹkedisịm ubiere nte ke Abasi odu ye nte ke enye ekere aban̄a se itịbede inọ nnyịn.

[Mme Ikọ idakisọn̄]

[Ebiet Ẹdade Ndise Ẹto ke page 28]

J. Hester and P. Scowen (AZ State Univ.), NASA