Idotenyịn Ediset ke N̄kpa Edi Akpanikọ!
Idotenyịn Ediset ke N̄kpa Edi Akpanikọ!
‘Mmodori enyịn ke Abasi nte ke ẹyeset ke n̄kpa.’—UTOM 24:15.
1. Ntak emi nnyịn ikemede ndidori enyịn ke ediset ke n̄kpa?
JEHOVAH ọmọnọ nnyịn nti ntak ndidori enyịn ke ediset ke n̄kpa. Nnyịn imenyene ikọ esie nte ke mme akpan̄kpa ẹyeset ẹfiak ẹdidu uwem. Ndien uduak esie kaban̄a mbon oro ẹdede ke n̄kpa oyosu ke akpanikọ. (Isaiah 55:11; Luke 18:27) Ke akpanikọ, Abasi ama ebem iso owụt odudu oro enye enyenede ndinam mme akpan̄kpa ẹset.
2. Didie ke idotenyịn ediset ke n̄kpa ekeme ndinọ nnyịn ufọn?
2 Mbuọtidem ke ndutịm Abasi ndinam mme akpan̄kpa ẹset ebe ke Eyen esie, Jesus Christ, ekeme ndimụm nnyịn n̄kama ke mme ini mfịghe. Idotenyịn ediset ke n̄kpa ndidi akpanikọ ekeme n̄ko ndin̄wam nnyịn isọn̄ọ ida ye Ete nnyịn eke heaven idem tutu esịm n̄kpa. Eyedi, idotenyịn nnyịn ke ediset ke n̄kpa ọyọsọn̄ọ nte nnyịn ikerede iban̄a mme ediset ke n̄kpa oro ẹwetde ke Bible. Ẹkeda odudu Jehovah Ọbọn̄ Andikara ẹnam kpukpru utịben̄kpọ emi.
Mmọ Ẹma Ẹbọ Mme Akpan̄kpa ke Ediset ke N̄kpa
3. Nso ke ẹkenọ Elijah odudu ndinam ke ini eyeneren ebeakpa ke Zarephath akakpade?
3 Ke akama-nduaidem ndụn̄ọde aban̄ade mbuọtidem oro mme ntiense Jehovah oro ẹkedude mbemiso eyo mme Christian ẹkenyenede, apostle Paul ama ewet ete: “Iban ẹbọ mme akpa-n̄kpa ke ediset ke n̄kpa.” (Mme Hebrew 11:35; 12:1) Kiet ke otu iban oro ekedi ubuene ebeakpa kiet ke obio Zarephath mbon Phoenicia. Ke ntak oro enye okowụtde Elijah prọfet Abasi mfọnido, ẹma ẹnam ndomuyo ye aran esie ke utịbe utịbe usụn̄ okûkụre ke ofụri ini akan̄ emi akpakadade uwem esie ye eke eyeneren esie. Ke ini eyen oro akakpade ke ukperedem, Elijah ama enịm enye ke n̄kpana, ọbọn̄ akam, anyanade idemesie ke idem eyen oro utịm ikata, onyụn̄ ekpe ubọk ete: “O Jehovah Abasi mi, mbọk, yak ukpọn̄ eyen emi afiak odụk enye ke idem.” Abasi ama anam ukpọn̄, m̀mê uwem, afiak odụk eyen oro ke idem. (1 Ndidem 17:8-24) Kere nte ebeakpa oro okokopde idatesịt nte ẹkenọde mbuọtidem esie utịp ebe ke akpa ediset ke n̄kpa oro akadade itie—eke edima eyen esie!
4. Nso utịben̄kpọ ke Elisha akanam ke Shunem?
4 N̄wan efen emi ọkọbọde akpan̄kpa ke ediset ke n̄kpa okodụn̄ ke obio Shunem. Enye ekedi n̄wan akanieren kiet, enye ama owụt prọfet Elisha ye asan̄autom esie mfọnido. Ẹma ẹdiọn̄ enye ke ndinọ enye eyeneren. Nte ededi, ediwak isua ke ukperedem enye ama ọdọn̄ ẹkekot prọfet oro, emi ekedide edikụt ke eyen oro ama akpa ke ufọk esie. Ke Elisha ama ọkọbọn̄ akam onyụn̄ anam ndusụk usio-ukot, “idem eyen oro akabade ofiop.” Enye ama “asia utịm ikatiaba, eyen onyụn̄ atat enyịn esie.” Ediset ke n̄kpa emi nte eyịghe mîdụhe ama ada akwa idatesịt ọsọk eka oro ye eyen esie. (2 Ndidem 4:8-37; 8:1-6) Edi mmọ ẹdikop idatesịt didie ntem ẹkan oro ke ini ẹdinamde mmọ ẹset edidu uwem ke isọn̄ ke “ediset ke n̄kpa eke ọfọnde akan”—kiet oro edinọde mmọ ifet unana edikpa tutu amama! Nso ntak ke emi edi ntem ndikọm ima ima Abasi ediset ke n̄kpa, kpa Jehovah!—Mme Hebrew 11:35.
5. Didie ke ẹkebuan Elisha ke utịben̄kpọ kiet idem ke enye ama akakpa?
5 Idem ke Elisha ama akakpa ẹnyụn̄ ẹbụk, Abasi ama anam mme ọkpọ esie ẹnyene odudu ebe ke edisana spirit. Nnyịn ikot ite: “Edikem ke ini [ndusụk nditọ Israel] ẹbụkde owo kiet, sese, mmọ ẹkụt [udịmekọn̄ Moab]; ndien mmọ ẹtop owo oro ẹsịn ke udi Elisha: ndien ke ini owo oro esịmde mme ọkpọ Elisha, onyụn̄ otụkde mmọ, enye eset, onyụn̄ adaha ada ke ukot esie.” (2 Ndidem 13:20, 21) Didie ke eren oro okokop n̄kpaidem ye inemesịt ntem! Kere idatesịt oro nnyịn idinyenede ke ini ẹdinamde mbon ima nnyịn ẹset ẹdidu uwem ke n̄kemuyo ye uduak Jehovah Abasi oro mîkpụhu!
Eyen Abasi Anam Mme Akpan̄kpa Ẹset
6. Nso utịben̄kpọ ke Jesus akanam ekpere obio Nain, ndien didie ke n̄kpọntịbe emi ekeme nditụk nnyịn?
6 Eyen Abasi, Jesus Christ, ọnọ nnyịn nti ntak ndinịm nte ke ẹkeme ndinam mme akpan̄kpa ẹset, ye idotenyịn nsinsi uwem. N̄kpọntịbe oro akadade itie ekpere obio Nain ekeme ndin̄wam nnyịn ndifiọk nte ke utọ utịben̄kpọ oro edi mmemmem ke odudu oro Abasi ọnọde. Ke idaha kiet, Jesus ama osobo ye otu mbon ntuan̄a emi ẹbiomde okpo akparawa kiet ẹwọrọ ke obio ẹka ndibụk. Enye ekedi n̄kukụre eyen ebeakpa. Jesus ama ọdọhọ ebeakpa oro ete: “Kûtua.” Ekem enye ama otụk ubiom-okpo onyụn̄ ọdọhọ ete: “Akparawa ndọhọ fi nte, Daha ke enyọn̄.” Ndien enye adaha etetie onyụn̄ etịn̄ ikọ. (Luke 7:11-15) Utịben̄kpọ emi ọsọn̄ọ edinịm ke akpanikọ nnyịn nte ke idotenyịn ediset ke n̄kpa edi akpanikọ.
7. Nso iketịbe ke ebuana ye eyen Jairus?
7 N̄ko, kere ban̄a n̄kpọntịbe abuanade Jairus, kpa etubom synagogue ke Capernaum. Enye ama ekpe Jesus ubọk ete edi edin̄wam edima eyen imọ an̄wan oro ekedide isua 12 ke emana, emi ọkọdọn̄ọde ekpere ndikpa. Ikebịghike ẹma ẹtọt ẹte ke eyen oro ama akpa. Ke esịnde udọn̄ ọnọ Jairus emi okofụhọde ete enyene mbuọtidem, Jesus ama etiene enye aka ufọk esie, emi otuowo ẹketuan̄ade. Mmọ ẹma ẹsak ke ini Jesus ọkọdọhọde mmọ ete: “Eyen emi ikpaha n̄kpa, edi edede.” Eyen emi ama akpa ke akpan, edi Jesus okoyom ndiwụt nte ke ẹkeme ndinam mme owo ẹset ẹdidu uwem kpa nte ẹkemede ndidemede mmọ ke ọkpọsọn̄ idap. Ke omụmde eyenan̄wan oro ubọk, Jesus ama ọdọhọ ete: “Eyen-an̄wan, ndọhọ fi nte, daha ke enyọn̄.” Ke ndondo oro enye ama adaha ke enyọn̄, “n̄kpa-idem onyụn̄ omụm ete ye eka esie.” (Mark 5:35-43; Luke 8:49-56) Nte eyịghe mîdụhe, ‘n̄kpa-idem oyomụm’ mbonubon ke ini ẹdinamde mbonima mmọ emi ẹkekpan̄ade ẹset ẹdidu uwem ke paradise isọn̄.
8. Nso ke Jesus akanam ke udi Lazarus?
8 Lazarus ama akpa ke usen inan̄ ke ini Jesus akakade udi esie okonyụn̄ ọdọhọde ete ẹkpat itiat ẹsio ke udi. Ke ama ọkọbọn̄ akam an̄wan̄wa man mme owo oro ẹkpefiọk ẹte ke imọ ikeberi edem ke odudu oro Abasi ọnọde, Jesus ama ofiori ete: “Lazarus, wọrọ di.” Ndien enye ama ọwọrọ edi! Ọfọn̄ udi okosụk awawan̄a enye ke ubọk ye ukot, ọfọn̄ ama onyụn̄ awan̄a enye ke iso. Jesus ama ọdọhọ ete: “Ẹtat enye, ẹyak enye ọnyọn̄ ufọk.” Ke ẹkụtde utịben̄kpọ emi, ediwak owo oro ẹkedude do man ẹdọn̄ nditọeka Lazarus, Mary ye Martha esịt, ẹbuọt idem ye Jesus. (John 11:1-45) Nte mbụk emi iyọhọke fi ye idotenyịn nte ke ẹkeme ndinam mbonima fo ẹset ẹdidu uwem ke obufa ererimbot Abasi?
9. Ntak emi nnyịn ikemede nditịm nnịm nte ke Jesus ekeme ndinam mme akpan̄kpa ẹset idahaemi?
9 Ke ini John Andinịm Owo Baptism okodude ke ufọk-n̄kpọkọbi, Jesus ama ọnọ etop nsịnudọn̄ emi ẹsọk enye: “Mme nnan ẹkụt usụn̄, . . . ẹnam mme akpa-n̄kpa ẹset.” (Matthew 11:4-6) Sia Jesus ama akanam mme akpan̄kpa ẹset ke ini okodude ke isọn̄, ke akpanikọ enye ekeme ndinam ntre nte okopodudu edibotn̄kpọ eke spirit emi Abasi ọnọde odudu. Jesus edi “ediset ye uwem,” ndien ọnọ ndọn̄esịt didie ntem ndifiọk nte ke n̄kpet n̄kpet ini iso ‘kpukpru mme andidu ke udi ẹyekop Enye uyo ẹwọn̄ọ ẹdi!’—John 5:28, 29; 11:25.
Mme Ediset ke N̄kpa En̄wen Ẹsọn̄ọ Idotenyịn Nnyịn
10. Didie ke afo okpobụk akpa edinam owo eset ke n̄kpa oro ẹtọtde nte apostle akanamde?
10 Ke ini Jesus okosiode mme apostle esie ọdọn̄ nte mme ọkwọrọ Obio Ubọn̄, enye ama ọdọhọ ete: “Ẹnam mme akpa-n̄kpa ẹset.” (Matthew 10:5-8) Nte ededi, man ẹnam emi mmọ ẹkenyene ndiberi edem ke odudu Abasi. Ke Joppa ke 36 E.N., abak-Abasi an̄wan oro Dorcas (Tabitha) ama akpa. Nti utom esie ama esịne edikịm edisịnen̄kpọ nnọ mme ebeakpa oro ẹkedude ke unana, ndien n̄kpa esie ama anam mmọ emi ẹtuan̄a etieti. Mme mbet ẹma ẹtịm enye idem ẹben̄e edibụk ẹnyụn̄ ẹdọn̄ ẹkekot apostle Peter, ndusụk man edinọ ndọn̄esịt. (Utom 9:32-38) Enye ama anam kpukpru owo ẹwọn̄ọ ke ubet enyọn̄, ọbọn̄ akam, onyụn̄ ọdọhọ ete: “Tabitha, daha ke enyọn̄.” Enye atat enyịn esie, adaha etetie, ọnọ Peter ubọk, ndien Peter emenede enye ke enyọn̄. Akpa edinam owo eset ke n̄kpa emi ẹtọtde nte apostle akanamde mi ama anam ediwak owo ẹkabade ẹdi mme andinịm ke akpanikọ. (Utom 9:39-42) Enye n̄ko ọmọnọ nnyịn ntak efen efen ndidori enyịn ke ediset ke n̄kpa.
11. Ewe ekedi akpatre ediset ke n̄kpa eke mbụk Bible?
11 Akpatre ediset ke n̄kpa ke mbụk Bible akada itie ke Troas. Ke ini Paul akawahade do ke isan̄ isụn̄utom esie ọyọhọ ita, enye ama ọnọ utịn̄ikọ tutu esịm ufọt okoneyo. Ke okopde mmemidem eyedi ke ntak ufiop otode ediwak utuenikan̄ ye ke ntak oro ufọk akafahade, akparawa kiet emi ekekerede Eutychus ama ede onyụn̄ oto ke window ọyọhọ enyọn̄ ita ọduọ ke isọn̄. “Ke ini mmọ ẹmende enye, enye ama akpa,” idịghe ikpîkpu edisụhọ. Paul ama ọduọ ofụk Eutychus, afat enye, onyụn̄ ọdọhọ mme andida nse ete: “Ẹkûnam ndutịme, koro uwem odu enye ke idem.” Ikọ Paul ọkọwọrọ nte ke ẹma ẹfiak ẹsịn akparawa oro uwem ke idem. Mbon oro ẹkedude do ẹma “ẹkop idọn̄esịt eti-eti.” (Utom 20:7-12) Mfịn, mme asan̄autom Abasi ẹnyene akwa ndọn̄esịt ke ndifiọk nte ke n̄kani nsan̄a mmimọ ke utom Abasi ẹyekụt edisu idotenyịn ediset ke n̄kpa.
Ediset ke N̄kpa—Idotenyịn Anyan Ini
12. Nso edinịm ke akpanikọ ke Paul okowụt ke ini akadade ke iso Felix andikara Rome?
12 Ke ini akadade ke ikpe ke iso Felix andikara Rome, Paul ama ọdọhọ ete: “Mmenịm kpukpru se ẹwetde ke ibet ye mme prophet ke akpanikọ: mmonyụn̄ ndori enyịn ke Abasi . . . nte, nti owo ye mme idiọk owo ẹyeset ke n̄kpa.” (Utom 24:14, 15) Didie ke ubak Ikọ Abasi, utọ nte “ibet,” ẹnyan ubọk ẹwụt ediset ke n̄kpa?
13. Ntak ẹkemede ndidọhọ ke Abasi ama etịn̄ otụk ediset ke n̄kpa ke ini enye eketịn̄de akpa ntịn̄nnịm ikọ?
13 Abasi ke idemesie ama etịn̄ otụk ediset ke n̄kpa ke ini enye eketịn̄de akpa ntịn̄nnịm ikọ oro ke Eden. Ke ini ekebierede ikpe ọnọ “akani urụkikọt,” Satan kpa Devil, Abasi ọkọdọhọ ete: “Nyonyụn̄ nsịn usua ke ufọt fo ye n̄wan, ye ke ufọt [mfri fo ye mfri, NW] esie: enye ayanuak fi ibuot, afo oyonyụn̄ anuak enye nditịn̄-ikpat.” (Ediyarade 12:9; Genesis 3:14, 15) Ndinuak nditịn̄ikpat n̄wan ọkọwọrọ ndiwot Jesus Christ. Edieke akanade Mfri oro anuak urụkikọt ibuot ke oro ebede, ẹkenyene ndinam Christ eset ke n̄kpa.
14. Didie ke edi nte ke Jehovah “idịghe Abasi mme akpa-n̄kpa, edi edi eke mme odu-uwem”?
14 Jesus ama atan̄a ete: “Edi kpa Moses etịn̄ ke ibuot n̄wed emi otụkde eto oro, aban̄a ete ẹnanam mme akpa-n̄kpa ẹset, ke adan̄aemi okotde Jehovah ete, Abasi Abraham, ye Abasi Isaac, ye Abasi Jacob. Enye idịghe Abasi mme akpa-n̄kpa, edi edi eke mme odu-uwem: koro kpukpru owo ẹdu uwem ẹnọ Enye.” (Luke 20:27, 37, 38; Exodus 3:6) Abraham, Isaac, ye Jacob ẹma ẹkpan̄a, edi uduak Abasi ndinam mmọ ẹset ama enen̄ede ọsọn̄ọ nte mîkemeke ndikpu tutu ye enye etie nte mmọ ẹkesụk ẹdodu ke uwem.
15. Ntak emi Abraham ekenyenede ntak ndinịm ediset ke n̄kpa ke akpanikọ?
15 Abraham ama enyene ntak ndidori enyịn mban̄a ediset ke n̄kpa, koro ke ini enye ye n̄wan esie, Sarah, ẹma ẹkenen̄ede ẹsọn̄, ukeme mmọ ndinyene nditọ ama okonyụn̄ akpa, Abasi ke utịbe utịbe usụn̄ ama afiak ọnọ mmọ ukeme unyene nditọ. Emi eketie nte ediset ke n̄kpa. (Genesis 18:9-11; 21:1-3; Mme Hebrew 11:11, 12) Ke ini eyen mmọ, Isaac, ekedide n̄kpọ nte isua 25 ke emana, Abasi ama ọdọhọ Abraham ete awa enye. Nte ededi, ke ndondo oro Abraham okoyomde ndiwot Isaac, angel Jehovah ama akpan enye. Abraham “ekenịm ete, Abasi ekeme ndisio [Isaac] ke otu mme akpa-n̄kpa nnam enye eset; ndien ke ido n̄ke, enye okonyụn̄ ọtọn̄ọ ntak ọbọ enye ke n̄kpa ada.”—Mme Hebrew 11:17-19; Genesis 22:1-18.
16. Abraham ede idahaemi ke n̄kpa ebet nso?
16 Abraham okodori enyịn ke ediset ke n̄kpa ke idak ukara Messiah, kpa Mfri oro ẹken̄wọn̄ọde. Ke idaha use n̄kpọ esie mbemiso akakabarede edi owo, Eyen Abasi ama okụt mbuọtidem Abraham. Nte owo oro Jesus Christ, enye ke ntre ama ọdọhọ mme Jew ete: “Ete mbufo Abraham akadat esịt ndikụt eyo Mi.” (John 8:56-58; Mme N̄ke 8:30, 31) Abraham edede idahaemi ke n̄kpa, ebetde ediset ke n̄kpa ndidu uwem ke isọn̄ ke idak Obio Ubọn̄ Messiah Abasi.—Mme Hebrew 11:8-10, 13.
Ikọ Ntiense Otode Ibet ye Psalm
17. Didie ke “kpukpru se ẹwetde ke ibet” ẹkenyan ubọk ẹwụt ediset ke n̄kpa Jesus Christ?
17 Idotenyịn ediset ke n̄kpa oro Paul ekenyenede ama odu ke n̄kemuyo ye “kpukpru se ẹwetde ke ibet.” Abasi ọkọdọhọ nditọ Israel ete: “Mbufo ẹmen ebek akpasarade ukpen̄e mbufo ẹdisọk oku; ndien [ke Nisan 16] enye ada ebek oro ofụn̄ ke iso Jehovah, kpan̄ ẹkpebọ mbufo ke ubọk.” (Leviticus 23:9-14) Paul ama ewet, ndusụk ye ibet emi ke ekikere, ete: “Ẹma ẹnam Christ eset ke n̄kpa, nte akpa mbun̄wụm ke otu mmọ emi ẹdede idap.” Nte “akpa mbun̄wụm,” ẹma ẹnam Jesus eset ke Nisan 16, 33 E.N. Ekem, ke ini edidu esie, ẹyenam mme ‘udiana mfri’ ẹset—kpa mme anditiene enye emi ẹyetde aran ke spirit.—1 Corinth 15:20-23; 2 Corinth 1:21; 1 John 2:20, 27.
18. Didie ke Peter okowụt nte ke ẹma ẹbem iso ẹtịn̄ ẹban̄a ediset ke n̄kpa Jesus ke Psalm?
18 Psalm n̄ko ọsọn̄ọ ediset ke n̄kpa. Ke usen Pentecost eke 33 E.N., apostle Peter ama okot oto Psalm 16:8-11, ọdọhọde ete: “David ọdọhọ aban̄a [Christ] ete, Mmokụt Jehovah ke iso Mi kpukpru ini; koro Enye odude Mi ke ubọk nnasia, mbak edisehede mi: mmọdo esịt adatde mi, edeme mi onyụn̄ adarade; obụkidem mi oyonyụn̄ etie ke idotenyịn: koro Afo udukpọn̄ke ukpọn̄ mi ke obio ekpo, udunyụn̄ uyakke Edisana Owo Fo okụt mbiara.” Peter ama adian do ete: “[David] ebem iso okụt, onyụn̄ etịn̄ aban̄a ediset Christ ke n̄kpa, ete, ikpọn̄ke ukpọn̄ Esie ke obio ekpo, obụkidem Esie inyụn̄ ikwe mbiara. Abasi akanam Jesus emi eset ke n̄kpa.”—Utom 2:25-32.
19, 20. Ini ewe ke Peter okokot oto Psalm 118:22, ndien didie ke emi ekenyene ebuana ye n̄kpa ye ediset ke n̄kpa Jesus?
19 Ndusụk usen ke ukperedem, Peter ama ada ke iso Sanhedrin onyụn̄ afiak okot oto Psalm. Ke ini ẹkebụpde enye nte akasan̄ade ọkọk owo mbụn̄ọ oro ekedide eben̄e eben̄e, apostle oro ama ọbọrọ ete: “Ẹyak kpukpru mbufo ye kpukpru mbon Israel ẹfiọk ẹte, edi enyịn̄ Jesus Christ eyen Nazareth, emi mbufo ẹkewotde ke [eto, NW], emi Abasi akanamde eset ke n̄kpa, edi enyịn̄ emi esịn owo emi ada ke iso mbufo ye nsọn̄idem. Jesus edi itiat emi mbufo [mme andibọp] ufọk ẹkesịnde, emi amakabade edi etubom inụk. Edinyan̄a inyụn̄ itoho ke baba owo kiet efen: koro enyịn̄ baba kiet efen inyụn̄ idụhe eke ẹnọde ke otu owo ke idak ikpa-enyọn̄, eke ẹnyenede ndida nnyan̄a nnyịn.”—Utom 4:10-12.
20 Peter mi okokot oto Psalm 118:22, adade se enye etịn̄de akabuan ye n̄kpa ye ediset ke n̄kpa Jesus. Ke ẹdide se mme adaiso ido ukpono ẹnụkde, mme Jew ẹma ẹsịn Jesus. (John 19:14-18; Utom 3:14, 15) ‘Mme andibọp ufọk ndisịn itiat oro’ ama osụn̄ọ ke n̄kpa Christ, edi ‘itiat oro ndikabade ndi etubom inụk’ akada aban̄a edinam oro ẹkenamde enye eset ke n̄kpa ekenyene ubọn̄ ke heaven nte spirit. Nte andiwet psalm ekebemde iso etịn̄, ‘emi okoto Jehovah.’ (Psalm 118:23) Ndinam “itiat” oro edi Etubom inụk ama esịne edimenede enye ke enyọn̄ nte Edidem oro Ẹmekde.—Ephesus 1:19, 20.
Idotenyịn Ediset ke N̄kpa Omụm Akama
21, 22. Nso idotenyịn ke Job ekenyene, nte ẹwetde ke Job 14:13-15, ndien didie ke emi ekeme ndidọn̄ mbon emi owo mmọ akpade esịt mfịn?
21 Okposụkedi akananam nnyịn ke idem nnyịn mîkwe owo ekededi oro ẹnamde eset ke n̄kpa, nnyịn imokot ndusụk mbụk N̄wed Abasi oro ẹnọde nnyịn nsọn̄ọ ẹban̄a ediset ke n̄kpa. Ke ntre, nnyịn imekeme ndinyene ukem idotenyịn oro edinen owo oro Job eketịn̄de aban̄a. Ke ini enye okokụtde ndutụhọ, enye ama anam n̄kpeubọk ete: “Afo [Jehovah] akpakam edịp mi ke [udi, NW], . . . onyụn̄ odori mi ini, ndien eti mi! Ke owo akpade, nte enye ediset? . . . Afo okpokot, ndien ami n̄kpeyere fi, utom ubọk fo ọkpọdọn̄ fi.” (Job 14:13-15) ‘Utom ubọk Abasi ọyọdọn̄ enye,’ enyenede ọkpọsọn̄ udọn̄ ndinam Job eset. Nso idotenyịn ke oro ọnọ nnyịn ntem!
22 Andibuana ke ubon oro edide abak-Abasi ekeme ndidọn̄ọ idiọk idiọk, kpa nte Job ọkọdọn̄ọde, ndien asua, oro edide n̄kpa akam ekeme ndikan enye ubọk. Owo emi owo esie akpade ekeme nditua, idem kpa nte Jesus akatuade aban̄a n̄kpa Lazarus. (John 11:35) Edi ọnọ ndọn̄esịt didie ntem ndifiọk nte ke Abasi oyokot ndien mbon oro ẹdude ke ibuot uti n̄kpọ esie ẹyeyere! Enye editie nte n̄kpọ eke mmọ ẹkenyọn̄de isan̄ ẹdi—idọn̄ọke m̀mê ndibiomo ndo, edi ẹkopde nsọn̄idem.
23. Didie ke ndusụk owo ẹwụt mbuọtidem mmọ ke idotenyịn ediset ke n̄kpa?
23 N̄kpa anam-akpanikọ Christian kiet oro ama ọkọsọn̄ ama onụk mme ekemmọ andinịm ke akpanikọ ndiwet ẹte: “Mbọk nyịme ntotụn̄ọ mbọm nnyịn ke n̄kpa eka fo. Ndien ke ata ekpri ini nnyịn iyafiak ikụt enye—eyede uyai onyụn̄ enyenede nsọn̄idem!” Ete ye eka oro eyeneren mmọ akakpade ẹma ẹdọhọ ẹte: “Nnyịn isak iso didie ntem ise usen oro Jason edisetde! Enye eyese akanade onyụn̄ okụt Paradise oro enye ekenyenede ọkpọsọn̄ udọn̄ aban̄a. . . . Nso ntak ke emi edi ntem ọnọ nnyịn oro ikamade enye ndidu do n̄ko.” Ih, ndien didie ke nnyịn ikeme ndiwụt esịtekọm ntem nte ke idotenyịn ediset ke n̄kpa edi akpanikọ!
Nso Idi Ibọrọ Fo?
• Didie ke mbuọtidem ke ndutịm Abasi ndinam mme akpan̄kpa ẹset ọnọ nnyịn ufọn?
• Mme n̄kpọntịbe ewe oro ẹwetde ke N̄wed Abasi ẹnọ nnyịn ntak ndidori enyịn ke ediset ke n̄kpa?
• Ntak emi ẹkemede ndidọhọ ke ediset ke n̄kpa edi idotenyịn anyan ini?
• Nso idotenyịn oro omụmde owo akama ke nnyịn ikeme ndinyene mban̄a mme akpan̄kpa?
[Mme Mbụme Ukpepn̄kpọ]
[Ndise ke page 10]
Elijah ama ada odudu otode Jehovah anam ekpri eyeneren ebeakpa eset
[Ndise ke page 12]
Ke ini Jesus ama akanam eyenan̄wan Jairus eset edidu uwem, ete ye eka esie ẹma ẹdat esịt etieti
[Ndise ke page 15]
Ke usen Pentecost 33 E.N., apostle Peter ama etịn̄ uko uko ete ke ẹma ẹnam Jesus eset ke n̄kpa