Nnyịn Idi Mmọ Ẹmi Ẹbuọtde Idem

Nditan̄a Eti Mbụk ke Mme In̄wan̄ Edesi Taiwan

NTE ido edide ekese edịm esidep ke Taiwan, ndien emi anam enye ekeme ndin̄wụm akpakịp edesi ikaba kpukpru isua. Nte ededi, ke ini ke ini, edịm isidepke ke ini akpanade edep, ndien mme n̄kpasịp ẹsikpan̄a. Ke ini emi etịbede, nte ọtọin̄wan̄ esikpa mba? Baba. Enye esifiọk ke oyom ime. Enye esitọ mbufa n̄kpasịp ke in̄wan̄. Ekem, edieke mme idaha ẹfọnde, ọtọin̄wan̄ esikpen̄e akpakịp mfri. Utọ ye idọk eke spirit ẹsidi ata ukem ntre ke ndusụk ini.

Ndisịn Ifịk ke Idọk eke Spirit

Ke ediwak isua oro ẹkebede Mme Ntiense Jehovah ke Taiwan ẹnam utom ọkpọsọn̄ nditọ nnyụn̄ ndọk n̄kpasịp akpanikọ N̄wed Abasi ke ndusụk itie oro ẹketiede nte in̄wụmke mfri. Uwụtn̄kpọ kiet edi Obio Miao-li. Esisịt owo ẹkenam n̄kpọ ẹban̄a ukeme oro ẹkesịnde ke ini ke ini ndinọ ikọ ntiense ke n̄kann̄kụk oro. Ntre ke 1973 ẹma ẹnọ ebe ye n̄wan oro ẹdide akpan asiakusụn̄ ndikanam utom do nte mme anditan̄a Obio Ubọn̄ uyọhọ ini. Ke ntọn̄ọ ntọn̄ọ, ndusụk owo ẹma ẹnyene udọn̄ ke eti mbụk. Nte ededi, ikebịghike udọn̄ oro ama akpa. Ndien ẹma ẹnọ mme akpan asiakusụn̄ oro ẹka ebiet en̄wen.

Ke 1991 ẹma ẹnọ akpan asiakusụn̄ iba efen ẹka do. Edi ini kiet efen se iketịbede ama owụt nte ke idaha ikọfọnke kaban̄a n̄kọri eke spirit. Ke isua ifan̄ ẹma ẹkebe, ẹma ẹnọ mme akpan asiakusụn̄ oro ẹka mme efakutom oro ẹkedoride enyịn nte ke ẹyen̄wụm mfri. Ntem, isọn̄ oro ekedi ekpene ke ndusụk ini.

Mbufa Ukeme Ẹnyene Utịp

Ke September 1998 ẹma ẹbiere ndisịn ukeme ke ndiyom mme ebiet oro ẹdin̄wụmde mfri ke akamba efakutom oro owo mîbahakede inọ owo ke Taiwan. Didie ke ẹdinam emi? Ebe ke ndinọ akpan asiakusụn̄ ibio ini 40 ẹkenam utom ke mme efakutom oro owo mîbahakede inọ owo oro mme owo ẹnen̄erede ẹwak.

Obio iba oro ẹdude ẹkpere Obio Miao-li ẹma ẹdu ke otu efakutom oro ẹkemekde ndinam ubịnikọt emi. Nditọete iban inan̄ oro mîdọhọ ndọ ẹkenyene ndinam utom do ke ọfiọn̄ ita man ẹse nte efakutom oro etiede. Ikebịghike ke mmọ ẹma ẹkesịm do, mmọ ẹma ẹwet mme inem inem ntọt ẹban̄a ibat mbon oro ẹkenyenede udọn̄ oro mmọ ẹkesobode. Etisịm ini emi mmọ ẹkekụrede ọfiọn̄ ita ke utom usiakusụn̄ mmọ ke n̄kann̄kụk oro, mmọ ẹma ẹnịm ediwak ukpepn̄kpọ Bible. Mmọ ẹma ẹtọn̄ọ otu ukpepn̄kpọ n̄wed n̄ko ye un̄wam ebiowo kiet otode n̄kpet n̄kpet esop.

Ita ke otu nditọete iban ẹmi ẹma ẹnam an̄wan̄a ẹte ke mmimọ ikpama ndika iso ke ndise mban̄a nsek “n̄kpasịp” emi ẹkekọride ata mfọn mfọn. Nte utịp, ẹma ẹmek iba ke otu mmọ ndidi mme ata ata akpan asiakusụn̄, ndien ọyọhọ ita ama aka iso ndinam utom do nte asiakusụn̄ ofụri ini. Ebiowo kiet otode n̄kpet n̄kpet esop ama ọwọrọ edidụn̄ ke n̄kann̄kụk oro man an̄wam mmọ. Se iwakde ibe owo 60 ẹkedụk akpa utịn̄ikọ an̄wa oro ẹkenọde ke n̄kann̄kụk oro. Idahaemi n̄kpet n̄kpet esop oro ke an̄wam obufa otu emi ndinịm mbono esop kpukpru Sunday ke adianade ye ndusụk ukpepn̄kpọ n̄wed esop. Ekeme ndidi ẹyetọn̄ọ obufa esop ke n̄kann̄kụk oro ke mîbịghike.

Ifịk Ada Mme Edidiọn̄ Edi ke Mme Ikpehe Taiwan Eken

Mme ebiet eken ẹma ẹyere ikot ke ukem usụn̄ emi. Ke Obio I-lan emi odude ke n̄kan̄ ufọt ufọt  edem edere ye edem usiahautịn isuo oro, ẹma ẹtọn̄ọ obufa Ukpepn̄kpọ N̄wed Esop ke n̄kann̄kụk oro mme akpan asiakusụn̄ ibio ini oro ẹkenamde utom.

Ke adan̄aemi akanamde utom eke ufọk ke ufọk ke mbubịteyo kiet, akpan asiakusụn̄ ibio ini kiet ama osobo ye akparawa kiet onyụn̄ owụt enye babru ikot oro ẹwetde mme mbono esop. Enye ama ọsọsọp obụp ete: “Ndi mmekeme ndidụk mbono oro mbubịteyo n̄kpọn̄? Ke edide ntre, nso ke n̄kpesịne?” Asiakusụn̄ emi ama enịm ukpepn̄kpọ Bible itiaita kpukpru urua ye mme owo oro ẹkenyenede udọn̄. Ikebịghike ediwak ke otu nditọ ukpepn̄kpọ Bible oro ẹma ẹnam ndutịm ndikabade ndi mme asuanetop eti mbụk ke idemmọ, ye utịtmbuba edina baptism.

Owo efen ke obio emi ama esika ufọkabasi ke ediwak isua edi ikekemeke ndikụt owo ndomokiet emi edikpepde enye Bible. Ke ini enye okokopde aban̄a ndutịm ukpepn̄kpọ Bible, enye ama enyịme ẹkpep imọ. Ẹma ẹsịn udọn̄ ẹnọ enye nditịm idem ke mbemiso nnọ ukpepn̄kpọ esie. Ke ini akpan asiakusụn̄ ibio ini oro ekedide ndinịm ukpepn̄kpọ oro, enye ama okụt ke n̄wan emi ama anam “utomufọk” esie ebe ke ndidep n̄wed uwetn̄kpọ emi enye akadade ewet mme mbụme oro ẹmịn̄de-mịn̄ oro ẹdude ke n̄wed ukpepn̄kpọ esie. Ekem enye ama ewet mme ibọrọ esie ke mbụme kiet kiet. Enye n̄ko ama ewet kpukpru itien̄wed oro ẹsiakde ẹsịn ke ukpepn̄kpọ esie esịn ke n̄wed uwetn̄kpọ esie. Etisịm ini emi eyenete an̄wan oro ekedide ndinịm akpa ukpepn̄kpọ, n̄wan emi ama etetịm idem ọnọ ukpepn̄kpọ ita!

Ẹma ẹkụt mme ukem utịp oro ke obio Dongshih ke ufọt ufọt Taiwan. Mme akpan asiakusụn̄ ibio ini oro ẹma ẹnịm se iwakde ibe ndiye uduot n̄kpri n̄wed 2,000 ke ọfiọn̄ ita oro mmọ ẹkenamde utom do. Etisịm ọyọhọ ọfiọn̄ ita, mmọ ẹma ẹnịm ukpepn̄kpọ Bible 16. Unyekisọn̄ oro eketịbede ke ufọt ufọt Taiwan ke September 21, 1999, ama enen̄ede abiat obio oro, edi ndusụk mbon oro ẹnyenede udọn̄ ke ẹka iso ndinam n̄kọri eke spirit, idem okposụkedi mmọ ẹsinyenede ndinam isan̄ ke hour kiet man ẹkedụk mme mbono esop ke Ufọkmbono Obio Ubọn̄ oro ekperede akan. Ih, oyom ifịk man ẹkpen̄e akpakịp mbun̄wụm, edide ata ata mbun̄wụm m̀mê mbun̄wụm eke spirit.

[Ndise obio ke page 8]

(Ama oyom ndikụt nte enye enen̄erede etie, se n̄wed)

CHINA

Utịp Taiwan

TAIWAN

[Ebiet Ẹdade N̄kpọ Ẹto]

Mountain High Maps® Copyright © 1997 Digital Wisdom, Inc.