Nti Uwụtn̄kpọ​—Ndi Afo ke Ọbọ Ufọn Oto Mmọ?

“MBUFO [ẹma] ẹkabade ẹdi uwụtn̄kpọ ẹnọ kpukpru owo eke ẹnịmde ke akpanikọ ke Macedonia ye Achaia.” Apostle Paul ekewet mme ikọ ẹmi ọnọ ẹsọk mme anam-akpanikọ Christian oro ẹkedụn̄de ke Thessalonica. Uwụtn̄kpọ emi mmọ ẹkenịmde ẹnọ mme ekemmọ andinịm ke akpanikọ ama enen̄ede odot itoro. Edi, mbon Thessalonica ke idemmọ ẹkekpebe uwụtn̄kpọ oro Paul ye mme nsan̄a esie ẹkenịmde. Paul ọkọdọhọ ete: “Gospel nnyịn ikedịghe ke ọtọ mbufo nte ikọ ikpọn̄, edi ekedi ke odudu, ye ke edisana spirit, ye ke mbụre edikan. Mbufo nde ẹmefiọk orụk owo eke nnyịn iwụtde idem ke otu mbufo, man ọfọn ye mbufo. Mbufo ẹma ẹnyụn̄ ẹkabade ẹdi mme andikpebe nnyịn.”—1 Thessalonica 1:5-7.

Ih, Paul ama anam se ikande edikwọrọ ikọ. Edu uwem esie ama ọkwọrọ ikọ—uwụtn̄kpọ mbuọtidem, ime, ye n̄waidem. Ke ntak emi, Paul ye mme nsan̄a esie ẹma ẹnyene ọkpọsọn̄ odudu ke uwem mbon Thessalonica, ẹnụkde mmọ ndinyịme akpanikọ “ke ufọt ọkpọsọn̄ ukụt.” Nte ededi, Paul ye mme nsan̄autom esie ikedịghe n̄kukụre mbon oro ẹkenyenede odudu ke idem mme andinịm ke akpanikọ oro ke baba usụn̄ kiet. Uwụtn̄kpọ mbon en̄wen ẹmi ẹkeyọde ukụt ekedi n̄kpọ nsịnudọn̄ n̄ko. Paul ekewet ọnọ mbon Thessalonica ete: “Mbufo, nditọ-ete, ẹmekabade ẹdi mme andikpebe mme ufọk Abasi ẹmi ẹdude ke Judea ke Christ Jesus; koro mbufo ẹmekụt ukem-ukem ukụt ke ubọk mbio-obio mbufo, kpa nte mmọ ẹkụtde ke ubọk mme Jew.”—1 Thessalonica 2:14.

Christ Jesus—Akakan Uwụtn̄kpọ

Okposụkedi Paul ke idemesie ekenịmde uwụtn̄kpọ oro odotde ẹkpebe, enye iketreke ndinyan ubọk n̄wụt Jesus Christ nte akakan uwụtn̄kpọ oro mme Christian ẹkpekpebede. (1 Thessalonica 1:6) Christ ekedi onyụn̄ edi akakan Uwụtn̄kpọ nnyịn. Apostle Peter ekewet ete: “Ẹkekot mbufo ẹte ẹdinam oro; koro Christ ke Idem Esie ama okụt ndutụhọ kaban̄a mbufo, onyụn̄ ọkpọn̄ uwụtn̄kpọ ọnọ mbufo, ete, mbufo ẹkpetiene ẹsan̄a ke nde ikpat Imọ.”—1 Peter 2:21.

Nte ededi, Jesus ama okụre uwem esie nte owo ke se ikperede ndisịm isua 2,000 ẹmi ẹkebede. Idahaemi enye ‘odụn̄ ke un̄wana eke owo mîkemeke ndisan̄a n̄kpere’ nte edibotn̄kpọ eke spirit oro mîkemeke ndikpa. Ke ntre, ‘akanam owo ikwe enye, idinyụn̄ ikemeke ndikụt.’ (1 Timothy 6:16) Do, didie ke nnyịn ikeme ndikpebe enye? Usụn̄ kiet edi ke ndikpep mbụk Bible inan̄ ẹban̄ade uwem Jesus. Mme Gospel oro ẹnọ ikike ẹban̄a edu, usụn̄ uwem, ye “orụk esịt” emi enye ekenyenede. (Philippi 2:5-8) Ẹkeme ndinyene ikike efen efen ebe ke nditịn̄ enyịn n̄kpep n̄wed Akakan Owo Oro Akanam Odude Uwem, emi etịn̄de aban̄a mme n̄kpọntịbe ke uwem Jesus ata ọyọhọ ọyọhọ ye ke adiana ke adiana. *

Uwụtn̄kpọ n̄waidem Jesus ama enyene ọkpọsọn̄ odudu ke idem apostle Paul. Enye ọkọdọhọ mme Christian ke Corinth ete: “Mmenyịme ke uyọhọ idatesịt ndida se nnyenede nnam n̄kpọ, ndinyụn̄ nda idem mi nnam n̄kpọ nnọ ukpọn̄ mbufo.” (2 Corinth 12:15) Nso mbiet edu Christ ke emi edi ntem! Nte nnyịn ikerede iban̄a mfọnmma uwụtn̄kpọ Christ, emi ekpenyene ndinụk nnyịn n̄ko ndikpebe enye ke usụn̄ uwem nnyịn.

 Ke uwụtn̄kpọ, Jesus ama ekpep nnyịn ete ke ikpenyene ndibuọt idem ke un̄wọn̄ọ Abasi ndinọ nnyịn n̄kpọ eke obụk. Edi enye ama anam se ikande oro. Enye ama owụt utọ mbuọtidem oro ke Jehovah ke usen ke usen. Enye ọkọdọhọ ete: “Ebua-ikọt ẹnyene ndudu, inuen enyọn̄ ẹnyụn̄ ẹnyene mme efọk; edi Eyen owo inyeneke ọtọ eke odoride ibuot Esie.” (Matthew 6:25; 8:20) Ndi mme udọn̄ n̄kpọ obụkidem ẹsikara mme ekikere ye edinam fo? Mîdịghe ndi uwem fo ọnọ uyarade nte ke afo ke ebem iso oyom Obio Ubọn̄? Ndien nso kaban̄a edu fo ke utom Jehovah? Ndi enye edi ukem ye eke Uwụtn̄kpọ nnyịn, Jesus? Bible owụt ete ke Jesus ikọkwọrọke-kwọrọ iban̄a ifịk kpọt edi ama owụt ọkpọsọn̄ ifịk ke ediwak idaha. (John 2:14-17) Ke adianade do, nso eti uwụtn̄kpọ ima ke Jesus ekenịm ntem! Kamse, enye ama ayak uwem esie ọnọ kaban̄a mme mbet esie! (John 15:13) Ndi afo emekpebe Jesus ebe ke ndinyene ima nnọ nditọete Christian fo? Mîdịghe nte afo amayak mme unana mfọnmma ndusụk owo ẹbiọn̄ọ fi ndinyene ima nnọ mmọ?

Ke adan̄aemi nnyịn isịnde ukeme ndikpebe uwụtn̄kpọ Christ, ediwak ini nnyịn iyedue. Edi ke akpanikọ Jehovah adat esịt ke ukeme oro nnyịn isịnde ‘ndimen Ọbọn̄ Jesus Christ nsịne.’—Rome 13:14.

‘Ẹdi Uwụtn̄kpọ Ẹnọ Mme Erọn̄’

Nte mme owo ẹdu ke esop mfịn ẹmi ẹkemede ndidi uwụtn̄kpọ nnọ nnyịn? Ke akpanikọ ẹdu! Nditọete ẹmi ẹkamade ifetutom akpan akpan ana ẹdi uwụtn̄kpọ. Paul ọkọdọhọ Titus, emi akanamde utom ke mme esop ke Crete onyụn̄ emekde mme esenyịn, ete ke ebiowo kiet kiet oro ẹmekde enyene ndidi “owo eke mîbiomke enye ikọ.” (Titus 1:5, 6) Ukem ntre, apostle Peter ama eteme “mbiowo” ete ẹnịm idem ke “uwụt-n̄kpọ ẹnọ mme erọn̄.” (1 Peter 5:1-3) Ndien nso kaban̄a mbon oro ẹnamde utom nte mme asan̄autom unamutom? Ana mmọ kpasụk ntre ẹdi “mmọ ẹmi ẹtịmde ẹnam utom.”—1 Timothy 3:13.

Nte ededi, idịghe ata idem n̄kpọ ndidori enyịn nte ke kpukpru mbiowo ye asan̄autom unamutom ẹyenyene n̄wọrọnda usọ ke kpukpru ikpehe utom Christian. Paul ọkọdọhọ mme Christian ke Rome ete: ‘Nnyịn inyene enọ eke ẹdide nsio-nsio, nte asan̄ade ekekem ye mfọn eke ẹnọde nnyịn.’ (Rome 12:6) Nsio nsio nditọete ẹnyene nsio nsio ukeme. Iwụtke eti ibuot ndidori enyịn nte ke mbiowo ẹyenam kpukpru n̄kpọ ẹnyụn̄ ẹtịn̄ kpukpru ikọ ke mfọnmma usụn̄. Bible ọdọhọ ke James 3:2 ete: “Kpukpru nnyịn idedue ke ediwak n̄kpọ. Edieke owo ekededi mîduehe ke ikọ-inua, enye ọfọn ama, onyụn̄ ekeme ndikara ofụri idem esie nde.” Nte ededi, kpa ye mme unana mfọnmma mmọ, mbiowo ẹsụk ẹkekeme ‘ndidi uwụtn̄kpọ nnọ mmọ ẹmi ẹnịmde ke akpanikọ, ke ikọ-inua, ye ke edu uwem, ye ke ima, ye ke mbuọtidem, ye ke edisana ido,’ ukem nte Timothy. (1 Timothy 4:12) Ke ini mbiowo ẹnamde ntre, mbon oro ẹdude ke otuerọn̄ ẹyenyịme ndinam item Mme Hebrew 13:7: “Ẹti mmọ ẹmi ẹkedade mbuot usụn̄. . . . Ẹtịm ẹse se uwem mmọ ọwọrọde ke akpatre, ẹnyụn̄ ẹkpebe mbuọtidem mmọ.”

Mme Uwụtn̄kpọ En̄wen ke Eyomfịn

Ke iduọk isua ifan̄ ẹmi ẹkebede, anana-ibat mbon efen ẹmewụt idem nte idide nti uwụtn̄kpọ. Nso kaban̄a ediwak tọsịn isụn̄utom oro ẹwade idem, ẹmi ‘ẹkpọn̄de ufọk, m̀mê nditọ-eka iren, m̀mê nditọ-eka iban, m̀mê ete, m̀mê eka, m̀mê nditọ, m̀mê isọn̄’ man ẹnam utom Christian ke an̄wautom isenidụt? (Matthew 19:29) Kere n̄ko ban̄a mme esenyịn oro ẹsan̄ade-san̄a ye iban mmọ, iren ye iban oro ẹnamde utom unyịmesịt ke mme ọfis Watch Tower Society, ye mme asiakusụn̄ oro ẹnamde utom ẹnọ mme esop. Nte mme utọ uwụtn̄kpọ oro ẹkeme ndisịn udọn̄ nnọ mbon efen? Christian ọkwọrọ eti mbụk kiet ke Asia eti isụn̄utom eke ọyọhọ otu itiaita eke Ufọkn̄wed Enyọn̄-Ukpeme Ukpep Bible eke Gilead. Enye etịn̄ ete ke anam-akpanikọ eyenete emi ama “enyịme ndiyọ uwak ọbọn̄ ye ata mbịtmbịt ofụm. . . . N̄kpọ  efen oro eketịmde otụk mi ekedi ukeme esie ndikwọrọ ikọ ke usem Chinese ye Malay okposụkedi enye okotode England.” Nso ikedi utịp eti uwụtn̄kpọ emi? Eyenete oro ọkọdọhọ ete: “Sụn̄sụn̄ ido ye uko esie ẹma ẹnam ọdọn̄ mi ndikabade ndi isụn̄utom ke mma n̄kọkọri n̄wọrọ owo.” Idịghe n̄kpọ n̄kpaidem, eyenete emi ama akabade edi isụn̄utom.

Watch Tower Publications Index ọdọn̄ọ udịm udịm mbụk uwem oro ẹdude ke magazine Enyọn̄-Ukpeme ye Awake! Mme mbụk ẹmi ẹban̄a mme owo ẹmi ẹkesịnde mme ubọkọkọ ye utịtmbuba ererimbot, ẹkan mme mmeme, ẹnam mme n̄wọrọnda ukpụhọde ke edu uwem, ẹmụm nti idaha ekikere ẹkama kpa ye idiọk idaha, ẹnyụn̄ ẹnyene ifịk, ime, edinam akpanikọ, nsụhọdeidem, ye edu n̄waidem. Andikot kiet ama ewet aban̄a mme mbụk ẹmi ete: “Nte n̄kotde mban̄a se mmọ ẹsobode, mmọ ẹnam mi ndi Christian oro enen̄erede enyene nsụkidem ye esịtekọm, ẹnyụn̄ ẹn̄wam mi n̄kûbat idemmi ke n̄kpọ n̄kaha m̀mê ndidi ibụk.”

Ke adianade do, kûfre nti uwụtn̄kpọ ẹmi ẹdude ke esop mbufo: mme ibuot ubon ẹmi mîtreke ndise mban̄a se ubon mmọ ẹyomde ke n̄kan̄ eke obụk ye eke spirit; nditọete iban—esịnede mme eka oro ẹbọkde nditọ ikpọn̄ ke adan̄aemi ẹsụk ẹbuanade ifịk ifịk ke utom ukwọrọikọ; mbon usọn̄ ye mbon n̄kpọnnam, ẹmi ẹkade iso ndinam akpanikọ kpa ye mmeme ye unana nsọn̄idem. Nte mme utọ uwụtn̄kpọ oro isịnke udọn̄ inọ fi?

Edi akpanikọ, ererimbot ọyọhọ ye ndiọi uwụtn̄kpọ. (2 Timothy 3:13) Kpa ye oro, kere ban̄a nsịnudọn̄ oro Paul ọkọnọde mme Christian oro ẹkedụn̄de ke Judea. Ke ama akasiak nti uwụtn̄kpọ edu uwem ediwak iren ye iban mbuọtidem eke eset, apostle Paul ama akpak mmọ ete: “Mmọdo, sia otu ntiense eke ẹwakde ntem ẹkande nnyịn ẹkụk, . . . ẹyak nnyịn ifehe mbuba eke anade nnyịn ke iso ye ime, iwụk enyịn ise Jesus, Anditọn̄ọ mbuọtidem nnyịn ye Andinam enye ọfọn ama.” (Mme Hebrew 12:1, 2) ‘Ediwak otu’ nti uwụtn̄kpọ—eke eset ye eke eyomfịn—ẹkan mme Christian mfịn ẹkụk n̄ko. Ndi afo ke enen̄ede ọbọ ufọn oto mmọ? Afo emekeme ndibọ ufọn nto mmọ edieke ebierede nditre ‘ndikpebe se idiọkde, edi ekpebede se ifọnde.’—3 John 11.

[Mme Ikọ idakisọn̄]

[Se Ẹwetde ke Ikpọ Abisi ke page 20]

Idịghe ata idem n̄kpọ ndidori enyịn nte ke kpukpru mbiowo ye asan̄autom unamutom ẹyenyene n̄wọrọnda usọ ke kpukpru ikpehe utom Christian

[Mme ndise ke page 21]

Mbiowo ẹnyene ‘ndinịm idem nte uwụt-n̄kpọ nnọ mme erọn̄’