Nte Afo Edi Christian Oro ‘Ọkọride Ọwọrọ Owo’?

“KE INI n̄kedide eyenọwọn̄, ntịn̄ ikọ nte eyenọwọn̄, n̄kere ekikere nte eyenọwọn̄, nnyụn̄ nneni eneni nte eyenọwọn̄.” Ntre ke Apostle Paul ekewet. Ke akpanikọ, kpukpru nnyịn ikedi anana-un̄wam nseknditọ ini kiet ko. Nte ededi, nnyịn ikaha iso idi nseknditọ ke nsinsi. Paul ọkọdọhọ ete: “Mma n̄kabade n̄kpon, mmokụre ye ido uyen.”—1 Corinth 13:11.

Ke ukem usụn̄ oro, kpukpru Christian ẹtọn̄ọ nte nseknditọ eke spirit. Edi nte ini akade, kpukpru ẹkeme ‘ndikabade ndi kiet ke mbuọtidem ye ke ifiọk Eyen Abasi, ẹkọri ẹkponi ẹwọrọ owo, ẹsịm ofụri idaha uyọhọ Christ.’ (Ephesus 4:13) Ke 1 Corinth 14:20, ẹkpak nnyịn ẹte: “Nditọ-ete mi, ẹkûdi nditọwọn̄ ke ekikere . . . ke ekikere ẹtie nte ikpọ owo.”

Mme Christian oro ẹkọride ẹsịm ọyọhọ idaha ndidu edi edidiọn̄ ọnọ ikọt Abasi mfịn, akpan akpan ke ntak oro ata ediwak mbufa owo ẹdude. Mme Christian oro ẹkọride ẹwọrọ owo ẹnam esop ọsọn̄ idem. Mmọ ẹnyene eti odudu ke idaha ekikere esop ekededi emi mmọ ẹbuanade.

Ke adan̄aemi n̄kọri ikpọkidem ekperede nditịbe ye unana ukeme, n̄kọri eke spirit esidi n̄kukụre ebe ke edisịn ini ye ukeme. Idịghe n̄kpọ n̄kpaidem, ko ke edem ke eyo Paul, ndusụk Christian ẹma ẹkpu ‘ndisịn idem mbịne ifiọk eke ọfọnde ama,’ kpa ye oro ẹma ẹkenam n̄kpọ Abasi ke ediwak isua. (Mme Hebrew 5:12; 6:1) Nso kaban̄a fi? Edide afo anam n̄kpọ Abasi ke ediwak  isua m̀mê ke ekpri ibio ini kpọt, odot afo ndidụn̄ọde idemfo ke esịt akpanikọ. (2 Corinth 13:5) Nte afo odu ke otu mbon oro ẹkemede ndinen̄ede n̄kot mme Christian oro ẹkọride ẹsịm ọyọhọ idaha, m̀mê ẹkọride ẹwọrọ owo? Edieke mûdịghe, didie ke afo ekeme ndikabade ndi utọ Christian oro?

‘Ẹtie Nte Ikpọ Owo ke Ekikere’

Owo emi edide nsekeyen ke n̄kan̄ eke spirit edi se ‘ukpepn̄kpọ ẹtode ke nsio-nsio edem ẹbara nte ofụm ẹmende ẹtop ẹduọk’ mmemmem mmemmem, ‘ẹdade ẹdiyo ke n̄kari owo eke ẹfiọkde nditịbi usụn̄ abian̄a.’ Ntem Paul akpak ete: ‘Ẹyak nnyịn ke ima, ikọri ke kpukpru n̄kpọ, ikabade isịm Enye emi edide Ibuot, kpa Christ.’ (Ephesus 4:14, 15) Didie ke owo ekeme ndinam oro? Mme Hebrew 5:14 ọdọhọ ete: “Ọkpọsọn̄ udia enyene mmọ emi ẹma ẹkekon̄ ẹwọrọ idaha, kpa mmọ emi otode ke nnam-mehe mmọ ẹma ẹkọ ifiọk ndidiọn̄ọ se ifọnde ye se idiọkde.”

Tịm fiọk ete ke mbon oro ẹkọride ẹsịm ọyọhọ idaha ẹnọ ukeme ikike mmọ ukpep ebe ke nnam-mehe, m̀mê ifiọk otode edida mme edumbet Bible nsịn ke edinam. Do, nte an̄wan̄ade, owo ikọrike isịm ọyọhọ idaha ke mbuari; esida ini ndikọri n̄kpon ke n̄kan̄ eke spirit. Kpa ye oro, afo emekeme ndinam ekese ndinam n̄kọri eke spirit fo awara ebe ke ọkpọkpọ ukpepn̄kpọ—akpan akpan ndikpep nditụn̄ọ n̄kpọ Ikọ Abasi. Ke ndondo emi Enyọn̄-Ukpeme emeneme ediwak ibuotikọ oro ẹsọn̄de. Mbon oro ẹkọride ẹsịm ọyọhọ idaha isifụmike mme utọ ibuotikọ oro ke ntak oro mmọ ẹdọn̄ọde ‘ndusụk n̄kpọ eke ẹsọn̄de owo nditịm mfiọk.’ (2 Peter 3:16) Utu ke oro, mmọ ẹsinyene ọkpọsọn̄ udọn̄ ndidia utọ ọkpọsọn̄ udia oro!

Mme Enyene-Ifịk Ọkwọrọikọ ye Andikpep

Jesus ama eteme mme mbet esie ete: “Mbufo ẹka ẹkenam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye Edisana Spirit: ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo.” (Matthew 28:19, 20) Ifịk ifịk ebuana ke utom ukwọrọikọ ekeme n̄ko ndinam n̄kọri eke spirit fo awara. Ntak mûdomoke ndinyene ọyọhọ ebuana ke enye nte mme idaha fo ẹyakde?—Matthew 13:23.

Ke ndusụk idaha, mme mfịghe uwem ẹkeme ndinam edi ọkpọsọn̄ n̄kpọ ndinyene ini ndikwọrọ ikọ. Edi, ebede ke afo ‘ndin̄wana eti-eti’ nte ọkwọrọikọ, afo owụt nte afo adade “gospel” ke akpan n̄kpọ. (Luke 13:24; Rome 1:16) Ntem afo emekeme ndidi ‘uwụtn̄kpọ nnọ mmọ emi ẹnịmde ke akpanikọ.’—1 Timothy 4:12.

Mbon Nsọn̄ọnda

Ndikọri nsịm ọyọhọ idaha abuana n̄ko afo ndisịn ukeme ndimụm nsọn̄ọnda n̄kama. Nte ẹwetde ke Psalm 26:1, David ama atan̄a ete: “Kpe ikpe mi, O Jehovah, koro nsan̄ade ke mfọnmma [“nsọn̄ọnda,” NW] mi.” Mfọnmma mi ọwọrọ ndisana ke ido uwem, ndida ekem. Nte ededi, enye iwọrọke owo ndifọn mma. David ke idemesie ama anam ediwak ikpọ idiọkn̄kpọ. Edi koro enye ekenyịmede nsuannọ onyụn̄ enen̄erede usụn̄ esie, enye ama owụt ete ke imọ isụk inyenyene ata ima ke esịt imọ inọ Jehovah Abasi. (Psalm 26:2, 3, 6, 8, 11) Nsọn̄ọnda abuana ofụri, m̀mê ọyọhọ ọyọhọ, utuakibuot ofụri esịt. David ọkọdọhọ eyen esie Solomon ete: “Fiọk Abasi usọ, nyụn̄ nam n̄kpọ esie ke ofụri esịt.”—1 Chronicles 28:9.

Ndimụm nsọn̄ọnda n̄kama abuana nditre ndidi “eke ererimbot,” ndidian̄ade n̄kpọn̄ mme mbre ukara ye mme ekọn̄ eke idụt. (John 17:16) Afo enyene ndision̄o idem n̄kpọn̄ mme mbiara  edinam n̄ko, utọ nte use, efịbe, ye edida ibọk ke idiọk usụn̄. (Galatia 5:19-21) Nte ededi, ndimụm nsọn̄ọnda n̄kama abuana se ikande owo ndifep mme n̄kpọ oro. Solomon ama ọtọt ete: “Okpo nsụn̄ ẹnam aran usọ-aran amak onyụn̄ etebe: kpa ntre esisịt ebiọ abiat owo eke ẹkponode ẹban̄a eti ibuot ye ubọn̄.” (Ecclesiastes 10:1) Ih, idem “esisịt ebiọ,” utọ nte idiọk mbubru m̀mê idiọk mbre ye owo isio uduot, ekeme ndibiat eti enyịn̄ owo eke “ẹkponode ẹban̄a eti ibuot.” (Job 31:1) Ke ntre, wụt nte afo ọkọride esịm ọyọhọ idaha ebe ke ndidomo ndidi uwụtn̄kpọ ke ofụri edu uwem fo, efepde n̄kpọ oro akam “ebietde idiọk.”—1 Thessalonica 5:22, King James Version.

Mme Anam Akpanikọ

Christian oro ọkọride ọwọrọ owo esinam akpanikọ n̄ko. Nte nnyịn ikotde ke Ephesus 4:24, apostle Paul ama akpak mme Christian ete: “Ẹmen obufa owo ẹsịne, emi ẹbotde ebiet Abasi ke edinen ido ye edisana ido akpanikọ.” Ke N̄wed Abasi Usem Greek, akpasarade ikọ oro adade ọnọ “edisana ido akpanikọ” ọnọ ekikere aban̄a edisana, edinen, ukpono. Owo oro anamde akpanikọ esinyene ifịk, enyene ukpono; enye esitịn̄ enyịn anam kpukpru utom Abasi.

Nso idi ndusụk usụn̄ emi afo ekemede ndikọri utọ edu edinam akpanikọ oro? Kiet edi ke ndidiana ye mbiowo esop n̄kann̄kụk mbufo. (Mme Hebrew 13:17) Sia ẹfiọkde ẹte ke Christ edi Ibuot esop Christian oro ẹmekde, mme Christian oro ẹkọride ẹsịm ọyọhọ idaha ẹnam akpanikọ ẹnọ mbon oro ẹmekde ẹte “ẹbọk mbon ufọk Abasi.” (Utom 20:28) Ọkpọdiọk didie ntem ndifan̄a m̀mê ndida odudu mbiowo oro ẹmekde ke usụhọde! Afo ekpenyene ndinam akpanikọ n̄ko nnọ “asan̄autom emi anamde akpanikọ, onyụn̄ enyenede ọniọn̄” ye n̄kpọutom emi ẹdade ndisuan ‘udia eke spirit ke edikem ini.’ (Matthew 24:45) Sọp ndikot nnyụn̄ nda mme ntọt ẹdude ke Enyọn̄-Ukpeme ye mme nsan̄a esie nsịn ke edinam.

Ndiwụt Ima Ebe ke Mme Edinam Fo

Paul ekewet ọnọ ẹsọk mme Christian ke Thessalonica ete: ‘Ima emi kpukpru mbufo ẹmade kiet eken onyụn̄ okpon.’ (2 Thessalonica 1:3) Ndikọri ke ima edi ata akpan ikpehe kiet ke n̄kọri eke spirit. Jesus ọkọdọhọ, nte ẹwetde ke John 13:35, ete: “Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.” Idịghe ikpîkpu ntụk m̀mê nte etiede owo ke idem ke ẹda ẹdiọn̄ọ utọ ima oro. Vine’s Expository Dictionary of Old and New Testament Words ọdọhọ ete: “Ẹkeme ndidiọn̄ọ ima ebe ke mme edinam esie kpọt.” Ih, afo esịn idem ebịne edikọri nsịm ọyọhọ idaha ke afan̄ emi ebe ke ndinanam ima n̄wụt!

Ke uwụtn̄kpọ, ke Rome 15:7, nnyịn ikot ite: “Ẹdara kiet eken.” Usụn̄ kiet ndiwụt ima edi ke ndikọm mme ekemmọ andinịm ke akpanikọ ye mbufa owo ke mme mbono esop—ufiop ufiop! Diọn̄ọ mmọ kiet kiet. Nyene “ọkpọkpọ udọn̄” ke idem mbon efen. (Philippi 2:4, NW) Ndusụk afo emekeme ndikam n̄wụt ntatubọk onyụn̄ ọnọ nsio nsio owo ikot ẹdi ufọk fo. (Utom 16:14, 15) Ndusụk ini unana mfọnmma mbon en̄wen ekeme ndisịn udomo ima oro afo enyenede ke udomo, edi nte afo ekpepde ‘ndime ime ye mmọ ke ima,’ afo owụt nte ke imọ ke ikọri iwọrọ owo.—Ephesus 4:3.

Ndida Inyene Nnyịn Mmenede Edisana Utuakibuot ke Enyọn̄

Ke eset, idịghe kpukpru ikọt Jehovah ẹkenam udeme mmọ ndinọ temple Jehovah un̄wam. Ntem Abasi ama ọdọn̄ mme prọfet, utọ nte Haggai ye Malachi, ndikesịn udọn̄  nnọ ikọt Esie ke afan̄ emi. (Haggai 1:2-6; Malachi 3:10) Mme Christian oro ẹkọride ẹsịm ọyọhọ idaha mfịn ẹda inyene mmọ ẹn̄wam utuakibuot Jehovah ke idatesịt. Kpebe utọ mbon oro ebe ke nditiene edumbet oro odude ke 1 Corinth 16:1, 2, ‘ndisio n̄kpọ nnịm n̄kan̄ kiet’ kpukpru ini nditịp nsịn ke esop ye ke utom ofụri ererimbot eke Mme Ntiense Jehovah. Ikọ Abasi ọn̄wọn̄ọ ete: “Owo eke ọtọde ke ntatubọk, uwak-uwak ke enye oyonyụn̄ ọdọk.”—2 Corinth 9:6.

Kûse inyene fo eken ke usụhọde, utọ nte ini ye odudu fo. Domo ‘ndidedep ifet’ nto mme edinam oro mînen̄ekede idi akpan n̄kpọ. (Ephesus 5:15, 16; Philippi 1:10) Kpep ndida ini fo nnam n̄kpọ nte ọfọnde. Ndinam ntre ekeme ndinam edi mmemmem n̄kpọ afo nditiene mbuana ke utom edidiọn̄ Ufọkmbono Obio Ubọn̄ ye mme ukem utom oro emi ẹmenerede utuakibuot Jehovah ke enyọn̄. Ndida inyene fo nnam n̄kpọ ke utọ usụn̄ emi ọyọnọ uyarade efen efen nte ke afo ke akabade edi Christian oro ọkọride ọwọrọ owo.

Sịn Idem Bịne Ifiọk Eke Ọfọnde Ama!

Iren ye iban emi ẹsịnde idem ẹkpep n̄kpọ ẹnyụn̄ ẹnyenede ifiọk, emi ẹdide mme enyene-ifịk ọkwọrọikọ, emi ẹsọn̄ọde ẹda, emi ẹnamde akpanikọ ẹnyụn̄ ẹnyenede ima, emi ẹnyụn̄ ẹnyịmede ndida odudu ye inyene mmọ n̄n̄wam utom Obio Ubọn̄ ẹnen̄ede ẹdi akwa edidiọn̄. Do, eyịghe idụhe apostle Paul akakpakde ete: “Ẹyak nnyịn ikpọn̄ ndien nditịn̄ mban̄a akpa editọn̄ọ ukpep-n̄kpọ Christ, isịn idem ibịne ifiọk eke ọfọnde ama”!—Mme Hebrew 6:1.

Nte afo edi Christian oro ọkọride ọwọrọ owo, ọkọride esịm ọyọhọ idaha? Mîdịghe nte afo, ke ndusụk usụn̄, osụk edi nsekeyen eke spirit? (Mme Hebrew 5:13) Ke idaha ekededi, biere ndisịn idem ke ọkpọkpọ ukpepn̄kpọ, ukwọrọikọ, ye ke ndinyene ima nnọ nditọete fo. Dara item ekededi oro mbon oro ẹkọride ẹsịm ọyọhọ idaha ẹnọde fi. (Mme N̄ke 8:33) Biom ọyọhọ mbiomo Christian fo. Ye ini ye ukeme, afo n̄ko emekeme ‘ndikabade ndi kiet ke mbuọtidem ye ke ifiọk Eyen Abasi, ọkọri okpon ọwọrọ owo, esịm ofụri idaha uyọhọ Christ.’—Ephesus 4:13.

[Se Ẹwetde ke Ikpọ Abisi ke page 27]

Mme Christian oro ẹkọride ẹwọrọ owo ẹnam esop ọsọn̄ idem. Mmọ ẹnyene eti odudu ke idaha ekikere esop

[Mme ndise ke page 29]

Mbon oro ẹkọride ẹsịm ọyọhọ idaha ẹtịp ẹsịn ke edu esop ebe ke ndinyene udọn̄ ke idem mbon en̄wen