Nte Afo Emeti?

Nte afo ama adara ndikot mme nsiondi Enyọn̄-Ukpeme eke ndondo emi? Ọfọn, se m̀mê afo emekeme ndibọrọ mme mbụme ẹtienede mi:

• Ntak emi nnyịn ikemede nditịm nnịm nte ke edisu ntịn̄nnịm ikọ aban̄ade “mbufa enyọn̄ ye obufa isọn̄” ke Isaiah 65:17-19 ama abuana se ikande mme Jew ndiwọn̄ọ ke ntan̄mfep?

Koro apostle Peter ye John, ke ẹwetde n̄wed ke akpa isua ikie E.N., ẹma ẹnyan ubọk ẹwụt edisu eke ini iso, emi esịnede mme edidiọn̄ oro ẹnyenede ndidi. (2 Peter 3:13; Ediyarade 21:1-4)—4/15, page 10-12.

• Nso ikeme ndidi ntak mme n̄ke Greece eset ẹban̄ade n̄kpri abasi afai?

Mmọ emi ẹkeme ndidi nneminua ye ediyụrọde akpanikọ oro nte ke mbemiso Ukwọ ndusụk angel ẹma ẹmen idem eke owo ẹsịne ẹnyụn̄ ẹdu afai afai, oburobụt uwem ke isọn̄. (Genesis 6:1, 2)—4/15, page 27.

• Nso idi ndusụk n̄kpọndịk emi mme Christian oro ẹkọride ẹsịm ọyọhọ idaha ẹdikpemede ẹbiọn̄ọ ke mme udianndọ?

Edi akpan n̄kpọ ndifep uyom uyom usọrọ, emi ekemede nditọn̄ọ edieke n̄kpọsọn̄ mmịn ẹdude barasuene ye edieke idat idat unek ye uyom uyom ikwọ ẹdude. Ibọhọke ẹdọhọ ke kpukpru owo ẹkeme ndidụk usọrọ ndọ, mbon oro owo mînọhọ ikot ikpenyeneke ndidụk. Ebendọ ekpenyene ndikụt ke mme Christian oro ẹkamade utom ẹdu tutu usọrọ oro etre ke eti ini.—5/1, page 19-22.

• Se ẹtịn̄de ke Psalm 128:3 nte ke nditọ “ẹyebiet nditọ olive” ẹkan okpokoro owo ẹkụk ọnọ ekikere aban̄a nso?

Mbufa n̄kọk ẹsika iso ndisiaha ke ekpat eto olive. Ke ini akpan etak akani eto oro mîn̄wụmke ekese mfri aba, mbufa n̄kọk ẹkeme ndikabade ndi n̄kpri ekpat eto ẹkanade enye ẹkụk. Ukem ntre, mme ete ye eka ẹkeme ndikop idatesịt ndinyene nditọ oro ẹn̄wụmde mfri ẹdianade ye mmọ ẹnam n̄kpọ Jehovah.—5/15, page 27.

• Nso idi ndusụk ufọn oro nditọ ẹsinyenede ẹto ubon nditie inem inem?

Enye esịn itiat idakisọn̄ ọnọ ediwụt ukpono nnọ odudu, ediwụt esịtekọm nnọ ndinen edu, ye inem inem itie ebuana ye mbon efen. Utọ uwem ufọk oro ekeme n̄ko ndin̄wam mmọ ndikọri itie ufan ye Abasi.—6/1, page 18.

• Nso ke ẹkenam ke idụt Edem Usiahautịn kiet ndisịn udọn̄ nnọ ekikere oro nte ke kpukpru Christian ẹdi nditọete?

Ẹma ẹsịn udọn̄ ẹnọ kpukpru esop ẹte ẹtre ndikot ndusụk owo ikpọ udorienyịn̄. Utu ke oro, ẹkpenyene ndikot kpukpru owo nditọete.—6/15, page 21, 22.

• Nte Mme Ntiense Jehovah ẹsibọ mme ibọkusọbọ oro ẹdade iyịp ẹnam?

Nnyịn imenịm ite ke ewụhọ Bible ‘ndibet iyịp’ akpan edikịm ofụri iyịp m̀mê mme akpan ikpehe esie (mmọn̄ iyịp, ndatndat nsen iyịp, mfia nsen iyịp, ye mme nsen ẹnamde iyịp oboho) nsịn ke idem. (Utom 15:28, 29) Amaedi n̄kpri ubak oro ẹdade ẹto mme akpan ikpehe oro, Christian kiet kiet ebiere oro ke idemesie, enyenede se Bible etịn̄de ye itie ebuana esie ye Abasi ke ekikere.—6/15, page 29-31.

• Ndi enen̄ede edi mmemmem n̄kpọ ndinyene emem esịtidem mfịn?

Ih. Ebede ke Bible, Jesus Christ ke ada mme owo owụt usụn̄ edisana utuakibuot ye emem oro ẹtịn̄de ẹban̄a ke Isaiah 32:18. N̄ko-n̄ko, mbon oro ẹnyenede utọ emem oro ẹnyene idotenyịn ndinyene nsinsi emem ke isọn̄ ke edisu Psalm 37:11, 29.—7/1, page 7.

• Nso udeme ke George Young ekenyene ke mbụk ukara Abasi eyomfịn?

Ọtọn̄ọde ke 1917, enye ama owụt idem nte andinọ un̄wana eti mbụk Obio Ubọn̄ ke ediwak idụt. Utom ukwọrọikọ esie ama ada enye akanade ofụri Canada, esịm mme isuo Caribbean, esịm Brazil ye mme idụt eken ke Edem Usụk America, esịm Ufọt Ufọt America, esịm Spain, esịm Portugal, esịm se ẹkediọn̄ọde ini oro nte Soviet Union, onyụn̄ esịm United States.—7/1, page 22-27.

• Nso ke 1 Corinth 15:29 ọwọrọ ke ini etịn̄de aban̄a nte ndusụk owo “ẹnade baptism ẹban̄a mme akpa-n̄kpa”?

Se ọwọrọde edi nte ke ini ẹyetde mme Christian aran ke edisana spirit, mmọ ẹdụk usụn̄ uwem oro adade esịm n̄kpa ye ediset ke n̄kpa mmọ n̄ka uwem eke heaven ke oro ebede.—7/15, page 17.

• Nso ke apostle Paul akanam ke mme isua oro owo mîtịn̄ke n̄kpọ iban̄a enye?

Ekeme ndidi enye ama an̄wam ke nditọn̄ọ m̀mê ndisọn̄ọ mme esop idem ke Syria ye Cilicia. Ekeme ndidi ediwak ke otu nsọn̄ọn̄kpọ oro ẹsiakde ke 2 Corinth 11:23-27 ẹketịbe ke ini emi, owụtde nte ke enye ke akanam utom ukwọrọikọ ifịk ifịk.—7/15, page 26, 27.

• Nso ikeme ndin̄wam nnyịn ndiwụt eti ibuot ke se idoride enyịn?

Ti ete ke Jehovah enyene eti ibuot. Ndibọn̄ akam nnọ enye ekeme ndin̄wam nnyịn ida ukem ukem ke ekikere, ndien emi owụt nsụkidem. Un̄wam efen edi ndiyom obufa ekikere ebe ke ndinyene nneme ye ufan oro ọkọride esịm ọyọhọ idaha.—8/1, page 29, 30.