Idotenyịn Ediset Ke N̄kpa Enyene Odudu
Idotenyịn Ediset Ke N̄kpa Enyene Odudu
‘N̄kayak kpukpru n̄kpọ ẹtak man n̄kpọfiọk [Jesus Christ] ye odudu ediset Esie.’—PHILIPPI 3:8-10.
1, 2. (a) Ediwak isua ko ke edem, didie ke ọkwọrọ ederi kiet eketịn̄ aban̄a ediset ke n̄kpa? (b) Didie ke ediset ke n̄kpa edida itie?
KE NTỌN̄Ọ ntọn̄ọ iduọk isua 1890, ufọkutom usuanetop kiet ama ọtọt aban̄a n̄wọrọnda utịn̄ikọ emi ọkwọrọ ederi kiet ọkọnọde ke Brooklyn, New York, U.S.A. Enye ọkọdọhọ ke ediset ke n̄kpa eyesịne edifiak ntan̄ mbok nnyụn̄ nsịn uwem ke kpukpru ọkpọ ye obụkidem oro ẹkedude ke idemowo, edide ẹkewot enye ke ikan̄ m̀mê mbabuat n̄kpọntịbe, edide unam akata m̀mê ama akabade edi udia ọnọ eto. Ọkwọrọ ederi oro ama ọsọn̄ọ etịn̄ ete ke usen kiet edide hour 24, ofụm ọyọyọhọ ye ubọk, ukot, ọkpọ, esịp, ye ikpaidem ediwak biliọn owo oro ẹkekpan̄ade. Mbakidem emi ẹyesan̄a ẹyom mbakidem eken ẹtode ukem ikpọkidem. Ekem mme ukpọn̄ ẹyeto ke heaven ye hell ẹdidụk mme ikpọkidem emi ẹnamde ẹset mi.
2 Ediset ke n̄kpa ebe ke edifiak ntan̄ akpa n̄kpatan̄a n̄kpọ idemowo mbọk isịneke ifiọk, ndien mme owo inyeneke ukpọn̄ eke mîkemeke ndikpa. (Ecclesiastes 9:5, 10; Ezekiel 18:4) Iyomke Jehovah, Abasi ediset ke n̄kpa, afiak atan̄ mme n̄kpatan̄a n̄kpọ oro ẹkenamde idemowo ke akpa obok. Enye ekeme ndibot obufa ikpọkidem nnọ mbon oro ẹnamde ẹset. Jehovah ọmọnọ Eyen esie, Jesus Christ, odudu ndinam mme akpan̄kpa ẹset, ye ifet ndinyene nsinsi uwem. (John 5:26) Ntre Jesus ama ọdọhọ ete: “Ami ndi ediset ye uwem: owo eke ọbuọtde idem ye Ami, okposụk edi nte enye ama akpa, enye oyodu uwem.” (John 11:25, 26) Nso ima ima un̄wọn̄ọ ke emi edi ntem! Enye ọsọn̄ọ nnyịn idem ndiyọ mme idomo ye idem ndisobo n̄kpa nte mme anam-akpanikọ Ntiense Jehovah.
3. Ntak emi okoyomde Paul ọsọn̄ọ etịn̄ aban̄a ediset ke n̄kpa?
3 Ediset ke n̄kpa idụhe ke n̄kemuyo ye ukpepn̄kpọ oro nte ke owo enyene ukpọn̄ eke mîkemeke ndikpa—kpa ukpepn̄kpọ owo akwaifiọk Greece oro Plato. Ntre, nso iketịbe ke ini apostle Paul ọkọkwọrọde ikọ ọnọ mme ọwọrọiso owo Greece ke Areopagus ke Athens, etịn̄de aban̄a Jesus, onyụn̄ ọdọhọde ete ke Abasi akanam enye eset ke n̄kpa? Mbụk oro ọdọhọ ete: “Ke ini mmọ ẹkopde ẹban̄a ediset ke n̄kpa, ndusụk mmọ ẹsak enye.” (Utom 17:29-34) Ediwak mbon oro ẹkekụtde Jesus Christ oro ẹkenamde eset ke n̄kpa ke ẹkesụk ẹdodu uwem, ndien ẹma ẹsọn̄ọ ẹtịn̄ ẹte ke ẹma ẹnam enye eset ke n̄kpa, kpa ye nsahi. Edi mme nsunsu andikpep oro ẹkebuanade ye esop Corinth ẹma ẹfan̄a ediset ke n̄kpa oro. Paul ke ntre ama ọsọn̄ọ etịn̄ aban̄a ukpepn̄kpọ Christian emi ke 1 Corinth ibuot 15. Edidụn̄ọde mme mfan̄a esie ye ntịn̄enyịn owụt ke usụn̄ oro owo mîkemeke ndineni nte ke idotenyịn ediset ke n̄kpa edi akpanikọ onyụn̄ enyene odudu.
Ọkpọsọn̄ Uyarade Kaban̄a Ediset ke N̄kpa Jesus
4. Nso uyarade nte ke mme owo ẹma ẹkụt ediset ke n̄kpa Jesus ke Paul ọkọnọ?
4 Tịm fiọk nte Paul ọkọtọn̄ọde utịn̄ikọ esie. (1 Corinth 15:1-11) Ibọhọke mbon Corinth ẹkekabade ẹdi mme andinịm ke akpanikọ ke ikpîkpu, mmọ ẹyesọn̄ọ ẹmụm eti mbụk edinyan̄a ẹkama. Christ ama akpa aban̄a mme idiọkn̄kpọ nnyịn, ẹma ẹbụk, ẹma ẹnyụn̄ ẹnam enye eset. Ke akpanikọ, Jesus oro ẹkenamde eset ama owụt Cephas (Peter) idem, “ekem owụt mbet Esie duopeba.” (John 20:19-23) N̄kpọ nte owo 500 ẹma ẹkụt enye, iso-ọfọn ke ini enye ọkọnọde ewụhọ ete: ‘Ẹka ẹkenam mme mbet.’ (Matthew 28:19, 20) James ama okụt enye kpa nte kpukpru anam-akpanikọ apostle ẹkekụtde. (Utom 1:6-11) Ke ekperede Damascus, Jesus ama ayarade idem owụt Saul “nte eyen eke amanade ke ini mîkemke”—nte n̄kpọ eke ẹma ẹkenanam enye eset odụk uwem eke spirit. (Utom 9:1-9) Mbon Corinth ẹkekabade ẹdi mme andinịm ke akpanikọ koro Paul ọkọkwọrọde ikọ ọnọ mmọ, ndien mmọ ẹma ẹnyịme eti mbụk.
5. Nso ikedi n̄kọkibuot Paul nte ẹwetde ke 1 Corinth 15:12-19?
5 Fiọk n̄kọkibuot Paul. (1 Corinth 15:12-19) Sia mbon emi ẹkekụtde ke enyịn ẹkwọrọde ẹte ke ẹma ẹnam Christ eset, ẹnam didie ẹdọhọ ẹte ke ediset ke n̄kpa idụhe? Edieke owo mîkanamke Jesus eset ke n̄kpa, ukwọrọikọ ye mbuọtidem nnyịn ẹwọrọ ikpîkpu, nnyịn inyụn̄ idi mme ntiense nsu inọ Abasi ke ndidọhọ ke enye ama anam Christ eset. Edieke owo mînamke mme akpan̄kpa ẹset, ‘nnyịn isụk idodu ke mme idiọk-n̄kpọ nnyịn,’ ndien mmọ emi ẹkpan̄ade ke Christ ẹtak. Akan oro, “edieke nnyịn mînyeneke se ibede idotenyịn ke Christ ke uwem emi, nnyịn idi mmọ emi ẹnyenede mbọm ikan kpukpru owo en̄wen.”
6. (a) Nso ke Paul eketịn̄ ndisọn̄ọ ediset ke n̄kpa Jesus? (b) Nso idi “akpatre usua,” ndien didie ke ẹdisobo enye?
6 Paul ọsọn̄ọ ediset ke n̄kpa Jesus. (1 Corinth 15:20-28) Adan̄a nte Christ edide “akpa mbun̄wụm” ke otu mmọ emi ẹdede ke n̄kpa, ẹyenam mbon efen n̄ko ẹset. Kpa nte n̄kpa okotode ntụtutọn̄ akpa owo oro Adam, ediset ke n̄kpa onyụn̄ oto owo—Jesus. Ẹkenyene ndinam mbon oro ẹdide eke Jesus ẹset ke ini edidu esie. Christ ‘osobo kpukpru edikara ye kpukpru nsọn̄-uyo ye odudu’ emi ẹdude ke ntuaha ye itie edikara Abasi onyụn̄ akara nte Edidem tutu Jehovah ada kpukpru mme asua esie esịn enye ke idak ikpat. Ẹyekam ẹsobo “akpatre usua”—n̄kpa emi ẹkedade ẹto Adam—ebe ke uwa Jesus. Ekem Christ ayayak Obio Ubọn̄ ọnọ Abasi ye Ete esie, osụhọrede idemesie ọnọ “Enye emi akadade kpukpru n̄kpọ adak Enye ke ikpat; man ke usụn̄ ekededi Abasi ekpedi kpukpru n̄kpọ.”
Ẹna Baptism Ẹnọ Mme Akpan̄kpa?
7. Mmanie ‘ẹna baptism ẹban̄a mme akpa-n̄kpa,’ ndien nso ke emi ọwọrọ ọnọ mmọ?
7 Ẹbụp mmọ emi ẹfan̄ade ediset ke n̄kpa ẹte: “Mmọ emi ẹnade baptism ẹban̄a mme akpa-n̄kpa ẹdinam nso?” (1 Corinth 15:29) Ikọ Paul ikọwọrọke ite ke mme odu uwem ẹna baptism ẹnọ mme akpan̄kpa, koro ana mme mbet Jesus ẹbọ ọkpọkpọ ukpep, ẹnịm ke akpanikọ, ẹnyụn̄ ẹna baptism. (Matthew 28:19, 20; Utom 2:41) Mme Christian oro ẹyetde aran ‘ẹna baptism ẹban̄a mme akpa-n̄kpa’ ebe ke ndisịn idemmọ ofụri ofụri ke usụn̄ uwem oro adade esịm n̄kpa ye ediset ke n̄kpa. Utọ baptism emi ọtọn̄ọ ke ini spirit Abasi esịnde mmọ idotenyịn heaven ke idem onyụn̄ etre ke ini ẹnamde mmọ ẹset ke n̄kpa ẹkedu uwem eke spirit emi mîkemeke ndikpa ke heaven.—Rome 6:3-5; 8:16, 17; 1 Corinth 6:14.
8. Nso ke mme Christian ẹkeme ndinịm ke akpanikọ idem ọkpọkọm Satan ye mme asan̄autom esie ẹwowot mmọ?
8 Nte mme ikọ Paul ẹwụtde, idotenyịn ediset ke n̄kpa an̄wam mme Christian ẹyọ afanikọn̄ ẹnyụn̄ ẹsobo n̄kpa kpukpru ini ke ntak edinam utom ukwọrọikọ Obio Ubọn̄. (1 Corinth 15:30, 31) Mmọ ẹfiọk ẹte ke Jehovah ekeme ndinam mmimọ iset edieke enye ayakde Satan ye mme asan̄autom esie ẹwot mmimọ. Abasi kpọt ekeme ndisobo ukpọn̄ m̀mê uwem mmọ, ke Gehenna, emi adade aban̄a nsinsi nsobo.—Luke 12:5.
Ufọn Ndidu ke Ukpeme
9. Edieke anade idotenyịn ediset ke n̄kpa ọsọn̄ọ nnyịn idem, nso ke ana nnyịn ifep?
9 Idotenyịn ediset ke n̄kpa ama ọsọn̄ọ Paul idem. Ke adan̄aemi enye okodude ke Ephesus, ekeme ndidi mme asua esie ẹma ẹtop enye ẹsịn ke an̄wambre man an̄wana ye ndiọi unam. (1 Corinth 15:32) Edieke oro eketịbede, ẹma ẹnyan̄a enye, kpa nte ẹkekam ẹnyan̄ade Daniel ẹsio ke inua mme lion. (Daniel 6:16-22; Mme Hebrew 11:32, 33) Sia enye okodoride enyịn ke ediset ke n̄kpa, Paul ikenyeneke edu mbon nsọn̄ibuot Judah ke eyo Isaiah. Mmọ ẹkedọhọ ẹte: “Yak idia inyụn̄ in̄wọn̄, koro iyakpa n̄kpa n̄kpọn̄.” (Isaiah 22:13) Edieke anade idotenyịn ediset ke n̄kpa ọsọn̄ọ nnyịn idem kpa nte ọkọsọn̄ọde Paul idem, ana ifep mbon oro ẹnyenede utọ idiọk edu oro. Paul ama odụri owo utọn̄ ete: “Ẹkûbian̄a idem mbufo ke n̄kpọ emi. Idiọk nsan̄a ababiat eti ido.” (1 Corinth 15:33) Nte ededi, edumbet emi abuana nsio nsio ikpehe uwem.
10. Didie ke ikeme ndinam idotenyịn ediset ke n̄kpa nnyịn aka iso ayama?
10 Paul ọkọdọhọ mbon oro ẹyịkde ediset ke n̄kpa ete: “Ẹfara ke idem edinen-edinen, ẹnyụn̄ ẹtre mme idiọk-n̄kpọ, koro ndusụk owo inyeneke ifiọk Abasi. Ntịn̄ emi man bụt anam mbufo.” (1 Corinth 15:34) Ke “utịt ini” emi, oyom nnyịn inam n̄kpọ ke n̄kemuyo ye nnennen ifiọk Abasi ye Christ. (Daniel 12:4; John 17:3) Emi ayanam idotenyịn ediset ke n̄kpa nnyịn aka iso ayama.
Ẹnam Ẹset ye Nso Orụk Ikpọkidem?
11. Didie ke Paul akanam ediset mme Christian oro ẹyetde aran an̄wan̄a?
11 Ekem Paul ọbọrọ ndusụk mbụme. (1 Corinth 15:35-41) Ndusụk ke odomode ndifan̄a ediset ke n̄kpa, owo ekeme ndibụp ete: “Ẹdinam mme akpa-n̄kpa ẹset didie? Nso orụk ikpọkidem ke mmọ ẹdinyụn̄ ẹda ẹdi?” Nte Paul okowụtde, n̄kpasịp oro ẹtọde ke isọn̄ esikpa mbemiso okpụhọrede akabade edi nsek eto. Ukem ntre, ana owo oro ẹbonde ke spirit akpa. Nte emịne asiahade ọwọrọ ke n̄kpasịp nte obufa idem, kpasụk ntre idem Christian oro ẹyetde aran emi ẹnamde eset okpụhọde ye obụkidem eke owo. Okposụkedi enye enyenede ukem edu uwem oro enye ekenyenede mbemiso akpade, ẹnam enye eset nte obufa edibotn̄kpọ ye idem eke spirit emi ekemede ndidụn̄ ke heaven. Nte ido edide, mbon oro ẹnamde ẹset ke isọn̄ ẹdinyene idem eke owo.
12. Nso ke ikọ oro ‘ikpọkidem eke heaven’ ye ‘ikpọkidem eke isọn̄’ ọwọrọ?
12 Nte Paul ọkọdọhọde, obụkidem eke owo okpụhọde ye eke unam. Obụkidem unam ẹkam ẹkpụhọde to ke orụk kiet sịm en̄wen. (Genesis 1:20-25) ‘Ikpọkidem eke heaven’ emi mme edibotn̄kpọ eke spirit ẹnyenede okpụhọde ke ubọn̄ ye ‘ikpọkidem eke isọn̄’ emi edide obụk. Mme ukpụhọde ẹdu n̄ko ke ubọn̄ utịn, ọfiọn̄, ye mme ntantaọfiọn̄. Edi mbon oro ẹyetde aran oro ẹnamde ẹset ẹnyene ubọn̄ oro okon̄de akan.
13. Nte ekemde ye 1 Corinth 15:42-44, nso ke ẹtọ ndien nso ke ẹnam ẹset?
13 Ke ama eketịn̄ mme ukpụhọde emi, Paul ama adian do ete: “Ntem ke onyụn̄ edi ye ediset mme akpa-n̄kpa.” (1 Corinth 15:42-44) Enye ama ọdọhọ ete: “Ẹtọ ikpọkidem ke mbiara; ẹnam enye eset nte n̄kpọ eke mîkemeke ndibiara.” Ekeme ndidi Paul etịn̄ aban̄a mbon oro ẹyetde aran nte otu. Ẹtọ ke mbiara ke n̄kpa, ẹnam ẹset nte se mîkemeke ndibiara, emi mînyeneke idiọkn̄kpọ. Okposụkedi ererimbot ẹsuenede, ẹnam enye eset ekenyene uwem eke heaven ẹnyụn̄ ẹyarade ye Christ ke ubọn̄. (Utom 5:41; Colossae 3:4) Ke n̄kpa, ẹtọ enye ke “idem eke otode ke uduot obụkidem” ẹnyụn̄ ẹnam eset nte “idem eke otode ke uduot spirit.” Sia ẹkemede ndinam emi ye mme Christian oro ẹbonde ke spirit, nnyịn imekeme ndinịm nte ke ẹkeme ndinam mbon eken ẹset ẹdidu uwem ke isọn̄.
14. Didie ke Paul okowụt ukpụhọde oro odude ke ufọt Christ ye Adam?
14 Ekem Paul owụt ukpụhọde odude ke ufọt Christ ye Adam. (1 Corinth 15:45-49) Adam, akpa owo, ama “akabade edi ukpọn̄ eke odude uwem.” (Genesis 2:7) “Akpatre Adam”—Jesus—“edi spirit emi ọnọde uwem.” Enye ama ọnọ uwem esie nte uwa ufak, akpa kaban̄a mme anditiene enye emi ẹyetde aran. (Mark 10:45) Nte owo, mmọ ‘ẹbiom mbiet owo eke otode ntan-isọn̄,’ edi ke ẹma ẹkenam ẹset, mmọ ẹkabade ẹtie nte akpatre Adam. Nte ededi, uwa Jesus eyenyene ufọn ọnọ kpukpru okopitem ubonowo, esịnede mbon oro ẹnamde ẹset ke isọn̄.—1 John 2:1, 2.
15. Ntak emi owo mînamke mme Christian oro ẹyetde aran ẹset ke obụkidem, ndien didie ke ẹnam mmọ ẹset ke ini edidu Jesus?
15 Ke ini mme Christian oro ẹyetde aran ẹkpan̄ade, owo inamke mmọ ẹset ke obụkidem. (1 Corinth 15:50-53) Ikpọkidem mbiara edide obụk ye iyịp ikemeke ndibọ se mîkemeke ndibiara ye Obio Ubọn̄ eke heaven nda nnyene. Ndusụk mbon oro ẹyetde aran idinyeneke ndide idap ke n̄kpa ke anyan ini. Ke ẹkụrede uwem mmọ eke isọn̄ ke edinam akpanikọ ke ini edidu Jesus, ‘ẹyenam mmọ ẹkpụhọde ke idaha kiet, ke ediyịp enyịn kiet.’ Ẹyenam mmọ ẹset ke ebe oro ẹkenyene uwem eke spirit oro mîkemeke ndibiara ye ubọn̄. Ke akpatre, ofụri ibat “n̄wan-ndọ” Christ eke heaven eyesịm 144,000.—Ediyarade 14:1; 19:7-9; 21:9; 1 Thessalonica 4:15-17.
Ndikan N̄kpa!
16. Nte Paul ye mme prọfet oro ẹkebemde iso ẹdu ẹkedọhọde, nso iditịbe inọ n̄kpa oro ẹkedade ẹto anamidiọk Adam?
16 Paul atan̄a ke idatesịt ete ke ẹyemen n̄kpa ke nsinsi. (1 Corinth 15:54-57) Ke ini mbiara ikpọkidem edisịnede se mîdibiarake ndien ikpọkidem n̄kpa edisịnede se mîdikpaha, mme ikọ emi ẹyesu: “Ẹda edikan ẹmen n̄kpa. O n̄kpa, edikan fo enye? O n̄kpa, ifọt fo enye?” (Isaiah 25:8; Hosea 13:14) Ifọt n̄kpa edi idiọkn̄kpọ, ndien odudu idiọkn̄kpọ ekedi Ibet, emi okobiomde mme anamidiọk ikpe n̄kpa. Edi ke ntak uwa ye ediset ke n̄kpa Jesus, n̄kpa oro ẹkedade ẹto anamidiọk Adam idinyeneke edikan aba.—Rome 5:12; 6:23.
17. Didie ke mme ikọ 1 Corinth 15:58 ẹnyene n̄kpọ ndinam mfịn?
17 Paul ama ọdọhọ ete: “Mmọdo ndima nditọ-ete mi, ẹsọn̄ọ ẹda, ẹkûyak n̄kpọ esehede mbufo; ẹyọhọ kpukpru ini ke utom Ọbọn̄; sia ẹmefiọk ẹte ke utom eke mme imọ inamde idiwọrọke idi ikpîkpu ke Ọbọn̄.” (1 Corinth 15:58) Mme ikọ oro ẹnyene n̄kpọ ndinam ye nsụhọ oro ẹyetde aran mfịn ye “mme erọn̄ en̄wen” eke Jesus idem ọkpọkọm mmọ ẹkpakpan̄a ke ukperedem ini emi. (John 10:16) Mme utom emi mmọ ẹnamde nte mme anditan̄a Obio Ubọn̄ idịghe ikpîkpu, koro ediset ke n̄kpa ke ana ebet mmọ. Do, nte mme asan̄autom Jehovah, ẹyak nnyịn iyọhọ ke utom Ọbọn̄ ke adan̄aemi itiede ibet usen eke nnyịn idikemede ndifiori idara idara ite: “N̄kpa, edikan fo enye?”
Ẹsu Idotenyịn Ediset ke N̄kpa!
18. Idotenyịn ediset ke n̄kpa Paul ekenyene odudu adan̄a didie?
18 Mme ikọ Paul oro ẹwetde ke 1 Corinth ibuot 15 ẹnam an̄wan̄a nte ke idotenyịn ediset ke n̄kpa ama enyene odudu ke uwem esie. Enye ama enen̄ede enịm nte ke ẹma ẹnam Jesus eset ke n̄kpa ye nte ke ẹyesion̄o mbon efen ke ikpîkpu udi ubonowo. Nte afo emenen̄ede enịm kpasụk ntre? Paul akabat n̄kpọ obụkidem “ke mbio” onyụn̄ ‘ayak kpukpru n̄kpọ ẹtak’ man enye ‘ọkpọfiọk Christ ye odudu ediset Esie.’ Apostle oro ama enyịme ndikpa n̄kpa eke ebietde n̄kpa Christ ye idotenyịn edibọ “ediset ke n̄kpa.” Sia ẹkotde enye “akpa ediset ke n̄kpa” n̄ko, mme anditiene Jesus ẹdide owo 144,000 oro ẹyetde aran ẹbuana ke enye. Ih, ẹnam mmọ ẹset ẹkedu uwem eke spirit ke heaven, ke adan̄aemi ẹdinamde “mme akpa-n̄kpa eken” ẹset ke isọn̄.—Philippi 3:8-11; Ediyarade 7:4; 20:5, 6.
19, 20. (a) Mme owo ewe oro ẹsiakde ke Bible ke ẹdinam ẹset ẹdidu uwem ke isọn̄? (b) Ediset ke n̄kpa eke mmanie ke afo asak iso ese?
19 Idotenyịn ediset ke n̄kpa amakabade edi ubọn̄ ubọn̄ ata idem n̄kpọ ọnọ mbon oro ẹyetde aran emi ẹnamde akpanikọ tutu ẹsịm n̄kpa. (Rome 8:18; 1 Thessalonica 4:15-18; Ediyarade 2:10) Mme andibọhọ “akwa ukụt” ẹyekụt nte ẹsude idotenyịn ediset ke n̄kpa ke isọn̄ nte ‘inyan̄ibom asanade mme akpa-n̄kpa emi ẹdude ke esịt ayak; n̄kpa ye [udi, NW] ẹnyụn̄ ẹsanade mme akpa-n̄kpa mmọ ẹyak.’ (Ediyarade 7:9, 13, 14; 20:13) Job, oro akatabade nditọiren esie itiaba ye nditọiban ita, oyodu ke otu mbon oro ẹdisetde ẹdidu uwem ke isọn̄. Kere ban̄a idatesịt esie ke ini mmọ ẹdisetde ẹdi—ndien mmọ ẹdikop inemesịt didie ntem ndinyene nditọeka iren itiaba ye ndiye nditọeka iban ita efen!—Job 1:1, 2, 18, 19; 42:12-15.
20 Nso edidiọn̄ ke edidi ntem ke ini ẹdinamde Abraham ye Sarah, Isaac ye Rebekah—ih ye ata ediwak mbon eken, esịnede “kpukpru mme prophet”—ẹset ẹdidu uwem ke isọn̄! (Luke 13:28) Kiet ke otu mme prọfet oro ekedi Daniel, oro ẹken̄wọn̄ọde ndinam eset ke idak ukara Messiah. Daniel ọduọk odudu ke udi ke n̄kpọ nte isua 2,500, edi ebede ke odudu ediset ke n̄kpa, ibịghike enye ‘ayada ke udeme esie’ nte kiet ke otu “mbọn̄ ke ofụri ererimbot.” (Daniel 12:13; Psalm 45:16) Nso nduaidem ke edidi ntem ndidara mme anam-akpanikọ eke eset ọkọrọ ye ete fo, eka fo, nditọ fo, m̀mê mbonima fo eken oro asua oro n̄kpa ọkọbọde fi!
21. Ntak emi nnyịn ikpanamde nti n̄kpọ inọ mbon efen ye unana ubiatini?
21 Ekeme ndidi ndusụk ufan ye mbonima nnyịn ẹnam n̄kpọ Abasi ke ediwak iduọk isua ẹnyụn̄ ẹnen̄ede ẹsọn̄ ke emana. Usọn̄ ekeme ndinam edi ọkpọsọn̄ n̄kpọ ọnọ mmọ ndiyọ mme n̄kpọ-ata eke uwem. Owụt ima didie ntem ndinọ mmọ ekededi un̄wam oro ikemede ndinọ idahaemi! Do nnyịn idituaha n̄kpọfiọk nte ke nnyịn ikanamke udeme nnyịn edieke n̄kpa adade mmọ. (Ecclesiastes 9:11; 12:1-7; 1 Timothy 5:3, 8) Nnyịn imekeme ndinịm nte ke Jehovah idifreke nti n̄kpọ oro nnyịn inamde inọ mbon efen, inamke n̄kpọ m̀mê nso idi isua emana m̀mê mme idaha mmọ. Paul ekewet ete: “Adan̄a nte ikụtde ifet, ẹyak nnyịn ifọn ido ye kpukpru owo, akpan-akpan ye mmọ emi ẹtode ke ufọk mme andinịm ke akpanikọ.”—Galatia 6:10; Mme Hebrew 6:10.
22. Tutu idotenyịn ediset ke n̄kpa osu, nso ke nnyịn ikpebiere ndinam?
22 Jehovah edi “Ete mbọm ye Abasi kpukpru ndọn̄esịt.” (2 Corinth 1:3, 4) Ikọ esie ọnọ nnyịn ndọn̄esịt onyụn̄ an̄wam nnyịn idọn̄ mbon efen esịt ye okopodudu idotenyịn ediset ke n̄kpa. Tutu nnyịn ikụt edisu idotenyịn oro ebe ke edinam mme akpan̄kpa ẹset ẹdidu uwem ke isọn̄, ẹyak nnyịn itie nte Paul, emi ekenyenede mbuọtidem ke ediset ke n̄kpa. Nnyịn ikpakam ikpebe Jesus akpan akpan, emi okokụtde edisu idotenyịn esie ke odudu Abasi ndinam enye eset. Ibịghike mbon oro ẹdude ke udi ẹyekop Christ uyo ẹnyụn̄ ẹwọn̄ọ ẹdi. Emi akpakam ọnọ nnyịn ndọn̄esịt ye idatesịt. Edi ke akande kpukpru, nnyịn ikpakam iwụt esịtekọm inọ Jehovah, emi anamde edi mmemmem n̄kpọ ndikan n̄kpa ebe ke Ọbọn̄ nnyịn Jesus Christ!
Nso Idi Ibọrọ Fo?
• Paul ọkọnọ nso uyarade nte ke mme owo ẹma ẹkụt ediset ke n̄kpa Jesus?
• Nso idi “akpatre usua,” ndien didie ke ẹdisobo enye?
• Ke se iban̄ade mme Christian oro ẹyetde aran, nso ke ẹtọ ndien nso ke ẹnam ẹset?
• Mme owo ewe oro ẹsiakde ke Bible ke afo edima ndisobo ke ini ẹnamde mmọ ẹset ẹdidu uwem ke isọn̄?
[Mme Mbụme Ukpepn̄kpọ]
[Ndise ke page 16]
Apostle Paul ama ọsọn̄ọ etịn̄ aban̄a ediset ke n̄kpa
[Mme ndise ke page 20]
Job, ubon esie ye ediwak mbon eken ndiset ke n̄kpa edidi n̄kpọ akwa idatesịt!