Ntọt Mme Anditan̄a Obio Ubọn̄

Mbon Oro Ẹmade Jehovah Ẹdi Ọsọn̄urua Ẹnọ Enye

ẸTỊM ẹdiọn̄ọ Lebanon ke ntak mme oto-obot inyene isọn̄ esie toto ke mme ini Bible. (Psalm 72:16; Isaiah 60:13) Se ikenen̄erede isọn̄ urua ẹkedi ikpọ cedar esie, emi ẹkesinen̄erede ẹyom nte n̄kpọ ubọp ufọk ke ntak uyai, ufuọn̄, ye nte mmọ ẹsibịghide. Ke akpa isua ikie, n̄kpọ emi ekenen̄erede ọsọn̄ urua ama ọwọrọ oto Lebanon. Gospel Mark ọtọt ete ke “ata ediwak owo emi ẹkopde ikpọ n̄kpọ eke [Jesus] anamde,” ẹma ẹto ke Tyre ye Sidon, emi ẹdude ke Lebanon eset, “ẹtiene Enye.”—Mark 3:8.

Kpasụk ntre mfịn, Lebanon ke aka iso ndin̄wụm mfri oro enen̄erede ọsọn̄ urua ke enyịn Jehovah. Mme ifiọkutom ẹtienede mi ẹwụt emi.

• Ẹma ẹdọhọ akparawa Ntiense kiet emi ekerede Wissam ẹte etịn̄ ikọ ke minit 30 ọnọ mbon ubet ukpepn̄kpọ esie ke ufọkn̄wed. Wissam ama ebiere ete ke oro edidi eti ifet ndinọ ikọ ntiense. Ntre enye ama ada n̄wed Life—How Did It Get Here? By Evolution or by Creation? etịm utịn̄ikọ ke ibuotikọ aban̄ade edibotn̄kpọ. Nte ededi, ke okụtde ibuotikọ oro, andikpep Wissam ama ọdọhọ ete sia enye ekedide ata akpan nneme, ke Wissam ekeme ndida minit 45 nneme enye.

Nte Wissam ọkọtọn̄ọde utịn̄ikọ esie, andikpep esie ama ọdọhọ enye ebet onyụn̄ ọdọn̄ ẹkekot etubom. Ikebịghike etubom ama edisịm, ndien Wissam ama afiak ọtọn̄ọ. Nte enye akakpan̄de utọn̄ ke mme mbụme oro Wissam okobụpde ke ntọn̄ọikọ utịn̄ikọ esie, etubom ama okop nduaidem onyụn̄ ọdọhọ ke kpukpru nditọ ufọkn̄wed ẹkpenyene ndibọ idem babru utịn̄ikọ oro kiet.

Esisịt ini ke oro ebede, andikpep efen, emi akasan̄ade-san̄a ebe, ama okụt idara oro okodude ke ubet ukpepn̄kpọ oro onyụn̄ obụp m̀mê nso iketịbe. Ke ẹma ẹketịn̄ ẹnọ enye, enye ama obụp m̀mê Wissam okodomo ndisọn̄ọ edibotn̄kpọ m̀mê edito ke unam mforo owo. Ibọrọ ekedi, “edibotn̄kpọ.” Ke ọfiọkde nte ke Wissam ekedi kiet ke otu Mme Ntiense Jehovah, andikpep oro ama asian mbon ubet ukpepn̄kpọ oro ete: “Utịn̄ikọ esie ayanam mbufo ẹkụt ke ifiọk ntaifiọk ada ye edibotn̄kpọ, idịghe edito ke unam mforo owo.”

Andikpep emi ama enyene idem n̄wed Creation ndien ama esikama enye ọnọ ukpep ke ufọkn̄wed ntaifiọk! Mbemiso ọkọnyọn̄de, enye ama obụp m̀mê imọ imekeme ndisan̄a ye nditọ ukpepn̄kpọ imọ ndi ke ndan̄nsiere man Wissam etịn̄ ikọ ọnọ mmọ. Oro ama osụn̄ọ ke edinọ eti ikọ ntiense efen mban̄a Jehovah.

• Nina emi edide isua 22 ke emana ama okop nsatitọn̄ mmọn̄ akpanikọ. Usen kiet eyen eyeneka ete esie ama ọnọ enye Bible onyụn̄ emen enye owụt Ufọkabasi Pentecostal. Nina ama okop inemesịt ndikot Bible oro onyụn̄ ekpep oto ukotn̄wed esie nte ke mme Christian ẹkpenyene ndikwọrọ ikọ, ntre enye ama ọtọn̄ọ ndikwọrọ ikọ nnọ mme ọdiọn̄ọ esie. Kpukpru owo oro enye ọkọkwọrọde ikọ ọnọ ẹma ẹbụp enye ẹte: “Nte afo edi kiet ke otu Mme Ntiense Jehovah?” Oro ama akpa enye idem.

Isua itiokiet ke ukperedem, Mme Ntiense Jehovah ẹma ẹwaha ufọk Nina ẹketịn̄ ẹnọ enye ẹban̄a Obio Ubọn̄ Abasi. Ke akpa enye ama odomo ndikụt ndudue nnọ mme ukpepn̄kpọ mmọ. Nte ededi, enye ama okụt ete ke kpukpru ibọrọ mmọ ẹma ẹsịne ifiọk ke ẹkenyụn̄ ẹkọn̄ọ ke Bible.

Se Nina ekekpepde ke akpatre—enyịn̄ Abasi, Jehovah; mme edidiọn̄ Obio Ubọn̄; ye ntre ntre eken—ẹma ẹnam enye enịm ete ke imọ imokụt akpanikọ. Enye ama ayak uwem esie ọnọ Abasi onyụn̄ ana baptism. Ke isua itiaba emi ẹkebede, Nina anam utom nte ọkwọrọikọ uyọhọ ini. Ke akpanikọ, Jehovah esidiọn̄ mbon oro ẹnyenede ata ima ẹnọ enye.—1 Corinth 2:9.