Ndiwọrọ N̄ka Mme Isuo Pacific​—Man Ikanam Utom!

UFỌKISEN ke itiembehe ubomofụm eke idụt ke Brisbane ye Sydney, Australia, ẹma ẹyọhọ ye idatesịt ẹkan nte akanam edide. Otu ekesịnede owo 46 ẹkedu ke mben̄eidem ndife n̄ka ufiop ufiop Samoa man ẹkesobo ye owo 39 en̄wen emi ẹketode New Zealand, Hawaii, ye United States. Mbiomo mmọ eketie esen esen—esịnede mme n̄kpọutom akpan akpan, utọ nte ukọn̄n̄kpọ, uyọkn̄kpọ, ye masịn utịbi ndudu—idịghe mme utọ n̄kpọ oro owo akpakamade anam isan̄ aka ediye isuo Pacific. Edi, kpa ye oro, isan̄ mmọ ekedi ata n̄wọrọnda.

Ke ẹkpede usụn̄ ke idemmọ, mmọ ẹkeka ndibiat urua iba nte mme anamutom unyịmesịt oro owo mîkpehe okụk ke ndutịm ubọpufọk oro Ọfis Utịmutom eke N̄kann̄kụk ke ọfis n̄kọk itieutom Mme Ntiense Jehovah ke Australia ọkọnọde ndausụn̄. Ndutịm oro, emi ẹkedade mme etịbe unyịmesịt ẹse ẹban̄a, esịne edibọp mme Ufọkmbono Obio Ubọn̄, mme Ufọk Mbono, mme ufọkidụn̄ isụn̄utom, ye n̄kọk itieutom m̀mê itie ukabade n̄wed nnọ mme esop Mme Ntiense Jehovah oro ẹkọride usọp usọp ke mme isuo Pacific. Ẹyak isobo ye ndusụk ke otu mme anamutom oro, emi ẹma ẹkedu ke otu mme ọbọp Ufọkmbono Obio Ubọn̄ ke mme idụt emana mmọ.

Max, ọkọn̄ ọkọmufọk, oto Cowra ke New South Wales, Australia. Enye ọdọ ndọ onyụn̄ enyene nditọ ition. Arnold oto Hawaii. Enye ye n̄wan esie ẹnyene nditọ iba, ndien enye edi asiakusụn̄ n̄ko, m̀mê asan̄autom uyọhọ ini. Ukem nte Max, Arnold anam utom nte ebiowo ke esop obio esie. Nte an̄wan̄ade, iren emi—mmọ ẹnyụn̄ ẹtie ukem ukem nte ata ediwak mbon oro ẹdude ke ndutịm oro—idịghe mme anamutom unyịmesịt ke ntak oro mmọ ẹnyenede nyọhọ nsụhọ ini. Utu ke oro, mmọ ye ubon mmọ ẹkụt ke oro edi se ẹyomde, ndien mmọ ẹyom ndinam se mmọ ẹkemede man ẹn̄wam.

Mme Anamutom Ẹtode Nsio Nsio Idụt Ẹyọhọ Akpan Udọn̄

Itie kiet emi ẹkeyomde mme usọ ye utom mmọ ekedi Tuvalu, idụt Pacific emi n̄kpọ nte owo 10,500 ẹdụn̄ọde onyụn̄ odude ke otu n̄kpri isuo usụkkiet oro ẹdude nsannsan ẹkpere ufọt ererimbot ye ufọt ufọt edem edere ye edem usoputịn Samoa. Mme isuo, m̀mê n̄kpri isuo oro, kiet kiet ẹdi n̄kpọ nte kilomita 2.5 ke n̄kan̄ mbinan̄ ke ẹbaharede ukem ukem. Ke 1994, Mme Ntiense 61 oro ẹkedude do ẹma ẹyom obufa Ufọkmbono Obio Ubọn̄ ye akamba ọfis ukabade n̄wed ata usọp usọp.

Ke n̄kan̄ ufiop isọn̄ Pacific emi, ana ẹtịm ẹnyụn̄ ẹbọp ufọk ke usụn̄ oro ekemede ndisọn̄ọ nda mbọhọ  ọkpọsọn̄ oyobio ye idio oro ẹsifụmede ndien ndien. Edi ibat ibat nti n̄kpọ ubọpufọk ẹdu ke mme isuo oro. Nso ikedi usọbọ? Ẹkemen kpukpru n̄kpoduoho—ọtọn̄ọde ke tian ye eto ọkọmufọk tutu esịm n̄kpọ mbanaufọk ye mme ọfọn̄ ikpehe, n̄kpọ ukaikọt mbakara ye esan̄ukwak itie uyere mmọn̄, idem efiọn̄ ye okpukwak—ẹto Australia ẹdi ke nsụn̄ikan̄.

Mbemiso mme n̄kpọutom emi ẹkedide ẹdibehe, ekpri otu kiet ama etịm itie onyụn̄ esịn itiat idakisọn̄. Ekem mme anamutom ẹtode ediwak idụt ẹma ẹdi ndibọp, ndiyet ndom mbakara, nnyụn̄ mbana mme ufọk oro.

Ke unana idotenyịn, kpukpru edinam emi ke Tuvalu ẹma ẹdemede iyatesịt ọkwọrọ ederi n̄kann̄kụk emi ọkọtọtde ke ekebe ukopikọ ete ke Mme Ntiense ẹkebọp “Tọwa Babel”! Nte ededi, nso ikedi akpanikọ? Graeme, anamutom unyịmesịt ọdọhọ ete: “Ke ini mme owo oro ẹkebọpde Tọwa Babel eke Bible ẹkekụtde ẹte ke mmimọ ikekemeke aba ndikop se kiet eken etịn̄de ke ntak oro Abasi ama eketịmede usem mmimọ, mmọ ẹkenyene nditre utom mmọ ye unana edibọp tọwa oro nsịm utịt.” (Genesis 11:1-9) “Edi ata isio isio ke ini ẹnamde utom ẹnọ Jehovah Abasi. Kpa ye mme ukpụhọde ke usem ye ido edinam, kpukpru ini ẹsikụre utom oro.” Ndien ekedi ntre ye enye emi—ke n̄kpasịp urua iba. Ke akpanikọ, owo 163, esịnede n̄wan akpan isụn̄utom ukara, ẹkedụk edinam ediyak nnọ.

Doug, eseutom oro, ke afiakde eti ifiọk n̄kpọntịbe oro, ọdọhọ ete: “Ekedi n̄kpọ idatesịt ndinam utom ye mbonutom unyịmesịt ẹtode mme idụt efen. Nnyịn inyene nsio nsio usụn̄ unam n̄kpọ, nsio nsio usụn̄ ndikot mme n̄kpọ, idem nsio nsio udomon̄kpọ, kpa ye oro mme n̄kpọ emi ndomokiet ikadaha mme mfịna idi.” Sia ama okodu ke ediwak utọ utom oro idahaemi, enye adian do ete: “Emi ọsọn̄ọ ọnọ mi nte ke ye un̄wam Jehovah ikọt esie ẹkeme ndibọp ufọk ke ebiet ekededi ke isọn̄ emi, inamke n̄kpọ m̀mê ebiet oro odu nsannsan m̀mê edi ọkpọsọn̄ n̄kpọ adan̄a didie. Ke akpanikọ, nnyịn imenyene ediwak iren oro ẹnyenede ndammana ukeme, edi edi spirit Jehovah anam ẹkeme ndinam enye.”

Spirit Abasi n̄ko edemede ubon Mme Ntiense ke mme isuo oro ndinọ udia ye itieidụn̄, emi edide ata akamba n̄waidem ke n̄kan̄ ndusụk owo. Ndien mbon oro ẹwụtde mmọ utọ ntatubọk oro ẹsinen̄ede ẹwụt esịtekọm. Ken, emi otode Melbourne, Australia, ama anam ukem utom oro ke French Polynesia. Enye ewet ete: “Nnyịn ikedi nte mme asan̄autom, edi ẹkeda nnyịn nte mbọn̄.” Ke ebiet ẹkemede, Mme Ntiense n̄kann̄kụk n̄ko ẹsin̄wam ke utom ubọpn̄kpọ. Ke Solomon Islands, iban ẹma ẹbuak mbat ubọpufọk—ke ubọk. Iren ye iban ikie ẹma ẹdọk mfiọnọde ikpọ obot ẹkebiom se ikawakde ibe tọn eto 40. N̄kparawa owo ẹma ẹn̄wam n̄ko. Anamutom kiet otode New Zealand ọdọhọ ete: “Mmeti akparawa kiet emi otode isuo oro emi ekesibiomde ekpat simen iba esịm ita ini kiet. Ndien enye ama esibuak n̄kwaitiat ofụri usen ke ufiopeyo ye ke edịm.”

Mme Ntiense n̄kann̄kụk ndibuana ke utom oro  ada ufọn efen edi. Ọfis n̄kọk itieutom Watch Tower Society ke Samoa ọtọt ete: “Nditọete ẹtode isuo oro ẹkpep usọ oro mmọ ẹkemede ndida mbọp mme Ufọkmbono Obio Ubọn̄ nnyụn̄ mfiak ndiọn̄ nnyụn̄ mbọp mme ufọk oro idio abiatde. Enye ekeme ndin̄wam mmọ n̄ko ndinyene se ẹdade ẹdu uwem ke n̄kann̄kụk emi edide ọkpọsọn̄ n̄kpọ ọnọ ediwak owo ndinyene n̄kpọ udu uwem.”

Ndutịm Ubọpufọk Oro Ọnọ Eti Ikọ Ntiense

Colin okodu ke Honiara ama onyụn̄ okụt nte ẹkebọpde Ufọk Mbono Solomon Islands. Ke emi otụkde enye, enye ama ada Mmemmem Ikọmbakara ewet ọnọ ẹsọk ọfis n̄kọk itieutom Watch Tower Society eke n̄kann̄kụk ete: “Kpukpru owo ẹkenyene ekikere kiet ndien owo ndomokiet ikayatke esịt, mmọ n̄ko ẹketie nte ubon kiet.” Ibịghike ke oro ebede, ke enye ama akafiak ọnyọn̄ obio-in̄wan̄ mmọ ke Aruligo, emi odude oyom usụn̄ ke kilomita 40, enye ye ubon esie ẹma ẹbọp Ufọkmbono Obio Ubọn̄ mmọ. Ekem mmọ ẹma ẹnọ etop efen ẹsọk ọfis oro ẹte: “Nnyịn imọbọp Ufọkmbono Obio Ubọn̄ nnyịn ikụre, idem esịnede okpokoro utịn̄ikọ, ntre nte nnyịn imekeme ndinịm mme mbono esop mi?” Ẹma ẹdiomi emi usọp usọp, ndien se ibede owo 60 ẹsidụk kpukpru ini.

Ọnọitem N̄ka Europe ama okụt ufọk oro ke Tuvalu. Enye ama etịn̄ ọnọ owo utom kiet ete: “Mmenịm nte ke kpukpru owo ẹtịn̄ ukem ikọ emi ẹnọ mbufo, edi emi edi ata utịben̄kpọ ọnọ mi!” N̄wan kiet oro anamde utom ke ufọkutom urụk ukopikọ ama obụp anamutom unyịmesịt efen oro okotode-to edi ete: “Nso inam kpukpru mbufo ẹkop inemesịt ntem? Eyo ofiop mi akaha!” Akananam mmọ ikekwe Ido Ukpono Christ anamde utom oro enyenede ufọn ke usụn̄ n̄waidem ntre.

Mme N̄waidem ye Unana Editua N̄kpọfiọk

Bible ọdọhọ ke 2 Corinth 9:6 ete: “Owo eke ọtọde ke ntatubọk, uwak-uwak ke enye oyonyụn̄ ọdọk.” Mbonutom oro, ubon mmọ, ye mme esop mmọ ke ẹka iso nditọ ke ntatubọk ke ndin̄wam mme ekemmọ Ntiense ke Pacific. Ross, ebiowo otode Kincumber, emi ekperede Sydney, ọdọhọ ete: “Esop nnyịn ẹma ẹnọ se ibede mbahade kiet ke itie ita ke otu okụk ukpe ubomofụm mi, ndien eyeneka n̄wan mi eren emi eketienede edi n̄ko, ama adian $500 ọnọ mi.” Anamutom efen ama anyam ubomisọn̄ esie ada ekpe usụn̄. En̄wen n̄ko ama anyam ndusụk isọn̄. Kevin ama oyom $900 efen efen, ntre enye ama ebiere ndinyam ibiom esie 16 emi ẹkedide isua iba. Ebede ke ọdiọn̄ọ kiet, enye ama okụt owo oro ekedepde mme ibiom oro ke nnennen $900!

Ẹma ẹbụp Danny ye Cheryl ẹte: “Ndi emi ama odot ye okụk ukpeusụn̄ ubomofụm ye okụkutom oro akatakde, emi kpukpru ẹkedide n̄kpọ nte $6,000?” Mmọ ẹma ẹbọrọ ẹte: “Ih! Idem ke akpawakde utịm ikaba akan oro, enye ekpenen̄ede odot.” Alan, emi otode Nelson, New Zealand, ama adian do ete: “Okụk oro n̄kadade n̄kpe usụn̄ n̄ka Tuvalu ekpekekem se ndade n̄kpe usụn̄ n̄ka Europe ndien nnyene nyọhọ-nsụhọ okụk. Edi nte n̄kpọkọbọ mme edidiọn̄, m̀mê ndinam ufan ye ediwak owo ẹtode nsio nsio idaha ke uwem, m̀mê ndinam n̄kpọ nnọ owo en̄wen utu ke ndinam nnọ idemmi? Baba! Kpa ye oro, se ededi oro n̄kọnọde nditọete nnyịn ẹtode isuo oro, mmọ ẹma ẹnọ mi se ikakande oro.”

Ukpọhọde edikụt unen efen ke ndutịm oro edi ibetedem otode ubon. Ke adan̄aemi ndusụk iban ẹkemede nditiene mme ebe mmọ ndien ẹkam ẹn̄wamde ke itieutom, mbon eken ẹnyene nditọ oro ẹdude ke isua uka ufọkn̄wed ndise mban̄a m̀mê mme mbubehe ubon ndise mban̄a. Clay ọkọdọhọ ete: “N̄wan mi ndinyịme ndise mban̄a nditọ ye ufọk ke adan̄aemi ami mmendụhe, ekedi n̄waidem oro okokponde akan okịm.” Ke akpanikọ, kpukpru ebendọ oro mîkekemeke ndisan̄a ye iban mmọ ẹyenyịme ke se ẹtịn̄de oro “Edi ntre!”

Tọn̄ọ nte ẹkebọp ufọk oro ẹkụre ke Tuvalu, mme anamutom unyịmesịt ẹmebọp mme Ufọkmbono Obio Ubọn̄, mme Ufọk Mbono, mme ufọkidụn̄ mme isụn̄utom, ye mme ọfis ukabade n̄wed ke Fiji, Tonga, Papua New Guinea, New Caledonia, ye mme itie en̄wen. Ediwak ufọk, esịnede ndusụk oro ẹyomde ndibọp ke Ufọt Ufọt Edem Usụk ye Edem Usiahautịn Asia, ke ẹsụk ẹbebet edibọp. Ndi ẹyenyene mme anamutom oro ẹwakde ẹkem?

Etie nte oro ididịghe mfịna. Ọfis n̄kọk itieutom Hawaii ewet ete: “Kpukpru owo mi oro ẹkebuanade ke ubọpn̄kpọ ofụri ererimbot oro ẹben̄e ẹte ẹti mmimọ ke ini ẹdiomide efen. Ke ndondo oro mmọ ẹnyọn̄de ẹsịm ufọk, mmọ ẹma ẹtọn̄ọ ndifam okụk nnịm nnọ oro.” Didie ke ndutịm oro ekpetre ndikụt unen ke ini ẹdade mme edidiọn̄ Jehovah ẹdian ye n̄waidem ofụri esịt ntre?

 [Mme ndise ke page 9]

Mme n̄kpoduoho ubọpn̄kpọ oro

[Mme ndise ke page 9]

Otu mbonutom ke itie ubọpufọk

[Mme ndise ke page 10]

Nte ubọpn̄kpọ oro ekesịmde utịt, nnyịn ima idat esịt iban̄a se spirit Abasi akanamde