Ẹtan̄a Eti Mbụk Ifịk Ifịk
Ẹtan̄a Eti Mbụk Ifịk Ifịk
“Ẹnyene ifiopesịt ke spirit; ẹnam utom ẹnọ Ọbọn̄.”—ROME 12:11.
1, 2. Nso edu ke mme Christian ẹdomo ndinyene nte mme ọkwọrọ eti mbụk?
AKPARAWA kiet okop nduaidem aban̄a obufa utom. Ke akpa usen esie ke itieutom, enye ebet mme item eteutom esie ye ọkpọsọn̄ udọn̄. Enye asak iso ese akpa utom esie inyụn̄ idaha enye mfefere mfefere. Enye enyene ọkpọsọn̄ udọn̄ ndinam ofụri ukeme esie.
2 Ke ukem usụn̄ oro, nnyịn nte mme Christian imekeme ndise idem nnyịn nte mbufa mbonutom. Sia idotenyịn nnyịn edide ndidu uwem ke nsinsi, ẹkeme ndidọhọ ke nnyịn ikam itọtọn̄ọ ndinam utom nnọ Jehovah. Ke akpanikọ, Andibot nnyịn enyene akpakịp utom ke ekikere ọnọ nnyịn oro ẹdinamde iyọhọ ye utom ke nsinsi. Edi ata akpa utom oro nnyịn ikọbọde ekedi editan̄a eti mbụk Obio Ubọn̄ esie. (1 Thessalonica 2:4) Nnyịn isise didie utom emi Abasi ọnọde nnyịn mi? Ukem nte akparawa oro, nnyịn iyom ndinam enye ke ofụri ukeme nnyịn, ye ifịk, ye idatesịt—ih, ye ọkpọsọn̄ udọn̄!
3. Nso ke oyom man okụt unen nte asan̄autom eti mbụk?
3 Edi akpanikọ, ndinyene utọ in̄wan̄în̄wan̄ edu oro ekeme ndidi n̄kpọ-ata. Ke adianade ye utom ukwọrọikọ nnyịn, nnyịn imenyene ediwak mbiomo efen, ẹmi ndusụk mmọ ẹyomde ekese ẹto nnyịn ke n̄kan̄ eke ikpọkidem ye ke n̄kan̄ eke ntụk. Ke ediwak idaha, nnyịn imesidomo ndise mban̄a mme n̄kpọ ẹmi ke adan̄aemi inọde utom ukwọrọikọ ntịn̄enyịn oro ekemde. Edi, enye ekeme ndidi en̄wan oro akade-ka iso. (Mark 8:34, NW) Jesus ama ọsọn̄ọ etịn̄ ete ke nnyịn ndikụt unen nte mme Christian oyoyom ọkpọsọn̄ en̄wan.—Luke 13:24.
4. Didie ke editịmede esịt eke usen ke usen ẹkeme nditụk idaha ekikere eke spirit nnyịn?
4 Ke ntak oro inyenede ata ediwak n̄kpọ ndinam, edi mmemmem ndikop mmemidem m̀mê ndikop mfịghe ke ndusụk idaha. “Ekikere uwem emi” ekeme ndibaba ifịk ye esịtekọm oro inyenede inọ mme edinam ukara Abasi owot. (Luke 21:34, 35; Mark 4:18, 19) Ke ntak unana mfọnmma nnyịn, nnyịn imekeme ndikpọn̄ ‘akpa ima nnyịn.’ (Ediyarade 2:1-4) Ndusụk ikpehe utom oro inamde inọ Jehovah ẹkeme ndikabade ndi ikpîkpu edinam ofụri ini. Didie ke Bible ọnọ nsịnudọn̄ ẹyomde man ika iso inyene ifịk ke utom ukwọrọikọ?
Nte “Ikan̄ Eke Asakde” ke Esịt Nnyịn
5, 6. Didie ke apostle Paul ekese ifetutom esie ndikwọrọ ikọ?
5 Utom ukwọrọikọ oro Jehovah ọnọde nnyịn etịm ọsọn̄ urua akan se ikpesede nte mfefere n̄kpọ. Apostle Paul ekese edikwọrọ eti mbụk nte ata akwa ifetutom, ndien enye ekese idemesie nte owo oro mîdotke se ẹkpenọde utom oro. Enye ọkọdọhọ ete: “Ẹkenọ mi, emi n̄kpride n̄kan ata andikpri n̄kan ke otu ikọt Abasi, ufọn emi, ẹte n̄kwọrọ nnọ mme Gentile uwak inyene Christ, eke owo mîkemeke ndidụn̄ọde mma: nnyụn̄ nnam an̄wan̄a kpukpru owo enyịn nte Abasi akadade ayarade ndịbe-n̄kpọ Esie, emi ọtọn̄ọde mme eyo edịbe ke Abasi, emi edide Andibot kpukpru n̄kpọ.”—Ephesus 3:8, 9.
6 In̄wan̄în̄wan̄ edu oro Paul ekenyenede aban̄a utom ukwọrọikọ esie edi ata eti uwụtn̄kpọ ọnọ nnyịn. Ke leta oro enye ekewetde ọnọ ẹsọk mbon Rome, enye ọkọdọhọ ete: “Ke n̄kan̄ mi, mmeben̄e idem ndikwọrọ gospel.” Bụt ikanamke enye ye eti mbụk. (Rome 1:15, 16) Enye ama enyene nnennen edu ama onyụn̄ enyene ọkpọsọn̄ udọn̄ ndinam utom ukwọrọikọ esie.
7. Ke leta oro enye ekewetde ọnọ ẹsọk mbon Rome, nso ke Paul okodụri mmọ utọn̄ aban̄a?
7 Apostle Paul ama ọfiọk ke oyom ẹnyene ifịk ifịk idaha ekikere, ntre enye ama eteme mme Christian ke Rome ete: “Ẹkûtek ke ifịk mbufo; ẹnyene ifiopesịt ke spirit; ẹnam utom ẹnọ Ọbọn̄.” (Rome 12:11) Ikọ Greek oro ẹkabarede “ẹkûtek ke ifịk” ọnọ ekikere edidi “mmeme, ifu.” Ke adan̄aemi ekemede ndidi nnyịn itekke ubọk ke utom ukwọrọikọ nnyịn, oyom kpukpru nnyịn idu ke edidemede iban̄a mme idiọn̄ọ mmeme eke spirit inyụn̄ inam mme edinen̄ede oro ẹdotde ke edu nnyịn edieke nnyịn ikụtde mme utọ idiọn̄ọ oro ke idem nnyịn.—Mme N̄ke 22:3.
8. (a) Nso ikakabade itie nte “ikan̄ eke asakde” ke esịt Jeremiah, ndien ntak-a? (b) Nso ke nnyịn ikeme ndikpep nto ifiọk n̄kpọntịbe Jeremiah?
8 Spirit Abasi ekeme n̄ko ndin̄wam nnyịn ke ini ikopde mmemidem. Ke uwụtn̄kpọ, ke idaha kiet prọfet Jeremiah ama okop mmemidem, ndien enye ama oyom nditre utom editịn̄ ntịn̄nnịm ikọ esie. Enye ama akam etịn̄ aban̄a Jehovah ete: “Ndisiakke aba enye, ndinyụn̄ ndọhọke aba ke enyịn̄ esie.” Nte emi ekedi uyarade ata unana ukeme eke spirit ke n̄kan̄ Jeremiah? Baba. Ke akpanikọ, nsọn̄idem eke spirit Jeremiah, ima oro enye ekenyenede ọnọ Jehovah, ye ifịk oro enye ekenyenede ọnọ akpanikọ ẹma ẹnọ enye odudu ndika iso ntịn̄ ntịn̄nnịm ikọ. Enye anam an̄wan̄a ete: “Ndien [ikọ Jehovah] odu mi ke esịt nte ikan̄ eke asakde, esịne mi ke ọkpọ, ndien n̄n̄wana ndimụm idemmi n̄kama, tutu akak.” (Jeremiah 20:9) Edi ndammana n̄kpọ mme anam-akpanikọ asan̄autom Abasi ndikop mmemidem ke ini ke ini. Edi ke ini mmọ ẹbọn̄de akam ẹnọ Jehovah ẹyom un̄wam, enye ọyọfiọk esịt mmọ, onyụn̄ ọnọ mmọ edisana spirit esie edieke mmọ, ukem nte Jeremiah, ẹnyenede ikọ esie ke esịt mmọ.—Luke 11:9-13; Utom 15:8.
“Ẹkûnịme Spirit”
9. Nso ikeme ndibiọn̄ọ utom oro edisana spirit akpanamde ke ufọn nnyịn?
9 Apostle Paul ama ọnọ mbon Thessalonica item ete: “Ẹkûnịme Spirit.” (1 Thessalonica 5:19) Ih, mme edinam ye edu oro ẹtuahade ye mme edumbet Abasi ẹkeme ndibiọn̄ọ utom oro edisana spirit akpanamde ke ufọn nnyịn. (Ephesus 4:30) Mme Christian mfịn ẹnyene utom edikwọrọ eti mbụk. Nnyịn imokpono ifetutom emi etieti. Idịghe n̄kpọ n̄kpaidem nte ke mbon oro mîfiọkke Abasi ẹse utom ukwọrọikọ nnyịn ke ndek. Edi ke ini Christian okoide-koi ofụmi utom ukwọrọikọ esie, emi ekeme ndisụn̄ọ ke spirit Abasi oro esinụkde owo anam n̄kpọ ndinịme.
10. (a) Didie ke ekikere ekemmọ owo ekeme nditụk nnyịn? (b) Nso n̄kokon̄ ekikere aban̄ade utom ukwọrọikọ nnyịn ke ẹwụt ke 2 Corinth 2:17?
10 Ndusụk owo oro mîdụhe ke esịt esop Christian ẹkeme ndise utom ukwọrọikọ nnyịn nte ikpîkpu edisuan mme n̄wed. Mbon eken ẹkeme ndibiere ke ndudue ẹte ke nnyịn isisan̄a ke ufọk ke ufọk man ibọ mme etịbe. Edieke nnyịn iyakde mme utọ etikwo etikwo ekikere oro ẹtụk edu nnyịn, emi ekeme ndisụhọde uforo nnyịn ke utom ukwọrọikọ. Utu ke ndiyak mme utọ ekikere oro ẹtụk nnyịn, ẹyak nnyịn isọn̄ọ inyene ekikere oro Jehovah ye Jesus ẹnyenede ẹban̄a utom ukwọrọikọ nnyịn. Apostle Paul eketịn̄ aban̄a utọ n̄kokon̄ ekikere oro ke ini enye ọkọdọhọde ete: “Nnyịn itiehe nte ediwak owo ẹmi ẹnyanyam ikọ Abasi ẹn̄wana udori; edi itịn̄ ikọ ke Christ ke iso Abasi, nte owo emi edide owo akpanikọ ye owo Abasi etịn̄de.”—2 Corinth 2:17.
11. Nso ikan̄wam mme akpa Christian ndika iso nnyene ifịk idem ke ẹkọbọde mmọ, ndien didie ke uwụtn̄kpọ mmọ okpotụk nnyịn?
11 Esisịt ini ke Jesus ama akakpa, ẹma ẹkọbọ mme mbet esie ke Jerusalem. Ẹma ẹtịn̄ ikọ ndịghe ẹnyụn̄ ẹwụk mmọ ẹte ẹkûkwọrọ ikọ. Kpa ye oro, Bible ọdọhọ ke mmọ ẹma “ẹyọhọ ye Edisana Spirit, ẹnyụn̄ ẹtịn̄ ikọ Abasi uko-uko.” (Utom 4:17, 21, 31) Mme ikọ oro Paul ekewetde ọnọ ẹsọk Timothy ndusụk isua ke ukperedem ẹwụt in̄wan̄în̄wan̄ idaha ekikere oro mme Christian ẹkpenyenede. Paul ọkọdọhọ ete: “Abasi ikọnọhọ nnyịn spirit ufep, edi spirit odudu ye ima ye mfara-idem. Mmọdo kûyak bụt anam fi ndidi ntiense nnọ Ọbọn̄ nnyịn, kûnyụn̄ uyak bụt anam fi ye ami, owo–n̄kpọkọbi Esie; edi kam tiene gospel biom ukụt, adan̄a nte asan̄ade ekekem ye odudu Abasi.”—2 Timothy 1:7, 8.
Nso Isọn ke Nnyịn Ikama Mbọhọidụn̄ Nnyịn?
12. Nso idi akpan ntak emi nnyịn ikwọrọde eti mbụk?
12 Man inyene nnennen edu iban̄a utom ukwọrọikọ nnyịn, ana nnyịn inyene eti uduakesịt. Ntak emi nnyịn ikwọrọde ikọ? Ẹkụt ata akpan ntak ke mme ikọ andiwet Psalm ẹmi: “Mbon-ima fo ẹnyụn̄ ẹtoro fi [Jehovah]. Mmọ ẹbụk ubom ubọn̄ fo, ẹnyụn̄ ẹtịn̄ ẹban̄a odudu fo. Ẹnyụn̄ ẹnam nditọ owo ẹfiọk ese esie, ye ubom uyai ubọk esie.” (Psalm 145:10-12) Ih, nnyịn ikwọrọ ikọ man itoro Jehovah an̄wan̄wa inyụn̄ inam enyịn̄ esie asana ke iso ofụri ubonowo. Idem ke ini ibat ibat owo ẹkpan̄de utọn̄ ẹnọ nnyịn, nnyịn nditan̄a etop edinyan̄a ke edinam akpanikọ ada itoro ọsọk Jehovah.
13. Nso inụk nnyịn ndisian mbon efen mban̄a idotenyịn edinyan̄a?
13 Nnyịn ikwọrọ ikọ n̄ko ke ntak ima oro inyenede inọ mme owo man inyụn̄ ifep ubiomikpe iyịp. (Ezekiel 33:8; Mark 6:34) Se inyenede ebuana ye emi edi mme ikọ oro Paul eketịn̄de aban̄a mbon oro mîdụhe ke esịt esop Christian ete: “Mmakama mme Greek ye isen owo isọn, ye mbon eti ibuot ye mme ọkọi nde.” (Rome 1:14) Paul ama okụt ke imakama mme owo isọn editan̄a eti mbụk nnọ mmọ, sia edide uduak Abasi ete “kpukpru owo ẹnyene edinyan̄a.” (1 Timothy 2:4) Mfịn, obiomo nnyịn ndinyene ukem ima oro nnọ mbọhọidụn̄ nnyịn. Ima oro Jehovah enyenede ọnọ ubonowo okonụk enye ndinọ Eyen esie edi isọn̄ edikpa ọnọ mmọ. (John 3:16) Oro ekedi akwa uwa. Nnyịn ikpebe ima Jehovah ke ini nnyịn iyakde ini ye ukeme nnyịn isịn ke ndisian mbon efen mban̄a eti mbụk edinyan̄a ọkọn̄ọde ke uwa Jesus.
14. Didie ke Bible etịn̄ aban̄a ererimbot oro edide isio ye esop Christian?
14 Mme Ntiense Jehovah ẹse mme ekemmọ owo nte mbon oro ẹditienede ẹbuana ke itie nditọete Christian ke ini iso. Ana nnyịn ikwọrọ ikọ ye uko, edi uko nnyịn idịghe en̄wan. Ke akpanikọ, Bible esida n̄kpọsọn̄ ikọ ke ini etịn̄de aban̄a ererimbot ke ofụri ofụri. Paul eketịn̄ aban̄a idiọk idaha “ererimbot” ke ini enye etịn̄de aban̄a “ifiọk ererimbot” ye “idiọk udọn̄ ererimbot.” (1 Corinth 3:19; Titus 2:12) Paul n̄ko ama eti mme Christian ke Ephesus ete ke ini oro mmọ ẹkesan̄ade “nte ido eke ererimbot emi edide,” mmọ ẹma ẹkpan̄a ke n̄kan̄ eke spirit. (Ephesus 2:1-3) Mme utịn̄ikọ ẹmi ye mbon eken ẹmi ẹbietde mmọ ẹdu ke n̄kemuyo ye mme ikọ apostle John oro: “Ofụri ererimbot onyụn̄ esịne ke ubọk andidiọk.”—1 John 5:19.
15. Kaban̄a mme owo oro mîdụhe ke esịt esop Christian, nso ke nnyịn mîkpanamke, ndien ntak-a?
15 Nte ededi, ti ete ke mme utọ ikọ oro itịn̄ke iban̄a owo kiet kiet, edi ẹtịn̄ ẹban̄a ererimbot oro adian̄arede ọkpọn̄ Abasi ke ofụri ofụri. Mme Christian idomoke ndibiere nte owo ekededi edinamde n̄kpọ iban̄a utom ukwọrọikọ. Mmọ inyeneke isọn̄ nditịn̄ mban̄a owo ekededi nte ebot. Inaha inọ nnyịn nditịn̄ se utịp edidide ke ini Jesus edide ndibahade “erọn̄ ye ebot.” (Matthew 25:31-46) Jesus edi ebiereikpe emi ẹmekde; idịghe nnyịn. Akande oro, ifiọk n̄kpọntịbe owụt nte ke ndusụk owo oro ẹkekam ẹnen̄erede ẹsịn idem ke oburobụt edinam ẹma ẹnyịme etop Bible, ẹkpụhọde, ẹnyụn̄ ẹkabade ẹdi mme Christian ẹmi ẹdude edisana uwem. Ntem, ke adan̄aemi nnyịn mîdinamke nsan̄a ye ndusụk owo, nnyịn ikpemen̄eke nditịn̄ nnọ mmọ mban̄a idotenyịn Obio Ubọn̄ nte ifet ebererede. N̄wed Abasi etịn̄ aban̄a ndusụk owo oro “nte enende ẹkenyịmede nsinsi uwem,” ke adan̄aemi ẹkesụk ẹdide mbon oro mînịmke ke akpanikọ. Nte ini akakade mmọ ẹma ẹkabade ẹdi mme andinịm ke akpanikọ. (Utom 13:48, NW) Nnyịn idikemeke-keme ndifiọk owo emi edinyịmede ibọhọke nnyịn inọ ikọ ntiense—ndusụk ediwak ini. Ye emi ke ekikere, nnyịn isinam n̄kpọ ye mbon oro mînyịmeke etop edinyan̄a kan̄a ke “nsụkesịt” ye “ido uten̄e,” idoride enyịn ite ke ndusụk ke otu mmọ ẹkeme ndinyịme etop uwem emi nte ini akade.—2 Timothy 2:25; 1 Peter 3:15.
16. Nso idi ntak kiet emi oyomde nnyịn ifori “usọ unọ ukpep”?
16 Ndifori usọ nte mme andikpep eyetịp esịn ke ifịk oro nnyịn inyenede nditan̄a eti mbụk. Ke ndinam an̄wan̄a: Inem inem mbre m̀mê mbre mbuba ekeme nditre ndinem owo oro mîdiọn̄ọke nte ẹbrede. Edi enye edi edinem mbre ọnọ owo oro ọdiọn̄ọde ndibre enye mfọn mfọn. Ukem ntre, mme Christian oro ẹforide “usọ unọ ukpep” ẹsinam inemesịt oro mmọ ẹnyenede ke utom ukwọrọikọ ọkọri. (2 Timothy 4:2; Titus 1:9, NW) Paul ọkọnọ Timothy item ete: “Sịn ifịk wụt Abasi idem fo, ete idi owo eke ẹdomode ẹfiọk, anam-utom eke mînyeneke ntak ndikop bụt, edi itịmde isiak ikọ akpanikọ.” (2 Timothy 2:15) Didie ke nnyịn ikeme ndifori usọ unọ ukpep nnyịn?
17. Didie ke nnyịn ikeme ‘ndikọri ọkpọsọn̄ udọn̄’ nnọ ifiọk Bible, ndien didie ke utọ ifiọk oro edinyene ufọn inọ utom ukwọrọikọ nnyịn?
17 Usụn̄ kiet edi ndikọ nnennen ifiọk efen efen. Apostle Peter esịn udọn̄ ọnọ nnyịn ete: “Nte nsek-nditọ, [ẹkọri ọkpọsọn̄ udọn̄ ẹnọ, NW] ata mmọn̄-eba Spirit, man mbufo ẹda enye ẹkọri ẹsịm edinyan̄a.” (1 Peter 2:2) Nsekeyen oro okopde nsọn̄idem esiyom mmọn̄eba ke ndammana usụn̄. Nte ededi, ekeme ndiyom Christian ‘ọkọkọri ọkpọsọn̄ udọn̄’ ọnọ ifiọk Bible. Ẹkeme ndinam emi ebe ke ndikọri eti edu edikpep ye edikot n̄wed. (Mme N̄ke 2:1-6) Ẹyom ukeme ye unọ idem ntụnọ edieke anade nnyịn ikabade idi mme andikpep Ikọ Abasi oro ẹnyenede usọ, edi mme utọ ukeme oro ẹsida mme utịp ẹdi. Idatesịt otode edidụn̄ọde Ikọ Abasi ayanam nnyịn inyene ifiopesịt ke spirit Abasi, inyenede ọkpọsọn̄ udọn̄ ndibuana mme n̄kpọ oro ikpepde ye mbon efen.
18. Didie ke mme mbono esop Christian ẹkeme nditịm nnyịn idem nditịm nsiak ikọ akpanikọ?
18 Mme mbono esop Christian n̄ko ẹnyene akpan udeme ke nnyịn ndida Ikọ Abasi nnam n̄kpọ usọ usọ. Ke ini ẹkotde mme itie Bible ke utịn̄ikọ an̄wa ye ke mme nneme N̄wed Abasi eken, ọkpọfọn nnyịn nditiene nse nte ẹkotde ke Bible nnyịn. Nnyịn iwụt eti ibuot ke nditịm nnọ n̄kpan̄utọn̄ ke mme ikpehe mbono esop, esịnede mme ikpehe oro ẹnyenede n̄kpọ ndinam akpan akpan ye utom ukwọrọikọ nnyịn. Nnyịn ikpedehede ida mme nnamn̄wụt ke usụhọde, ndusụk itrede ndinọ n̄kpan̄utọn̄. N̄ko-n̄ko, emi oyom edinọ idem ntụnọ ye edinọ ntịn̄enyịn. (1 Timothy 4:16) Mme mbono Christian ẹsibọp mbuọtidem nnyịn, ẹn̄wam nnyịn ndikọri ọkpọsọn̄ udọn̄ nnọ Ikọ Abasi, ẹnyụn̄ ẹnọ nnyịn ukpep ndidi mme ifịk ifịk anditan̄a eti mbụk.
Nnyịn Imekeme Ndiberi Edem ke Un̄wam Jehovah
19. Ntak emi edibuana ke utom ukwọrọikọ kpukpru ini edide akpan n̄kpọ?
19 Mme Christian oro ẹnyenede “ifiopesịt ke spirit” ẹnyụn̄ ẹnyenede ọkpọsọn̄ udọn̄ nditan̄a eti mbụk ẹsidomo ndibuana ke utom ukwọrọikọ kpukpru ini. (Ephesus 5:15, 16) Edi akpanikọ, mme idaha ẹkpụhọde, ndien idịghe kpukpru owo ẹkeme ndisịn ukem ini ke utom unyan̄a uwem emi. (Galatia 6:4, 5) Kpa ye oro, eyedi adan̄a ediwak ini oro nnyịn itịn̄de ikọ inọ mbon en̄wen iban̄a idotenyịn nnyịn edi akpan n̄kpọ akan ofụri ini oro nnyịn isịnde ke utom ukwọrọikọ nnyịn. (2 Timothy 4:1, 2) Adan̄a nte nnyịn ikwọrọde ikọ, ntre ke nnyịn idikụt nte utom emi edide akpan n̄kpọ. (Rome 10:14, 15) Nnyịn iyọkọri edu mbọm ke ini nnyịn kpukpru ini isobode mme owo oro ẹsemede ẹnyụn̄ ẹtuan̄ade oro mînyụn̄ inyeneke idotenyịn.—Ezekiel 9:4; Rome 8:22.
20, 21. (a) Nso utom osụk ododu nnyịn ke iso? (b) Didie ke Jehovah ọnọ ukeme nnyịn ibetedem?
20 Jehovah ayak eti mbụk ọnọ nnyịn. Emi edi akpa utom oro nnyịn ibọde enye nte “mme anam-utom” esie. (1 Corinth 3:6-9) Nnyịn imenyene ọkpọsọn̄ udọn̄ ndibiom mbiomo emi Abasi ọnọde mi ke ofụri ukpọn̄, ye ke ofụri ukeme nnyịn. (Mark 12:30; Rome 12:1) Ediwak mbon esịt akpanikọ ẹsụk ẹdodu ke ererimbot ẹmi ẹkopde biọn̄ akpanikọ. Ekese utom ẹdu ndinam, edi nnyịn imekeme ndiberi edem ke un̄wam Jehovah nte nnyịn inamde utom nnyịn ima.—2 Timothy 4:5.
21 Jehovah ọmọnọ nnyịn spirit esie onyụn̄ etịm nnyịn idem ye “ofụt spirit,” kpa Ikọ Abasi. Ye un̄wam esie nnyịn imekeme nditat inua nnyịn “ntịn̄ ikọ nyarade ndịbe-n̄kpọ gospel ye uko.” (Ephesus 6:17-20) Ẹyak ẹda se apostle Paul ekewetde ọnọ ẹsọk mme Christian ke Thessalonica ẹtịn̄ ẹban̄a nnyịn: “Gospel nnyịn ikedịghe ke ọtọ mbufo nte ikọ ikpọn̄, edi ekedi ke odudu, ye ke Edisana Spirit ye ke mbụre edikan.” (1 Thessalonica 1:5) Ih ẹyak nnyịn itan̄a eti mbụk ifịk ifịk!
Ibio Ibio Ndụn̄ọde
• Ke ntak editịmede esịt eke uwem, nso ikeme nditịbe nnọ ifịk oro nnyịn inyenede ke utom ukwọrọikọ nnyịn?
• Ke nso usụn̄ ke udọn̄ oro nnyịn inyenede nditan̄a eti mbụk ekpebiet “ikan̄ eke asakde” ke esịt nnyịn?
• Mme etikwo etikwo edu ewe ẹban̄ade ukwọrọikọ ke nnyịn ikpefep?
• Ke ofụri ofụri, didie ke nnyịn ikpese mbon oro mîbuanake mme edinịm ke akpanikọ nnyịn?
• Didie ke Jehovah an̄wam nnyịn imụm ifịk oro inyenede ke utom ukwọrọikọ ikama?
[Mme Mbụme Ukpepn̄kpọ]
[Mme ndise ke page 9]
Mme Christian ẹkpebe ifịk oro Jeremiah ye Paul ẹkenyenede
[Mme ndise ke page 10]
Ima oro inyenede inọ Jehovah ye mbọhọidụn̄ edemede ọkpọsọn̄ udọn̄ oro nnyịn inyenede ke utom ukwọrọikọ