Ntak Ikpowụtde Eti Ibuot ke Se Nnyịn Idoride Enyịn?

IDOTENYỊN oro mîkpụhu ye mme udọn̄ oro ẹsude ẹsinọ nnyịn uyụhọ. Kpa ye oro, nte ẹnyịmede, ekese udọn̄ ye idotenyịn nnyịn isidịghe nte nnyịn iyomde. Nditi mme edikpu ke uwem ekeme ndinam nnyịn itọhọ ye idem nnyịn ye idem mbon efen. Enyene-ọniọn̄ owo kiet ama etịn̄ nte odotde ete: “Idot-enyịn eke anamde ubịghi esịn esịt ọdọn̄ọ.”—Mme N̄ke 13:12.

Nso idi ndusụk n̄kpọ oro ẹkemede ndida edikpu ndi? Didie ke nnyịn ikeme ndiwụt eti ibuot ke se nnyịn idoride enyịn? N̄ko-n̄ko, ntak edide ke ufọn nnyịn ndinam oro?

Idotenyịn ye Mme Edikpu

Ye emi uwem etiede itọk itọk ntem mfịn, adan̄a nte nnyịn idomode ndisan̄a n̄ka iso, ntre ke nnyịn ikpọt ke edem. Mme n̄kpọ ẹyomde ini ye odudu nnyịn ẹkeme ndiwak, ndien ke ini nnyịn ikpude ndikụre se ikọtọn̄ọde, nnyịn imekeme ndibiom idem nnyịn ikpe. Nnyịn imekeme ndikam ntọn̄ọ ndikere ke imokpu mbon efen. Cynthia, n̄wanndọ onyụn̄ edide eka nditọ emi ọfiọkde mme mfịghe ubọk nditọ, ọdọhọ ete: “Ndinana iwụk ke ndinen̄ede nditọ mi ye ekikere nte ke nnọhọ mmọ ukpep oro ekemde ẹsidi n̄kpọ iyatesịt.” Stephanie, emi edide uyen, etịn̄ aban̄a ubọ ukpep esie ete: “Nnyeneke ini awakde ekem ndinam kpukpru se nyomde ndinam, ndien oro anam mi nnana ime.”

Akwa idotenyịn oro mîwụtke eti ibuot esisọp ndikabade ndi ediyom mfọnmma, ndien emi ekeme ndinen̄ede n̄kama edikpu. Ben, akparawa emi ọdọde ndọ, ayarade ete: “Ke ini ndụn̄ọrede mme edinam, mme ekikere, ye mme ntụk mi, mmesikụt kpukpru ini nte ke oyom nnen̄ede mmọ. Ami mmesiyom mfọnmma kpukpru ini, ndien emi esida esịm unana ime, ye edikpu.” Gail, n̄wanndọ Christian, ọdọhọ ete: “Ekikere oyom-mfọnmma isinyịmeke edikpu. Nnyịn isiyom ndidi mme eka ye ibanndọ oro ẹfọnde ẹkan. Nnyịn isinyene ndinam utom man inyene inemesịt, ntre ukeme oro ẹbiatde esiyayat nnyịn esịt.”

Edi n̄kpọ efen oro ekemede ndida nsịm edikpu edi udọn̄ọ ye usọn̄. Unana ukeme ye odudu ẹsiyarade mme mmeme nnyịn ẹnyụn̄ ẹtịp ẹsịn ke ndinam nnyịn inyene ekikere edikpu. Elizabeth enyịme ete: “Mmesikop iyatesịt mban̄a idemmi ke ntak oro mmen̄kemeke ndinam mme n̄kpọ oro ẹkesidide ata mmemmem ye edinam ofụri usen ke ini idem ọkọsọn̄de mi.”

Se ẹnemede emi edi uwụtn̄kpọ ke se ikemede ndida mme ekikere edikpu ndi. Ke owo mîkpemeke, mme utọ ekikere oro ẹkeme ndinam nnyịn inịm nte ke mbon efen imaha nnyịn. Ntre, mme in̄wan̄în̄wan̄ edinam ewe ẹkeme ndin̄wam nnyịn iyọ mme edikpu inyụn̄ inyene idotenyịn oro owụtde eti ibuot?

Mme Usụn̄ Ndiwụt Eti Ibuot ke Se Nnyịn Idoride Enyịn

Akpa, ti ete ke Jehovah enyene eti ibuot onyụn̄ owụt edikere mban̄a. Psalm 103:14 eti nnyịn ete: “Koro enye ọfiọkde nte iborode; emeti ete ke nnyịn idi ntan.” Sia ọfiọkde mme ukeme ye mmeme nnyịn, Jehovah esiyom n̄kukụre se nnyịn ikemede ndinam oto nnyịn. Ndien n̄kpọ kiet emi enye oyomde oto nnyịn edi ‘ndisụk idem nsan̄a ye Abasi nnyịn.’—Micah 6:8.

Jehovah eteme nnyịn n̄ko ete idi ibịne imọ  ke akam. (Rome 12:12; 1 Thessalonica 5:17) Nte ededi, didie ke oro an̄wam nnyịn? Akam esinam ekikere nnyịn ana sụn̄ onyụn̄ ada ukem ukem. Akam ofụri esịt edi ndinyịme nte ke nnyịn imoyom un̄wam—enye edi idiọn̄ọ nsụkidem ye nsụhọdeidem. Jehovah odu ke mben̄eidem ndiyere mme akam nnyịn ebe ke ndinọ nnyịn edisana spirit esie, emi mbun̄wụm esie esịnede ima, mfọnido, eti ido, ye mfara ke idem. (Luke 11:13; Galatia 5:22, 23) Akam esisụhọde editịmede esịt ye mfụhọ n̄ko. Elizabeth ọdọhọ ke ebede ke akam, “afo eyenyene ndọn̄esịt oro mûkemeke ndinyene nto ebiet efen ekededi.” Kevin ọsọn̄ọ ete: “Mmesibọn̄ akam mben̄e sụn̄sụn̄ esịt ye in̄wan̄în̄wan̄ ekikere man n̄keme ndiyọ mfịna. Akananam Jehovah ikpụhu mi.” Apostle Paul ama ọfiọk nte akam enen̄erede ọfọn. Ntak edi oro enye eketemede ete: “Ẹsian Abasi se mbufo ẹyomde. Ndien emem Abasi, emi ayan̄ade ifiọk owo, eyekpeme mbufo esịt ye ekikere ke Christ Jesus.” (Philippi 4:6, 7) Ih, nditịn̄ ikọ ye Jehovah esinen̄ede an̄wam ke ndinam nnyịn ikọri eti ibuot ke se nnyịn iyomde ito idem nnyịn ye mbon efen.

Nte ededi, ke ini ke ini, nnyịn imesiyom mme ikọ nsịnudọn̄. Ikọ eke ẹtịn̄de ke ekem ini esifọn. Nditịn̄ ikọ idịbi nnọ ufan oro ẹbuọtde idem onyụn̄ ọkọride esịm ọyọhọ idaha ekeme ndin̄wam nnyịn inyene ifiọk iban̄a se inamde nnyịn inyene edikpu m̀mê editịmede esịt. (Mme N̄ke 15:23; 17:17; 27:9) Mme uyen oro ẹn̄wanade ye ekikere edikpu ẹfiọk ẹte ke ndiyom item nto mme ete ye eka mmimọ esin̄wam mmimọ ida ukem ukem. Kandi enyịme ye esịtekọm ete: “Ima ima ndausụn̄ ete ye eka mi an̄wam mi nnen̄ede nnyene eti ibuot, nda ukem ukem, nnyụn̄ ndi eti nsan̄a.” Ih, item odude ke Mme N̄ke 1:8, 9 enen̄ede edi ekemini: “Eyen mi, kop item usọ, kûnyụn̄ ukpọn̄ mbet uka: koro mmọ ẹyedi ediye anyanya ke ibuot fo, ye obukpe ke itọn̄ fo.”

Ẹwụt mme utịp ẹdude ke edu ukere n̄kpọ oyom mfọnmma ibio ibio ke n̄ke emi: “Ndiyom uwem asan̄a nte nnyịn iyomde edi ndiyom edikpu.” Man ifep emi, oyom ikpụhọde usụn̄ ukere n̄kpọ nnyịn. Nsụhọdeidem ye nsụkidem—kpa edinyene nnennen ekikere mban̄a mme mmeme nnyịn—ẹyenen̄ede ẹnam nnyịn ida ukem ukem inyụn̄ iwụt eti ibuot ke idotenyịn nnyịn. Nte odotde, Rome 12:3 ọnọ nnyịn item ete ‘ikûkere ite idi n̄kpọ ikan nte ikpekerede.’ Adianade do, Philippi 2:3 esịn udọn̄ ọnọ nnyịn ete ida nsụhọde esịt ibat ite mbon en̄wen ẹfọn ẹkan nnyịn.

Elizabeth, oro ẹkesiakde ke mbemiso, ama anana ime ke ntak udọn̄ọ esie. Ama oyom ini man enye ese n̄kpọ nte Jehovah esede onyụn̄ enyene ndọn̄esịt ke ndifiọk nte ke enye ifreke utom nnyịn. Colin ikemeke ndisan̄a isan̄ ke ntak udọn̄ọ emi akamade ọkpọsọn̄ mmemidem. Ke akpa, enye ama esikere ke utom ukwọrọikọ imọ inyeneke ufọn ndomokiet ke ẹmende ẹdomo ye se imọ ikesinamde ke ini idem ọkọsọn̄de imọ. Ebede ke nditie n̄kere mme utọ itien̄wed nte 2 Corinth 8:12, enye ama ekeme ndikan mme ekikere emi. Ufan̄ikọ emi ọdọhọ ete: “Koro edieke edinyịme esịt odude, enem Abasi esịt ndibọ enọ nte asan̄ade ekekem ye se owo enyenede, idịghe nte ebede ukeme esie.” Colin ọdọhọ ete: “Okposụkedi nnyenede ata esisịt ndinọ, mmekeme ndisụk nnọ, ndien oro enem Jehovah esịt ndibọ.” Ke Mme Hebrew 6:10, ẹti nnyịn ẹte: “Abasi ikwan̄ake nte efrede utom mbufo ye ima enyịn̄ Esie eke mbufo ẹwụtde.”

Do, didie ke nnyịn ikeme ndifiọk m̀mê idotenyịn nnyịn owụt eti ibuot? Bụp idemfo, ‘Ndi se ndoride enyịn ẹdu ke n̄kemuyo ye se Abasi odoride enyịn?’ Galatia 6:4 ọdọhọ ete: “Yak owo kiet kiet odomo utom esie ọfiọk, ekem enye eyenyene se enye obụrede aban̄a ke idem esie ikpọn̄, idibụreke ke idem owo en̄wen.” Ti, Jesus ọkọdọhọ ete: “Ọkpọnọ Mi ememem, mbiomo Mi onyụn̄ efefere.” Ih, nte mme Christian, nnyịn imenyene mbiomo ndibiom, edi enye “ememem” onyụn̄ “efefere,” ndien Jesus ama ọn̄wọn̄ọ ete ke iyokụt nduọkodudu edieke ikpepde ndibiom enye nte enende.—Matthew 11:28-30.

Ndiwụt Eti Ibuot ke Se Idoride Enyịn Ada Mme Utịp Ẹdi

Mme utịp ibio ini ye eke anyan ini ẹsisụn̄ọ ẹto edikpan̄ utọn̄ nnọ nnyụn̄ nda mme item  Ikọ Abasi nsịn ke edinam nte nnyịn isịnde ukeme ndiwụt eti ibuot ke se nnyịn idoride enyịn. Akpa n̄kpọ edi, emi esinyene eti utịp ke ikpọkidem nnyịn. Jennifer, emi ọkọbọde ufọn oto mme n̄kpọ editi Jehovah, enyịme ete: “Mmenyene odudu ye inemesịt efen efen ke uwem.” Nte odotde, Mme N̄ke 4:21, 22 esịn udọn̄ ọnọ nnyịn ete ikûyak mme ikọ Jehovah ẹsop ke enyịn ye ke ọwọn̄ esịt nnyịn, “koro mmọ ẹdide uwem mmọ eke ẹkụtde mmọ [ye se inọde mmọ nsọn̄idem ikpọkidem, NW].”

Utịp efen edi nsọn̄idem ekikere ye eke ntụk. Theresa ọdọhọ ete: “Ke ini nyakde Ikọ Abasi odụk ekikere ye esịt mi, ami mmesinen̄ede n̄kop inemesịt.” Edi akpanikọ, nnyịn iyosụk inyene mme edikpu ke uwem. Edi, nnyịn iyekeme ndiyọ mmọ mmemmem mmemmem. James 4:8 akpak ete: “Ẹsan̄a ẹkpere Abasi, ndien enye ayasan̄a ekpere mbufo.” Jehovah ọn̄wọn̄ọ n̄ko ndisọn̄ọ nnyịn idem man iyọ mme n̄kpọ-ata ke uwem onyụn̄ ọn̄wọn̄ọ ndida emem ndiọn̄ nnyịn.—Psalm 29:11.

Ndiwụt eti ibuot ke se idoride enyịn an̄wam nnyịn imụm edida ukem ukem ke n̄kan̄ eke spirit ikama. Emi n̄ko edi edidiọn̄. Nnyịn imekeme ndibịne se ifọnde ikan ke uwem. (Philippi 1:10) Do mme utịtmbuba nnyịn ẹyedi ata idem n̄kpọ ye se ikemede ndisịm, emi ẹdade akwa idatesịt ye uyụhọ ẹsọk nnyịn. Nnyịn iyenyịme ndinen̄ede n̄kọn̄ mbuọtidem nnyịn ke Jehovah, ifiọkde ite ke enye ayanam mme n̄kpọ ẹtịm ẹfọn. Peter ọdọhọ ete: “Ẹsụhọde idem ndien ke idak ọkpọsọn̄ ubọk Abasi, man Enye ekpemenede mbufo enịm ke enyọn̄ ke edikem ini.” (1 Peter 5:6) Ndi n̄kpọ ekededi ekeme ndidu oro ọnọde utịp eke okponde akan ndidi se Jehovah okponode?

[Mme ndise ke page 31]

Ndiwụt eti ibuot ke se nnyịn idoride enyịn ekeme ndin̄wam nnyịn ndiyọ mme edikpu